Persevere Dan Sa Travay Rekolt!
Persevere Dan Sa Travay Rekolt!
“Bann ki pe senm avek larm pou rekolte avek en kriye lazwa.”—PSONM 126:5.
1. Akoz ozordi nou bezwen “sipliy met rekolt pour anvoy zouvriye”?
PRE ki Zezi ti’n fer son trwazyenm vwayaz an Galile pour prese, i ti dir avek son bann disip: “Rekolt i gran, me zouvriye i pti gin.” (Matye 9:37) An Zide sitiasyon ti menm parey. (Lik 10:2) Vi ki sa ti preski 2,000 an pase, eski sitiasyon i ankor parey ozordi? Pandan sa dernyen lannen servis, 6,000,000 Temwen Zeova ti persevere dan sa travay rekolt parmi sa 6,000,000,000 dimoun ki annan dan lemonn, dan ki bokou zot i “fatige e dekouraze parey bann mouton ki napa berze.” Alor konsey Zezi pour “sipliy met rekolt pour anvoy zouvriye” i ankor touzour aplikab konmela parey i ti leka plizyer syek pase.—Matye 9:36, 38.
2. Ki sa ki atir latansyon dimoun lo nou?
2 Zeova, Met rekolt, in reponn sa lapel pour anvoy plis zouvriye. E pa i en lazwa pour partisip dan sa travay rekolt ki ganny dirize par Bondye! Menm si nou en pti gin konpare avek bann nasyon, nou partisipasyon zele dan aktivite pour pres lo Rwayonm e pour fer disip i atir latansyon lemonn lo nou. Dan plizyer pei nou souvan ganny mansyonnen dan lapres. Si laport i sonnen dan en pyes teat lo televizyon, sa i kapab lev en komanter ki bann Temwen Zeova i devan laport. Wi, nou aktivite Kretyen konman bann zouvriye rekolt i byen renonmen dan sa 21 tyenm syek.
3. (a) Ki mannyer nou konnen ki aktivite predikasyon lo Rwayonm ti ganny remarke dan premye syek? (b) Akoz nou kapab dir ki bann lanz i soutenir nou minister?
3 Lemonn ti osi remark aktivite predikasyon dan premye syek e persekit sa bann ki ti pe anons sa bon nouvel. An rezilta, Pol ti dir: “Mon krwar ki Bondye in fer nou zapot, parmi bann dernyen, parey bann kondannen an-mor; nou’n ganny ekspoze konman en spektak pour lemonn antye, pour lanz konman pour zonm.” (1 Korentyen 4:9) Pareyman, nou perseverans konman bann proklanmater Rwayonm malgre persekisyon, i atir latansyon lemonn lo nou e i vreman enportan pour bann lanz. Revelasyon 14:6 i dir: “Apre mon [zapot Zan] ti war en lot lanz pe anvole atraver lesyel, avek en levanzil eternel pour anons tou zabitan later, tou nasyon, tribi, lalang ek pep.” Wi, bann lanz pe soutenir nou dan nou minister—nou travay rekolt!—Ebre 1:13, 14.
“Tou Dimoun pou ay zot”
4, 5. (a) Ki lavertisman Zezi ti donn son bann disip? (b) Akoz bann ‘dimoun i ay’ bann serviter Bondye denozour?
4 Kan bann zapot Zezi ti ganny anvoye konman zouvriye dan rekolt, zot ti ekout son lenstriksyon pour “vin pridan parey bann serpan e dou parey bann kolonm.” Zezi ti osi azoute: “Fer atansyon, akoz zot pou ganny arete e ganny anmennen devan lakour, e zot pou ganny fwete dan sinagog. Akoz mwan, zot pou ganny anmennen devan bann gouverner ek bann lerwa, pour anons zot ek bann non-Zwif Bonn Nouvel. . . . Tou dimoun pou ay zot akoz mwan. Me sa ki persevere ziska lafen pou ganny sove.”—Matye 10:16-22.
