Ou Drwa pour krwar

San dout ou apresye ou drwa pour krwar sa ki ou ou anvi krwar. I osi leka avek lezot dimoun. Sa sis bilyon zabitan lo later in egzers sa drwa par form en kantite diferan kalite krwayans ekstraordiner. Parey varyasyon dan kouler, laform, tekstir, gou, loder, ek son ki nou vwar dan kreasyon, bann diferan krwayans i souvannfwa azout lentere, lemosyon, ek plezir dan lavi. Annefe, en tel varyete, i donn lavi en gou.—Psonm 104:24.

ME NOU bezwen pran prekosyon. Serten krwayans pa selman diferan me i osi danzere. Par egzanp, byen boner dan 20 tyenm syek, serten dimoun ti krwar ki bann Zwif ek bann Farmason ti’n plàn pour “deranz sivilizasyon Kretyen e enstal en leta mondyal anba zot dominasyon.” En tel krwayans ti ganny propaze atraver en papye ki ti koz kont bann Zwif, e ki ti annan pour tit Protocols of the Learned Elders of Zion. Sa dokiman ti pretann ki sa de group i annan plan pour siport taks ki tro o, promot prodiksyon zarm, ankouraz bann tre gran lakonpannyen pour ki zot kontrol tou lezot biznes pour ki ‘larises bann non-Zwif i kapab ganny detri en sel kou.’ Bann deklarasyon ti osi dir ki zot ti pou manipil sistenm ledikasyon pour ‘fer bann non-Zwif vin konman bann zannimo ki napa abilite pour panse,’ e menm konstri bann souteren pour zwenn bann lavil par tren, pour ki bann dirizan Zwif i ‘vin pli for ki okenn lennmi zis par elimin zot.’

Byensir, sa ti bann mansonz—ki ti ganny envante pour ki dimoun i deteste bann Zwif. Mark Jones en travayer British Museum ti dir: ‘Sa zistwar ekstravagan ti konmans depi Larisi,’ kot premyerman i ti aparet dan lartik en zournal an 1903. I ti propaze pour plitar aparet dan The Times an Langleter le 8 Me, 1920. Enn an plitar, The Times ti revele ki sa dokiman ti fo. Pandan sa letan, domaz ti’n fini ganny fer. ‘Bann tel mansonz,’ Jones ti dir, ‘i difisil pour anpese.’ Enn fwa ki dimoun in aksepte sa bann mansonz, zot devlop serten krwayans negatif, anpwazonnen, e danzere—ki souvan anmenn bann konsekans katastrofik, parey listwar 20 tyenm syek in montre.—Proverb 6:16-19.

Laverite kont sa ki ou krwar

Byensir, bann fo krwayans i kapab devlope san menm ki bann mansonz in ganny dir par ekspre. Parler, nou zis mal enterpret keksoz. Konbyen dimoun ki’n mor avan zot ler an fezan en keksoz ki zot ti krwar i byen? Parfwa, nou senpleman krwar en keksoz akoz nou anvi krwar li. En profeser  ti dir ki menm bann syantis i “parfwa tonm anmoure avek zot prop teori ek konklizyon.” Sa ki zot krwar i anpes zot byen zize. Apre zot kapab pas tou zot lavi zis pour esey prouv bann fo krwayans.—Zeremi 17:9.

Menm keksoz in arive avek bann krwayans relizye—kot gran kontradiksyon i egziste. (1 Timote 4:1; 2 Timote 4:3, 4) En zonm i annan lafwa for dan Bondye. En lot i dir ki napa okenn levidans pour annan lafwa dan en Bondye. Enn i argimante ki ou nanm i kontinyen viv apre ki ou’n mor. En lot i krwar ki letan ou mor ou aret egziste, totalman e konpletman. Evidaman, i pa posib ki tou sa bann krwayans kontradiktwar i vre. Aprezan, pa i saz pour fer sir ki sa ki ou krwar i vre e pa senpleman sa ki ou anvi krwar? (Proverb 1:5) Konman ou kapab fer sa? Lartik swivan pou diskit sa size.

[Portre lo paz 3]

Lartik 1921 ti pe ekspoz “Protocols of the Learned Elders of Zion”