Trouv Lazwa Pour Donnen!
Trouv Lazwa Pour Donnen!
“I annan plis lazwa pour donnen ki pour resevwar.”—AKT 20:35.
1. Ki mannyer Zeova i demontre lazwa pour donnen?
LAZWA ek byenfe ki nou gannyen apre ki nou’n konn laverite i en kado presye sorti kot Bondye. Bann ki’n arive konn Zeova i annan bokou rezon pour rezwir. Me menm si ler nou ganny en kado i annan lazwa, i osi annan lazwa kan nou donn enn. Zeova i sa Enn ki donn “tou don ekselan, tou kado parfe” e i en “Bondye ere.” (Zak 1:17; 1 Timote 1:11, NW ) I ansenny bann keksoz itil avek tou bann ki ekoute e i kontan kan bann ki i’n ansennyen i obeir, zis parey bann paran i kontan kan zot zanfan i obeir en bon lenstriksyon.—Proverb 27:11.
2. (a) Ki Zezi ti dir lo donnen? (b) Ki lazwa ki nou gannyen kan nou ansenny lezot laverite Biblik?
2 Demenm, kan Zezi ti lo later i ti kontan pour vwar bann dimoun reazir pozitivman avek son lansennyman. Zapot Pol ti sit sa ki Zezi ti dir: “I annan plis lazwa pour donnen ki pour resevwar.” (Akt 20:35) Lazwa ki nou gannyen kan nou ansenny lezot laverite Biblik i pa zis sa satisfaksyon ki nou resanti kan en dimoun i tonm dakor avek nou bann krwayans relizye. Nou annan en lazwa ki enplik bokou plis ki sa, se lazwa pour konnen ki nou pe donn en keksoz ki annan en vre valer e en valer ki dirab. Kan nou donn en keksoz ki annan valer spirityelman, nou kapab ed bann dimoun pour benefisye la konmela e menm pour leternite.—1 Timote 4:8.
Donnen i anmenn Lazwa
3. (a) Ki mannyer zapot Pol ek zapot Zan ti eksprim zot lazwa ki zot ti gannyen kan zot ti ed lezot spirityelman? (b) Akoz i en lekspresyon lanmour kan nou donn nou zanfan laverite Biblik?
3 Anfet, zis parey Zeova ek Zezi i kontan donn bann kado spirityel, bann Kretyen osi i kontan fer li. Zapot Pol ti kontan ki i’n ed lezot konn laverite dan Parol Bondye. I ti ekrir kongregasyon an Tesalonik: “Annefe, kwa ki nou lesperans, nou lazwa e nou kouronn lafyerte devan nou Senyer Zezi kan i retournen? Se pa zot? Wi, se zot nou laglwar ek nou lazwa.” (1 Tesalonisyen 2:19, 20) Pareyman, zapot Zan ki ti pe refer avek son bann zanfan spirityel, ti ekrir: “Napa en pli gran lazwa pour mwan ki ler mon tande ki mon bann zanfan i swiv laverite.” (3 Zan 4) Mazin osi lazwa ki nou eksperyanse ler nou ed nou prop zanfan pour vin nou zanfan spirityel! I en lekspresyon lanmour delapar bann paran kan zot elve zot zanfan dan “ledikasyon ek lenstriksyon Senyer.” (Efezyen 6:4) Dan sa fason, bann paran i montre ki zot enterese avek byennet eternel zot zanfan. Kan zanfan i reazir favorableman, paran i eksperyans en gran lazwa ek satisfaksyon.
