Eski Benediksyon Zeova Pou Ariv Lo Ou?

“E tou sa bann benediksyon i bezwen vin lo ou e ariv lo ou, akoz ou kontinyen ekout lavwa Zeova ou Bondye.”—DETERONONM 28:2.

1. Kwa ki ti pou determinen si bann Izraelit ti pou ganny benediksyon oubyen malediksyon?

VER lafen zot vwayaz dan dezer ki ti dir pour 40 an, bann Izraelit ti pe kanp dan Laplenn Moab. Later Promiz ti lanmenm la devan zot. Se la ki Moiz ti ekrir liv Deterononm, ki ti enkli en seri benediksyon ek malediksyon. Si lepep Izrael ti “kontinyen ekout lavwa Zeova” par obeir li, bann benediksyon ti pou “ariv” lo zot. Zeova ti kontan zot konman son “posesyon spesyal,” e i ti anvi demontre son pwisans dan zot faver. Me si zot pa ti kontinyen ekout li, pareyman malediksyon ti pou sirman ariv lo zot.—Deterononm 8:10-14; 26:18; 28:2, 15.

2. Ki lide nou gannyen dan sa verb Ebre ki’n ganny tradwir “kontinyen ekoute” e “ariv” dan Deterononm 28:2?

² Sa verb Ebre ki’n ganny tradwir “kontinyen ekoute” dan Deterononm 28:2 i enplik en aksyon kontinyel. Pep Zeova pa senpleman bezwen ekout li detanzaot me zot bezwen kontinyen ekout li dan tou keksoz. Se selman dan sa fason ki bann benediksyon Bondye pou ariv lo zot. I’n ganny sertifye ki sa verb Ebre ki’n ganny tradwir “ariv” ti en term ki ti ganny servi dan lasas e ki souvannfwa vedir “atrape” oubyen “zwenn.”

3. Konman ki nou kapab vin parey Zozye, e akoz sa i vreman enportan?

³ Zozye, sef Izraelit, ti swazir pour ekout Zeova, alor i ti eksperyans bann benediksyon. Zozye ti dir: “Swazir pour zot menm ozordi lekel ki zot pou servi . . . Me mwan ek mon fanmiy, nou pou servi Zeova.” Kan zot ti tann sa, lepep ti reponn: “I enposib pour nou kit Zeova pour servi lezot bondye.” (Zozye 24:15, 16) Vi ki Zozye ti annan en tre bon latitid, i ti parmi sa pti group dimoun dan son zenerasyon ki ti privilezye pour antre dan Later Promiz. Ozordi nou pros pour poz lipye lo en Later Promiz ki bokou pli siperyer—en paradi lo later kot bann benediksyon bokou pli ris ki sa bann dan letan Zozye pe esper tou bann ki annan laprouvasyon Bondye. Eski sa bann benediksyon pou ariv lo ou? Byensir, si ou kontinyen ekout Zeova. Pour ede fortifye ou rezolisyon pour fer sa, annou analiz listwar nasyonal ansyen Izrael ensi ki ennde legzanp ki kapab itil pour nou. —Romen 15:4.

 Benediksyon oubyen Malediksyon?

4. Pour reponn lapriyer Salomon, ki Bondye ti akord li, e ki mannyer nou devret santi anver bann tel benediksyon?

⁴ Pandan renny Lerwa Salomon, laplipar-di-tan bann Izraelit ti ganny bann benediksyon eksepsyonnel sorti kot Zeova. Zot ti pe viv an sekirite e zot ti ganny bann bon keksoz an abondans. (1 Lerwa 4:25) Salomon ti vin popiler pour son larises, kantmenm i pa ti demann Bondye larises materyel. Okontrer, kan i ti ankor zenn e napa ase leksperyans, i ti priye pour li ganny en leker obeisan. Zeova ti akord son demann par donn li lasazes ek konprenezon. Sa ti ed Salomon pour kapab ziz lepep byen, e disteng sa ki byen ek sa ki mal. Menm si Bondye ti osi donn li larises ek laglwar, konman en zennonm, Salomon ti apresye valer larises spirityel ki ti bokou pli siperyer. (1 Lerwa 3:9-13) Ki swa nou annan bokou oubyen pti gin lo plan materyel, nou devret vreman kontan si nou annan laprouvasyon Zeova e nou ris spirityelman!

