Kestyon Lekter

Eski lenstriksyon ki Bondye ti donnen, ki’n ganny rikorde dan Zeremi 7:16, i vedir ki bann Kretyen pa devret priy pour en dimoun ki’n ganny ekskli dan kongregasyon Kretyen akoz i en peser ki pa repantir?

Apre ki i ti pas son zizman lo Zida enfidel, Zeova ti dir avek Zeremi: “Ou, ou pa devret priy pour sa pep, ni fer monte okenn siplikasyon e okenn lapriyer pour zot, pa ni ensiste avek mwan, parski mon pa pou ekout ou.” —Zeremi 7:16.

Akoz Zeova ti defann Zeremi pour priy pour bann Izraelit? Evidaman, sa ti akoz zot ti vyol son Lalwa dan en fason sokan. Ouvertman e san okenn laont, zot ti pe “vole, komet mert, komet adilter, fer bann fo serman, fer lafimen sakrifisyel pour Baal e swiv lezot bondye.” Alors, Zeova ti dir avek bann Zwif enfidel: “Mon pou rezet zot devan mon figir, zis parey mon ti rezet tou zot bann frer, tou desandans Efraim.” San dout, i pa ti pou apropriye pour Zeremi, oubyen nenport ki, priye pour Zeova sanz son lide konsernan Son zizman.—Zeremi 7:9, 15.

Anliny avek sa, zapot Zan ti ekrir konsernan lapriyer ki apropriye. Premyerman, i ti asir bann Kretyen: “Si nou demann keksoz dapre son lavolonte, i pou ekout nou.” (1 Zan 5:14) Apre, konsernan priy pour lezot, Zan ti kontinyen: “Si en dimoun i war son frer pe fer en pese ki pa anmenn lanmor, i ava priye, e Bondye i ava donn li lavi, pour bann ki zot pese pa anmenn lanmor. Me i annan pese ki anmenn lanmor; pour en tel pese mon pa dir zot ki zot devre priye.” (1 Zan 5:16) Zezi ti osi koz lo en pese ki “pa pou zanmen ganny pardonnen.” Sa se fer pese kont lespri sen.—Matye 12:31, 32.

 Eski sa i vedir ki tou dimoun ki ganny ekskli dan kongregasyon Kretyen akoz zot in fer pese e pa repantir, in komet en pese ki “anmenn lanmor” e alor nou pa devret priy pour zot? Pa neseserman, akoz dan serten ka pese ki ganny komet pa anmenn lanmor. Anfet, i pa fasil pour konnen si en pese i kapab anmenn lanmor. Pran legzanp Lerwa Manase ki ti reste an Zida. I ti fer bann lotel pour bann fo bondye, i ti ofer son prop garson konman sakrifis, i ti pratik grigri, e i ti met bann zidol dan tanp Zeova. Anfet, Labib i dir ki Manase ek bann dimoun ti “fer sa ki ti mal plis ki bann nasyon ki Zeova ti detri devan bann garson Izrael.” Zeova ti pini Manase pour tou sa bann keksoz par anvoy li konman prizonnyen an Babilonn.—2 Lerwa 21:1-9; 2 Kronik 33:1-11.

Eski pese Manase, menm si i ti tre grav, ti sa kalite pese ki anmenn lanmor? I pa paret, akoz sa resi i kontinyen par dir lo son size: “Osito ki sa ti met li dan ladetres, i ti apez figir Zeova son Bondye e abes li bokou akoz Bondye son zanset. E i ti kontinyen priy Li, ki fer ki I ti les li ganny enplore par li e I ti antann son demann pour ganny faver e I ti reetablir li dan son rwayote an Zerizalenm; e Manase ti arive konnen ki Zeova i sa vre Bondye.”—2 Kronik 33:12, 13.

Alors, nou pa devret konklir ki en dimoun i neseserman koupab pour en pese ki anmenn lanmor zis akoz i’n ganny ekskli dan kongregasyon. I kapab pran letan pour konn vre kondisyon leker sa dimoun. Anfet, en rezon ki souvan ganny site pour ekskli en peser se pour fer li retourn a larezon, repantir, e retourn ver Bondye.

Vi ki sa dimoun i nepli dan kongregasyon, se bann ki pros avek li, tel konman son konzwen oubyen son fanmiy, ki pou kapab vwar premye si son leker oubyen son latitid pe sanze. Sa bann dimoun ki vwar sa bann sanzman i kapab konklir ki sa peser pa’n komet en pese ki anmenn lanmor. Zot kapab santi zot pouse pour priye ki sa dimoun i retir lafors dan Parol enspire Bondye e ki Zeova i fer keksoz pour sa peser an armoni avek son lavolonte.—Psonm 44:21; Eklezyast 12:14.

Menm si serten i dan en pozisyon pour vwar ase levidans ki fer zot konvenki ki sa peser in repantir, sa i kapab pa leka pour kongregasyon an zeneral. Zot kapab soke, trouble, oubyen menm tonbe si zot tann kelken priy piblikman pour sa dimoun ki’n ganny ekskli. Alors, bann ki santi zot pouse pour priy pour sa peser i devret fer li dan zot lapriyer personnel selman, e les lezot devlopman konsernan sa size dan lanmen bann ansyen ki responsab dan kongregasyon.

[Portre lo paz 29]

Reprodwir apartir Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s

[Portre lo paz 30]

Pese grav Manase ti ganny pardonnen ler i ti abes li devan Zeova