Lekel Ki Pou Separ Nou Avek Lanmour Bondye?
Lekel Ki Pou Separ Nou Avek Lanmour Bondye?
“Nou, nou kontan akoz Bondye in kontan nou an premye.”—1 ZAN 4:19.
1, 2. (a) Akoz i enportan pour konnen ki i annan dimoun ki kontan nou? (b) Lanmour lekel ki nou bezwen plis?
ESKI i enportan pour ou konnen ki i annan dimoun ki kontan ou? Depi lanfans ziska adilt, imen i bezwen lanmour pour epanouir. Eski ou’n deza obzerv en pti baba letan son manman in ser li tandreman dan son lebra? Souvannfwa, nenport kwa ki kapab pe pase otour li, letan sa pti baba i fikse regar souriyan son manman i santi li alez e dan trankilite, dan lebra en manman ki kontan li. Oubyen eski ou rapel konman ou ti ete dan sa bann lannen troublan, dan ou ladolesans? (1 Tesalonisyen 2:7) Parfwa, petet ou pa ti konnen ki ou ti anvi oubyen menm ou pa ti konnen ki mannyer ou ti pe santi, pourtan ki degre enportan i ti ete pour ou konnen ki ou papa ek ou manman i kontan ou! Eski pa i ti soulazman pour ou konnen ki ou ti kapab apros zot kan ou ti annan okenn problenm oubyen okenn kestyon? Vreman, enn parmi bann keksoz ki nou pli bezwen tan ki nou ankor vivan se ki lezot i kontan nou. En tel lanmour i asir nou ki nou annan valer.
2 Lanmour konstan ki en paran i demontre anver en zanfan i definitivman kontribye ver en bon devlopman ek balans. Me sa ki pli enportan pour nou byennet spirityel e emosyonnel se pour annan konfyans ki nou Papa seles, Zeova, i kontan nou. Petet i annan serten parmi nou bann lekter ki zot paran pa’n vreman montre en lentere dan zot. Si sa i leka avek ou, pran kouraz. Menm si ou pa’n ganny lanmour, oubyen menm si ou pa’n ganny ase lanmour avek ou paran, lanmour fidel Bondye i la pour konble sa mankman.
3. Ki mannyer Zeova in rasir son pep ki i kontan zot?
3 Atraver son profet Izai, Zeova ti fer resorti ki en manman i kapab “oubliy” son pti baba, me li Zeova i pa pou oubliy son pep. (Izai 49:15) Pareyman, David ti dir avek konfyans: “Si mon manman ek mon papa i kit mwan, Zeova li menm pou resevwar mwan.” (Psonm 27:10) Pa sa i rekonfort nou! Nenport ki sitiasyon ou ladan, si ou’n dedye ou lavi avek Zeova, ou pa devret zanmen oubliye ki i kontan ou bokou plis ki okenn imen i kapab kontan ou!
Reste dan Lanmour Bondye
4. Konman ki bann Kretyen premye syek ti ganny rasire ki Bondye i kontan zot?
4 Kan ki ou ti konn lanmour Bondye pour premye fwa? Petet, ou’n annan preski menm leksperyans avek bann Kretyen premye syek. Dan senkyenm sapit let Pol ki i ti adres avek bann Romen, i ti dekrir konman ki bann peser ki oparavan ti elwannyen avek Bondye ti arive konn lanmour Zeova. Dan verse 5, nou lir: “Lanmour Bondye in ganny deverse dan nou leker par Sent-Espri ki Bondye in donn nou.” Dan verse 8, Pol ti azoute: “Bondye in prouv son lanmour pour nou: kan nou ti ankor peser, Kris in mor pour nou.”
