Konman Ou Kapab Ed En Zanfan “Prodig”?

“Rezwir akoz . . . i ti’n perdi e i’n ganny retrouve.”—LIK 15:32, NW.

1, 2. (a) Konman ki serten zenn in reazir anver laverite Kretyen? (b) Konman ki paran ek zanfan ki dan bann tel sitiasyon i santi?

“MON pe kit laverite!” I en sok pour bann paran ki annan lakrent pour Bondye ki’n fer en kantite zefor pour elve zot zanfan dan laverite antann enn zot zanfan dir zot sa! Lezot zenn zot zis ‘elwannyen’ san ki zot vreman fer konnen zot lentansyon. (Ebre 2:1) En kantite sa bann zenn i resanble sa garson prodig dan parabol Zezi, ki ti kit lakour son papa e depans son larzan dan en lot pei.—Lik 15:11-16.

² Menm si laplipar Temwen Zeova pa pe fer fas avek sa problenm, pour bann ki dan sa sitiasyon, napa okenn mo rekonfortan ki kapab retir zot sagrinasyon konpletman. Keksoz ki nou pa devret inyore se sa latristes ki sa zenn dezobeisan limenm pe eksperyanse. I kapab ki dan fon son leker, son konsyans pe trouble li en kantite. Dan parabol Zezi, sa garson prodig ti finalman ‘retourn a larezon’ e sa ti fer son papa kontan. Konman ki bann paran ek lezot dan kongregasyon i kapab ed sa bann zenn pour ‘retourn a larezon’?—Lik 15:17, NW.

Akoz serten Zenn i kit Laverite

3. Nonm serten rezon ki kapab fer en zenn deside pour kit kongregasyon Kretyen?

³ Plizyer santenn milye zenn pe zwayezman  servi Zeova dan kongregasyon Kretyen. Me akoz ki lezot zenn i kite? Zot kapab santi ki zot pe mank serten keksoz ki sa monn pe ofer. (2 Timote 4:10) Oubyen zot kapab panse ki proteksyon kongregasyon Zeova i tro restrikte. Lezot lakoz ki kapab fer en zenn elwannyen avek troupo Zeova i en konsyans koupab, en gran lentere avek en dimoun lot sèks, oubyen en dezir pour ganny aksepte par lezot. En zenn i osi kapab aret servi Zeova akoz i panse ki i annan serten lipokrizi dan son paran oubyen dan lezot Kretyen.

4. Kwa ki souvan-d-fwa lakoz pour en zenn elwannyen avek laverite?

⁴ En zanfan ki annan en latitid oubyen en konportman rebel i souvan-d-fwa montre ki i pe afebli spirityelman, sa i endike kwa ki dan son leker. (Proverb 15:13; Matye 12:34) Pour nenport rezon ki en zenn i elwannyen, sours sa problenm i souvan-d-fwa akoz i napa ‘en konnesans egzakt lo laverite.’ (2 Timote 3:7) Olye ki senpleman servi Zeova zis akoz i’n abitye fer li, i enportan ki bann zenn i kiltiv en relasyon pros avek Zeova. Kwa ki pou ed zot fer sa?

Apros avek Bondye

5. Kwa ki esansyel afen ki en zenn i kiltiv en relasyon personnel avek Bondye?

⁵ “Apros avek Bondye,” disip Zak ti dir, “e i ava apros avek zot.” (Zak 4:8) Pour arive fer sa, en zenn i bezwen ganny ede pour kiltiv en dezir pour Parol Bondye. (Psonm 34:8) Pour konmanse i pou bezwen “dile”—bann lansennyman debaz Labib. Anmezir ki i pran plezir dan Parol Bondye e gradyelman konmans kontan “manze solid”—lenformasyon profon—i pa pou pran bokou letan pour li atenn matirite spirityel. (Ebre 5:11-14; Psonm 1:2) En zenn ki ti admet ki i ti’n ganny absorbe dan fason viv sa monn ti konmans apresye bann valer spirityel. Kwa ki ti ed li retournen? I ti met an pratik en sizesyon pour lir Labib antye, i ti gard en progranm lektir Labib regilye. Wi, lir Parol Bondye regilyerman i esansyel pour kiltiv en relasyon pros avek Zeova.

6, 7. Konman ki paran i kapab ed zot zanfan pour devlop en dezir pour Parol Bondye?

