Pa Arete Fer Sa Ki Byen
Pa Arete Fer Sa Ki Byen
“Annou pa aret fer sa ki byen, parski nou pou rekolte kan letan i a’n arive, si nou pa arete.”—GALAT 6:9.
1, 2. (a) Akoz nou bezwen perseverans pour kapab servi Bondye? (b) Konman ki Abraam ti montre perseverans, e kwa ki ti ed li pour fer sa?
ETAN Temwen Zeova, nou byen kontan pour fer lavolonte Bondye. Nou osi ganny rekonforte kan nou pran “zoug” en disip. (Matye 11:29) Toudmenm, servi Zeova avek Kris pa touzour fasil. Zapot Pol ti fer sa kler kan i ti enplor son bann konpanyon Kretyen: “Zot bezwen annan perseverans pour akonpli lavolonte Bondye e resevwar sa ki i’n promet zot.” (Ebre 10:36) Nou bezwen annan perseverans parski servi Bondye i kapab pa touzour fasil.
2 Lavi Abraam i definitivman prouve ki sa i vre. Plizyer fwa, i ti bezwen fer bann swa difisil e fer fas avek bann sitiasyon ki demann bokou. Ganny demande pour abandonn en lavi konfortab an Our ti zis en konmansman. Pa ti pran li bokou letan pour fer fas avek lafanmin, lopozisyon avek son bann vwazen, pros pour perdi son madanm, lopozisyon avek serten son fanmiy, ek britalite lager. Ti annan ankor bann pli gran leprev ki ti pe vini. Me Abraam pa ti zanmen aret fer sa ki byen. Sa i vreman remarkab kan nou pran an konsiderasyon lefe ki i ti napa Parol Bondye an antye parey nou ozordi. Toudmenm, i ti san dout konn sa premye profesi kot Bondye ti dir: “Mon pou met en ostilite ant ou ek sa fanm, ant ou semans ek son semans.” (Zenez 3:15) Etan donnen ki sa Semans ti pou vin atraver Abraam, natirelman Satan ti pou target li konman lobze son ostilite. Rekonnet sa ti san dout ed Abraam pour persevere avek lazwa diran son bann leprev.
3. (a) Akoz pep Zeova ozordi i bezwen ekspekte pas dan soufrans? (b) Ki lankourazman Galat 6:9 i donn nou?
3 Ozordi, pep Zeova i bezwen ekspekte pas dan soufrans. (1 Pyer 1:6, 7) Apre tou, Revelasyon 12:17 i averti nou ki Satan pe “fer lager” avek larestan Kretyen swazir. Vi ki ‘lezot mouton’ i annan en relasyon pros avek bann Kretyen swazir, zot osi zot vin target lakoler Satan. (Zan 10:16) Apard ki lopozisyon ki bann Kretyen i kapab fer fas avek dan zot minister, zot osi kapab eksperyans bann presyon dan zot lavi personnel ki difisil pour siporte. Pol i ankouraz nou: “Annou pa aret fer sa ki byen, parski nou pou rekolte kan letan i a’n arive, si nou pa arete.” (Galat 6:9) Wi, menm si Satan i annan pour bi detrir nou lafwa, nou bezwen pran nou pozisyon kont li e reste ferm dan lafwa. (1 Pyer 5:8, 9) Ki nou fidelite i kapab aporte pour nou? Zak 1:2, 3 i eksplike: “Konsider konman en lazwa, tou bann leprev ki zot bezwen pas ladan. Parski zot konnen ki si zot lafwa i reste ferm dan bann leprev, sa i prodwi pasyans.”
