Konman Lape Kris I Kapab Diriz Nou Leker?

“Ki lape Kris i diriz zot leker, sa lape ki Kris i oule zot posede ler i ti anmenn zot ansanm konman manm en sel lekor.”—KOLOSYEN 3:15.

1, 2. Dan ki fason ki “lape Kris” i diriz leker en Kretyen?

POUR bokou dimoun sa mo dirize i en mo repinyan, vi ki i fer nou mazin presyon oubyen ganny anbete. Konsey ki Pol ti donn bann Kretyen an Kolos, “Ki lape Kris i diriz zot leker,” i kapab alor donn serten sa lenpresyon ki sa pa rezonnab. (Kolosyen 3:15) Eski pa nou annan liberte moral? Akoz nou devret les en nenport keksoz oubyen en nenport dimoun diriz nou leker?

² Pol pa ti pe demann bann Kolosyen pour abandonn zot liberte pour swazir. Mo Grek ki’n ganny tradwir “diriz” dan Kolosyen 3:15 i relye avek sa mo ki ganny servi pour en ziz ki ti donn pri dan bann konpetisyon atletik dan son letan. Sa bann konpetiter ti annan en serten liberte menm si zot ti bezwen swiv lalwa sa zwe, me alafen, sa ziz ti deside lekel ki’n swiv lalwa e ki’n finalman ranport sa konpetisyon. Pareyman, nou annan liberte pour fer en kantite desizyon dan nou lavi, me letan nou fer sa, “lape Kris” i devret toultan sa “ziz”—oubyen, parey tradikter Edgar J. Goodspeed in tradwi, “en lenfliyans dominan” dan nou leker.

3. Kisisa “lape Kris”?

³ Kisisa “lape Kris”? Se sa trankilite, sa lape enteryer, ki nou gannyen letan nou vin disip Zezi e letan nou aprann ki nou’n ganny laprouvasyon ek lanmour Zeova Bondye ek son Garson. Omoman ki Zezi ti pe al kit son bann disip, i ti dir avek zot: “Mon donn zot mon lape. . . . Pa bezwen enkyet e pa bezwen per sa ki pou arive.” (Zan 14:27) Pour preski 2,000 an, bann manm swazir lekor Kris ki fidel in rezwir sa lape, e ozordi zot bann konpanyon, ‘lezot mouton,’ pe eksperyans sa menm lape. (Zan 10:16) Sa lape i devret en lenfliyans ki kontrol nou leker. Kan nou dan en leprev dir, i kapab ed nou pour evite paralize avek lafreyer oubyen trouble an ekse. Annou vwar si sa i vre kan nou fer fas avek lenzistis, kan nou ganny anvair par lenkyetid, e kan nou santi ki nou pa vo nanryen.

Kan nou fer fas avek Lenzistis

4. (a) Konman Zezi limenm ti familye avek lenzistis? (b) Konman bann Kretyen in reazir letan zot in vin bann viktim lenzistis?

⁴ Lerwa Salomon ti fer sa obzervasyon: “Zonm in domin zonm ver son ditor.” (Eklezyast 8:9) Zezi ti konnen ki sa parol i vre. Kan i ti ankor dan lesyel, i ti vwar bann lenzistis sokan ki imen ti enpoz lo kanmarad. Lo later, i ti personnelman soufer en pli gran lenzistis letan li, ki ti en zonm san pese, ti ganny akize konman en dimoun ki blasfenm e ganny met amor konman en kriminel. (Matye 26:63-66; Mark 15:27) Denozour, lenzistis i ankor komen,  e bann vre Kretyen in menm soufer plis ki lezot akoz bann ‘dimoun in ay zot.’ (Matye 24:9) Ziska prezan, malgre bann leksperyans terib ki’n ariv zot dan bann kan lanmor Nazi ek kan travay Larisi, malgre zot in vin viktim bann group rebel vyolan, bann fo lakizasyon, bann latak mansonz, lape Kris in kit zot ferm. Zot in imit Zezi, ki nou kapab lir lo li: “Kan zot ti ensilte li, i pa ti reponn par lensilt. Dan son soufrans, i pa’n fer okenn menas; me i ti met tou dan lanmen Bondye ki rann lazistis.”—1 Pyer 2:23.

5. Kan nou krwar ki en dimoun dan kongregasyon in ganny trete dan en fason enzis, ki nou devret premyerman pran an konsiderasyon?

