Lareg D-or—I itil

Tandis ki laplipar dimoun i vwar Lareg d-or konman en lansennyman moral prononse par Zezi, li menm i ti dir: “Lansennyman ki mon donnen i pa mon prop lansennyman, me i sorti kot Bondye ki’n anvoy mwan.”—Zan 7:16.

WI, LOTER lansennyman Zezi, enkli sa ki’n ganny rekonnet konman Lareg d-or, i sa enn ki ti anvoy Zezi, Kreater, Zeova Bondye.

Plan orizinal Bondye i ki tou dimoun i tret kanmarad parey zot ti pou kontan ganny trete. I ti etabli pli bon legzanp pour eksprim konsern pour byennet lezot dan fason ki i ti kree imen: “Bondye ti konmans kree zonm dan son resanblans, dan resanblans Bondye i ti kree li; i ti kree zot mal ek femel.” (Zenez 1:27) Sa i vedir ki avek lanmour Bondye ti donn imen serten son bann kalite merveye afen ki zot kapab rezwir lavi dan lape, lazwa e dan larmoni—posibleman pour touzour. Zot konsyans ki Bondye in donn zot, kan i ganny byen edike, ti pou ed zot pour  tret lezot lafason ki zot menm zot ti pou oule ganny trete.

Legois ti domin zot

Lefe ki limanite ti annan en konmansman merveye, ki ti arive apre? Akoz legois, dimoun ti konmans demontre bann move kalite. Parey i’n ganny rikorde dan Zenez sapit 3, laplipar dimoun i familye avek sa resi Labib lo sa ki sa premye koup ti fer. Ankouraze par Satan, en lennmi ki opoz tou bann standar drwat Bondye, Adan ek Ev ti rezet dominasyon Bondye, e prefere pour vin endepandan e annan sa liberte pour desid pour zot menm. Zot aksyon rebel e egois pa ti anmenn en gran perd zis pour zot me osi ti anmenn bann konsekans trazik pour tou zot desandans. Sa i montre klerman bann konsekans terib ki arive kan nou inyor sa lansennyman ki’n arive ganny rekonnet konman Lareg d-or. An konsekans, “pese in antre dan lemonn par en sel zonm, e pese in anmenn lanmor, e lanmor in pas avek tou dimoun, parski tou dimoun in konmet pese.” —Romen 5:12.

Kantmenm limanite an zeneral in rezet bann prensip Zeova Bondye ki ranpli avek lanmour, Zeova pa’n abandonn zot. Par egzanp, Zeova ti donn nasyon Izrael son Lalwa pour gid zot. Sa Lalwa ti ansenny zot pour tret lezot parey zot ti pou anvi ganny trete. Sa Lalwa ti donn lenstriksyon lo konman pour tret bann lesklav, bann zanfan ki napa papa, ek bann vev. I ti fer resorti konman pour tret bann ka latak vyolan, kidnap ek vol. Bann lalwa lo lizyenn ti montre konsern pour lasante lezot. Ti menm annan lalwa ki ti annan pour fer avek sèks. Zeova ti rezim son Lalwa par dir avek son pep: “Ou devret kontan ou prosen parey ou prop lekor,” en deklarasyon ki Zezi ti site plitar. (Levitik 19:18; Matye 22:39, 40) Lalwa ti osi kontyen lareg konsernan konman pour tret bann rezidan etranze parmi bann Izraelit.  Lalwa ti komande: “Ou pa devret oprim en rezidan etranze, akoz zot menm zot konn tre byen nanm rezidan etranze, parski zot ti vin bann rezidan etranze dan pei Lezip.” Andotmo, bann Izraelit ti devret demontre labonte anver bann ki ti dan bezwen.—Egzod 23:9; Levitik 19:34; Deterononm 10:19.

Osi lontan ki Izrael ti swiv Lalwa fidelman, Zeova ti beni sa nasyon. Anba renny David ek Salomon, sa nasyon ti prospere e bann dimoun ti ere e satisfe. En resi istorik i dir nou: “Zida ek Izrael ti en kantite, parey gren disab ki obor lanmer, an gran kantite, zot ti manze e bwar e rezwir. E Zida ek Izrael ti kontinyen abit an sekirite, sakenn anba son prop pye laviny e anba son prop pye fig.”—1 Lerwa 4:20, 25.

Malerezman, lape ek sekirite sa nasyon pa ti dir pour lontan. Menm si zot ti annan Lalwa Bondye, bann Izraelit pa ti obzerv li; zot ti permet legois etouf zot konsern pour lezot. Sa, ansanm avek apostazi, ti anmenn difikilte pour zot endividyelman e konman en nasyon. Finalman, dan lannen 607 A.N.L., Zeova ti les bann Babilonnyen detri rwayonm Zida, lavil Zerizalenm, e menm son tanp manifik. Pour ki rezon? “ ‘Parski zot pa’n obei mon parol, la mon pe anvoye e mon pou pran tou bann fanmiy dan nor,’ se sa ki Zeova i deklare, ‘menm anvoy Neboukadnetsar lerwa Babilonn, mon serviter, e mon pou fer zot vin kont sa pei e kont son zabitan e kont tou bann nasyon ki dan zalantour; e mon pou dedye zot pour destriksyon e fer zot en lobze sezisman, en keksoz pour soufle avek, e bann landrwa ki’n ganny devaste pour letan endefini.’ ” (Zeremi 25:8, 9) Wi, abandonn ladorasyon pir Zeova i vreman kout ser!

