Dyab Pa zis en Siperstisyon

“Partou dan Nouvo Testaman i annan en konfli ant lafors Bondye ek lafors pour fer sa ki byen, lo en kote, e lo lot kote lafors pour fer sa ki mal dirize par Satan. Sa i pa lide enn oubyen de ekriven Labib, me i en keksoz ki zot tou zot dakor lo la. . . . Alors levidans dan Nouvo Testaman i kler. Satan i en realite, en malfezan, ki touzour ostil avek Bondye e avek pep Bondye.”—“The New Bible Dictionary.”

ALORS, akoz bokou dimoun ki dir ki zot Kretyen e krwar dan Labib i rezet sa lide ki Dyab i vreman egziste? Parski, an realite, zot pa aksepte Labib konman Parol Bondye. (Zeremi 8:9) Zot dir ki sa bann ki’n ekrir Labib ti pe reflekte bann filozofi bann nasyon otour zot e ki zot pa’n fidelman transmet laverite sorti kot Bondye. Par egzanp, en teolozyen Katolik, Hans Küng, i ekrir: “Sa bann zistwar lo Satan ek plizyer demon . . . ti konmans dan mitolozi Babilonnyen e enfiltre byen boner dan Zidaism e answit dan Nouvo Testaman.”—On Being a Christian.

Me Labib pa senpleman parol zonm. I vreman Parol enspire Bondye. Alor, i saz lo nou par si nou pran oserye sa ki i dir lo size Dyab.—2 Timote 3:14-17; 2 Pyer 1:20, 21.

Ki Zezi ti krwar?

Zezi Kri ti krwar ki Dyab ti en vre personnaz. Zezi pa ti ganny tante par en serten move keksoz anndan li. I ti ganny atake par en vre personnaz ki plitar i ti apel li “sa enn ki gouvern lemonn.” (Zan 14:30; Matye 4:1-11) I ti osi krwar ki lezot kreatir spirityel i siport Satan dan son bann move konplo. I ti geri bann dimoun ki “ti posede par en demon.” (Matye 12:22-28) Menm en piblikasyon ate, A Rationalist Encyclopædia, i fer resorti lenplikasyon ki sa i annan kan i dir: “Pour bann teolozyen, i’n toultan en lanbara konman ki Zezi dan Levanzil ti krwar dan dyab.” Kan Zezi ti koz lo Dyab ek son bann demon, i pa ti pe senpleman repet bann siperstisyon ki ti’n propaze depi mitolozi Babilonnyen. I ti konnen ki zot ti vreman egziste.

 Nou aprann en kantite lo Dyab kan nou egzamin parol ki Zezi ti dir avek bann profeser relizye dan son letan: “Zot, zot papa dyab, e se dezir zot papa ki zot oule realize. Depi okonmansman i en kriminel, i pa’n zanmen kontan laverite, akoz napa laverite dan li. Ler i koz manti, i koz selon son natir, akoz i manter e papa tou mansonz.”—Zan 8:44.

Dapre sa parol, Dyab, en non ki vedir “en dimoun ki koz mansonz lo kelken,” ti en “manter e papa tou mansonz.” I ti premye kreatir pour koz mansonz lo Bondye, e i ti fer sa dan zarden Edenn. Zeova ti dir ki nou premye paran ti pou ‘sirman mor’ si zot ti manz fri ki sorti dan sa pye konnesans bon e move. Satan ti servi en serpan pour dir ki sa parol pa vre. (Zenez 2:17; 3:4) Alor i apropriye ki i’n ganny apele “serpan lantikite, ki apel dyab ou satan.”—Revelasyon 12:9.

Dyab ti koz manti konsernan sa pye konnesans bon e move. I ti argimante ki lenterdiksyon pour manz fri sorti dan sa pye dibwa pa ti zistifye; Bondye ti pe abiz son pouvwar. I ti dir ki Adan ek Ev ti pou kapab “vin parey Bondye” par desid lo zot menm sa ki byen ek sa ki mal. Endirekteman, Satan ti sizere ki konman bann endividi ki annan laliberte pour swazir, zot ti devret depan antyerman lo zot menm. (Zenez 3:1-5) Sa latak ki i ti fer lo drwa Bondye pour dirize ti lev bann kestyon enportan. Alor, Zeova in permet letan pase pour ki sa bann kestyon i ganny reponn. Savedir i’n permet Satan kontinyen viv pour en serten peryod letan. Tre byento son letan ki reste pou fini. (Revelasyon 12:12) Kantmenm sa, i pe kontinyen elwanny dimoun avek Bondye par son bann mansonz ek tronpri e an servan bann dimoun parey bann profeser lalwa ek Farizyen dan letan Zezi pour propaz son lansennyman.—Matye 23:13, 15.

Zezi ti osi dir ki Dyab ‘depi okonmansman i en kriminel’ e ki ‘i pa’n zanmen kontan laverite.’ Sa pa vedir ki Zeova ti kree Dyab konman en “kriminel.” I pa ti ganny kree konman en nespes kalite bebet ki ti pou ansarz en landrwa kot i annan dife ek tourman pour okenn dimoun ki ti opoz Bondye. Sa mo lanfer ki Labib i parfwa mansyonnen i pa landrwa kot Satan i reste. I senpleman latonm kot tou imen i ale letan zot mor.—Akt 2:25-27; Revelasyon 20:13, 14.