5 Bann ‘dimoun i ay nou’ ozordi akoz “lemonn antye i dan pouvwar dyab,” Satan, lennmi prensipal Bondye ek Son pep. (1 Zan 5:19) Nou bann lennmi i remark nou prosperite spirityel me zot refize pour rekonnet ki Zeova i par deryer sa. Bann ki opoz nou i vwar ki nou touzour zwaye e lo nou figir i annan sa sourir letan nou pe partisip dan sa travay rekolt. Zot etonnen pour vwar konman nou ini ansanm! Anfet, zot kapab admet sa kantmenm i pa zot leker kan zot vwayaz dan en lot pei e vwar ki Temwen Zeova pe fer egzakteman menm travay ki zot pe fer dan zot prop pei. Nou konnen byensir ki dan letan apropriye menm nou bann lennmi pou konn Zeova, sa enn ki soutenir nou e ki sours nou linite.—Ezekyel 38:10-12, 23.
6. Ki lasirans nou annan anmezir ki nou fer sa travay rekolt, me ki kestyon ki ganny demande?
6 Met rekolt in donn son Garson, Zezi Kri, “tou pouvwar dan lesyel ek lo later.” (Matye 28:18) Alor Zeova i servi Zezi pour diriz sa travay rekolt atraver bann lanz dan lesyel e atraver “lesklav fidel e pridan” lo later. (Matye 24:45-47, NW; Revelasyon 14:6, 7) Me ki mannyer nou kapab fer fas avek nou bann lennmi ki opoz nou e anmenmtan gard nou lazwa anmezir ki nou persevere dan sa travay rekolt?
7. Ki leta lespri nou devret sey nou mye pour mentenir kan nou ganny opoze oubyen persekite?
7 Kan nou fer fas avek lopozisyon oubyen menm persekisyon direk, annou rod led Bondye pour ki nou kapab gard menm leta lespri avek Pol. I ti ekrir: “Ler nou ganny ensilte, nou beni, ler nou ganny persekite, nou siporte. Ler dimoun i kalonmni nou, nou reponn avek bon parol.” (1 Korentyen 4:12, 13) Sa kalite leta lespri ansanm avek nou minister ki nou fer li avek tak, i parfwa sanz latitid bann dimoun ki opoz nou.
8. Ki lasirans nou gannyen dan parol Zezi ki’n ganny rikorde dan Matye 10:28?
8 Menm kan nou ganny menase avek lanmor sa pa diminyen nou zel konman bann zouvriye dan rekolt. Nou anons mesaz Rwayonm pli ouvertman posib san okenn lafreyer. E nou retir en lasirans ankourazan dan sa ki Zezi ti dir: “Pa per bann ki touy lekor me ki pa kapab touy lam; per plito sa ki kapab detri ou lekor ek ou lam dan [Zeenn, NW ].” (Matye 10:28) Nou konnen ki se nou Papa seles ki donn lavi. I rekonpans bann ki gard lentegrite avek li e ki persevere fidelman dan sa travay rekolt.
En Mesaz ki sov Lavi
9. Konman ki serten ti reazir anver parol Ezekyel, e konman ki menm keksoz pe arive ozordi?
9 Kan avek kouraz profet Ezekyel ti anons mesaz Zeova avek “bann nasyon rebel”—rwayonm Izrael ek Zida—serten dimoun ti kontan pour tann sa ki i ti annan pour dir. (Ezekyel 2:3) “Gete!” Zeova ti dir, “pour zot ou parey en sanson lanmour sansyel, parey kelken ki annan en zoli lavwa e ki zwe en lenstriman lakord byen.” (Ezekyel 33:32) Menm si zot ti kontan sa ki Ezekyel ti dir, zot pa ti aplik son parol. Ki pe arive ozordi? Kan larestan Kretyen swazir ek zot konpanyon i anons mesaz Zeova avek kouraz, i annan serten ki kontan tann sa bann benediksyon ki Rwayonm pou anmennen, me zot pa reazir avek rekonesans pour vin bann disip e zwenn ansanm avek bann zouvriye dan rekolt.
10, 11. Kwa ki ti ganny fer pour anons nou mesaz ki sov lavi pandan sa premye lanmwatye 20 tyenm syek, e ki rezilta sa ti anmennen?
10 De lot kote, bokou dimoun in reazir favorableman avek sa travay rekolt e zot in donn lanmen anons mesaz Bondye. Par egzanp, pandan en seri lasanble ki ti ganny fer an 1922 a 1928, mesaz konsernan zizman lo sa sistenm mesan Satan ti ganny anonse klerman. Ti annan bann stasyon radyo ki ti brodkas sa bann zizman ki ti pe ganny prezante dan sa bann lasanble. Par laswit, pep Bondye ti distribye plizyer milyon kopi sa mesaz ki ti’n ganny enprimen.