5. Ki ti arive kan pep Izrael ek Zida pa ti kontinyen ekout Zeova?

⁵ Bann Izraelit pa ti kapab montre lapresyasyon pour benediksyon Zeova. Parey ti’n ganny dir, bann malediksyon ti vin lo zot akoz zot pa ti kontinyen ekout li. Pour fini kont, zot ti ganny konkerir par zot lennmi e bann zabitan Izrael ek Zida ti ganny egzile. (Deterononm 28:36; 2 Lerwa 17:22, 23; 2 Kronik 36:17-20) Eski pep Bondye ti aprann par en tel soufrans ki benediksyon i ariv lo zis bann ki kontinyen ekout Zeova? Sa larestan Zwif ki ti retourn dan zot pei natal an 537 A.N.L. ti ganny loportinite pour demontre si zot ti’n ganny “en leker lasazes” e si aprezan zot ti vwar nesesite pour kontinyen ekout Bondye. —Psonm 90:12.

6. (a) Akoz Zeova ti anvoy Agai ek Zekarya pour profetiz avek son pep? (b) Ki prensip ki nou kapab tire dan sa mesaz ki Bondye ti fer pase atraver Agai?

⁶ Bann Zwif ki ti’n retourn dan zot pei, ti enstal en lotel e konmans travay lo tanp an Zerizalenm. Me kan zot ti konmans ganny opoze severman, zot zel ti konmans afebli e konstriksyon ti arete. (Ezra 3:1-3, 10; 4:1-4, 23, 24) Zot ti osi konmans donn priyorite bann konfor materyel. Alor, Bondye ti anvoy profet Agai ek Zekarya pour renouvle zel son pep pour vre ladorasyon. Atraver Agai, Zeova ti dir: “Eski la i letan pour zot reste dan zot lakaz ki’n byen dekore tandis ki sa lakaz [ladorasyon] i abandonnen? . . . Fikse zot leker lo zot semen. Zot in senm bokou, me i annan en pti gin ki pe rantre. Zot manze, me pa ziska satisfaksyon. . . . E sa ki lwe son lekor pe lwe li pour en sak ki annan trou ladan.” (Agai 1:4-6) Abandonn bann keksoz spirityel pour resers bann lavantaz materyel pa anmenn benediksyon Zeova.—Lik 12:15-21.

7. Akoz Zeova ti dir avek bann Zwif: “Fikse zot leker lo zot semen”?

⁷ Vi ki bann Zwif ti’n absorbe dan bann preokipasyon toulezour, zot ti oubliye ki benediksyon divin dan laform lapli ek bann sezon prodiktif ti pou ariv lo zot si selman zot ti reste obeisan anver Bondye, menm dan persekisyon. (Agai 1:9-11) Alor, sa konsey ti vreman apropriye: “Fikse zot leker lo zot semen.” (Agai 1:7) An realite, Zeova ti pe dir zot: ‘Reflesir! Gete ki relasyon i annan ant zot travay san valer dan bitasyon ek kondisyon mon lakaz ladorasyon ki’n ganny abandonnen.’ Parol enspire bann profet Zeova ti finalman tous leker bann ki ti ekoute, parski zot ti rekonmans travay lo tanp e travay ti konplete an 515 A.N.L.

8. Ki konsey ki Zeova ti donn bann Zwif dan letan Malaki, e akoz?

⁸ Plitar, dan letan profet Malaki, bann Zwif ti konmans afeblir ankor spirityelman, zot ti menm prezant Bondye bann sakrifis ki pa ti akseptab. (Malaki 1:6-8) Alor, Zeova ti konsey zot pour anmenn en dizyenm zot prodwi dan stor e teste li pour vwar si i pa pou ouver baro lapli lesyel avek zot e vreman vers lo zot en benediksyon ziska i a nepli annan  ankor bezwen. (Malaki 3:10) Pa i ti bet pour bann Zwif rente pour ganny menm keksoz ki Bondye ti pou donn zot an abondans si zis zot ti kontinyen ekout son lavwa!—2 Kronik 31:10.