4. Ki leksperyans ki demontre lazwa pour donnen spirityelman?
4 Dell, i en pionye aplentan e i annan senk zanfan. I dir: “Mon konpran tre byen santiman ki ti fer zapot Zan dir sa parol akoz mon byen kontan ki kat mon zanfan ‘pe swiv laverite.’ Mon konnen ki i anmenn loner ek laglwar pour Zeova kan bann fanmiy i ini ansanm dan vre ladorasyon, alor mon santi en satisfaksyon profon kan mon vwar ki i’n beni mon zefor pour enkilke laverite dan mon zanfan. Sa posibilite atiran pour viv pour touzour dan Paradi avek mon fanmiy i donn mwan bokou lespwar e i motiv mwan pour andire malgre bann difikilte ek lobstak.” Malerezman, enn son fiy ti ganny ekskli dan kongregasyon akoz i ti pe anmenn en lavi ki pa ti an akor avek lavi en Kretyen. Kantmenm sa, Dell ti travay dir pour gard en latitid pozitif. “Mon swete ki en zour mon fiy i a retourn ver Zeova avek limilite ek senserite,” i dir. “Me mon remersye Bondye ki laplipar mon zanfan pe kontinyen servi li fidelman. Sa lazwa ki mon resanti i’n vreman donn mwan lafors.”—Neemya 8:10.
Fer bann Zanmi ki pou la pour touzour
5. Anmezir ki nou depans nou lenerzi dan sa travay pour fer disip, kwa ki nou konnen ki donn nou satisfaksyon?
5 Zezi ti demann son bann disip pour fer lezot vin disip Kretyen e pour ansenny zot konsernan Zeova e sa ki i ekspekte zot fer. (Matye 28:19, 20) Tou le de, Zeova ek Zezi, in zenerezman ed bann dimoun pour aprann semen laverite. Alors kan nou depans nou lenerzi dan sa travay pour fer disip, nou santi en satisfaksyon akoz nou konnen ki nou pe imit legzanp Zeova ek Zezi, zis parey bann premye Kretyen ti fer. (1 Korentyen 11:1) Kan nou korpere dan sa fason avek Bondye Tou Pwisan ek son Garson byenneme, nou lavi i ganny en vre sans. Konman i en benediksyon pour ganny konte parmi bann ki “pe travay ansanm pour Bondye”! (1 Korentyen 3:9) Pa i en plezir pour konnen ki menm bann lanz pe partisip dan sa aktivite pour pres sa bon nouvel?—Revelasyon 14:6, 7.
6. Anmezir ki nou kontribye pour donn lezot en keksoz ki annan valer spirityel, lekel ki vin nou zanmi?
6 Anfet, kan nou partisip dan sa travay pour donn lezot en keksoz ki annan valer spirityel, nou kapab vin plis ki en konpanyon travay avek Bondye—nou kapab ganny en lanmitye dirab avek li. Abraam ti ganny apele zanmi Zeova akoz son lafwa. (Zak 2:23) Anmezir ki nou esey nou mye pour fer lavolonte Bondye, nou osi nou kapab vin son zanmi. Si nou fer sa, nou osi vin zanmi Zezi. I ti dir avek son bann disip: “Mon apel zot zanmi, akoz mon’n dir zot tou sa ki mon Papa in dir mwan.” (Zan 15:15) Bokou dimoun i kontan pour ganny konsidere konman zanmi bann dimoun enportan oubyen bann o zofisye, me nou nou kapab ganny konsidere konman zanmi sa de pli gran personnaz dan liniver!
7. (a) Konman ki en madanm ti ganny en vre zanmi? (b) Eski ou menm ou’n fer sa leksperyans?
7 Deplis, kan nou ed bann dimoun pour konn Bondye, zot osi zot vin nou zanmi, zot donn nou en lazwa eksepsyonnel. Joan, ki reste Letazini, ti konmans etidye Labib avek en madanm ki apel Thelma. Kantmenm fanmiy Thelma ti opoz son letid, i ti persevere e i ti batize enn an plitar. Joan ti ekrir: “Nou frekantasyon pa ti fini la; okontrer i ti devlop dan en lanmitye ki’n dir pour 35 an ziska prezan. Souvan nou’n al ansanm dan predikasyon ek bann lasanble. Finalman, mon ti al reste dan en nouvo lakaz ki ti en distans 800 km avek kot mon ti ete avan. Me Thelma i kontinyen ekrir mwan bann let pli tousan e ranpli avek santiman. I dir mwan ki i mazin mwan tandreman e ki i remersye mwan pour vin son zanmi e son legzanp e pour ansenny li laverite dan Labib. En tre bon zanmi ki sitan pros i en rekonpans merveye pour zefor ki mon’n fer pour ed li pour aprann lo Zeova.”