Latak direk
4. Ki mannyer Satan in servi bann latak direk avek lentansyon pour kas lentegrite pep Bondye?
4 Sirman lavi Abraam i demontre “bann leprev” ki en Kretyen i kapab fer fas avek ozordi. Par egzanp, i ti bezwen fer keksoz kan bann anvaiser sorti an Sinear ti fer zot latak. (Zenez 14:11-16) I pa sirprann nou pour vwar ki Satan pe kontinyen servi bann latak direk dan form persekisyon kont nou. Depi lafen Dezyenm Lager Mondyal, gouvernman dan en douzenn pei in enterdi sa travay edikasyonnel ki Temwen Zeova pe fer. Annuaire des Témoins de Jéhovah 2001 i raport vyolans ki bann Kretyen an Angola ti bezwen sibir anba lanmen zot lennmi. An depandan lo Zeova, nou bann frer dan sa bann pei in refize avek determinasyon pour abandonnen. Zot in reazir, non pa avek vyolans oubyen rebelyon, me par persiste pour prese dan en fason diskre.—Matye 24:14.
5. Ki mannyer bann zenn Kretyen i kapab vin viktim persekisyon kot lekol?
5 De lot kote, persekisyon pa neseserman enplik vyolans. Abraam ti finalman ganny rekonpanse avek de garson—Ismael ek Izaak. Zenez 21:8-12 i raporte ki en rafal Ismael ti pe ‘boufonn’ Izaak. Dan son let ki i ti ekrir bann Galat, Pol i montre ki sa pa ti senpleman en zwe antre manrmay, parski i ti dir ki Ismael ti pe persekit Izaak! (Galat 4:29) Alor bann sikannri par kanmarad lekol ensi ki bann latak verbal par bann dimoun ki opoz nou i kapab ganny apele persekisyon. En zenn Kretyen ki apel Ryan i rapel konman i ti ganny tourmante avek son bann kanmarad laklas: “Mon ti krwar ki sa 15 minit dan bis pour al lekol e retournen pa ti pou zanmen fini avek sa bann manrmay ki ti pe ensilte mwan. Zot ti bril mwan avek zagraf papye ki zot ti’n sofe avek brike.” Akoz i ti ganny trete dan sa fason kriyel? “Sa formasyon ki mon ti’n gannyen atraver lorganizasyon Bondye ti fer mwan diferan avek lezot zenn kot lekol.” Toudmenm, avek sipor son paran, Ryan ti kapab andire fidelman. Zenn, eski ou santi ou dekouraze kan lezot i monk ou? Antouka, pa abandonnen! Si ou andire fidelman, ou pou eksperyans realizasyon parol Zezi: “Zot byennere, kan en dimoun i ensilte zot, persekit zot, e koz manti pour dir tou sort keksoz mal kont zot akoz zot mon disip.”—Matye 5:11.
Lenkyetid toulezour
6. Ki bann keksoz ki kapab kree tansyon parmi bann konpanyon Kretyen ozordi?
6 Laplipar leprev ki nou fer fas avek ozordi i nou bann lenkyetid toulezour. Abraam li menm ti bezwen fer fas avek tansyon ki ti’n devlope ant son bann gardyen troupo ek sa ki pour son neve Lot. (Zenez 13:5-7) Pareyman ozordi, bann diferans dan personnalite ek bann pti zalouzi i kapab kree tansyon e vin en menas pour lape dan kongregasyon. “Kot i annan zalouzi ek lanbisyon egois, i annan dezord ek tou sort move keksoz.” (Zak 3:16) Konman i enportan pour nou pa aret dan semen, me pour konsider lape pli enportan ki nou prop lorgey parey Abraam ti fer, e pour resers lentere lezot!—1 Korentyen 13:5; Zak 3:17.
7. (a) Ki en dimoun i devret fer si i’n ganny blese par enn son konpanyon Kretyen? (b) Ki mannyer Abraam ti donn en bon legzanp konsernan mentenir en bon relasyon avek lezot?
7 I kapab en defi pour promot lape kan nou santi ki en konpanyon Kretyen in mal azir avek nou. Proverb 12:18 i dir: “I annan ki koz san reflesir konmsi bann kou lepe.” Bann parol ki ganny dir san reflesir, menm san okenn move lentansyon, i kapab bles nou en kantite. Nou santi sa blesir plis ankor si nou krwar ki nou’n ganny kalonmni oubyen nou’n vin viktim en bavardaz malisye. (Psonm 6:6, 7) Me en Kretyen pa kapab les son santiman fer li aret dan semen! Si ou dan en tel sitiasyon, pran linisyativ pour redres keksoz par koz avek sa enn ki’n ofans ou dan en fason zantiy. (Matye 5:23, 24; Efezyen 4:26) Annan sa lanvi pour pardonn sa dimoun. (Kolosyen 3:13) Kan nou pa gard rankin, nou fer li posib pour geri nou prop santiman ensi ki nou relasyon avek nou frer. Abraam pa ti gard okenn rankin ki i ti’n kapab resanti pour Lot. Okontrer, Abraam ti depese pour al defann Lot ek son fanmiy!—Zenez 14:12-16.
