Vre Lafwa—Eski i ankor posib?

“Lafwa i en konfyans solid e vivan dan lagras Bondye, telman sir e serten ki sa krwayan pou riske son lavi lo la mil fwa.”—MARTIN LUTHER, 1522.

“Nou preski deza en sosyete kot lafwa Kretyen ek son bann pratik in preski disparet.”—LUDOVIC KENNEDY, 1999.

BANN pwenn-vi lo lafwa i kapab diferan dan en fason enpresyonan. Ti komen dan lepase pour dimoun annan lafwa dan Bondye. Denozour, dan en monn ki ranpli avek dout ek soufrans, vre lafwa dan Bondye e dan Labib pe disparet rapidman.

Vre Lafwa

Pour bokou dimoun, “lafwa” i senpleman vedir annan en krwayans relizye oubyen swiv en form ladorasyon. Toutfwa, parey i ganny servi dan Labib, “lafwa” i an realite en konfyans total—konfyans ferm e konplet dan Bondye ek son bann promes. I en kalite ki idantifye en disip Zezi Kri.

En fwa, Zezi Kri ti koz konsernan nesesite pour priye e pour “pa perdi kouraz.” An fezan sa, i ti soulev en kestyon konsernan si vre lafwa ti pou vreman egziste dan nou letan. I ti demande: “Ler Fis-de-Lonm pou vini, eski i pou trouv lafwa lo later?” Akoz i ti soulev en tel kestyon?—Lik 18:1, 8.

Perdi Lafwa

Bokou keksoz i kapab fer dimoun perdi lafwa ki zot annan. Sa bann keksoz i enkli bann traka ek bann leprev dan lavi toulezour. Par egzanp, profeser Michael Goulder ti en pret an Manchester, Langleter, letan ki en avyon ti kraze Munich an 1958, kot bokou zwer foutbol Manchester United ti mor. Dan en progranm televizyon BBC, anonser Joan Bakewell ti eksplike ki Goulder “ti napa kouraz e pa ti kapab fer nanryen letan i ti war soufrans ki sa bann dimoun ti ladan.” Konsekans, se ki i ti “perdi son lafwa dan en Bondye ki entervenir dan destinasyon imen.” Goulder ti dir ki i  krwar ki “Labib i pa . . . parol Bondye ki napa fot” me plito “parol zonm ki kapab annan fot, petet avek serten lenspirasyon divin dan ennde landrwa.”

Parfwa, lafwa i zis diminyen ptit-a-pti. Se sa ki ti arive avek Ludovic Kennedy, en ekriven e zournalis. I ti dir ki depi lanfans son “bann dout ek lensertitid [konsernan Bondye] in ale vini e [son] doutans ti ranforsi.” Ti sanble ki personn pa ti pou kapab donn li bann larepons satisfezan pour son bann kestyon. Lanmor son papa lo lanmer ti en tre gran defet ki i ti sibir kont son lafwa ki ti deza tre feb. Lapriyer avek Bondye pour “prezerv nou kont danze lanmer e kont lennmi” pa ti ganny reponn kan bann pasaze dan sa bato ki son papa ti ladan ti ganny atake e detri par bann bato lager Alman pandan Dezyenm Lager Mondyal. —All in the Mind—A Farewell to God.

Bann tel leksperyans i ariv souvan. Zapot Pol ti dir ki “pa tou dimoun ki annan lafwa.” (2 Tesalonisyen 3:2) Ki ou panse? Eski vre lafwa dan Bondye e dan son Parol i ankor posib dan en monn kot doutans pe kontinyen ogmante? Egzamin sa ki lartik swivan i annan pour dir lo sa size.