Les Dimoun War Ou Progre
Les Dimoun War Ou Progre
“Pran byen a-ker sa responsabilite e met tou ou zefor ladan, pour ki tou dimoun i a war ou progre.”—1 TIMOTE 4:15
1. Ki mannyer ou konnen kan en fri in mir e bon pour manze?
MAZIN ou fri prefere—en mang, en ponm, en bannann, e lezot ankor. Eski ou kapab konnen kan i’n mir e bon pour manze? Definitivman. Ou santi son loder, ou get son kouler e ou tat li—tousala i fer delo vini dan ou labous. Dek ki ou mord en bout, ou montre ki ou pe vreman apresye li. Pa i bon! Pa i dou! I fer ou vreman kontan.
2. Ki mannyer matirite i ganny demontre e ki lefe sa i annan lo relasyon personnel avek lezot?
2 Nou kapab konpar sa pti leksperyans agreab avek lezot laspe dan lavi. Par egzanp, zis parey nou fasilman war kan en fri in mir, nou osi kapab war dan plizyer laspe si en dimoun i mir spirityelman. Nou rekonnet si en dimoun i mir oubyen matir kan nou war li pe demontre disernman, bon konprenezon, lasazes, ensidswit. (Zob 32:7-9) I vreman gou pour asosye e travay avek bann dimoun ki demontre sa bann kalite dan zot latitid ek aksyon.—Proverb 13:20.
3. Ki sa deskripsyon ki Zezi ti fer lo bann dimoun dan son letan i revele konsernan matirite?
3 Lo lot kote, en dimoun i kapab adilt lo plan fizik, me lafason ki i koze e konport li i kapab fer ou war ki i pa matir emosyonnelman e spirityelman. Par egzanp, kan Zezi Kri ti pe koz lo sa zenerasyon difisil pandan son letan, i ti dir: “Zan ti vini, i pa ti zennen, e i pa ti bwar diven, e zot dir, ‘I posede par en demon!’ Fis-de-Lonm in vini, i manze e i bwar, e zot dir, ‘Get sa, i en gourman e en soular.’ ” Menm si sa bann dimoun ti matir fizikman, Zezi ti dir ki zot ti azir parey “bann zanfan”—zot ti mank matirite. Alor, i ti azoute: “Me lasazes Bondye i Matye 11:16-19.
ganny rekonnet par son bann aksyon.”—4. Dan ki fason progre ek matirite i aparan?
4 Par sa ki Zezi ti dir, nou kapab war si en dimoun i annan lasazes—en siny ki endik matirite—par son bann aksyon e rezilta ki i gannyen. Get byen konsey ki zapot Pol ti donn Timote dan sa menm laliny. Apre ki i ti’n spesifye bann keksoz ki Timote i devret pourswiv, Pol ti dir: “Pran byen a-ker sa responsabilite e met tou ou zefor ladan, pour ki tou dimoun i a war ou progre.” (1 Timote 4:15) Wi, lezot i “war,” oubyen i aparan pour zot, progre ki en Kretyen i fer ver matirite. Parey en lalimyer ki pe klere, matirite Kretyen i pa en kalite enteryer ki nou pa kapab war. (Matye 5:14-16) Nou pou alor egzamin de fason prensipal kot progre ek matirite i aparan: (1) kan en dimoun i grandi dan konnesans, konprenezon, ek lasazes; (2) kan i demontre bann fri lespri.
Linite dan Lafwa e dan Konnesans
5. Ki mannyer nou kapab dekrir matirite?
5 Laplipar diksyonner i dekrir matirite konman en leta ki’n konn en devlopman konplet, i’n fini devlope e in ariv sa dernyen leta oubyen sa standar ki i ti swete arive. Parey nou’n mansyonnen pli boner, en fri i matir oubyen mir kan i’n konplet son devlopman natirel e son laparans, son kouler, son loder ek son gou in ariv sa leta ki nou ti swete. Alor matirite i sinonim avek ekselans, leta konplet, e menm perfeksyon.—Izai 18:5; Matye 5:45-48; Zak 1:4.
6, 7. (a) Kwa ki montre ki Zeova i vreman enterese pour war tou son adorater progres ver matirite spirityel? (b) Avek ki matirite spirityel i relye etrwatman?