5. Kwa ki ti ed ou pour realize ki grander lanmour Bondye i ete?
5 Pareyman, kan laverite dan Parol Bondye ti ganny entrodwir avek ou e ou ti konmans demontre lafwa, lespri sen Zeova ti konmans fer lefe dan ou leker. Se dan sa fason ki ou ti konmans realize ki kantite Zeova in fer kan i’n anvoy son garson ki i ti byen kontan pour vin mor pour ou. Alor Zeova in ed ou pour konnen ki kantite egzakteman i kontan limanite. Eski ou leker pa ti touse kan ou ti realize ki menm si ou ti ne konman en peser, elwannyen avek li, Zeova in ouver semen pour bann imen ganny deklare drwat avek lespwar pour viv eternelman? Eski ou pa ti santi en lanmour pour Zeova?—Romen 5:10.
6. Akoz nou kapab parfwa santi nou lwen avek Zeova?
6 Apre ki ou ti’n ganny atire par lanmour ou Papa seles e apre ki ou ti’n aranz ou lavi pour fer li plezir, ou ti dedye ou lavi avek li. Aprezan ou anpe avek Bondye. Toudmenm, eski parfwa ou santi ou lwen avek Zeova? Sa i kapab arive avek nou tou. Me pa zanmen oubliye ki Bondye pa sanze. Son lanmour i stab e touzour la parey soley, ki pa zanmen aret anvoy son reyon lalimyer lo later. (Malaki 3:6; Zak 1:17) Parkont, nou nou kapab sanze—kantmenm pa pour lontan. Anmezir ki later i vire, lanmwatye nou plannet i ganny anvlope dan fernwanr. Demenm, si nou vir kantmenm zis en pti gin kont Zeova, nou kapab santi ki nou relasyon avek li i vin fre. Ki nou kapab fer pour redres sa sitiasyon?
7. Konman ki ler nou egzamin nou lekor sa i kapab ed nou pour reste dan lanmour Bondye?
7 Si nou santi ki nou pe konmans separe avek lanmour Bondye, nou devret demann nou lekor: ‘Eski mon’n pran lanmour Bondye alalezer? Eski ptit-a-pti mon’n dekile avek sa Bondye vivan e Bondye lanmour, e mon pe montre dan diferan fason ki mon lafwa pe feb? Eski mon pe konsantre lo bann keksoz laser olye lo bann keksoz lespri?’ (Romen 8:5-8; Ebre 3:12) Si nou’n separe avek Zeova, nou kapab pran bann pa pour redres sa sitiasyon, e pour reganny en relasyon pros e solid avek li. Zak i enplor nou: “Apros avek Bondye, e i ava apros avek zot.” (Zak 4:8) Annou pran aker parol Zid: “Mon bann byenneme, kontinyen fer progre dan zot lafwa ki tre sen, e priye par Sent-Espri. Reste dan lanmour Bondye.”—Zid 20, 21.
Sirkonstans i sanze, me sa pa afekte Lanmour Bondye
8. Ki bann sanzman ki kapab arive en sel kou dan nou lavi?
8 Dan sa sistenm ki nou pe viv, nou bezwen fer fas avek bokou sanzman. Lerwa Salomon ti fer remarke ki “letan ek levennman san ekspekte i ariv lo [nou] tou.” (Eklezyast 9:11) I kapab ki en sel kou nou lavi i sanze konpletman. Ozordi nou an bonn sante, demen nou kapab byen malad. Ozordi nou kapab annan en travay stab, demen nou kapab vwar nou san en travay. Lanmor i kapab pran en dimoun ki nou byen pros avek san averti. Dan serten pei, bann Kretyen i kapab viv anpe pour en serten letan, e apre en sel kou persekisyon vyolan i eklate. Petet lezot i fer bann fo lakizasyon lo nou, e akoz sa, nou eksperyans serten lenzistis. Wi, lavi pa stab oubyen i pa antyerman an sekirite.—Zak 4:13-15.
9. Akoz i byen pour egzamin en porsyon Romen sapit 8?
9 Kan maler i ariv lo nou, nou kapab konmans santi ki nou’n ganny abandonnen, e menm mazinen ki lanmour Bondye pour nou in diminyen. Vi ki sa bann keksoz i kapab ariv avek nou tou, i ti a byen si nou egzamin avek bokou latansyon parol zapot Pol ki’n ganny rikorde dan Romen sapit 8, ki tre rekonfortan. Sa bann parol ti ganny adrese avek bann Kretyen ki’n ganny swazir avek lespri sen. Me, anfet i kapab aplik osi pour bann ki form parti avek lezot mouton, zot ki’n ganny deklare drwat konman zanmi Bondye, zis parey ti leka avek Abraam avan lepok Kretyen.—Romen 4:20-22; Zak 2:21-23.