8. Ki latitid pozitif ki pou kapab ed nou dan predikasyon?
8 Sa panse pour trouv en dimoun ki anvi konn laverite i kapab ed nou pour andire menm si bokou dimoun ki nou zwenn i montre pti gin lentere oubyen pa montre okenn lentere dan Parol Bondye. En tel lendiferans i kapab vin en defi pour nou lafwa ek landirans. Pourtan, en latitid pozitif i kapab ed nou. Fausto, ki sorti Gwatemala, ti dir: “Kan mon temwanny avek lezot, mon mazinen konman i ti a gou si sa dimoun ki mon pe koz avek ti a vin en frer oubyen en ser spirityel. Mon rezonn dan mwan menm ki omwen en dimoun ki mon zwenn i a finalman aksepte laverite dan Parol Bondye. Sa panse i ed mwan pour kontinyen e i donn mwan en vre lazwa.”
Akimil Larises dan Lesyel
9. Ki Zezi ti dir lo larises dan lesyel, e ki nou kapab aprann par sa?
9 I pa touzour fasil pour fer lezot vin disip, ki swa i nou zanfan oubyen lezot endividi. I demann letan, pasyans, ek perseverans. Toudmenm, mazinen ki bokou dimoun i pare pour travay dir pour akimil en kantite keksoz materyel, bann keksoz ki normalman pa fer zot ere e ki pa dir pour touzour. Zezi ti dir avek bann ki ti ekout li ki i pli bon pour travay pour bann keksoz ki annan valer spirityel. I ti dir: “Pa akimil zot larises lo later, kot i a ganny detri par lever ek larouy, kot voler a kas laport e vole. Plito akimil zot larises dan lesyel, kot i pa pou ganny detri ni par lever, ni par larouy, kot voler pa pou kapab kas laport e vole.” (Matye 6:19, 20) Par pourswiv bann lobzektif spirityel—ki enkli partisip dan sa travay enportan pour fer disip—nou kapab ganny sa satisfaksyon akoz nou konnen ki nou pe fer lavolonte Bondye e ki i pou rekonpans nou. Zapot Pol ti ekrir: “Bondye pa enzis pour oubliy travay ki zot in fer, ni lanmour ki zot in montre pour li.”—Ebre 6:10.
10. (a) Akoz Zezi ti annan larises spirityel? (b) Dan ki fason Zezi ti donn son lekor pour lezot, e ki benefis sa in anmennen pour zot?
10 An armoni avek sa ki Zezi ti dir, si nou pe travay dir pour fer disip, nou pe ‘akimil nou larises dan lesyel.’ Sa i donn nou lazwa pour resevwar. Si nou donnen san mazin nou prop lentere, alafen se nou menm ki ganny anrisir. Zezi li menm in servi Zeova pour plizyer bilyon lannen. Mazin sa larises ki i’n akimile dan lesyel! Pourtan, Zezi pa ti rod son prop lentere. Zapot Pol ti ekrir: ‘Kris in donn son prop lekor pour sov nou dan nou pese, pour delivre nou dan sa monn aktyel e move, selon lavolonte Bondye, nou Papa.’ (Galat 1:4) Zezi pa ti zis depans son lenerzi dan predikasyon me i ti osi donn son prop lavi konman en ranson afen ki lezot i ganny sa loportinite pour akimil larises dan lesyel.
11. Akoz bann kado ki annan valer spirityel i pli meyer ki bann kado ki annan valer materyel?
11 Kan nou pe ed bann dimoun pour konn Bondye, nou pe ed zot pour vwar konman ki zot osi zot kapab akimil larises spirityel ki pou dir pour touzour. Ki pli bon kado ki ou ti a kapab donnen? Si ou donn ou zanmi en mont ser, en loto, oubyen menm en lakaz, i probab ki sa zanmi pou kontan e byen apresye, e ou ou pou eksperyans sa lazwa pour donnen. Me dan ki kondisyon sa kado pou ete dan 20 an? Dan 200 an? Dan 2,000 an? Parkont, si ou konsakre ou letan pour ed en dimoun pour servi Zeova, i kapab benefisye avek sa kado pour touzour.