⁶ I vreman enportan ki paran i ed zot zanfan pour kiltiv en lanvi pour lir Parol Bondye. Menm si i ti annan en letid familyal regilye, en zenn fiy adolesan ti asosye avek bann bandi. Konsernan son letid fanmiy, i ti  dir: “Kan mon papa ti demann kestyon, mon ti zis lir larepons, san ki mon ti ni menm get son figir.” Olye ki senpleman kouver en serten kantite lenformasyon pandan letid familyal, bann paran saz pou itiliz lar pour ansennyen. (2 Timote 4:2, NW ) Pour en zenn kontan son letid, i bezwen santi ki sa letid i relye avek bann keksoz ki konsern li ek son lavi personnel. Akoz pa poz bann kestyon pwenn-vi e les li eksprim son lekor? Ankouraz bann zenn pour fer laplikasyon pratik sa size ki pe ganny diskite. *

⁷ Anplis ki sa, fer bann diskisyon Biblik vivan. Kan i apropriye fer sa bann zenn akt sa bann levennman ki trouve dan Labib. Ed zot pour mazinen kote e kimannyer sa pei ti ete kot bann levennman ki pe ganny diskite ti arive. Paran i osi kapab ed zot zanfan par servi bann map ek latab ki dan Labib. Wi, avek en pti limazinasyon, en letid familyal i kapab vivan e varye. Paran i devret osi egzamin zot prop relasyon avek Zeova. Anmezir ki zot apros avek Zeova, zot kapab ed zot zanfan pour fer parey.—Deterononm 6:5-7.

8. Konman ki lapriyer i kapab ed en dimoun pour apros avek Bondye?

⁸ Lapriyer osi i kapab ed en dimoun pour apros avek Bondye. En zenn fiy adolesan ti santi li angwase akoz i pa ti konnen ki swa i pou fer ant son lavi Kretyen ek son lasosyasyon avek son bann zanmi ki pa ti partaz menm krwayans avek li. (Zak 4:4) Ki i ti fer konsernan sa? “Pour premye fwa dan mon lavi,” i ti admet, “mon ti vreman priy Zeova konsernan lafason ki mon ti santi.” I ti konklir an dizan ki son lapriyer ti ganny reponn kan i ti finalman trouv en zanmi dan kongregasyon ki i ti kapab konfye. I ti santi ki Zeova ti pe gid li, alor i ti konmans batir en relasyon personnel avek Bondye. Paran i kapab ed zot zanfan par amelyor kalite zot prop lapriyer. Kan zot pe priy an fanmiy, paran i kapab senserman eksprim zot santiman, afen ki zot zanfan i kapab santi sa relasyon personnel ki paran i annan avek Zeova.

Pasyan me ferm

9, 10. Ki legzanp ki Zeova in demontre an sa ki konsern demontre pasyans avek bann Izraelit rebel?

⁹ Kan en zenn i konmans elwannyen, i kapab esey izol li e reziste okenn zefor ki son paran i fer pour antretenir en diskisyon spirityel avek li. Ki bann paran i kapab fer dan en sitiasyon difisil koumsa? Konsider sa ki Zeova ti fer avek pep Izrael. Pour plis ki 900 an i ti toler ‘lantetman’ bann Izraelit avan abandonn zot dan zot rebelyon. (Egzod 34:9; 2 Kronik 36:17-21; Romen 10:21) Menm si zot ti kontinyen ‘teste li,’ Zeova ti ‘bon’ avek zot. “Plizyer fwa i ti fer son lakoler retournen, e i pa ti pou eksit tou son lakoler.” (Psonm 78:38-42) Bondye ti parfe dan son mannyer ki i ti azir avek zot. Paran ki annan lanmour i imit Zeova e zot pasyan kan zot zanfan pa reazir imedyatman avek bann zefor ki zot fer pour ed li.

¹⁰ Letan ki nou pasyan i pa senpleman vedir “soufer pour en bon pe letan”; i vedir ki nou refize pour perdi lespwar ki sa problenm relasyonnel i kapab aranze. Zeova in kit en legzanp lo konman pour demontre bokou pasyans. I ti pran linisyativ par anvoy son bann mesaze kot bann Izraelit “ankor e  ankor.” Zeova “ti annan konpasyon pour son pep,” menm si “zot ti kontinyen gognard bann mesaze vre Bondye e mepriz son bann parol.” (2 Kronik 36:15, 16) I ti sipliy bann Izraelit, an dizan: “Sorti, silvouple, zot tou dan zot move semen.” (Zeremi 25:4, 5) Toutfwa, Zeova pa ti pare pour abandonn son bann prensip drwat. Bann Izraelit ti ganny demande pour ‘retourn’ anver Zeova ek son bann prensip.

11. Konman ki paran i kapab annan pasyans me anmenmtan ferm kan i pe ed en zanfan ki pe elwannyen?

¹¹ Paran i kapab imit pasyans Zeova par pa abandonn tro vitman tou lespwar lo en zanfan ki pe elwannyen. San ki zot perdi lespwar, zot kapab pran linisyativ pour kontinyen kominik avek zot zanfan oubyen pour reetablir kominikasyon. Anmenmtan ki zot pe respekte bann prensip drwat, zot kapab “ankor e ankor” sipliy sa zanfan pour retourn ver semen laverite.