10, 11. (a) Ki bann lakizasyon bann lennmi i fer parfwa kont pep Bondye? (b) Akoz bann tel lakizasyon pa devret trakas bann Kretyen?
10 Lir Romen 8:31-34. Pol i demande: “Si Bondye i pour nou, lekel ki pou kapab kont nou?” I vre ki Satan ek son monn mesan i kont nou. Nou bann lennmi i kapab fer bann fo lakizasyon lo nou menm ankour. Serten paran Kretyen in ganny akize konmkwa zot pa kontan zot zanfan akoz zot pa les zot pran bann tretman medikal ki vyol lalwa Bondye oubyen les zot partisip dan bann lafet payen. (Akt 15:28, 29; 2 Korentyen 6:14-16) I annan lezot Kretyen fidel ki’n ganny akize konmkwa zot pe rebel kont lotorite parski zot pa oule touy zot prosen dan lager oubyen partisip dan politik. (Zan 17:16) Serten dimoun ki opoz nou in propaz bann mansonz dan medya e menm akiz Temwen Zeova konman en sekt danzere.
11 Me pa oubliye ki dan letan bann zapot, zot ti dir sa: “Bokou dimoun partou pe koz kont sa [sekt, NW ].” (Akt 28:22) Eski sa bann fo lakizasyon i vreman enportan pour nou? Se Bondye ki deklar bann vre Kretyen drwat, baze lo zot lafwa ki zot annan dan sakrifis Kris. Akoz Zeova ti ava aret kontan son bann adorater apre ki i’n donn zot son kado pli presye—son prop garson ki i ti telman kontan? (1 Zan 4:10) Aprezan ki Kris in leve parmi bann mor e i’n ganny plase lo kote drwat Bondye, i pe aktivman siport bann Kretyen. Lekel ki kapab prouve ki Kris pa pe siport son bann disip oubyen lekel ki kapab reisi konteste zizman favorab Bondye an faver son bann fidel? Napa personn ki kapab fer sa! —Izai 50:8, 9; Ebre 4:15, 16.
12, 13. (a) Ki bann kondisyon oubyen sitiasyon ki pa kapab separ nou avek lanmour Bondye? (b) Ki lobzektif Satan kan i kree bann difikilte pour nou? (c) Akoz bann Kretyen i sorti konpletman viktorye?
12 Lir Romen 8:35-37. Apard ki nou menm endividyelman, eski i annan okenn dimoun oubyen okenn keksoz ki kapab separ nou avek lanmour Zeova ek son Garson, Zezi Kri? Satan i kapab servi son bann lazan lo later pour met bann Kretyen dan bokou difikilte. Diran bann syek ki’n pase, bokou nou bann frer ek ser Kretyen in vin lobze persekisyon vyolan dan bokou pei. Dan serten landrwa ozordi, toulezour nou bann frer i fer fas avek difikilte ekonomik. Serten i konn douler lafen oubyen serten napa ase lenz. Ki lobzektif Satan kan i kree sa bann sitiasyon difisil? Omwen enn son lobzektif se pour dekouraz vre ladorasyon Zeova. Satan i anvi fer nou krwar ki lanmour Bondye in vin fre. Me eski sa i leka?
13 Parey Pol, ki ti sit Psonm 44:22, nou’n etidye parol an ekri Bondye. Nou konpran ki se akoz non Bondye ki sa bann keksoz pe ariv avek nou, son “mouton.” Sangtifikasyon non Bondye e zistifikasyon son souvrennte iniversel i enplike dan sa zafer. Se akoz sa size enportan ki Bondye in permet sa bann leprev, pa akoz i nepli kontan nou. Nenport ki sitiasyon difisil ki nou ladan, nou annan lasirans ki lanmour Bondye pour son pep, enkli pour sakenn parmi nou, pa’n sanze. Sa ki paret en defet pour nou, pou vin en laviktwar alafendizour si nou reste fidel. Sa lasirans ki lanmour Bondye pa kapab sanze i fortifye e soutenir nou.