Bann Leprev ki nou menm nou met lo nou
8. (a) Ki mannyer bann Kretyen i kapab “met zot lekor dan en kantite tourman”? (b) Akoz Abraam ti kapab annan en pwenn-vi ekilibre lo bann keksoz materyel?
8 Nou bezwen admet ki i annan serten leprev ki se nou menm ki met lo nou. Par egzanp, Zezi ti dir avek son bann disip: “Pa akimil zot larises lo later, kot i a ganny detri par lever ek larouy, kot voler a kas laport e vole.” (Matye 6:19) Pourtan, i annan serten frer ki “met zot lekor dan en kantite tourman” par met bann keksoz materyel avan bann keksoz ki annan pour fer avek Rwayonm. (1 Timote 6:9, 10) Abraam ti pare pour sakrifye bann konfor materyel pour li fer plezir Bondye. “Par lafwa, i ti reste konman en etranze dan sa pei ki i ti’n ganny promet. I ti reste anba latant avek Izaak ek Zakob konman zeritye menm promes. Parski Abraam ti pe esper sa lavil avek fondasyon solid, ki Bondye i limenm arsitek e konstrikter.” (Ebre 11:9, 10) Lafwa ki Abraam ti annan dan en fitir “lavil,” oubyen gouvernman Bondye, ti ed li pour pa depan lo bann larises. Eski i pa ti pou saz lo nou par si nou fer parey?
9, 10. (a) Ki mannyer en dezir pour fer lezot remark nou i kapab vin en leprev? (b) Konman ki en frer ozordi i kapab konport li konman enn “ki pli pti”?
9 Annou vwar en lot laspe. Labib i donn sa bon konsey: “Si en dimoun i krwar ki i enportan, kan i en nanryen ditou, i pe anbet son prop lekor.” (Galat 6:3) Deplis, nou ganny ankouraze pour “pa fer nanryen par lespri egois e vantar, me avek limilite konsider lezot pli enportan.” (Filipyen 2:3) Serten i anmenn leprev lo zot menm kan zot pa aplik sa konsey. Vi ki zot ganny pouse par en dezir pour fer lezot remark zot, olye en dezir pour akonpli “en fonksyon nob,” zot dekouraze e mekontan kan zot pa ganny serten privilez dan kongregasyon.—1 Timote 3:1.
10 Abraam in donn en bon legzanp parski i ‘pa’n annan en tro gran lopinyon lo li menm.’ (Romen 12:3) Kan i ti rankontre Melkisedek, Abraam pa ti azir konmsi son pozisyon privilezye avek Bondye ti fer li pli siperyer. Okontrer, i ti rekonnet siperyorite Melkisedek konman en pret par pey li en dim. (Ebre 7:4-7) Pareyman, bann Kretyen denozour i devret pare pour konport zot konman bann ki ‘pli pti parmi lezot’ e pa rod pour fer lezot remark zot. (Lik 9:48) Si ou ganny lenpresyon ki bann ki pe dirize dan kongregasyon pe refiz ou serten privilez, egzamin ou lekor onnetman pour vwar bann amelyorasyon ki ou kapab fer dan ou personnalite oubyen dan lafason ki ou regle keksoz. Olye ki ou vin anmer akoz serten privilez ki ou napa, profit o maksimonm sa privilez ki ou annan—privilez pour ed lezot pour konn Zeova. Wi, “avek limilite plas zot anba kontrol pisans Bondye pour ki dan son ler ki i’n fikse, i a elev zot.”—1 Pyer 5:6.