11 Tar dan bann lannen 1930, en nouvo form temwannyaz ti ganny entrodwir—lamars piblisiter. Okonmansman, pep Zeova ti anmenn bann plakar ki ti pe anons bann diskour piblik. Plitar, zot ti anmenn bann plakar lo ki ti annan bann slogan tel konman “Larelizyon i en pyez e i malonnet” e “Servi Bondye ek Kris Lerwa.” Kan zot ti marse lo semen zot ti atir latansyon bann dimoun ki ti pe pase. ‘Sa ti kontribye bokou pour fer bann Temwen Zeova ganny remarke par piblik e pour donn zot kouraz.’ Sa i en komanter ki ti ganny fer par en frer ki ti regilyerman partisip dan sa travay lo bann lari tre okipe an Lonn, Langleter.
12. Apar ki en mesaz zizman, lo kwa nou atir latansyon dan nou minister, e lekel ki aprezan ini pe pres sa bon nouvel?
12 Kan nou deklar mesaz zizman Bondye, nou osi atir latansyon lo bann benediksyon ki’n ganny promet, ki form parti sa mesaz Rwayonm. Nou temwannyaz kouraze ki nou fer dan sa monn i ede pour rod bann ki merite. (Matye 10:11) Laplipar bann dernyen manm Kretyen swazir ti reponn lapel pour rekolt pandan bann lannen 1920 ek 1930. Apre sa, dan en lasanble ki ti ganny fer an 1935, en bon nouvel konsernan en lavenir ere dan paradi lo later ti sorti pour “sa gran lafoul” ‘lezot mouton.’ (Revelasyon 7:9; Zan 10:16) Zot ti ekout mesaz zizman Bondye e zot in reini ansanm avek bann Kretyen swazir pour pres sa bon nouvel ki sov lavi.
13, 14. (a) Ki rekonfor nou kapab retire dan Psonm 126:5, 6? (b) Si nou kontinyen senmen e aroze, ki pou arive?
13 Parol ki trouve dan Psonm 126:5, 6 i en gran rekonfor pour bann zouvriye dan rekolt, sirtou bann ki pe sibir persekisyon. I dir: “Bann ki pe senm avek larm pou rekolte avek en kriye lazwa. Sa ki al devan, menm an pleran, avek en sak plen avek legren, pou san fot rantre avek en kriye lazwa, avek son rekolt.” Sa ki sa Psalmis i dir konsernan senmen e rekolte i demontre swen ek benediksyon ki Zeova ti donn larestan Zwif ki ti retournen sorti an egzil an Babilonn. Kan zot ti ganny libere zot ti vreman kontan, me zot ti bezwen senm an pleran dan sa later abandonnen ki pa ti’n ganny kiltive pour sa 70 lannen ki zot ti an egzil. Me bann ki ti kontinyen senmen e konstri ti ganny en bon rezilta e trouv satisfaksyon dan zot travay.
14 Petet nou plere kan nou dan leprev oubyen kan nou ouswa menm nou bann konpanyon Kretyen pe soufer akoz sa ki byen. (1 Pyer 3:14) Nou kapab ganny difikilte premye kou dan nou travay rekolt, akoz pour nou petet nou pa vwar nanryen konman en laprev pour montre ki nou pe reisi dan nou minister. Me si nou kontinyen senmen e aroze, Bondye pou fer pouse, laplipar-di-tan bokou plis ki nou ti pe ekspekte. (1 Korentyen 3:6) Sa in ganny byen demontre par rezilta ki nou’n gannyen atraver nou distribisyon Labib ek bann piblikasyon baze lo Labib.