14. Akoz Pol ti konvenki ki Bondye i kontan bann Kretyen malgre bann difikilte ki zot kapab fer fas avek?
14 Lir Romen 8:38, 39. Kwa ki ti konvenk Pol ki nanryen pa kapab separ bann Kretyen avek lanmour Bondye? San dout, son bann prop leksperyans ki i ti gannyen dan minister ti ranforsi son konviksyon ki bann difikilte pa kapab afekte lanmour Bondye pour nou. (2 Korentyen 11:23-27; Filipyen 4:13) Deplis, Pol ti konn plan eternel Zeova e i ti konnen ki I ti fer pour Son pep dan lepase. Eski lanmor i kapab venk lanmour Bondye pour bann dimoun ki’n servi li fidelman? Ditou! Sa bann fidel ki mor i kontinyen viv dan memwar parfe Bondye, e i pou resisit zot kan i apropriye.—Lik 20:37, 38; 1 Korentyen 15:22-26.
15, 16. Nonm serten keksoz ki pa zanmen kapab fer Bondye aret kontan son bann serviter.
15 Nenport ki maler ki kapab ariv nou dan lavi—ki swa i en aksidan ki’n afebli nou, en maladi fatal, oubyen en problenm ekonomik—napa nanryen ki kapab detri lanmour Bondye pour son pep. Bann lanz pwisan, parey sa lanz dezobeisan ki ti vin Satan, pa kapab enfliyans Zeova pour aret kontan son bann serviter devoue. (Zob 2:3) Bann gouvernman i kapab enterdi, anprizonn oubyen maltret bann serviter Bondye e rezet zot dan lasosyete. (1 Korentyen 4:13) En tel laenn delapar bann nasyon, ki pa zistifye, i kapab met presyon lo bann imen pour vir kont nou, me i pa enfliyans Souvren liniver pour abandonn nou.
16 Konman bann Kretyen, nou pa bezwen per ki okenn keksoz dan “letan prezan” parey Pol ti apel li—bann levennman, kondisyon, ek sitiasyon dan sa sistenm prezan—ni bann keksoz ki pou vini dan “lavenir” i kapab kas latasman ki Bondye i annan avek son pep. Kantmenm bann pwisans lo later ek bann move lespri dan lesyel i lager kont nou, lanmour fidel Bondye i la pour soutenir nou. Parey Pol i ensiste, ni “bann zabitan dan lemonn ki anler, ni dan lemonn ki anba” pa kapab retenir lanmour Bondye. Wi, napa okenn keksoz ki annan pour bi dekouraz nou, ni okenn keksoz ki kapab annan en gran lenfliyans lo nou, ki kapab separ nou avek lanmour Bondye; ni okenn lezot kreatir pa kapab kas sa relasyon ki Kreater i annan avek son bann serviter fidel. Lanmour Bondye pa zanmen fel; i reste pour touzour.—1 Korentyen 13:8.
Apresye Labonte Leker Bondye pour touzour
17. (a) Akoz annan lanmour Bondye i “pli meyer ki lavi”? (b) Ki mannyer nou demontre ki nou apresye labonte leker Bondye?