Kan en Zanfan miner i ganny ekskli

12. Ki responsabilite paran i annan anver en zanfan miner ki reste avek zot me ki’n ganny ekskli dan kongregasyon?

¹² Me ki pou arive si en zanfan miner ki reste avek son paran i enplike dan en fot grav e ki pa oule repantir i ganny ekskli dan kongregasyon? Lefe ki sa zanfan i reste avek son paran, zot ankor annan sa responsabilite pour enstri e disiplin li an armoni avek Parol Bondye. Konman ki sa i kapab ganny fer? —Proverb 6:20-22; 29:17.

13. Konman ki paran i kapab esey tous leker en zanfan ki pe fer pese?

¹³ I posib—annefe, i pou pli meyer—pour donn en tel lenstriksyon ek disiplin pandan en letid Labib an prive. En paran i devret get pli lwen ki latitid difisil sa zanfan e esey vwar kwa ki dan son leker. Ki kantite grav son maladi spirityel i ete? (Proverb 20:5) Eski ou kapab tous son leker? Ki bann lekritir ki kapab fer lefe? Zapot Pol i asir nou ki: “Parol Bondye i vivan e i annan pisans. I pli koupe ki en lepe ki koup de kote. I kapab penetre ziska separasyon lam ek lespri, zwentir ek lanmwel lezo. I arive desifre tou dezir ek sekre leker imen.” (Ebre 4:12) Wi, paran i kapab fer plis ki senpleman dir avek sa zanfan pa partisip dan bann keksoz mal ankor. Zot kapab konmanse e travay pour favoriz gerizon spirityel.

14. Ki premye pa ki en zenn ki pe fer keksoz mal i devret pran pour reetablir son relasyon avek Zeova, e konman ki paran i kapab ed sa zanfan pour pran sa pa?

 ¹⁴ En zenn ki pe fer bann keksoz mal i bezwen reetablir son relasyon avek Zeova. Premye keksoz ki i bezwen fer se “repantir . . . e retournen.” (Akt 3:19, NW; Izai 55:6, 7) Pour kapab ed en zenn dan zot lakour pour repantir, paran i devret ‘kontrol zot lekor anba keksoz mal, ansenny avek douser’ sa zanfan ki pa tro anvi sanze. (2 Timote 2:24-26) Zot bezwen “reprimann” li dan sans Biblik. Sa mo Grek ki’n ganny tradwir “reprimann” i kapab osi ganny tradwir “donn levidans konvenkan.” (Revelasyon 3:19; Zan 16:8, NW ) Alor, pour reprimann en zanfan, i enplik montre li dekwa levidans pour konvenk li ki son aksyon i vreman en pese. I vre ki i pa fasil pour fer sa. Kan i posib, paran i kapab tous son leker, par servi bann Lekritir apropriye pour konvenk sa zanfan. Zot devret esey ed li pour konpran nesesite pour “ay sa ki move, e kontan sa ki bon.” (Amos 5:15) I kapab retourn dan son ‘bon sans e debaras li dan pyez dyab.’

15. Ki rol ki lapriyer i zwe dan reetablir relasyon en dimoun ki’n fer pese kont Zeova?

¹⁵ Lapriyer i endispansab kan en dimoun pe reetablir son relasyon avek Zeova. Byensir, personn pa devret “priye” konsernan pese ki fer onte ki pe ganny pratike klerman san repantir par okenn endividi ki’n deza asosye avek kongregasyon Kretyen. (1 Zan 5:16, 17; Zeremi 7:16-20; Ebre 10:26, 27) Toutfwa, paran i kapab demann Zeova lasazes pour ed zot fer fas avek sa sitiasyon. (Zak 1:5) Si en zenn ki’n ganny ekskli i donn levidans ki i pe repantir me i pa “posed lasirans devan Bondye,” paran i kapab priye ki si Bondye i trouv en baz pour pardonn fot sa zanfan, ki Son lavolonte i ganny fer. (1 Zan 3:21) Letan sa zanfan i antann sa lapriyer sa i devret ed li pour vwar Zeova konman en Bondye mizerikord. * —Egzod 34:6, 7; Zak 5:16.

16. Konman ki nou kapab ed bann manm fanmiy ki zot zanfan in ganny ekskli?

¹⁶ Si en zenn ki’n batize i ganny ekskli, bann manm dan kongregasyon i ekspekte pour ‘pa asosye avek’ li. (1 Korentyen 5:11; 2 Zan 10, 11) Sa i kapab finalman ed li pour ‘retourn a larezon’ e benefisye ankor avek proteksyon kongregasyon Bondye. (Lik 15:17, NW ) Menm si i retourn dan lorganizasyon Bondye oubyen non, bann manm dan kongregasyon i kapab ankouraz fanmiy sa zenn ki’n ganny ekskli. Nou tou nou kapab rod loportinite pour montre nou “santiman” e pour “annan konpasyon” anver zot.—1 Pyer 3:8, 9.