⁵ Lo en pli pti lesel, nou kapab krwar ki en dimoun dan kongregasyon in ganny trete dan en fason enzis. Dan en tel sitiasyon, nou kapab santi parey Pol, ki ti dir: “Lekel ki tonbe e ki mwan mon pa dan sagren?” (2 Korentyen 11:29) Ki nou kapab fer? Nou merit demann nou lekor, ‘Eski sa i vreman en lenzistis?’ Souvan, nou pa konn tou sa ki’n vreman arive. Nou kapab azir brit apre ki nou’n ekout en dimoun ki pretann ki i konn en bon pe dan sa sitiasyon. Pour en bon rezon, Labib i dir: “Sa ki napa leksperyans i met lafwa dan tou parol.” (Proverb 14:15) Alor, nou bezwen fer atansyon.

6. Konman nou kapab azir si nou krwar ki nou’n ganny trete dan en fason enzis dan kongregasyon?

⁶ Sipoze nou mazinen ki nou’n personnelman vin en viktim lenzistis. Konman ki en dimoun ki annan lape Kris dan son leker pou reazir? Nou kapab vwar nesesite pour al koz avek sa dimoun ki nou santi i’n fer en fot kont nou. Apre sa, olye al diskit sa problenm avek en nenport dimoun ki pou ekoute, akoz ou pa met sa sitiasyon devan Zeova dan lapriyer e konfye dan li pour vwar ki lazistis i ganny fer? (Psonm 9:10; Proverb 3:5) I probab ki ler nou’n fer sa, nou pou satisfe pour rezourd sa problenm dan nou leker e “gard silans.” (Psonm 4:4) Dan laplipar ka, konsey Pol i aplike: “Siport kanmarad, pardonn kanmarad sak fwa ki enn ant zot i ofans en lot. Parey Senyer ti pardonn zot, zot osi pardonn kanmarad.”—Kolosyen 3:13.

7. Ki nou devret toultan rapel dan nou mannyer azir avek bann frer ek ser?

⁷ Nenport keksoz ki nou fer, nou bezwen mazinen ki menm si nou pa kapab kontrol sa ki arive, nou kapab kontrol nou reaksyon. Si nou reazir anver en lenzistis dan en fason ki pa ekilibre, sa i kapab annan en lefe pli destriktif lo nou lape ki sa lenzistis li menm. (Proverb 18:14) Nou kapab menm ofanse e aret asosye avek kongregasyon ziska ki nou santi ki lazistis in ganny fer. En psalmis ti ekri ki “napa lobstak ki fer tonbe” pour sa bann ki kontan lalwa Zeova. (Psonm 119:165) An realite, tou dimoun i eksperyans lenzistis de tanzantan. Pa zanmen les sa bann move leksperyans enterfer dan ou servis pour Zeova. Plito, les lape Kris diriz ou leker.

 Kan nou ganny anvair par Lenkyetid

8. Ki detrwa keksoz ki koz lenkyetid, e ki konsekans lenkyetid i annan?

⁸ Lenkyetid i en par dan lavi dan sa “bann dernyen zour.” (2 Timote 3:1) I vre ki Zezi ti dir: “Pa bezwen trakase lo size zot lavi, ki zot pou manze, ni pour zot lekor, ki zot pou mete.” (Lik 12:22) Me selman, pa tou lenkyetid ki konsern bann keksoz materyel. Lot ti “sagrinen” akoz bann vis ki bann zabitan Sodonm ti fer. (2 Pyer 2:7) Pol ti ganny anvair par ‘lenkyetid pour tou bann kongregasyon.’ (2 Korentyen 11:28) Zezi ti sitan dan lagoni sa zour swar avan son lanmor ki “son transpirasyon ti tonm ater parey gro gout disan.” (Lik 22:44) Byensir, pa tou lenkyetid ki demontre en lafwa feb. Toutfwa, si lenkyetid i vreman for e i kontinyen, i kapab priv nou nou lape. Lenkyetid in anvair serten, ki fer zot santi zot nepli kapab desarz bann responsabilite ki enplike dan servis Zeova. Labib i dir: “Lenkyetid dan leker en zonm i fer son leker kourbe.” (Proverb 12:25) Aprezan, ki nou kapab fer si nou ganny anvai par lenkyetid?