Lafwa dan bann Keksoz ki nou pa vwar
11, 12. (a) Akoz ki serten dan kongregasyon i kapab perdi sa santiman ki nou pe viv dan en letan irzan? (b) Ki mannyer Abraam ti donn en bon legzanp konsernan batir son lavi lo lafwa dan promes Bondye?
11 Lenpresyon ki lafen sa sistenm mesan i tarde i kapab vin en lot leprev. Dapre 2 Pyer 3:12, bann Kretyen i bezwen “pe esper sa zour.” Pourtan, bokou in esper sa “zour” pour plizyer lannen, menm pour plizyer dizenn lannen. An rezilta, serten i kapab dekouraze e perdi sa santiman ki nou letan i irzan.
12 Ankor enn fwa, annou egzamin legzanp Abraam. I ti batir son lavi antye lo lafwa dan bann promes Bondye, kantmenm ti napa okenn posibilite ki zot tou zot ti pou akonpli pandan ki i ti pou ankor vivan. I vre ki i ti viv pour vwar son garson Izaak grandi. Me plizyer syek ti pou bezwen pase avan ki desandans Abraam ti pou kapab ganny konpare avek “bann zetwal dan lesyel” oubyen “bann gren disab obor lanmer.” (Zenez 22:17) Toudmenm, Abraam pa ti vin anmer oubyen dekouraze. Konsernan Abraam ek lezot patriars, zapot Pol ti dir: “Zot tou, zot in mor dan lafwa, san ki zot i’n resevwar sa bann keksoz ki zot in ganny promet, me zot in war de lwen e zot in rezoui. Zot ti deklare ki zot ti bann etranze e [bann rezidan tanporer dan pei, NW ].”—Ebre 11:13.
13. (a) Konman ki bann Kretyen denozour i parey “bann rezidan tanporer”? (b) Akoz Zeova pou anmenn en lafen avek sa sistenm?
13 Si Abraam ti kapab kontinyen santre son lavi lo bann promes ki ti pou ganny akonpli ankor “lwen” dan lavenir, konbyen nou bezwen fer parey, nou ozordi ki lakonplisman i sitan pros avek nou! Parey Abraam, nou bezwen konsider nou lekor konman “bann rezidan tanporer” dan sistenm Satan, e pa les nou tonm dan en kalite lavi kot nou atoupri oule satisfer nou bann dezir fizik. I toutafe normal ki nou anvi “lafen tou keksoz” arive la konmela menm, olye ki i senpleman pros pour arive. (1 Pyer 4:7) Petet nou pe soufer avek bann problenm lasante grav. Oubyen i kapab ki bann presyon ekonomik i tro lour lo nou. Toudmenm, nou bezwen mazinen ki Zeova pe anmenn lafen, pa selman pour liber nou dan bann sitiasyon penib, me osi pour sangtifye son prop non. (Ezekyel 36:23; Matye 6:9, 10) Lafen pou vin, pa neseserman dan en letan ki konvenab pour nou, me dan en letan ki pou pli byen akonpli lavolonte Zeova.
14. Konman ki pasyans Bondye i benefisye bann Kretyen denozour?
14 Mazinen osi, ki Zeova “pa tarde pour akonpli son promes parey serten i mazinen, me i pran pasyans avek zot, i pa oule ki personn i ganny detri, me ki tou dimoun i arive repanti.” (2 Pyer 3:9) Remarke ki Bondye i “pran pasyans avek zot”—bann manm dan kongregasyon Kretyen. I probab ki serten parmi nou i bezwen plis letan pour fer bann sanzman ‘pour Bondye trouv nou pir, san defo e dan lape avek li.’ (2 Pyer 3:14) Alor, eski nou pa devret rekonesan ki Bondye in demontre en tel pasyans?
Konman trouv Lazwa malgre Lobstak
15. Ki mannyer Zezi ti kapab gard son lazwa kan i ti fer fas avek bann leprev, e ki mannyer bann Kretyen denozour i kapab benefisye kan zot imit li?