6 Zeova i vreman enterese pour war tou son adorater progres ziska matirite spirityel. Pour zot arive fer sa, i’n donn bann provizyon merveye dan kongregasyon Kretyen. Zapot Pol ti ekrir bann Kretyen an Efez: “Se limenm li ki’n etabli serten konman zapot, serten konman profet, serten konman levanzelis, serten konman paster, ou serten konman ansenyan, pour prepar bann sen pour akonpli travay konstriksyon lekor Kris. Alor par sa fason nou a kapab ansanm ariv dan linite nou lafwa ek dan konnesans Garson Bondye; nou a vin bann adilt e nou a konn en developman konplet parey Kris. Alor nou pou nepli parey bann zanfan ki ganny trennen par laroul, e pouse partou par nenport divan lansennyman ki dimoun tronper i fannen, bann ki antrenn dimoun dan lerer par tou sort riz ki zot envante.”—Efezyen 4:11-14.
7 Dan sa bann verse, Pol ti eksplike ki parmi bann rezon akoz Bondye in fourni bokou provizyon spirityel dan kongregasyon i ki tou i ‘ariv ansanm dan linite lafwa e dan konnesans,’ vin “bann adilt,” e “konn en devlopman konplet parey Kris.” Se selman apre sa ki nou pou evite ganny pouse parey en pti baba spirityel par bann fo lide ek lansennyman. Alor nou kapab war en relasyon etrwat ant progrese pour vin en Kretyen matir ek “ariv dan linite nou lafwa ek dan konnesans Garson Bondye.” Konsey
Pol i kontyen serten pwen ki ti a byen nou pran aker.8. Kwa ki neseser pour ariv dan “linite” nou lafwa ek konnesans?
8 Premyerman, vi ki “linite” i bezwen ganny mentenir, en Kretyen matir i bezwen ini e dan larmoni total avek son bann konpanyon Kretyen kot lafwa ek konnesans i konsernen. An sa ki konsern konprenezon Labib, i pa siport oubyen ensiste ki son prop lopinyon oubyen lide personnel i pli meyer. Plito, i annan en konfyans total dan laverite parey i’n ganny revele par Zeova atraver son Garson, Zezi Kri, ek ‘lesklav fidel e pridan.’ Par regilyerman pran nouritir spirityel ki ganny fourni “kan i ler”—atraver bann piblikasyon Kretyen, bann renyon ek lasanble—nou kapab asire ki nou pe mentenir “linite” dan lafwa e dan konnesans avek nou bann konpanyon Kretyen.—Matye 24:45.
9. Eksplike ki sa lekspresyon “lafwa” i oule dir parey Pol i servi li dan son let pour bann Efezyen.
9 Dezyenmman, sa lekspresyon “lafwa” pa pe refer avek konviksyon ki sak Kretyen i annan personnelman, me avek sa ki nou krwar konman en group, “larzer, longer, oter e profonder” nou krwayans. (Efezyen 3:18; 4:5; Kolosyen 1:23; 2:7) Anfet, konman ki en Kretyen i kapab dan linite avek lezot konpanyon Kretyen si i krwar e aksepte selman en serten parti “lafwa”? Setadir nou pa devret kontant nou avek konn senpleman bann lansennyman debaz lo Labib oubyen annan zis en serten konnesans lo laverite oubyen en konnesans ki pa tro kler. Okontrer, nou devret enterese pour servi o maksimonm tou bann provizyon ki Zeova i donnen atraver son lorganizasyon pour al pli profon dan son Parol. Nou devret sey nou mye pour ganny en konprenezon lo lavolonte ek plan Bondye, ki pli egzakt e pli konplet posib. Sa i enkli pran letan pour lir e etidye Labib ek bann piblikasyon baze lo Labib, pour priy Bondye pour son led ek gidans, pour asiste bann renyon Kretyen regilyerman e pour partisip plennman dan sa travay prese e fer disip.—Proverb 2:1-5.
10. Ki lenplikasyon sa parol “nou a kapab ansanm ariv,” ki ganny servi dan Efezyen 4:13?
10 Trwazyenmman, Pol ti konmans son deskripsyon lo sa trwa lobzektif par sa parol “nou a kapab ansanm ariv.” Sa lekspresyon “ansanm” i an armoni avek sinifikasyon ki en mannyel lo Labib i donnen ki dir “pa tou, enn par enn, separeman, me tou ansanm.” Andotmo, nou tou endividyelman nou devret fer en serten zefor ansanm avek tou lezot frer pour atenn sa lobzektif matirite Kretyen. The Interpreter’s Bible i fer sa komanter swivan: “Lakonplisman spirityel dan tou son totalite pa ganny akonpli par zis en endividi li tousel, zis parey en parti en lekor pa devlop ver matirite san ki lekor antye i kontinyen byen devlope.” Pol ti rapel bann Kretyen an Efez ki se “ansanm avek tou pep Bondye” ki zot devret fer zefor pour sezi lanpler total zot lafwa.—Efezyen 3:18.
11. (a) Kwa ki pa enplike dan fer progre spirityel? (b) Ki nou bezwen fer pour fer progre?