Rod bann ki anvi Laverite
12. Konman ki bokou in donn zot letan pour ed lezot spirityelman?
12 Pep Zeova in al ziska lo bout later pour eksperyans sa lazwa pour donnen spirityelman. Detrwa milye zot in kit zot lakour ek fanmiy pour servi konman misyonner dan bann pei kot zot in bezwen adapte avek bann nouvo langaz ek kiltir. Lezot in al dan bann landrwa dan zot prop pei kot i annan en pli gran bezwen pour proklanmater Rwayonm. I annan lezot ankor ki’n aprann en langaz etranze, ki’n fer li posib pour zot pres dan zot prop landrwa me avek bann dimoun ki’n imigre dan sa landrwa. Par egzanp, apre ki en koup an New Jersey, Letazini, ti’n elve zot de zanfan ki pe aktyelman servi dan biro prensipal Temwen Zeova, zot ti konmans fer servis pionye e zot ti aprann langaz Sinwan. Pandan en peryod 3 an, zot ti kondwir letid Labib avek 74 dimoun ki koz langaz Sinwan, ki ti pe etidye dan en kolez pros avek zot. Eski ou kapab elarzi ou minister dan en serten fason afen ki ou a trouv plis lazwa dan sa travay pour fer disip?
13. Ki ou kapab fer si ou ti a kontan ganny en pli bon rezilta dan ou predikasyon?
13 Petet ou annan sa lanvi pour kondwir en letid Labib me ou pa ankor arive fer li. Dan serten pei i difisil pour trouv bann ki enterese. Petet bann dimoun ki ou zwenn pa montre okenn lentere dan Labib. Si sa i leka, ou kapab mansyonn ou dezir pli souvan dan lapriyer, vi ki ou konnen ki Zeova ek Zezi Kri i vreman enterese avek sa travay e zot kapab gid ou ver en dimoun ki resanble mouton. Rod sizesyon avek bann dimoun dan ou kongregasyon ki pli eksperyanse e ki zot predikasyon i raport bon rezilta. Profit sa formasyon ek bann sizesyon ki ganny donnen dan renyon Kretyen. Servi davantaz konsey ki sirveyan rezyonal ek son madanm i donn ou. Pli enportan ki tou, pa zanmen abandonnen. En zonm saz ti ekrir: “Dan bomaten senm ou legren e ziska aswar pa les ou lanmen repoze; akoz ou pa konnen kote sa pou reisi.” (Eklezyast 11:6) An atandan, mazin bann zonm fidel parey Noe ek Zeremi. Kantmenm ti annan zis en pti gin dimoun ki ti reazir favorableman avek predikasyon, enpe ti ekoute, e zot predikasyon ti en sikse. Pli enportan ki tou, i ti fer plezir Zeova.
Fer tou sa ki ou kapab
14. Ki mannyer Zeova i konsider bann ki en pe pli aze dan son servis?
14 I kapab arive ki ou sitiasyon pa permet ou pour fer otan sa ki ou ti a anvi fer dan predikasyon. Par egzanp, lavyeyes i kapab limit sa ki ou kapab fer dan servis Zeova. Toudmenm, mazin sa ki sa zonm saz ti ekrir: “Seve blan i en kouronn labote kan i ganny trouve dan semen ladrwatir.” (Proverb 16:31) Pour Zeova, en lavi ki’n ganny dedye dan son servis i vreman fer li plezir. Deplis, Labib i dir: “Ziska [ou] lavyeyes mon [Zeova] sanmenm sa Enn; e ziska [ou] seve blan mon pou kontinyen soutenir. Mon pou azir, pour ki mwan mon anmennen e pour ki mwan mon soutenir e fer sove.” (Izai 46:4) Nou Papa lanmour ki dan lesyel i promet pour soutenir e siport son bann fidel.
