Zeova I Montre Nou Konman Pour Kont Nou Bann Zour
Zeova I Montre Nou Konman Pour Kont Nou Bann Zour
“Montre nou ki mannyer pour kont nou bann zour dan en fason ki nou kapab ganny en leker lasazes.”—PSONM 90:12.
1. Akoz i apropriye pour demann Zeova pour montre nou konman “pour kont nou bann zour”?
ZEOVA Bondye i nou Kreater e sa Enn ki donn lavi. (Psonm 36:9; Revelasyon 4:11) Alor napa okenn lezot ki pli byen plase ki li, pour montre nou konman pour servi nou bann lannen ki nou viv dan en fason ki saz. I apropriye alor, ki sa psalmis ti demann Bondye: “Montre nou ki mannyer pour kont nou bann zour dan en fason ki nou kapab ganny en leker lasazes.” (Psonm 90:12) Sa lapel i trouve dan Psonm 90 e i sertennman merit nou konsiderasyon. Me, premyerman annou vwar en apersi an bref lo sa kantik enspire par Bondye.
2. (a) Lekel ki ganny mansyonnen konman sa enn ki ti konpoz Psonm 90, e kan ki i’n kapab ganny ekrir? (b) Konman Psonm 90 i devret afekte lafason ki nou vwar lavi?
2 Dan soutit pour Psonm 90 i mansyonnen ki sa i “en lapriyer Moiz, sa zonm vre Bondye.” Vi ki sa psonm i aksantye ki longer lavi imen i bref, i tre probab ki i ti ganny konpoze apre ki bann Izraelit ti’n ganny delivre dan lesklavaz Lezip e pandan zot vwayaz ki ti dir pour 40 an dan dezer, kot lanmor plizyer milye zot ti anmenn lafen avek sa zenerasyon enfidel. (Nonm 32:9-13) Antouka, Psonm 90 i montre ki lavi bann imen enparfe i kourt. Alor i evidan, ki nou devret servi byen nou bann zour presye.
3. Ki Psonm 90 i kontyen?
3 Dan Psonm 90 verse 1 a 6 i idantifye Zeova konman nou demer eternel. Verse 7 a 12 i montre ki nou bezwen pour kapab servi nou bann lannen ki nou vivan, ki pas byen vit, dan en fason ki li i aksepte. E parey verse 13 a 17 i eksprimen, nou senserman anvi resevwar labonte leker Zeova ek son benediksyon. Byensir, sa psonm pa direkteman aplik avek nou prop leksperyans konman serviter Zeova. Me kantmenm sa, nou devret medit e imit sa devosyon avek Bondye ki ganny manifeste dan lapriyer sa Psonm. Annou egzamin Psonm 90 e aplik li lo nou, nou ki’n dedye nou lavi avek Bondye.
Zeova—Nou “vre Demer”
4-6. Konman Zeova i “en vre demer” pour nou?
4 Sa psalmis i konmanse: “O Zeova, ou’n montre ou menm konman en vre demer pour nou, pour zenerasyon apre zenerasyon. Avan ki montanny ti ne, oubyen ou ti donn nesans later ek teren prodiktif dan douler lakousman, wi depi letan endefini ziska letan endefini ou menm Bondye [oubyen, sa Enn Divin].” —Psonm 90:1, 2, not anba lo paz.
5 Pour nou, Zeova “Bondye eternel,” i en “vre demer”—en refiz spirityel. (Romen 16:26) Nou santi nou an sekirite, akoz i toultan la pour ed nou konman sa enn “ki ekout lapriyer.” (Psonm 65:2) Lefe ki nou larg nou bann lenkyetid lo nou Papa seles atraver son Garson byenneme, ‘lape Bondye ki depas tou konpreansyon imen i gard nou leker ek lespri.’ —Filipyen 4:6, 7; Matye 6:9; Zan 14:6, 14.