9. Ki serten mezir pratik nou kapab pran pour kalme nou lenkyetid, me ki bann lakoz lenkyetid ki pa kapab ganny tire?

⁹ Dan serten sitiasyon, nou kapab pran bann mezir pratik. Si en problenm medikal i lakoz nou lenkyetid, i pou saz pour pran serten aksyon, menm si sa i en desizyon personnel. * (Matye 9:12) Si nou’n sarze avek en kantite responsabilite, nou kapab donn enpe lezot. (Egzod 18:13-23) Me pour serten ki dan bann sitiasyon—parey bann paran—ki annan bann gro responsabilite ki zot pa kapab donnen. Oubyen pran legzanp en Kretyen ki pe viv avek en konzwen ki opoz li. Ouswa en fanmiy ki annan problenm finansyel oubyen ki pe viv dan en rezyon lager. Byensir, nou pa kapab elimin tou bann sours lenkyetid dan  sa sistenm. Kantmenm, nou kapab prezerv lape Kris dan nou leker. Konman?

10. Ki sa de fason ki en Kretyen i kapab sey apez son lenkyetid?

¹⁰ Rod rekonfor dan Parol Bondye i en fason. Lerwa David ti ekri: “Kan mon bann panse troublan i ogmante dan mwan, ou konsolasyon i konmans kares mon nanm.” (Psonm 94:19) “Konsolasyon” Zeova i kapab ganny trouve dan Labib. Regilyerman konsilte sa Liv enspire i ede pour prezerv lape Kris dan nou leker. Labib i dir: “Larg ou fardo lo Zeova li menm, e li li menm i pou soutenir ou. Zanmen i pou permet sa enn drwat drive.” (Psonm 55:22) Demenm, Pol ti ekri: “Pa bezwen enkyet pour nanryen, me dan tou sirkonstans par lapriyer ek siplikasyon demann Bondye tou sa ki zot bezwen avek en leker rekonnesan. Ki lape Bondye ki depas tou konpreansyon imen i ava gard zot leker ek zot lespri dan Kris-Zezi.” (Filipyen 4:6, 7) Lapriyer senser e regilye pou ed nou pour prezerv nou lape.

11. (a) Konman Zezi ti en bon legzanp dan domenn lapriyer? (b) Konman nou devret vwar lapriyer?

¹¹ Zezi ti en bon legzanp dan sa domenn. Dan serten lokazyon, i ti priy avek son Papa en sel tre pour plizyer er-d-tan. (Matye 14:23; Lik 6:12) Lapriyer ti ed li pour andir bann leprev pli terib. Sa zour swar avan son lanmor, son soufrans ti vin pli for. Ki ti son reaksyon? I ti priy “plis ankor.” (Lik 22:44) Wi, Garson parfe Bondye ti en zonm ki ti depan lo lapriyer. Alor, konbyen plis, son bann disip enparfe i devret kiltiv sa labitid pour priye! Zezi ti ansenny son bann disip pour “touzour priye e pa perdi kouraz.” (Lik 18:1) Lapriyer i en vre kominikasyon ki esansyel avek sa Enn ki konn nou pli byen ki nou konn nou menm. (Psonm 103:14) Si nou oule prezerv lape Kris dan nou leker, nou pou “priye tou letan!”—1 Tesalonisyen 5:17.

Sirmont nou bann Lanpesman

12. Pour ki rezon serten i kapab santi ki zot servis pa vo nanryen?

¹² Zeova i konsider sak son bann serviter konman presye. (Agai 2:7, not anba paz) Pourtan, bokou i vwar li difisil pour aksepte sa lide. Serten i kapab dekouraze akoz lavyeyes, lobligasyon familyal ki ogmante, oubyen lasante ki deteryore. Lezot i kapab santi zot mizerab akoz bann leksperyans kriyel ki zot in pas atraver pandan zot lanfans. Lezot ankor i kapab pe ganny tourmante akoz bann fot ki zot in komet dan lepase, ki fer zot doute si zanmen en zour Zeova pou pardonn zot. (Psonm 51:3) Kwa ki kapab ganny fer konsernan bann tel santiman?

13. Ki rekonfor Labib i donnen pour sa bann ki santi ki zot pa vo nanryen?

¹³ Lape Kris pou asir nou lanmour Zeova. Nou kapab reetablir sa lape dan nou leker par medit lo lefe ki Zezi pa’n zanmen dir ki nou valer i ganny mezire par konpar sa ki nou fer avek sa ki lezot i fer. (Matye 25:14, 15; Mark 12:41-44) Plito, sa ki i ti met lanfaz lo la se fidelite. I ti dir son bann disip: “Me sa ki reste fidel ziska lafen pou ganny sove.” (Matye 24:13) Zezi li menm ti “ganny meprize” par bann zonm, pourtan i ti napa dout ki son Papa pa ti kontan li. (Izai 53:3; Zan 10:17) E i ti dir avek son bann disip ki zot osi zot ganny seri. (Zan 14:21) Pour met lanfaz lo sa, Zezi ti dir: ‘Eski de pti sren pa i vann pour en sou? Me en sel pa tonm ater san ki zot Papa i konnen. Me menm, bann bren seve lo zot latet in konte. Alor pa bezwen per, zot vo bokou plis ki en kantite sren!’ (Matye 10:29-31) Pa sa i en lasirans rezwisan lanmour Zeova!