15. Eski ou krwar ki Zeova i konpran ou sitiasyon? Akoz?
15 Petet ou bezwen andire avek en maladi, lopozisyon ki ou gannyen avek ou konzwen ki pa Temwen, bann gran responsabilite familyal, oubyen lezot problenm difisil. Zeova i konpran nou limitasyon ek nou sitiasyon, e i kontan nou akoz nou zefor senser ki nou fer pour servi li. Sa i leka menm si sa ki nou fer i kapab mwens ki sa ki lezot i fer. (Galat 6:4) Zeova i konnen ki nou enparfe, e i realistik dan sa ki i ekspekte avek nou. (Psonm 147:11) Si nou fer nou mye, nou kapab asire ki nou presye dan lizye Bondye e ki i pa pou oubliy sa ki nou’n fer avek lafwa.—Lik 21:1-4.
16. Dan ki fason en kongregasyon antye i kontribye pour fer en disip?
16 Mazinen osi ki sa travay pour fer disip i en travay lekip. Napa personn ki fer en disip li tousel, zis parey napa okenn gren lapli ki nouri en plant lo li menm. I vre ki en Temwen i kapab zwenn en dimoun ki enterese e kondwir en letid Labib. Me dek ki sa nouvo i vin dan Lasal Rwayonm, kongregasyon antye i ede pour familyariz li avek laverite. Sa lantouzyasm ki egziste parmi sa lasosyasyon frer i montre lenfliyans lespri sen. (1 Korentyen 14:24, 25) Bann zanfan ek bann adolesan i donn bann komanter ankourazan, ki montre sa nouvo ki nou bann zenn i diferan avek bann zenn dan lemonn. Bann ki malad, bann ki en pe fay fay, ek bann ki pli aze i ansenny bann nouvo kisisa lendirans. Malgre nou laz ek limitasyon, nou tou nou zwe en rol enportan pour ed bann nouvo ofiramezir ki zot lanmour pour laverite Biblik i vin pli profon e zot progrese ver batenm. Sak letan ki nou depanse dan predikasyon, sak retourn vizit, sak konversasyon avek en dimoun enterese kot Lasal Rwayonm, i kapab paret napa okenn lenportans lo li menm, me i form parti en travay remarkab ki Zeova pe akonpli.
17, 18. (a) Apard ki angaz dan sa travay pour fer disip, konman nou kapab eksperyans lazwa pour donnen? (b) Lekel ki nou pe imite kan nou eksperyans lazwa pour donnen?
17 Byensir, apard ki partisip dan sa travay pour fer disip, konman Kretyen nou osi eksperyans lazwa pour donnen dan lezot fason. Nou kapab met dekote en serten larzan pour soutenir ladorasyon pir e pour ed bann ki dan bezwen. (Lik 16:9; 1 Korentyen 16:1, 2) Nou rod bann loportinite pour demontre lospitalite anver lezot. (Romen 12:13) Nou kapab fer tou nou posib pour “fer dibyen tou dimoun, sirtou nou bann frer dan lafwa.” (Galat 6:10) E dan bann pti fason, me ki pourtan enportan, nou kapab donn lezot—en let, en kou-d-telefonn, en kado, en kou-d-men, e en mo lankourazman.
18 Par donnen, nou montre ki nou pe imit nou Papa seles. Nou osi demontre nou lanmour fraternel, en mark ki idantifye vre Kretyen. (Zan 13:35) Si nou mazin sa bann keksoz, i kapab ed nou pour eksperyans sa lazwa pour donnen.
Eski ou kapab eksplike?
• Ki mannyer Zeova ek Zezi in montre legzanp pour donnen spirityelman?
• Ki mannyer nou ti a kapab fer bann zanmi ki pou la pour touzour?
• Ki bann pa ki nou kapab fer pour nou pli reisi dan nou minister?
• Konman ki nou tou dan kongregasyon nou kapab eksperyans lazwa pour donnen?
[Kestyon]
[Portre lo paz 27]
Kan zanfan i reazir favorableman avek lenstriksyon, paran i eksperyans en gran lazwa ek satisfaksyon
[Portre lo paz 29]
Kan nou fer disip, nou kapab ganny bann vre zanmi
[Portre lo paz 30]
Zeova i soutenir bann ki aze
[Portre lo paz 31]
Nou kapab resanti lazwa pour donnen dan bann pti fason me ki pourtan enportan