Okonmansman Dyab ti dan “laverite.” I ti form parti fanmiy seles Zeova e i ti en garson spirityel parfe Bondye. Me i “pa’n zanmen kontan laverite.” I ti pli kontan son prop fason e son bann prop prensip ki baze lo mansonz. Son ‘konmansman’ pa ti letan i ti ganny kree konman en lanz Bondye, me kan i ti volonterman rebel kont Zeova e koz mansonz avek Adan ek Ev. Dyab i parey sa bann dimoun ki ti rebel kont Zeova dan letan Moiz. Nou lir konsernan zot: “Lo zot par, zot in azir dan en fason deplorab; zot pa son bann zanfan, se zot lafot.” (Deterononm 32:5) Nou kapab dir menm zafer lo Satan. I ti vin en “kriminel” kan i ti rebele e vin responsab pour lanmor Adan ek Ev e, an realite, lanmor lafanmiy imen an antye.—Romen 5:12.

Bann Lanz dezobeisan

Ti annan lezot lanz ki ti zwenn Satan dan son rebelyon. (Lik 11:14, 15) Dan letan Noe, sa bann lanz ti “abandonn zot prop demer” e pran laform imen pour kapab annan relasyon seksyel avek “bann fiy bann zonm.” (Zid 6; Zenez 6:1-4; 1 Pyer 3:19, 20) “En tyer bann zetwal dan lesyel,” oubyen en pti minorite bann kreatir spirityel in swiv sa semen.—Revelasyon 12:4.

Liv Revelasyon ki en liv tre senbolik, i dekrir Dyab konman “en gro dragon rouz konman dife.” (Revelasyon 12:3) Akoz sa? Pa akoz i annan en vilen lekor ki fer per. Anfet, nou pa konnen ki kalite lekor bann kreatir spirityel i annan, me nou pa ekspekte Satan pour diferan avek lezot kreatir spirityel dan sa domenn. Parkont, “en gro dragon rouz konman dife” i apropriye pour dekrir lespri voras, efreyan, pwisan e destriktif Satan.

Aprezan, Satan ek son bann demon in ganny severman restrikte. Zot nepli kapab pran laform lezot kreatir parey zot ti aparaman fer oparavan. Zis apre ki Rwayonm  Bondye ti ganny konfye avek Kris an 1914, zot ti ganny zete lo later.—Revelasyon 12:7-9.

Dyab i en Lennmi ki pa fasil pour defet

Malgre tou, Dyab i touzour en lennmi ki pa fasil pour defet. I pe “pas partou konman en lyon ki kriye, pe rode ki i pou devore.” (1 Pyer 5:8) Dyab pa kek move natir dan nou lekor enparfe. I vre ki nou bezwen fer en konba avek nou prop move tandans. (Romen 7:18-20) Me sa vre konba i kont “bann pouvwar move lespri dan ler.”—Efezyen 6:12.

Ziska ki degre Dyab pe enfliyans dimoun lo later? Zapot Zan i dir ki “lemonn antye i dan pouvwar dyab.” (1 Zan 5:19) Byensir, nou pa anvi preokip nou avek Dyab oubyen les lafreyer siperstisye fer nou pa kapab fer nanryen. Parkont, i saz pour nou vey son bann zefor ki i fer pour avegle nou pour nou pa vwar laverite e pour li kas nou lentegrite avek Bondye.—Zob 2:3-5; 2 Korentyen 4:3, 4.

Dyab pa touzour servi britalite pour atak bann dimoun ki anvi fer lavolonte Bondye. Parfwa, i fer li vin parey en “lanz lalimyer.” Zapot Pol ti averti bann Kretyen kont sa danze kan i ti ekrir: “Me mon per ki parey Eve ti ganny tronpe par riz serpan, zot les zot lentelizans ganny egare lwen avek senplisite ek lapirte Kris.”—2 Korentyen 11:3, 14.

Alor, nou bezwen ‘reste vizilan, vey byen, reste ferm dan lafwa, e reziste li.’ (1 Pyer 5:8, 9; 2 Korentyen 2:11) Evite fer li fasil pour Satan tronp nou par annan menm en pti lentere dan bann domenn misterye. (Deterononm 18:10-12) Etidye Parol Bondye seryezman, tou an mazinan ki Zezi Kri ti plizyer fwa refer avek Parol Bondye kan Dyab ti tant li. (Matye 4:4, 7, 10) Demann Bondye son lespri dan lapriyer. Fri son lespri i kapab ed ou pour evite akonpli bann aktivite laser, ki Satan i promot byen. (Galat 5:16-24) Deplis, priy avek santiman kan ou santi ou anba presyon Dyab ek son bann demon dan en fason ou en lot.—Filipyen 4:6, 7.

Pa bezwen ki nou viv dan lafreyer akoz Dyab. Zeova i promet pour vreman protez nou kont okenn keksoz ki Satan i kapab fer. (Psonm 91:1-4; Proverb 18:10; Zak 4:7, 8) “Rod ou lafors dan linyon avek Senyer e dan son gran pisans,” zapot Pol i dir. Alor ou pou kapab “reziste kont tou bann riz Dyab.”—Efezyen 6:10, 11.

[Portre lo paz 3]

Zezi ti konnen ki Dyab ti en vre personnaz

[Portre lo paz 5]

Pran ou pozisyon kont Dyab par etidye Parol Bondye e par priy regilyerman