15. Donn en legzanp pour montre konman ki nou bann piblikasyon ki nou distribye dan travay rekolt i itil.
15 Reflesir lo legzanp en zonm ki ti apel Jim. Kan son manman ti mor, i ti vwar dan son bann zafer en kopi sa liv La vie: comment est-elle apparue? Évolution ou création? * I ti lir sa liv avek bokou lentere. Dan en diskisyon ki i ti gannyen avek en Temwen ki ti’n apros li lo semen, Jim ti aksepte pour sa dimoun vizit li e sa ti kondwir ver en letid Labib. Jim ti progres vitman, i ti dedye son lavi avek Zeova e batize. I ti rakont lezot son fanmiy sa ki i ti’n aprann. An rezilta, son ser ek son frer ti vin Temwen Zeova, e plitar Jim ti benefisye avek privilez pour servi konman en volonter aplentan dan Betel Lonn.
Zwaye malgre Persekisyon
16. (a) Akoz nou’n eksperyans sikse dan nou travay rekolt? (b) Ki Zezi ti averti konsernan lefe ki sa bon nouvel ti pou annan, me ki latitid nou annan kan nou apros dimoun?
16 Akoz nou travay rekolt in annan sitan bokou sikse? Parski bann Kretyen swazir ek zot konpanyon in swiv lenstriksyon Zezi: “Sa ki mon dir zot dan fernwanr, repet an plen-zour; e sa ki zot tande an sekre pibliy li lo twa lakaz.” (Matye 10:27) Toudmenm, nou ekspekte rankontre difikilte parski Zezi ti averti: “Frer pou denons zot prop frer pou ganny touye, papa pou fer parey avek son prop zanfan, bann zanfan pou tourn kont zot paran pour zot ganny touye.” Apre Zezi ti dir: “Pa krwar ki mon’n vin anmenn lape lo later. Mon pa’n vin anmenn lape, me lepe.” (Matye 10:21, 34) Zezi pa’n vin ekspreseman pour diviz bann fanmiy. Me parfwa sa bon nouvel ti annan sa lefe. I leka pour bann serviter Bondye ozordi. Kan nou vizit bann fanmiy, nou napa lentansyon pour fer divizyon dan fanmiy. Nou dezir se ki tou dimoun i aksepte sa bon nouvel. Alor, nou sey apros tou manm lafanmiy dan en fason zantiy e amikal ki fer nou mesaz atiran pour bann ki “dan dispozisyon neseser pour lavi eternel.”—Akt 13:48, NW.
17. Konman ki bann ki siport souvrennte Bondye i ganny met apar, e sit en legzanp pour montre sa?
17 Sa mesaz Rwayonm i met bann ki siport souvrennte Bondye apar. Par egzanp, mazinen konman nou bann frer Kretyen an Lalmanny ti montre ki zot diferan kan zot ti “rann Sezar sa ki pour Sezar, e Bondye sa ki pour Bondye” dan letan Sosyalism Nasyonal. (Lik 20:25) Diferaman avek bann sef relizye ek bann swadizan Kretyen ki ti asosye avek bann legliz Kretyente, bann Temwen Zeova ti reste ferm e refize pour vyol bann prensip Labib. (Izai 2:4; Matye 4:10; Zan 17:16) Profeser Christine King, ekriven liv The Nazi State and the New Religions, ti obzerve: “Zis kont bann Temwen ki gouvernman [Nazi] pa ti reisi, akoz menm si zot ti touy en milye zot, sa travay ti kontinyen e an Me 1945 mouvman bann Temwen Zeova ti ankor touzour vivan tandis ki Sosyalism Nasyonal ti nepli.”
18. Ki latitid pep Zeova i demontre malgre persekisyon?
18 Latitid ki ganny manifeste par pep Zeova kan zot trouv zot dan persekisyon i vreman enportan. Byen ki bann lotorite dan sa monn i kapab enpresyonnen par nou lafwa, zot eksprim zot ladmirasyon pour lefe ki nou pa gard rankin. Par egzanp, bann Temwen ki ti sirviv Olokos i souvan eksprim lazwa ek kontantman kan zot mazin zot leksperyans. Zot konnen ki se Zeova ki ti donn zot “sa pisans ki napa son parey.” (2 Korentyen 4:7) Bann Kretyen swazir parmi nou i annan sa lasirans ki zot “non in ganny ekri dan lesyel.” (Lik 10:20) Zot perseverans in prodwir en lesperans ki pa pou dezapwent zot, e bann zouvriye fidel dan rekolt ki annan sa lesperans pour viv lo later i annan en menm konviksyon.—Romen 5:4, 5.