 Konman Lezot i kapab ede

17. Ki bann manm dan kongregasyon i devret gard antet kan zot pe esey ed en zanfan ki pe egare?

¹⁷ Me konsernan en zenn ki pa’n ganny ekskli dan kongregasyon Kretyen me ki’n afeblir spirityelman? “Si en parti lekor i soufer,” zapot Pol ti ekrir, “tou lezot parti i soufer avek li.” (1 Korentyen 12:26) Lezot i kapab pran en lentere aktif dan sa tel zenn. Byensir, nou bezwen pran bann prekosyon neseser, lefe ki en zenn ki malad spirityelman i kapab enfliyans lezot zenn dan en fason negatif. (Galat 5:7-9) Dan en kongregasyon, bann adilt ki ti annan bon lentansyon e ki ti anvi ed serten zenn ki ti’n afebli spirityelman, ti envit zot bann rankont pour ekout lanmizik popiler ansanm. Menm si sa bann zenn ti aksepte e rezwir bann tel aktivite, zot lenfliyans lo kanmarad ti finalman fer zot aret asosye avek kongregasyon. (1 Korentyen 15:33; Zid 22, 23) Se pa bann rankont sosyal san okenn gidans spirityel ki kapab ed sa zanfan ki malad spirityelman, me frekantasyon ki ed li kiltiv lanmour pour bann keksoz spirityel. *

18. Konman ki nou kapab imit latitid sa papa dan parabol Zezi?

¹⁸ Kan en zenn ki’n kit kongregasyon i retourn dan Lasal Rwayonm oubyen asiste en lasanble, mazinen konman i kapab santi. Eski pa nou devret montre latitid akeyan parey sa papa dan parabol Zezi? (Lik 15:18-20, 25-32) En adolesan ki ti’n kit kongregasyon Kretyen e plitar asiste en lasanble distrik ti dir: “Mon ti krwar ki tou dimoun ti pou inyor en dimoun parey mwan, me bann frer ek ser ti apros mwan e akeyir mwan. Sa ti tous mwan en kantite.” I ti konmans etidye Labib ankor e plitar i ti batize.

Pa abandonnen

19, 20. Akoz nou devret mentenir en latitid pozitif an sa ki konsern en zanfan prodig?

¹⁹ Ed en zanfan ‘prodig’ pour ‘retourn a larezon’ i demann pasyans e i kapab en defi pour paran ek lezot. Me pa abandonnen. “Nou Senyer pa tarde pour akonpli son promes parey serten i mazinen, me i pran pasyans avek zot, i pa oule ki personn i ganny detri, me ki tou dimoun i arive repanti.” (2 Pyer 3:9) Nou annan lasirans Biblik ki Zeova i oule ki bann dimoun i repantir e viv. Annefe, i’n pran sa linisyativ an fezan en laranzman pour rekonsilye bann imen avek li. (2 Korentyen 5:18, 19) Son pasyans in fer posib pour milyon dimoun revin dan zot bon sans.—Izai 2:2, 3.

²⁰ Aprezan, eski paran pa i devret servi tou bann metod Biblik ki posib pour ed zot zanfan adolesan retourn a larezon? Imit Zeova, annan pasyans letan ou pe pran bann mezir pour ed ou zanfan retourn kot Zeova. Reste byen atase avek bann prensip Labib, e esey reflekte bann kalite Zeova parey lanmour, lazistis, ek lasazes anmenmtan ki ou kontinyen priy li pour ed ou. Zis parey en kantite zenn rebel e difisil in reponn lenvitasyon ranpli avek lanmour ki sorti kot Zeova pour retournen, ou zanfan prodig i kapab retourn kot troupo Bondye ki pou protez li.—Lik 15:6, 7.

[Not anba lo paz]

Eski ou rapel?

• Kwa ki kapab lakoz bann problenm kan bann zenn i kit kongregasyon?

• Konman ki bann zenn i kapab ganny ede pour kiltiv en relasyon personnel avek Zeova?

• Akoz ki paran i bezwen pasyan me ferm kan i pe ed en zanfan prodig?

• Konman ki bann ki dan kongregasyon i kapab ed en zenn prodig pour retournen?

[Kestyon]

[Portre lo paz 25]

Lir Parol Bondye i esansyel pour kiltiv en relasyon avek Zeova

[Portre lo paz 25]

Lapriyer senser bann paran i kapab ed zot zanfan santi sa relasyon personnel ki zot annan avek Zeova

[Portre lo paz 27]

Akeyir en zanfan prodig kan i ‘retourn a larezon’

[Portre lo paz 28]

Pran bann pa pozitif pour ed ou zanfan retourn kot Zeova