En Legzanp pour imite

Lo lot kote, Zezi Kri pa ti zis ansenny Lareg d-or me i ti osi etabli pli bon legzanp par viv an armoni avek li. I ti vreman pran swen avek byennet lezot. (Matye 9:36; 14:14; Lik 5:12, 13) En fwa, pre avek lavil Nain, Zezi ti vwar en vev ki ti dan en gran latristes dan en laprosesyon lanterman son sel garson. Resi Labib i dir: “Kan Zezi ti vwar sa vev, i ti pran pitye pour li.” (Lik 7:11-15) Dapre Vine’s Expository Dictionary of Old and New Testament Words sa lekspresyon “pran pitye pour li,” i sinifye “ganny touse par sa ki lezot pe santi.” Zezi ti santi soufrans sa madanm, e sa ti pous li pour pran en pa pozitif pour soulaz son douler. Pa i ti en lazwa pour sa vev kan Zezi ti resisit son garson e “rann li avek son manman”!

Finalman, an armoni avek plan Bondye, Zezi ti volonterman soufer e donn son lavi konman en ranson afen ki limanite i kapab ganny libere dan lesklavaz pese ek lanmor. Sa ti legzanp siprenm pour viv dapre Lareg d-or. —Matye 20:28; Zan 15:13; Ebre 4:15.

Bann Dimoun ki aplik Lareg d-or

Eski denozour i annan dimoun ki vreman viv an akor avek Lareg d-or? Wi, e pa zis kan i konvenyan pour zot. Par egzanp, pandan Dezyenm Lager Mondyal an Nazi Lalmanny, bann Temwen Zeova ti mentenir zot lafwa dan Bondye e annan lanmour pour zot prosen e zot ti refize pour fer okenn konpromi avek Lareg d-or. Letan sa gouvernman ti enpoz en kanpanny laenn ek diskriminasyon kont tou bann Zwif, bann Temwen ti kontinyen swiv Lareg d-or. Menm dan bann kan konsantrasyon, zot ti kontinyen pran swen avek lezot dimoun, partaz zot manze menm si i ti en pti gin avek bann Zwif e avek bann ki pa ti Zwif ki ti lafen. Deplis, menm si sa Gouvernman ti demann zot pour pran zarm pour touy lezot, zot ti refize pour fer li, zis parey zot pa ti oule ganny touye par lezot. Konman zot ti pou kapab touy bann ki zot ti devret kontan parey zot kontan zot lekor? Akoz zot ti refize fer sa, en kantite parmi zot ti ganny anvoye pa zis dan kan konsantrasyon me ver zot lanmor.—Matye 5:43-48.

Anmezir ki ou pe lir sa lartik, ou pe benefisye atraver en lot legzanp kot Lareg d-or pe ganny met an pratik. Bann Temwen Zeova i realize ki denozour bokou dimoun pe soufer san  okenn lespwar e san okenn soutyen. Akoz sa, bann Temwen i volonterman pran aksyon pozitif pour ed lezot aprann konsernan sa lespwar ek gidans pratik ki trouve dan Labib. Sa i form par en travay edikasyonnel ki pe ganny fer partou dan lemonn, e ki ozordi pe ganny fer lo en nivo ki pa’n zanmen ganny fer oparavan. Ki rezilta? Parey i’n ganny profetize dan Izai 2:2-4, “bokou dimoun,” annefe plis ki sis milyon endividi partou dan lemonn, in ganny ‘enstri dan semen Zeova e pe mars dan son santye.’ Dan en sans senbolik, zot in aprann “forz zot lepe an pyos e zot lans an sizay.” Zot in trouv lape ek sekirite dan sa letan difisil.

Ki ou pou fer?

Reflesir pour en moman lo douler ek soufrans ki negliz Lareg d-or in anmennen lo limanite depi rebelyon an Edenn, ki ti ganny promouvwar par Satan Dyab. Zeova in plàn pour ranvers sa sitiasyon byento. Konman? “La rezon akoz Garson Bondye in aparet, se zisteman pour detri bann travay dyab.” (1 Zan 3:8) Sa pou arive anba renny Rwayonm Bondye, dan lanmen kapab e saz Zezi Kri, sa enn ki ti ansenny e viv dapre Lareg d-or.—Psonm 37:9-11; Danyel 2:44.

Lerwa David ki ti viv dan ansyen Izrael ti obzerve: “Mon ti en zennonm, mon’n menm vin vye, e pourtan mon pa’n vwar okenn dimoun drwat ganny abandonnen konpletman, ni menm son desandans pe sers dipen. Toudilon lazournen i pe demontre faver e pe prete, e alor son desandans i kapab esper en benediksyon.” (Psonm 37:25, 26) Eski pa ou dakor ki laplipar dimoun ozordi pe zis pran bann keksoz san okenn konsiderasyon plito ki “pe demontre faver e pe prete”? San dout, swiv Lareg d-or i kapab anmenn ver vre lape ek sekirite akoz i permet en dimoun pour rezwir bann benediksyon la konmela e dan lavenir anba Rwayonm Bondye. Rwayonm Bondye pou retir tou dernyen latras legois ek mesanste lo later e ranplas sa sistenm koronpi ki pe ganny dirize par bann lalwa zonm avek en nouvo sistenm ki Bondye pou fer. Alor, tou dimoun pou kontan pour viv dapre Lareg d-or.—Psonm 29:11; 2 Pyer 3:13.

[Portre lo paz 5]

Zezi pa ti zis ansenny Lareg d-or me i ti osi etabli pli bon legzanp par viv an armoni avek li

[Portre lo paz 7]

Swiv Lareg d-or i kapab anmenn ver vre lape ek sekirite