Persevere dan sa Travay Rekolt
19. Ki bann metod efikas ki’n ganny servi dan minister?
19 Nou pa konnen pour konbyen letan ankor Zeova pou permet nou kontinyen sa travay rekolt senbolik. Antretan, nou bezwen kit antet ki bann zouvriye dan rekolt i anploy bann metod spesifik pour fer zot travay. Demenm, nou kapab asire ki nou fidelite pour servi bann fason sir pour prese pou vreman efikas. Pol ti dir avek son bann konpanyon Kretyen: “Mon sipliy zot, imit mwan.” (1 Korentyen 4:16) An Mile, letan Pol ti zwenn bann ansyen sorti Efez, i ti rapel zot ki i pa ti kasyet zot nanryen me i ti ansenny zot ‘an piblik e kaz an kaz.’ (Akt 20:20, 21) Timote ki ti konpanyon Pol, ti aprann bann metod ki Pol ti servi e alor i ti kapab fer bann Korentyen vin familye avek sa bann metod. (1 Korentyen 4:17) Bondye ti beni bann metod ki Pol ti servi pour ansennyen e pareyman i pou beni nou perseverans ki nou montre kan nou pres sa bon nouvel port an port, dan bann retourn vizit, dan bann letid Labib, e nenport lezot landrwa kot nou trouv dimoun.—Akt 17:17.
20. Ki mannyer Zezi ti endike ki tre byento zot ti pou rekolte en kantite dan en sans spirityel, e ki mannyer sa in leka pandan bann lannen ki fek pase?
20 Lannen 30 N.L., apre ki Zezi ti’n donn temwannyaz en madanm Samariten pre avek lavil Sikar, i ti koz lo en rekolt spirityel. I ti dir avek son bann disip: “Lev lizye e get byen bann plantasyon, bann lagrenn in mir e in pare pour larekolt. Sa ki fer rekolt i resevwar son lapey e i ranmas bann lagrenn pour lavi eternel, e dan sa fason, sa ki senmen e sa ki rekolte zot ganny kontantman ansanm.” (Zan 4:34-36) Petet Zezi ti’n fini vwar ki lefe son rankont avek sa madanm Samariten ti’n annan parski en kantite dimoun ti pe met lafwa dan li akoz sa madanm ti pe fer lezot konn sa ki ti’n arive. (Zan 4:39) Dan bann lannen ki fek pase, ti annan detrwa pei ki’n retir bann restriksyon lo Temwen Zeova oubyen rekonnet zot legalman, e sa in ouver bann nouvo teritwar pour rekolt. Rezilta se ki nou pe vwar en labondans rekolt spirityel an progre. Anfet, i annan bokou byenfe ki pe ganny eksperyanse partou dan lemonn ofiramezir ki nou kontinyen fer nou par dan sa rekolt spirityel avek lazwa.
21. Akoz nou annan rezon pour persevere konman bann zouvriye dan rekolt?
21 Kan rekolt i mir e pare pour rekolte, bann zouvriye i bezwen debrouye. Zot bezwen pa tarde pour konmans travay. Ozordi, nou bezwen travay dir e annan sa santiman ki sa travay i vreman irzan akoz nou pe viv dan “letan lafen.” (Danyel 12:4) I vre ki nou rankontre diferan leprev me deor i annan en gran rekolt bann serviter Zeova plis ki zanmen oparavan. Alor la i en letan pour rezwir. (Izai 9:3) Parey bann zouvriye zwaye dan rekolt, annou alor persevere dan sa travay rekolt!
[Not anba lo paz]
^ par. 15 Pibliye e distribye par Temwen Zeova.
Ki ou pou reponn?
• Ki mannyer Met rekolt in reponn lapel pour plis zouvriye?
• Menm si ‘dimoun i ay nou’ ki leta lespri nou mentenir?
• Akoz nou zwaye kantmenm nou ganny persekite?
• Akoz nou devret persevere dan sa travay rekolt e annan sa santiman ki i en travay irzan?
[Kestyon]
[Portre lo paz 15]
Bann lamars piblisiter ti atir latansyon bokou dimoun lo sa mesaz Rwayonm
[Portre lo paz 15]
Nou plante e aroze, me Bondye i fer pouse
[Portre lo paz 17]
Bann ki pe partisip dan sa rekolt spirityel i annan soutyen bann lanz