Kestyon Lekter

Ki “repo” ki zapot Pol ti refer avek dan Ebre 4:9-11, e ki mannyer en dimoun i “antre dan sa repo”?

Zapot Pol ti ekrir bann Kretyen Ebre dan premye syek: “I ankor reste en repo saba pour pep Bondye. Parski sa ki antre dan sa repo Bondye, i repoze avek son travay, parey Bondye ti repoze avek sa ki pour li. Alor annou fer tou zefor posib pour antre dan sa repo.”—Ebre 4:9-11.

Letan Pol ti pe koz lo repo Bondye avek Son travay, aparaman i ti pe refer avek sa ki Zenez 2:2 i dir, kot nou lir: “Setyenm zour Bondye ti’n konplet son travay ki i ti’n fer, e i ti konmans repoze setyenm zour avek tou son travay ki i ti’n fer.” Akoz Zeova ti konmans “repoze setyenm zour”? Byensir sa pa ti akoz i ti bezwen rekipere “avek tou son travay ki i ti’n fer.” Verse swivan i donn nou en lide: “Bondye ti konmans beni setyenm zour e fer li sakre, akoz sa zour in repoze avek tou son travay ki Bondye ti kree avek bi pour fer.”—Zenez 2:3; Izai 40:26, 28.

“Setyenm zour” ti diferan avek tou le sis zour ki ti’n fini pase dan le sans ki i ti en zour ki Bondye ti beni e fer sakre, setadir, en zour ki ti’n ganny met apar, oubyen dedye pour en rezon spesyal. Me ki sa rezon? Pli boner, Bondye ti revel son plan konsernan bann imen ek later. I ti dir avek premye zonm ek fanm: “Vin fertil e miltipliye, ranpli later e soumet li, e pran an soumisyon bann pwason dan lanmer ek bann kreatir ki anvole dan lesyel ek tou kreatir vivan ki pe marse lo later.” (Zenez 1:28) Kantmenm Bondye ti’n donn zonm ek later en konmansman parfe, ti pou pran letan pour later antye soumet e ganny transformen dan en paradi ki konpoze avek en fanmiy imen parfe, parey Bondye ti oule. Alor, “setyenm zour,” Bondye ti repoze, oubyen aret fer bann travay kreasyon pour permet sa ki i ti’n deza kree devlop an akor avek son lavolonte. Alafen sa “zour,” tou sa ki Bondye ti’n plàn ti pou’n bezwen vin en realite. Ki kantite letan sa repo ti pou dire?

Si nou refer avek sa ki Pol ti dir dan Ebre, nou pou remarke ki i ti fer resorti ki “i ankor reste en repo saba pour pep Bondye,” e i ti enplor son bann konpanyon Kretyen pour fer tou zefor posib “pour antre dan sa repo.” Sa i montre ki letan Pol ti ekrir sa parol, “setyenm zour” repo Bondye ki ti konmanse apepre 4,000 an avan, ti ankor pe dire. I pa pou terminen tan ki plan Bondye konsernan bann imen ek later pa ganny antyerman realize alafen Renny Milener Zezi Kri, ki limenm “Met Saba.”—Matye 12:8; Revelasyon 20:1-6; 21:1-4.

Avek sa lespwar merveye pour lavenir, Pol ti eksplike konman ki en dimoun i kapab antre dan repo Bondye. I ti ekrir: “Sa ki antre dan sa repo Bondye, i repoze avek son travay.” Sa i fer nou vwar ki kantmenm imen ti annan en konmansman parfe, limanite an zeneral pa’n antre dan repo Bondye. Sa i akoz Adan ek Ev pa ti obzerv pour lontan repo Bondye son “setyenm zour” par aksepte laranzman ki i ti fer pour zot. Okontrer, zot ti rebele e zot ti anvi vin endepandan avek Bondye. Anfet, zot ti siport konplo Satan olye aksepte bon lenstriksyon Bondye. (Zenez 2:15-17) Rezilta se ki zot ti perdi sa posibilite pour viv pour touzour lo en later paradi. Apartir sa moman, tou imen in vin lesklav pese ek lanmor.—Romen 5:12, 14.

Rebelyon imen pa’n met en lafen avek plan Bondye. Son zour repo i ankor pe kontinyen. Me avek lanmour, Zeova ti fourni en ranson atraver son Garson, Zezi Kri, afen ki tou sa ki aksepte li par lafwa i kapab esper liberasyon ek repo avek sa fardo ki pese ek lanmor in anmennen. (Romen 6:23) Se pour sa ki Pol ti enplor son bann konpanyon Kretyen pour ‘repoze avek zot prop travay.’ Zot ti bezwen aksepte provizyon ki Bondye ti’n fer pour delivrans e pa esey fer zot prop lavenir dan zot prop fason, parey Adan ek Ev ti fer. Zot ti bezwen osi evite fer bann keksoz pour esey zistifye zot lekor.

 Met akote nou bann lobzektif egois oubyen bann lobzektif sa monn afen ki nou kapab fer lavolonte Bondye vreman en repo pour nou. Zezi ti donn sa lenvitasyon: “Vin kot mwan zot tou ki fatige e ki pe anmenn en fardo e mwan, mon a donn zot repo. Pran mon zoug e aksepte mon legzanp akoz mon dou e mon annan limilite dan mon leker e zot a ganny repo. Akoz mon zoug i fasil e mon fardo i leze.”—Matye 11:28-30.

Diskisyon Pol konsernan repo Bondye e konman ki en dimoun i kapab antre dan sa repo ti en sours lankourazman pour bann Kretyen Ebre an Zerizalenm, ki ti’n sibir bokou persekisyon ek ridikil akoz zot lafwa. (Akt 8:1; 12:1-5) Pareyman, parol Pol i kapab vin en sours lankourazman pour bann Kretyen ozordi. Kan nou realize ki promes Bondye pour anmenn en paradi lo later anba dominasyon son Rwayonm drwat i pros pour akonpli, nou osi nou devret repoze avek nou prop travay e fer tou nou posib pour antre dan sa repo.—Matye 6:10, 33; 2 Pyer 3:13.

[Portre lo paz 31]

Promes Bondye konsernan en paradi lo later pou ganny realize alafen son zour repo