6 Nou rezwir sekirite spirityel akoz, dan en sans senbolik, Zeova i “en vre demer” pour nou. I osi fourni “bann lasanm enteryer”—ki petet pe refer etrwatman avek bann kongregasyon son pep—konman bann landrwa refiz spirityel, kot bann bon berze i kontribye bokou pour fer nou santi an sekirite. (Izai 26:20; 32:1, 2; Akt 20:28, 29) Deplis, serten parmi nou i sorti dan bann fanmiy ki pe servi Bondye depi byen lontan e zot in eksperyanse pour zot menm ki Bondye i ‘en vre demer pandan zenerasyon apre zenerasyon.’
7. Dan ki sans ki bann montanny ti “ne” e ti donn nesans later avek “douler lakousman”?
7 Zeova ti egziste avan ki bann montanny ti “ne” oubyen ler i ti donn nesans later avek “douler lakousman.” Dapre lafason ki imen i vwar keksoz, i demann en kantite travay pour prodwir sa later avek tou son bann karakteristik, tou bann prosedir simik, ek bann mekanism konplike. E ler sa psalmis i dir ki bann montanny ti “ne” e i ti donn nesans later avek “douler lakousman,” i pe demontre en gran respe pour lakantite travay ki ti enplike ler Zeova ti kree tou sa bann keksoz. Eski nou osi pa nou devret respe e apresye travay lanmen nou Kreater?
Zeova i toultan la pour nou
8. Ki ou konpran par sa deklarasyon ki Zeova i Bondye “depi letan endefini ziska letan endefini”?
8 Sa psalmis ti sante “wi depi letan endefini ziska letan endefini ou Bondye.” “Letan endefini” i kapab refer avek bann keksoz ki annan en lafen me ki son peryod letan pa’n ganny spesifye. (Egzod 31:16, 17; Ebre 9:15) Me, dan Psonm 90:2 e lezot landrwa dan Lekritir Ebre, “letan endefini” i vedir “pour touzour.” (Eklezyast 1:4) Nou lespri pa kapab konpran konman i posib ki Bondye in toultan egziste. Toudmenm, Zeova napa ni konmansman e i pou napa ni okenn lafen. (Abakouk 1:12) I pou toultan vivan e pare pour ed nou.
9. Dapre sa psalmis mil an legzistans imen i egal avek kwa?
9 Sa psalmis ti ganny enspire pour ekrir ki mil an legzistans imen i egal avek en pti gin letan dapre leksperyans Kreater eternel. I ti ekrir sa bann parol ki i ti adres avek Bondye: “Ou fer zonm mortel retourn an matyer kraze, e ou dir: ‘Retournen, zot bann garson zonm.’ Akoz mil an dan ou lizye i konmsi yer kan i’n pase, e parey en veye pandan lannwit.”—Psonm 90:3, 4.
10. Konman ki Bondye i fer zonm “retourn an matyer kraze”?
10 Zonm i mortel, e Bondye i fer li “retourn an matyer kraze.” Savedir, zonm i retourn “an pousyer,” parey later ki’n ganny kraze. An realite, Zeova pe dir: ‘retourn an pousyer avek ki ou ti ganny fer.’ (Zenez 2:7; 3:19) Sa i aplik pour nou tou—sa ki for oubyen fay, sa ki ris ouswa pov—akoz okenn imen enparfe ‘pa zanmen kapab reaste en frer, ni donn Bondye en ranson pour li, afen ki i pou kapab viv pour touzour.’ (Psonm 49:6-9) Me nou vreman rekonesan ki ‘Bondye in donn son sel Garson, pour ki nenport ki ki demontre lafwa dan li a ganny lavi eternel’! —Zan 3:16; Romen 6:23.
11. Akoz nou kapab dir ki en gran letan pour nou i enn tre kourt pour Bondye?
11 Dapre lafason ki Zeova i vwar keksoz, menm Metousela ki ti annan 969 an ti viv mwens ki en zour. (Zenez 5:27) Pour Bondye mil an ler i’n fini pase i konmsi yer, zis en peryod 24 er-d-tan. Sa psalmis ti osi mansyonnen ki pour Bondye mil an i parey sa kat er-d-tan ki en veyer i veye dan en kan pandan lannwit. (Ziz 7:19) I evidan, alor ki en gran peryod letan pour nou i enn tre kourt pour Bondye eternel, Zeova.