15 Bann Kretyen denozour i kapab aprann bokou atraver lavi Abraam. I pa ti zis demontre lafwa me osi pasyans, pridans, kouraz ek lanmour dezenterese. I ti donn ladorasyon Zeova priyorite dan son lavi. Toudmenm, nou bezwen mazinen ki legzanp siprenm pour nou imite ti ganny donnen par Zezi Kri. Li osi i ti fer fas avek bokou leprev me sa pa ti zanmen fer li perdi son lazwa. Akoz? Parski i ti gard son lespri fikse lo lespwar ki ti devan li. (Ebre 12:2, 3, NW ) Se pour sa ki Pol ti priye: “Aprezan ki sa Bondye ki donn landirans ek konfor i akord zot pour annan sa menm latitid mantal parey Zezi ti annan.” (Romen 15:5, NW ) Avek en bon latitid mantal, nou kapab trouv lazwa malgre bann lobstak ki Satan i anvoy dan nou semen.
16. Ki nou kapab fer kan nou problenm i paret pli for ki nou?
16 Kan ou bann problenm i paret pli for ki ou, mazinen ki zis parey Zeova ti kontan Abraam, i kontan ou. I anvi ki ou reisi. (Filipyen 1:6) Met ou konfyans antyerman dan Zeova, konfidan ki “i pa pou permet ki nou ganny tante plis ki nou kapab siporte, me avek tantasyon i osi donn mwayen pour sorti pour ki ou kapab siporte.” (1 Korentyen 10:13) Devlop labitid pour lir Parol Bondye sak zour. (Psonm 1:2) Persevere dan lapriyer, e demann Zeova led pour ed ou andire. (Filipyen 4:6) I pou “donn son Lespri Sen tou bann ki demann li.” (Lik 11:13) Profit bann laranzman ki Zeova in fer pour soutenir ou spirityelman, tel konman nou bann piblikasyon ki baze lo Labib. Anplis ki sa, rod sipor ou bann frer ek ser. (1 Pyer 2:17) Touzour asiste bann renyon Kretyen parski se la ki ou pou ganny lankourazman ki ou bezwen pour ou kapab andire. (Ebre 10:24, 25) Rezwir dan konviksyon ki ou landirans i fer ou ganny aprouve par Bondye, e ki ou fidelite i fer son leker kontan!—Proverb 27:11; Romen 5:3-5.
17. Akoz bann Kretyen pa merit dezespere?
17 Konman son “zanmi,” Bondye ti kontan Abraam. (Zak 2:23) Malgre sa, lavi Abraam ti ranpli avek leprev ek soufrans ki ti anmenn bokou presyon. Alor, bann Kretyen i bezwen ekspekte pas dan menm leksperyans pandan sa “bann dernyen zour” ki tre move. Anfet, Labib i averti nou ki “bann move dimoun ek bann anbeter, zot pou fer touzour plis progre dan sa ki mal.” (2 Timote 3:1, 13) Olye dezespere, realize ki bann presyon ki nou fer fas avek i donn levidans ki lafen sistenm mesan Satan i pros. Me Zezi i rapel nou ki “sa ki reste fidel ziska lafen pou ganny sove.” (Matye 24:13) Alor, ‘pa arete fer sa ki byen!’ Imit Abraam, montre ki ou enn parmi sa bann ki “par lafwa ek pasyans i erit bann promes Bondye.”—Ebre 6:12.
Eski ou’n fer atansyon?
• Akoz pep Zeova denozour i ekspekte pas atraver leprev ek soufrans?
• Ki bann fason ki Satan i kapab servi bann latak direk?
• Konman ki bann konfli personnel antre Kretyen i kapab ganny rezourd?
• Konman ki lafyerte ek egoism i kapab kree bann leprev?
• Dan ki fason ki Abraam ti donn en bon legzanp konsernan esper lakonplisman bann promes Bondye?
[Kestyon]
[Portre lo paz 18]
Bokou zenn Kretyen i sibir persekisyon, zot ganny monke par zot bann kanmarad
[Portre lo paz 21]
Dan letan Abraam, lakonplisman promes Bondye ti ankor “lwen” dan lavenir, pourtan i ti batir son lavi otour zot