9. Lekel sa trwa dimoun ki nou pou egzamin zot lavi dan Labib?

⁹ Apard ki prezant listwar nasyonal Izrael, Labib i osi rikord lavi plizyer endividi ki ti ganny benediksyon oubyen malediksyon, depandan lo si zot ti kontinyen ekout Zeova ou non. Annou vwar ki nou kapab aprann lo trwa parmi zot—Boaz, Nabal, ek Ana. An rapor avek sa, petet ou ti a swete lir liv Rit ensi ki 1 Samyel 1:1–​2:21 ek 1 Samyel 25:2-42.

Boaz ti ekout Bondye

10. Ki Boaz ek Nabal ti annan an komen?

¹⁰ Kantmenm Boaz ek Nabal pa ti viv dan menm letan, zot ti annan serten keksoz an komen. Par egzanp, zot tou le de zot ti reste an Zida. Zot ti de propriyeter ki ti byen ris, e zot ti annan en loportinite spesyal pour demontre labonte anver en dimoun ki ti dan bezwen. Me se tou similarite ki zot ti annan.

11. Ki mannyer Boaz ti montre ki i ti kontinyen ekout Zeova?

¹¹ Boaz ti viv pandan lepok bann ziz an Izrael. I ti tret lezot avek respe, e son bann zouvriye ti byen dakor avek li. (Rit 2:4) Par son lobeisans anver Lalwa, Boaz ti fer sir ki dan son plantasyon, loportinite pour anmas sa ki reste apre rekolt ti ganny rezerve pour bann pov e aflize. (Levitik 19:9, 10) Ki Boaz ti fer letan i ti antann konsernan Rit ek Naomi e vwar ki Rit ti travay dir pour pran swen avek son vye belmer lo plan materyel? I ti donn Rit en latansyon spesyal e i ti demann son bann zonm pour les Rit pran sa ki ti reste apre rekolt dan son plantasyon. Par son parol ek son bon aksyon, Boaz ti demontre ki i ti en zonm spirityel ki ekout Zeova. Alor, i ti resevwar faver ek benediksyon Bondye.—Levitik 19:18; Rit 2:5-16.

12, 13. (a) Ki mannyer Boaz ti montre respe profon pour lalwa ki Zeova ti donnen pour prezerv leritaz en dimoun? (b) Konman ki Bondye ti beni Boaz?

¹² Laprev pli remarkab ki montre ki Boaz ti kontinyen ekout Zeova i sa fason zenere ki i ti  azir anver lalwa ki Bondye ti donnen pour prezerv leritaz en dimoun. Boaz ti fer tou sa ki i ti kapab pour fer sir ki leritaz son fanmiy—Elimelek, mari Naomi ki ti’n mor—i reste dan fanmiy Elimelek. Par “maryaz bofrer,” en vev ti bezwen marye avek enn fanmiy pli pros son mari afen ki zot kapab ganny en garson ki a prezerv son leritaz. (Deterononm 25:5-10; Levitik 25:47-49) Rit ti ofer son lekor pour marye dan plas Naomi, ki ti’n tro vye pour ganny zanfan. Apre ki en fanmiy pli pros Elimelek ti refize pour ed Naomi, Boaz ti pran Rit konman son madanm. Zot garson Obed ti ganny konsidere konman zanfan Naomi e eritye legal Elimelek.—Rit 2:19, 20; 4:1, 6, 9, 13-16.

¹³ Boaz ti resevwar bann benediksyon ris akoz i ti konform avek lalwa Bondye san mazin zis son prop lavantaz. Atraver zot garson Obed, zot de Rit zot ti ganny loner pour vin zanset Zezi Kri. (Rit 2:12; 4:13, 21, 22; Matye 1:1, 5, 6) Atraver zenerozite Boaz, nou aprann ki benediksyon i ariv lo bann ki montre lanmour pour lezot e ki azir an armoni avek sa ki Bondye i demande.

Nabal pa ti ekoute

14. Ki kalite dimoun Nabal ti ete?

¹⁴ Kontrerman avek Boaz, Nabal pa ti ekout Zeova. I ti vyol lalwa Bondye: “Ou devret kontan ou prosen parey ou prop lekor.” (Levitik 19:18) Nabal pa ti en zonm spirityel; i ti “dir e move dan son fason azir.” Menm son prop serviter ti vwar li konman “en bon nanryen.” Son non i apropriye parski i vedir “perdi larezon,” oubyen “idyo.” (1 Samyel 25:3, 17, 25) Alor, ki mannyer Nabal ti pou reazir letan i ti ganny en loportinite pour montre konsiderasyon pour en dimoun ki ti dan bezwen—David, en dimoun ki Zeova ti’n swazir? —1 Samyel 16:13.