11 Par sa ki Pol ti dir, i kler ki fer progre spirityel pa vedir ki nou senpleman ranpli nou lespri avek bann gran konnesans. En Kretyen ki matir i pa en dimoun ki enpresyonn lezot par son lentelizans. Plito, Labib i dir: “Santye bann dimoun drwat i parey sa lalimyer briyan ki vin pli kler e pli kler ziska sa zour i solidman etabli.” (Proverb 4:18) Wi, se sa “santye,” non pa sa endividi ki pe “vin pli kler e pli kler.” Si nou kontinyelman fer zefor pour reste azour avek konprenezon Parol Bondye, ki Zeova pe fer vin deplizanpli kler pour son pep, nou pou fer progre spirityel. Dan sa ka, reste azour i vedir al pli devan, e sa i en keksoz ki nou tou nou kapab fer.—Psonm 97:11; 119:105.
Manifeste “fri Lespri”
12. Akoz ki i enportan pour manifeste fri lespri kan nou pe progrese spirityelman?
12 Parey “ariv dan linite nou lafwa ek dan konnesans” i enportan, i osi enportan pour manifeste fri lespri Bondye dan tou laspe nou lavi. Akoz? Sa i akoz matirite, parey nou’n war, i pa en keksoz enteryer ki lezot pa kapab war, me i marke par bann karakteristik ki klerman aparan, ki kapab benefisye e batir lezot. Byensir, progrese spirityelman pa senpleman en zefor pour kiltiv serten bon mannyer oubyen donn en serten lenpresyon lezot. Plito, ofiramezir ki nou grandi spirityelman, an swivan gidans lespri sen, nou pou eksperyans en sanzman merveye dan nou latitid ek aksyon. “Les Lespri diriz zot lavi, pa satisfer bann dezir natir imen,” zapot Pol ti dir.—Galat 5:16.
13. Ki sanzman ki klerman endike ki en dimoun pe progrese?
13 Pol ti kontinyen par mansyonn “bann aktivite natir imen,” ki an abondans e ki aparan. Avan ki en dimoun i arive konpran valer bann legzizans Bondye, son lavi i ganny formen dapre bann prensip sa monn e petet i ranpli avek serten sa bann keksoz ki Pol ti mansyonnen: “aksyon imoral, lenpirte, vis, ladorasyon zidol, siperstisyon, laenn, diskord, zalouzi, lakoler, egois, divizyon an diferan parti opoze, groker, soulezon, parti bwar, ek lezot bann tel aksyon ankor.” (Galat 5:19-21) Me anmezir ki sa dimoun i progrese spirityelman, i gradyelman sirmont sa bann “aktivite natir imen” endezirab e fer plas pour “fri Lespri.” Sa sanzman ki tre aparan i endike klerman ki sa dimoun pe avans ver matirite Kretyen.—Galat 5:22.
14. Eksplik sa de lekspresyon “aktivite natir imen” ek “fri lespri.”
14 Nou devret pran not sa de lekspresyon “bann aktivite natir imen” ek “fri Lespri.” “Aktivite” i rezilta sa ki en dimoun i fer, konsekans son bann aksyon. Andotmo, sa bann keksoz ki Pol in nonmen konman aktivite natir imen i swa rezilta en swa volonter ki en dimoun i fer oubyen rezilta lenfliyans natir enparfe sa dimoun. (Romen 1:24, 28; 7:21-25) Lo lot kote, sa lekspresyon “fri Lespri” i endike ki sa bann kalite ki’n ganny mansyonnen pa rezilta bann zefor ki ou fer pour devlop ou karakter oubyen pour amelyor ou personnalite, me i rezilta lespri Bondye ki oper lo en dimoun. Zis parey en pye dibwa i donn son fri kan i ganny byen okipe, demenm en dimoun pou manifeste fri lespri kan lespri sen i azir libreman dan son lavi.—Psonm 1:1-3.
15. Akoz i enportan pour donn latansyon tou laspe “fri Lespri”?
15 En lot pwen pour egzaminen i lafason ki Pol i servi sa mo “fri” pour kouver tou sa bann kalite atiran ki i’n mansyonnen. Lespri pa prodwir en varyete fri pour nou swazir sa ki nou pli kontan. Tou sa bann kalite ki Pol in mansyonnen—lanmour, lazwa, lape, pasyans, labonte, lafwa, ladouser, kontrol lo nou prop lekor—zot tou zot enportan, e zot tou ansanm zot fer en nouvo personnalite Kretyen posib. (Efezyen 4:24; Kolosyen 3:10) Alor, menm si serten sa bann kalite i pli evidan dan nou lavi akoz nou personnalite ek karakter, i enportan ki nou donn latansyon tou sa bann laspe ki Pol in mansyonnen. An fezan sa, nou kapab pli byen reflekte personnalite Kris dan nou lavi.—1 Pyer 2:12, 21.