12. Ki mannyer imen i ‘ganny balye’ par Bondye?
12 Ler i ganny konpare avek legzistans eternel Bondye, sa lavi ki imen pe viv aktyelman i vreman kourt. Sa psalmis i dir: “Ou’n balye zot; zot in vin senpleman en sonmey; dan bomaten zot zis parey zerb ver ki sanze. Dan bomaten i fleri e i bezwen sanze; aswar i fletri e byensir i sek.” (Psonm 90:5, 6) Moiz ti vwar plizyer milye Izraelit mor dan dezer, ‘ganny balye’ par Bondye parey dan en deliz. Sa bout dan sa psonm in ganny tradwir: “Ou balye bann zonm dan sonmey lanmor.” (New International Version) Lo lot kote, lakantite letan ki imen enparfe i viv i “senpleman en sonmey” ki dir pour en pti peryod letan—zis parey avek en pti sonm.
13. Konman nou “zis parey zerb ver,” e ki lefe sa i devret annan lo nou?
13 Nou ‘zis parey zerb ver ki fleri dan bomaten’ me kan i ariv aswar i’n sek avek lasaler soley. Wi, nou lavi i kourt zis parey zerb ki fletri dan zis en zour. Alor, annou pa gat sa trezor presye. Plito, nou devret rod gidans Bondye konsernan konman nou merit servi larestan nou lavi dan sa sistenm.
Zeova i ed nou “pour kont nou bann Zour”
14, 15. Konman ki Psonm 90:7-9 ti akonpli lo bann Izraelit?
14 Konsernan Bondye, sa psalmis i azoute: “Parski dan ou lakoler nou’n trouv nou lafen, e par ou firer nou’n ganny trouble. Ou’n met devan ou nou bann fot, nou bann keksoz kasyet devan ou figir briye. Parski dan ou firer tou nou bann zour in diminyen; nou’n fini nou bann lannen zis parey en mirmir.”—Psonm 90:7-9.
15 Bann Izraelit enfidel ‘ti trouv zot lafen dan lakoler Bondye.’ Zot ti ‘trouble par son lakoler,’ oubyen ‘terifye par son firer.’ (New International Version) Akoz zizman Bondye, serten ti “tonbe e mor dan dezer.” (1 Korentyen 10:5) Zeova ti ‘met devan li zot bann fot.’ I ti fer zot rann kont pour zot bann mesanste ki zot ti komet dan kler, me menm zot “bann keksoz kasyet,” oubyen bann pese ki zot ti fer an kasyet, ti osi ‘devan son figir briye.’ (Proverb 15:3) Vi ki zot ti’n vin bann size lakoler Bondye, bann Izraelit ki pa ti repantir ti ‘fini zot bann lannen zis parey en mirmir.’ An rapor avek sa, lakantite letan ki nou viv i kourt, i kapab ganny konpare avek en souf ki sorti lo nou lalev ler nou fer en senp mirmir.
16. Si serten pe fer serten pese an sekre, ki zot devret fer?
16 Si okenn parmi nou pe fer serten pese an sekre, petet pour en serten kantite letan nou kapab anpes lezot konnen. Me nou bann move aksyon ki nou pe kasyet i ‘devan figir briye Zeova,’ e nou aksyon pou afekte nou relasyon avek li. Pour reganny en relasyon pros avek Zeova, nou pou bezwen priye ki i pardonn nou, aret fer sa bann keksoz mal e avek lapresyasyon aksepte led spirityel bann ansyen dan kongregasyon. (Proverb 28:13; Zak 5:14, 15) Eski sa pa pou pli meyer plito ki ‘fini nou bann lannen zis parey en mirmir,’ e deplis met nou lespwar lavi eternel an danze!