15. Ki mannyer Nabal ti tret David, e ki mannyer Abigail ti diferan avek son mari dan sa domenn?

¹⁵ Kan David ek son bann zonm ti pe kanpe dan sa rezyon kot troupo Nabal ti ete, zot ti vin konman en proteksyon kont bann bandi e zot pa ti ni demann okenn lapey pour sa. Enn bann berze Nabal ti dir: “Zot ti parey en miray otour nou, aswar konman lizour.” Toudmenm, kan bann mesaze David ti demann Nabal en pe manze, i ti “kriy avek zot e repros zot” e fer zot retourn lanmen vid. (1 Samyel 25:2-16) Abigail, madanm Nabal, ti depese e anmenn en pe provizyon pour David. Vi ki David ti vreman ankoler, i ti pe al touy Nabal ek son bann zonm. Linisyativ ki Abigail ti pran ti sov lavi en kantite dimoun e ti anpes David vin koupab pour mert. Me Nabal ti’n al tro lwen avek son vorasite ek son leker dir. Anviron dis zour plitar, “Zeova ti frap Nabal, afen ki i ti mor.”—1 Samyel 25:18-38.

16. Ki mannyer nou kapab imit Boaz e rezet latitid Nabal?

¹⁶ Konman Boaz ek Nabal ti diferan! Annou imit sa konsiderasyon ek zenerozite ki Boaz ti demontre me rezet latitid dir e egois ki Nabal ti annan. (Ebre 13:16) Nou kapab fer sa par aplik konsey zapot Pol: “Pandan ki nou annan lokazyon, annou fer dibyen tou dimoun, sirtou nou bann frer dan lafwa.” (Galat 6:10) Ozordi, “lezot mouton,” bann Kretyen ki annan lesperans pour viv lo later, i annan sa privilez pour fer dibyen pour bann Kretyen swazir Zeova, sa larestan 144,000 ki pou ganny lavi eternel dan lesyel. (Zan 10:16, NW; 1 Korentyen 15:50-53; Revelasyon 14:1, 4) Zezi i vwar sa bann bon aksyon konmsi zot pe ganny fer pour li personnelman, e deplis kan nou fer sa bann bon keksoz nou ganny benediksyon ris Zeova.—Matye 25:34-40; 1 Zan 3:18.

Leprev ek Benediksyon Ana

17. Ki leprev Ana ti fer fas avek, e ki latitid i ti demontre?

¹⁷ Benediksyon Zeova ti osi ariv lo Ana, en madanm ki ti annan en devouman pour Bondye. I ti reste dan rezyon montanny Efraim avek son msye Elkana, ki ti en Levit. Vi ki  Lalwa ti permet, Elkana ti annan en lot madanm ki ti apel Penina. Ana pa ti kapab fer zanfan, e sa ti en repros pour en madanm Izraelit, tandis ki Penina ti annan plizyer zanfan. (1 Samyel 1:1-3; 1 Kronik 6:16, 33, 34) Olye rekonfort Ana, Penina ti azir dan en move fason ki ti irit Ana ziska ki i ti fer li plere e perdi lapeti. Sa ki ti pli grav ankor se ki sa ti ariv “lannen apre lannen,” sak fwa sa fanmiy ti al dan lakaz Zeova an Silo. (1 Samyel 1:4-8) Penina ti annan en leker vreman dir, e sa ti vreman en gran leprev pour Ana! Kantmenm sa, Ana pa ti zanmen blanm Zeova e i pa ti ni reste se li kan son mari ti al Silo. Alor, finalman en gran benediksyon ti pou ariv lo li.

