“Par Lalimyer ki sorti kot ou nou kapab vwar Lalimyer”

LALIMYER i en keksoz ki nou souvannfwa pa konsyan son lenportans ziska ki i annan en lenteripsyon kouran e ki nou vwazinaz antye i ganny anvlope dan fernwar. Erezman, nou kapab toultan depan lo nou “stasyon lenerzi” ki dan lesyel—soley. E gras a lalimyer ki sorti kot soley, nou kapab vwar, manze, respire, e viv.

Vi ki lalimyer i esansyel pour viv, nou pa devret sirprann pour lir dan Zenez ki lalimyer ti aparet premye zour kreasyon. “Alor Bondye ti dir: ‘Les lalimyer aparet.’ Alor lalimyer ti aparet.” (Zenez 1:3) Bann zonm ki ti annan bokou respe pour Bondye parey Lerwa David ti toultan rekonnet Zeova konman sours lavi ek lalimyer. David ti ekrir: “Sours lavi i avek ou; par lalimyer ki sorti kot ou nou kapab vwar lalimyer.”—Psonm 36:9.

Parol David i aplikab dan en sans literal e osi dan en sans senbolik. Encyclopædia Britannica i fer resorti: “Definitivman, lalimyer i responsab pour fer nou vwar.” I apre azoute: “Pli bokou lenformasyon i ariv kot laservel en imen atraver son lizye ki atraver okenn son bann lezot parti lekor ki annan pour fer avek sans.” Vi ki laplipar sa ki nou aprann i depan lo sa don pour vwar—ki bezwen lalimyer pour fonksyonn byen —lalimyer i osi ganny servi dan Labib dan en sans senbolik.

Se pour sa rezon, Zezi ti dir avek son bann disip: “Mwanmenm lalimyer lemonn, sa ki swiv mwan pa pou mars dan fernwanr, me i a ganny lalimyer lavi.” (Zan 8:12) Sa lalimyer senbolik ki Zezi ti pe koz lo la ti sa mesaz laverite ki i ti prese, ki ti kapab eklersi lespri ek leker sa bann ki ti ekout li. Apre bokou lannen dan fernwanr spirityel, bann disip Zezi ti kapab finalman konpran plan Bondye pour limanite ek lespwar pour Rwayonm. Sa ti vreman “lalimyer lavi,” lefe ki sa konnesans i kapab anmenn ver lavi eternel. Dan lapriyer avek son Papa dan lesyel, Zezi ti dir: “[Lavi eternel] savedir ki zot konn ou konman sel vre Bondye, ek Zezi-Kri ki ou’n anvoye.” (Zan 17:3) Annou pa zanmen pran sa lalimyer spirityel alalezer!