16. Ki nou lobzektif kan nou pe travay pour vin en Kretyen matir, e ki mannyer nou kapab atenn li?
16 Leson enportan ki nou aprann atraver diskisyon Pol i ki kan nou pe pourswiv matirite Kretyen, nou lobzektif se pa pour ganny en gran konnesans ni menm pour kiltiv bann pli bon kalite. I pour les lespri Bondye azir libreman dan nou lavi. Pli nou les nou panse ek nou aksyon ganny gide par lespri Bondye, pli nou pou vin matir spirityelman. Ki mannyer nou kapab atenn sa lobzektif? Nou bezwen ouver nou leker ek nou lespri pour les zot ganny enfliyanse avek lespri Bondye. Sa i enplik ki nou fidelman asiste e partisip dan bann renyon Kretyen. Nou devret osi etidye e medit lo Parol Bondye regilyerman, les son bann prensip gid nou dan nou relasyon avek lezot e dan swa ek desizyon ki nou fer. Dan sa ka, lezot pou definitivman war nou progre.
Fer Progre pour Laglwar Bondye
17. Konman ki fer progre i relye avek glorifye nou Papa ki dan lesyel?
17 Finalman, kan lezot i war nou progre, sa pa anmenn laglwar ek loner pour nou me pour nou Papa seles, Zeova, ki fer li posib pour nou vin matir spirityelman. Sa zour swar avan ki Zezi ti ganny touye, i ti dir son bann disip: “Mon Papa i ganny glorifye ler zot raport bokou fri e par sa zot montre ki zot mon bann disip.” (Zan 15:8) Bann disip i anmenn laglwar pour Zeova par fri lespri ki zot manifeste ensi ki fri ki zot prodwi dan zot minister.—Akt 11:4, 18; 13:48.
18. (a) Ki rekolt zwaye ki pe deroule ozordi? (b) Ki defi sa rekolt i prezante?
18 Ozordi, Zeova pe beni son pep dan sa rekolt spirityel ki zot pe fer globalman. I fer en pe lannen aprezan ki apepre 300,000 nouvo i dedye zot lavi avek Zeova tou-le-zan e senboliz zot dedikasyon par batenm delo. Sa i fer nou zwaye e san dout i osi Proverb 27:11) Toutfwa, pour sa kontinyen vin en sours lazwa ek louanz pour Zeova, tou bann nouvo i bezwen “kontinyen reste atase avek [Kris]. Viv anrasinen dan li; bati zot lavi lo li; reste touzour pli ferm dan lafwa.” (Kolosyen 2:6, 7) Sa i prezant en defi doub pour pep Bondye. Lo en kote, si ou en nouvo ki fek batize, eski ou pou aksepte sa defi pour fer zefor afen ki “tou dimoun i a war ou progre”? Lo lot kote, si ou dan laverite pour en serten letan, eski ou pou aksepte defi pour pran responsabilite pour okip byennet spirityel bann nouvo? Dan tou le de ka, nesesite pour kontinyen avans ver matirite i kler.—Filipyen 3:16; Ebre 6:1.
fer leker Zeova rezwir. (19. Ki privilez ek benediksyon ki kapab vin pour ou si ou fer ou progre ganny manifeste?
19 Bann benediksyon merveye pe esper tou sa bann ki travay dir pour fer zot progre aparan. Mazin sa parol ankourazan ki Pol ti dir Timote apre ki i ti enplor li pour fer progre: “Vey byen ou lekor e fer byen atansyon avek ou lansennyman, e montre perseverans dan tousala. Si ou azir koumsa ou ava sov ou lekor ek tou bann ki ekout ou.” (1 Timote 4:16) Par travay dir pour fer ou progre vizib, ou osi ou kapab annan en par dan sa privilez pou glorifye non Bondye e rezwir son bann benediksyon.
Eski ou mazinen?
• Dan ki fason lezot i kapab remarke kan en dimoun i matir spirityelman?
• Ki kalite konnesans ek konprenezon ki reflekte matirite?
• Ler en dimoun i manifeste “fri Lespri,” ki mannyer sa i endike ki i pe fer progre spirityel?
• Ki defi ki nou devret aksepte kan nou pe avans ver matirite?
[Kestyon]
[Portre lo paz 24]
I aparan kan en dimoun i mir oubyen matir
[Portre lo paz 27]
Nou fer progre spirityel par reste azour avek laverite ki ganny revele
[Portre lo paz 28]
Lapriyer i ed nou pour demontre “fri Lespri”