18. Ki legzanp Ana ti demontre?

¹⁸ Ana in kit en bon legzanp pour pep Zeova ozordi, sirtou bann ki petet in ganny blese par bann move remark ki lezot in fer. Dan en tel sitiasyon, izol nou lekor i pa solisyon. (Proverb 18:1) Ana pa ti les son bann leprev fer li nepli anvi al sa landrwa kot Parol Bondye i ganny ansennyen e kot son pep i rasanble pour ador li. Alor, i ti reste for spirityelman. Son zoli lapriyer ki’n ganny rikorde dan 1 Samyel 2:1-10 i montre ki degre profon son spirityalite ti ete. *

19. Ki mannyer nou kapab demontre nou lapresyasyon pour bann keksoz spirityel?

¹⁹ Konman bann serviter Zeova denozour, nou pa ador kot en tabernak. Toudmenm, nou kapab montre nou lapresyasyon pour bann keksoz spirityel, zis parey Ana ti fer. Par egzanp, nou kapab montre ki nou vreman apresye bann keksoz spirityel par asiste bann renyon Kretyen ek bann diferan lasanble regilyerman. Annou servi sa bann moman pour ankouraz kanmarad dan vre ladorasyon Zeova, li ki’n akord nou sa privilez pour “servi li san lafreyer, e pour viv en lavi zis e sen devan li.”—Lik 1:74, 75; Ebre 10:24, 25.

20, 21. Ki mannyer Ana ti ganny rekonpanse pour son devouman ki i ti annan pour Bondye?

²⁰ Zeova ti remarke ki Ana ti devoue avek li e i ti rekonpans li en kantite. En fwa kan lafanmiy antye ti al Silo parey tou le zan, Ana ti senserman priy Zeova avek larm dan son lizye e fer en ve: “O Zeova bann larme, si ou san fot get sagren profon ki ou lesklav i ladan e si vreman ou mazin mwan, si ou pa oubliy ou lesklav e si vreman ou donn ou lesklav en desandans mal, mon pou donn li avek Zeova pour tou son lavi.” (1 Samyel 1:9-11) Bondye ti tann siplikasyon Ana e i ti beni li avek en garson, ki i ti apel Samyel. Kan i ti’n aret tete, Ana ti anmenn li Silo afen ki i kapab servi kot tabernak.—1 Samyel 1:20, 24-28.

²¹ Ana ti demontre lanmour pour Bondye e i ti realiz son ve ki i ti’n fer an rapor avek Samyel. E mazin benediksyon ki zot de Elkana ti eksperyanse akoz zot garson byenneme ti servi kot tabernak Zeova! Bokou paran Kretyen i eksperyans menm lazwa akoz zot zanfan i servi konman bann pionye aplentan, bann manm lafanmiy Betel, e dan lezot fason ki onor Zeova.

Kontinyen ekout Zeova!

22, 23. (a) Ki nou kapab asire si nou kontinyen ekout lavwa Zeova? (b) Ki nou pou egzaminen dan lartik swivan?

²² Si nou kontinyen ekout Zeova, ki nou kapab asire? Nou pou ris dan en sans spirityel si nou kontan Zeova avek tou nou leker e viv an akor avek nou dedikasyon avek  li. Menm si kan nou viv en tel lavi nou bezwen sibir bann leprev dir, benediksyon Zeova pou san dout ariv lo nou—souvannfwa dan bann pli gran fason ki nou kapab mazinen.—Psonm 37:4; Ebre 6:10.

²³ Pep Bondye pou ganny bokou benediksyon dan lavenir. Par zot lobeisans anver Zeova, “en gran lafoul” pou ganny prezerve dan ‘gran ladetres’ e zot pou eksperyans lazwa pour viv dan nouvo monn Bondye. (Revelasyon 7:9-14; 2 Pyer 3:13) Zeova pou konpletman satisfer bann bon dezir ki son pep pou annan. (Psonm 145:16) Toutfwa, parey nou lartik swivan pou montre, menm konmela bann dimoun ki kontinyen ekout lavwa Zeova i resevwar ‘don ekselan, e kado parfe ki sorti lao.’—Zak 1:17.

[Not anba lo paz]

Eski ou rapel?

• Ki listwar Izrael i ansenny nou konsernan benediksyon divin?

• Ki mannyer Boaz ek Nabal ti diferan?

• Ki mannyer nou kapab imit Ana?

• Akoz nou devret kontinyen ekout lavwa Zeova?

[Kestyon]

[Portre lo paz 8]

Lerwa Salomon ti priye pour en leker obeisan, e Zeova ti beni li avek lasazes

[Portre lo paz 10]

Boaz ti tret lezot avek respe ek konsiderasyon

[Portre lo paz 13]

Ana ti ganny beni en kantite akoz i ti depann lo Zeova