17 Ki lenportans lanmour Bondye i annan pour ou? Eski ou santi parey David, ki ti ekrir: “Parski ou labonte leker i pli meyer ki lavi, mon prop lalev pou loue ou. Alor mon pou beni ou tou dilon mon lavi; mon pou lev mon plak lanmen an ou non”? (Psonm 63:3, 4) Fransman, eski i annan okenn keksoz dan sa monn ki lavi i kapab ofer ki pli meyer ki rezwir lanmour Bondye ek son lanmitye fidel? Par egzanp, eski rod en profesyon ki pey byen i pli meyer ki annan lape lespri ek lazwa ki ou gannyen kan ou annan en relasyon pros avek Bondye? (Lik 12:15) Serten Kretyen in ganny konfronte avek en swa pour renons Zeova ouswa fer fas avek lanmor. Sa ti arive avek bokou Temwen Zeova dan kan konsantrasyon Nazi pandan Dezyenm Lager Mondyal. Apard ki ennde eksepsyon, nou bann frer Kretyen ti swazir pour reste dan lanmour Bondye, e pare pour fer fas avek lanmor si i neseser. Bann ki reste fidel dan son lanmour i kapab asire ki zot pou ganny en lavenir eternel avek Bondye, en keksoz ki lemonn pa kapab donn nou. (Mark 8:34-36) Me pa zis lavi eternel ki enplike.
18. Akoz lavi eternel i en keksoz vreman atiran?
18 Kantmenm i pa posib pour viv pour touzour san Zeova, esey mazinen konman i ti pou ete pour viv en bon pe letan san nou Kreater. Nou lavi ti pou vid, i ti pou napa en vre bi. Zeova in donn son pep en travay satisfezan pour fer dan sa bann dernyen zour. Alor nou kapab annan konfyans ki ler Zeova, sa Enn ki akonpli son plan, i donn lavi eternel, sa lavi pou ranpli avek bann keksoz pasyonnan e itil pour nou aprann e fer. (Eklezyast 3:11) Eksplor nou kantite ki nou oule pandan sa bann milener ki pou pase, nou pa pou zanmen arive konpran tou ‘grander larises Bondye, son lasazes ek son konnesans.’—Romen 11:33.
Mon Papa i kontan zot
19. Ki lasirans Zezi ti donn son bann disip avan i ti separe avek zot?
19 Le 14 Nizan, lannen 33 N.L., pandan son dernyen sware ki i ti pase avek son 11 zapot fidel, Zezi ti dir en kantite keksoz pour fortifye zot pour sa ki ti pe al arive. Zot tou zot ti’n reste fidel avek Zezi dan son bann leprev, e zot ti’n personnelman santi lanmour ki i ti annan pour zot. (Lik 22:28, 30; Zan 1:16; 13:1) Apre Zezi ti rasir zot: “Mon papa li menm i kontan zot.” (Zan 16:27) Sa bann parol ti’n bezwen ed son bann disip pour realize ki zot Papa seles i vreman kontan zot en kantite!
20. Ki ou determinen pour fer, e ki konfyans ou kapab annan?
20 Bokou in servi Zeova fidelman pour plizyer dizenn lannen. San dout, avan lafen sa sistenm, nou pou fer fas avek bokou plis leprev. Pa zanmen les sa bann leprev oubyen soufrans fer ou dout lanmour fidel ki Bondye i annan pour ou. I pou difisil pour nou arive met tro bokou lanfaz lo sa laverite: Zeova i kontan ou. (Zak 5:11) Nou tou annou kontinyen fer nou par pour swiv bann komannman Bondye fidelman. (Zan 15:8-10) Annou servi sak loportinite pour loue son non. Nou devret fortifye nou rezolisyon pour kontinyen apros pli pre avek Zeova dan lapriyer e an etidyan son Parol. Nenport ki keksoz ki kapab arive demen, si nou pe fer nou mye posib pour fer plezir Zeova, nou pou reste anpe, avek konfyans total ki son lanmour pa pou zanmen sanze.—2 Pyer 3:14.
Ki ou pou reponn?
• Nou bezwen lanmour lekel pour nou stab spirityelman e emosyonnelman?
• Ki bann keksoz ki pa ti pou zanmen fer Zeova aret kontan nou?
• Akoz eksperyans lanmour Zeova i “pli meyer ki lavi”?
[Kestyon]
[Portre lo paz 8]
Si nou santi nou separe avek lanmour Bondye, nou kapab travay pour redres sa sitiasyon
[Portre lo paz 9]
Pol ti konpran akoz i ti ganny persekite