17. An zeneral pour konbyen letan dimoun i viv, e kwa ki ranpli nou bann lannen legzistans?
17 Konsernan lakantite letan ki imen enparfe i viv, sa psalmis i dir: “Dan zot menm bann zour nou bann lannen i swasanndis an; e si akoz en lafors spesyal zot katreven an, kantmenm sa zot rankontre ryen ki problenm ek maler; akoz vreman tousala i pas vit, e nou anvole.” (Psonm 90:10) An zeneral i komen pour dimoun viv ziska 70 an. Lafors Kaleb alaz 85 an ti ekstraordiner. Ti annan ennde eksepsyon, tel ki Aaron (123), Moiz (120), ek Zozye (110). (Nonm 33:39; Deterononm 34:7; Zozye 14:6, 10, 11; 24:29) Me konsernan sa zenerasyon enfidel ki ti sorti Lezip, bann ki ti’n ganny anrezistre depi laz 20 an e parlao, zot tou zot ti mor dan lespas 40 an. (Nonm 14:29-34) Ozordi dan bokou pei, lakantite letan ki imen i viv pa depas plis ki sa psalmis ti dir. Nou bann lannen legzistans i ranpli avek “problenm ek maler.” Zot pas vit, “e nou anvole.”—Zob 14:1, 2.
18, 19. (a) Ki savedir pour “kont nou bann zour dan en fason ki nou kapab ganny en leker lasazes”? (b) Ler nou demontrelasazes, sa i pous nou pour fer kwa?
18 Sa psalmis i kontinyen sante: “Lekel ki konn lafors ou lakoler ek ou firer dapre lakrent pour ou? Montre nou ki mannyer pour kont nou bann zour dan en fason ki nou kapab ganny en leker lasazes.” (Psonm 90:11, 12) Napa okenn parmi nou ki konn antyerman lafors lakoler Bondye oubyen degre son mekontantman, alor sa i devret ranforsi nou lakrent pour Zeova. Annefe, i devret motiv nou pour demann li “ki mannyer [nou kapab] kont nou bann zour dan en fason ki nou kapab ganny en leker lasazes.”
19 Atraver son bann parol sa psalmis pe priye pour ki Zeova i ansenny son pep konman pour demontre lasazes, pour apresye, e pour servi larestan zot zour dan en fason ki Bondye i aprouve. En peryod lavi 70 an i ofer 25,500 zour. Nenport ki laz nou ete, ‘nou pa konnen ki mannyer nou lavi pou ete demen, akoz nou parey en brouyar ki paret pour en pti moman e ki apre disparet.’ (Zak 4:13-15) Vi ki ‘letan ek levennman san ekspekte i ariv lo nou tou,’ nou pa kapab dir ki kantite letan nou annan pour viv ankor. Alor, annou priy pour lasazes pour kapab fer fas avek bann leprev, pour tret lezot byen, e pour fer nou mye dan servis Zeova konmela menm—ozordi! (Eklezyast 9:11; Zak 1:5-8) Zeova i gid nou par mwayen son Parol, son lespri, ek son lorganizasyon. (Matye 24:45-47; 1 Korentyen 2:10; 2 Timote 3:16, 17) Ler nou aplik lasazes i pous nou pour ‘rod Rwayonm Bondye premye’ e pour servi nou bann zour dan en fason ki anmenn laglwar pour Zeova e fer son leker kontan. (Matye 6:25-33; Proverb 27:11) Byensir, ador Zeova avek tou nou leker pa pou retir tou nou problenm, me i definitivman anmenn bokou lazwa.
Benediksyon Zeova i donn nou Lazwa
20. (a) Dan ki fason Bondye i “santi regre”? (b) Konman Zeova pou tret nou si nou komet en fot grav me nou demontre vre repantans?