14. Ki lasirans nou annan ki Zeova i apresye sakenn ant nou?

¹⁴ Zezi ti osi dir: “Personn pa kapab vin kot mwan, si mon Papa ki’n anvoy mwan, pa atir li kot mwan.” (Zan 6:44) Vi ki Zeova in atir nou pour swiv Zezi, I anvi nou ganny sove. Zezi ti dir son bann disip: “Zot Papa ki  dan lesyel pa oule ki okenn sa bann pti zanfan perdi.” (Matye 18:14) Alor, si ou pe servi avek en leker konplet, ou kapab rezwir dan ou bon travay. (Galat 6:4) Si ou pe ganny tourmante par bann fot lepase, asire ki Zeova pou pardonn “larzman” sa bann ki vreman repantir. (Izai 43:25; 55:7) Si pour en lot rezon ou santi ou dekouraze, rapel ki “Zeova i pre avek sa bann ki annan leker brize; e i sov sa bann ki annan lespri ekraze.”—Psonm 34:18.

15. (a) Ki mannyer Satan i oule pran nou lape? (b) Ki konfyans nou kapab annan dan Zeova?

¹⁵ Dezir profon Satan se pour pran ou lape. Se li ki lorizin pese ki nou’n erite e ki nou pe konbat avek. (Romen 7:21-24) I vreman anvi ki ou santi ki ou lenperfeksyon i fer ou servis pa akseptab devan Bondye. Pa zanmen les Dyab demoraliz ou! Mazin byen son bann plan, e les sa konnesans fer ou determinen pour andire. (2 Korentyen 2:11; Efezyen 6:11-13) Rapel ki “Bondye i pli gran ki nou leker e i konn tou.” (1 Zan 3:20) Zeova i vwar plis ki nou defo. I osi vwar nou bann motif ek lentansyon. Aprezan, tir rekonfor dan parol sa psalmis: “Zeova pa pou abandonn son pep, ni kit son prop leritaz.”—Psonm 94:14.

Ini dan Lape Kris

16. Dan ki sans ki nou pa tousel kan nou pe esey andire?

¹⁶ Pol ti dir ki nou devret les lape Kris diriz nou leker akoz nou “ansanm konman manm en sel lekor.” Bann Kretyen swazir ki Pol ti pe ekri ti’n ganny swazir pour form parti lekor Kris, parey larestan Kretyen swazir ozordi. Zot bann konpanyon, ‘lezot mouton,’ i ini avek zot konman “en sel troupo” anba “en sel berze,” Zezi Kri. (Zan 10:16) Ansanm, en “troupo,” konpoze avek plizyer milyon dimoun dan lemonn antye pe les lape Kris diriz zot leker. Ler nou konnen ki nou pa tousel i ed nou pour andire. Pyer ti ekri: “Reste ferm dan lafwa e reziste li, parski zot konnen ki tou zot bann frer dan lemonn antye pe pas par menm soufrans.”—1 Pyer 5:9.

17. Ki motivasyon nou annan pour les lape Kris diriz nou leker?

¹⁷ Fotespere ki nou tou, aprezan, nou kontinyen kiltiv lape, sa fri esansyel lespri sen Bondye. (Galat 5:22, 23) Sa bann ki Zeova i trouv zot san tas, san repros, e anpe pou finalman ganny beni avek lavi eternel dan en paradi lo later, kot pou annan lazistis. (2 Pyer 3:13, 14) Nou annan tou rezon pour les lape Kris diriz nou leker.

[Not anba lo paz]

Eski ou rapel?

• Kisisa lape Kris?

• Konman ki lape Kris i diriz nou leker letan nou fer fas avek lenzistis?

• Konman lape Kris i ed nou pour fer fas avek lenkyetid?

• Konman ki lape Kris i rekonfort nou kan nou santi ki nou pa vo nanryen?

[Kestyon]

[Portre lo paz 29]

Kan Zezi ti ganny akize, i ti met son konfyans dan Zeova

[Portre lo paz 30]

Parey en Papa lanmour ki may ou tandreman, konsolasyon Zeova i kapab kalme nou lenkyetid

[Portre lo paz 32]

Perseverans i annan gran valer pour Bondye