20 Si nou ti kapab rezwir larestan nou lavi, pa sa ti pou gou! Lo sa menm laliny, Moiz i sipliye: “Retournen, O Zeova! Ziska kan? E santi regre pour ou bann serviter. Satisfer nou dan bomaten avek ou labonte leker [oubyen, “lanmour fidel”], pour ki nou kapab kriye avek lazwa e kapab rezwir pandan tou nou bann zour.” (Psonm 90:13, 14; not anba lo paz) Bondye pa fer okenn fot. Toudmenm, i “santi regre” e ‘detourn’ kont son lakoler e kont egzekit pinisyon ler son lavertisman pour pran en tel aksyon i prodwir en sanzman dan latitid ek kondwit sa bann ki ti pe fer mal me ki aprezan repantir. (Deterononm 13:17) Alor menm si nou fer en fot grav me nou demontre vre repantans, Zeova pou ‘satisfer nou avek son labonte leker,’ e sa pou donn nou rezon pour “kriye avek lazwa.” (Psonm 32:1-5) E kan nou anmenn en lavi drwat dan lizye Zeova, nou pou santi lanmour fidel Zeova e nou pou kapab “rezwir pandan tou nou bann zour”—wi, pour larestan nou lavi.
21. Dapre sa bann parol ki rikorde dan Psonm 90:15, 16 ki Moiz ti kapab pe demande?
21 Sa psalmis i priye avek bokou santiman: “Fer nou rezwir dapre lakantite zour ki ou’n afliz nou, pour bann lannen kot nou’n vwar maler. Ki ou aksyon i aparet avek ou bann serviter zot menm, e ou labote manifik lo zot bann garson.” (Psonm 90:15, 16) Petet Moiz ti pe demann Bondye pour beni Izrael avek lazwa ki koresponn avek, oubyen dir osi lontan ki bann zour difisil ek bann lannen ki zot ti’n soufer. I ti demande ki “aksyon” Bondye pour beni i aparan pour Son bann serviter e ki Son labote manifik i ganny manifeste lo zot bann garson, oubyen desandans. Nou kapab priy Zeova ki i devers bann benediksyon lo bann imen obeisan dan nouvo monn promiz Bondye.—2 Pyer 3:13.
22. Dapre Psonm 90:17, pour kwa ki nou kapab priye?
22 Psonm 90 i konklir avek sa siplikasyon: “Ki sarm Zeova nou Bondye i ava avek nou, e ki ou etabli solidman lo nou, travay nou lanmen. Wi, etablir solidman travay nou lanmen.” (Psonm 90:17) Sa bann parol i endike ki nou kapab priy Bondye pour beni nou zefor dan son servis. Konman bann Kretyen swazir oubyen zot konpanyon, “lezot mouton,” nou rezwir ki “sarm Zeova” i reste avek nou. (Zan 10:16, NW ) Nou vreman ere ki Bondye in ‘solidman etablir travay nou lanmen’ konman bann proklanmater Rwayonm e dan lezot fason!
Annou kontinyen kont nou bann Zour
23, 24. Ki mannyer nou kapab benefisye ler nou medit lo Psonm 90?
23 Ler nou medit lo Psonm 90, sa i devret fer nou depan plis ankor lo Zeova, nou “vre demer.” Kan nou reflesir lo sa bann parol konsernan lavi ki kourt, sa i devret fer nou vin pli konsyan ankor nesesite gidans Bondye pour nou kont nou bann zour. E si avek perseverans nou rod e demontre lasazes Bondye, alor nou pou sirman resevwar labonte leker ek benediksyon Zeova.
24 Zeova pou kontinyen montre nou konman pour kont nou bann zour. E si nou soumet avek son lenstriksyon, nou pou kapab kontinyen kont nou bann zour pour leternite. (Zan 17:3) Toudmenm, si nou vreman anvi lavi eternel, nou devret fer Zeova nou refiz. (Zid 20, 21) Dan lartik swivan, sa pwen i byen evidan dan bann parol ankourazan ki trouve dan Psonm 91.
Konman ou pou reponn?
• Konman Zeova i “en vre demer” pour nou?
• Akoz nou kapab dir ki Zeova i toultan pare pour ed nou?
• Konman Zeova i ed nou “pour kont nou bann zour”?
• Kwa ki permet nou pour “rezwir pandan tou nou bann zour”?
[Kestyon]
[Portre lo paz 9]
Zeova ti Bondye “avan montanny ti ne”
[Portre lo paz 10]
Dapre lafason ki Zeova i vwar keksoz, Metousela ki ti viv 969 an, ti viv mwens ki en zour
[Portre lo paz 12]
Zeova in ‘solidman etablir travay nou lanmen’