Zeova I Nou Refiz
Zeova I Nou Refiz
“Akoz ou’n dir: ‘Zeova i mon refiz,’ . . . pa pou ariv ou okenn maler.”—PSONM 91:9, 10.
1. Akoz nou kapab dir ki Zeova i nou refiz?
ZEOVA i en vre refiz pour son pep. Si nou antyerman devoue avek li, nou kapab ganny “pouse dan tou kote me san ganny kraze; nou enkyet me nou pa perdi lespwar, nou ganny persekite, me nou pa ganny abandonnen; nou ganny rabat, me nou pa ganny detri.” Akoz? Parski Zeova i donn nou “pisans ki napa son parey.” (2 Korentyen 4:7-9) Wi, nou Papa seles i ed nou pour viv en lavi ki li i aprouve, e nou kapab pran aker parol sa psalmis: “Akoz ou’n dir: ‘Zeova i mon refiz,’ ou’n fer Tre O li menm ou demer; pa pou ariv ou okenn maler.”—Psonm 91:9, 10.
2. Ki nou kapab dir lo Psonm 91 e ki i promet?
2 I tre probab ki Moiz ki’n ekrir Psonm 91, vi ki Moiz ki ganny adrese konman konpoziter Psonm 90, e Psonm 91 i swiv san okenn deklarasyon ki mansyonn en lot ekriven. Petet Psonm 91 ti ganny sante par de group santer; savedir, petet pour konmanse en dimoun ti sant li tousel (91:1, 2), avek en lakoral ki ti reponn (91:3-8). I posib ki apre sa, zis en santer ki ti sante (91:9a) e en group ti reponn (91:9b-13). Apre i kapab ki en santer in sant bann dernyen parol (91:14-16). Antouka, Psonm 91 i promet sekirite spirityel pour bann Kretyen swazir konman en group e i osi donn en menm lasirans pour zot konpanyon ki’n dedye zot lavi avek Bondye. * Annou egzamin e aplik sa Psonm avek tou bann serviter Zeova.
Proteze dan ‘Landrwa sekre Bondye’
3. (a) Kwa sa “landrwa sekre sa enn Tre O”? (b) Ki nou eksperyanse par “reste anba lonbraz sa Enn Tou Pwisan”?
3 Sa Psalmis i sante: “Nenport dimoun ki reste dan landrwa sekre sa enn Tre O pou reste anba lonbraz sa Enn Tou Pwisan. Mon pou dir avek Zeova: “Ou mon refiz e mon forteres, mon Bondye, dan ki mon pou met konfyans.’” (Psonm 91:1, 2) “Landrwa sekre sa enn Tre O” i en landrwa proteksyon senbolik pour nou, e sirtou pour bann Kretyen swazir, ki Dyab i targete prensipalman. (Revelasyon 12:15-17) Si pa ti akoz sa proteksyon ki nou rezwir konman bann envite spirityel ki reste avek Bondye, Dyab ti pou’n fini detri nou tou. Par “reste anba lonbraz sa Enn tou Pwisan,” nou eksperyans lonbraz proteksyon Bondye. (Psonm 15:1, 2; 121:5) Napa refiz pli an sekirite oubyen en pli bon forteres ki nou Souvren Senyer, Zeova.—Proverb 18:10.
4. Ki bann fason ki Satan, sa “enn ki atrap zwazo,” i servi, e konman nou sape?
4 Sa psalmis i azoute: “Akoz li menm [Zeova] ki pou delivre ou dan latrap sa enn ki atrap zwazo, dan lepidemi ki koz bann soufrans.” (Psonm 91:3) En dimoun ki ti atrap zwazo dan ansyen Izrael ti souvan servi bann pyez oubyen latrap pour ganny zot. Sa “enn ki atrap zwazo,” i Satan li menm e parmi son bann pyez, se son lorganizasyon mesan ek son “bann riz.” (Efezyen 6:11) I’n maske son bann latrap dan nou semen pour atir nou dan mesanste e detri nou spirityalite. (Psonm 142:3) Toutfwa, parski nou’n renons tou keksoz ki pa drwat dan lizye Zeova, ‘nou nanm i parey en zwazo ki sape dan latrap.’ (Psonm 124:7, 8) Nou vreman rekonesan ki Zeova i delivre nou kont Satan “sa enn ki atrap zwazo”!—Matye 6:13.
5, 6. Ki “lepidemi” ki’n koz “bann soufrans,” me akoz pep Zeova pa soumet avek li?
5 Sa psalmis i sit “lepidemi ki koz bann soufrans.” Parey en maladi kontazye ki propaze, i annan serten keksoz ki koz “bann soufrans” pour lafanmiy imen e pour bann ki siport souvrennte Zeova. Dan sa domenn, istoryen Arnold Toynbee ti ekrir: “Depi lafen Dezyenm Lager Mondyal lakantite leta endepandan in double pour rezon nasyonalism . . . Ozordi se latitid divize ki deplizanpli pe domin lespri limanite.”
6 Toudilon bann syek, serten dirizan in entansifye bann konfli enternasyonal ki kree divizyon. Zot in osi demande ki loner ek respe i ganny donnen avek zot oubyen ver serten zimaz ouswa senbol. Me Zeova pa’n zanmen les son pep fidel soumet avek en tel “lepidemi.” (Danyel 3:1, 2, 20-27; 6:7-10, 16-22) Konman en lasosyasyon frer enternasyonal ki ranpli avek lanmour, nou donn Zeova latasman total, zis parey Labib in ansenny nou, nou pa pran kote avek personn, e san okenn prezidis nou rekonnet ki “dan nenport ki nasyon tou dimoun ki annan respe pour [Bondye] e ki fer sa ki byen Bondye i kontan li.” (Akt 10:34, 35; Egzod 20:4-6; Zan 13:34, 35; 17:16; 1 Pyer 5:8, 9) Me si konman Kretyen nou pas atraver “bann soufrans” dan laform persekisyon, nou zwaye e ganny proteze spirityelman “dan landrwa sekre sa enn Tre O.”
7. Konman Zeova i protez nou “avek bout son lezel”?
7 Annan Zeova konman nou refiz, nou trouv konfor dan sa bann parol: “Avek bout son lezel i pou bar tou akse avek ou, e anba son lezel ou pou pran refiz. Son fidelite i pou en gran boukliye e en gro miray.” (Psonm 91:4) Bondye i protez nou, zis parey en zwazo i anvol parlao son bann pti piti pour protez zot. (Izai 31:5) ‘Avek bout son lezel i bar tou akse avek nou.’ Avek son lezel en zwazo i kouver son bann piti, i protez zot kont lezot zannimo. Parey bann senp pti piti zwazo, nou an sekirite anba lezel senbolik Zeova parski nou’n pran refiz dan son vre lorganizasyon Kretyen.—Rit 2:12; Psonm 5:1, 11.
8. Konman “fidelite” Zeova i en gran boukliye e en miray?
8 Nou annan konfyans dan “fidelite.” I parey en gran boukliye ki ti ganny servi dan letan ansyen, son laform ti souvan parey en laport e ti ase gran pour kouver lekor en dimoun antye. (Psonm 5:12) Konfyans ki nou annan dan sa proteksyon i liber nou avek lafreyer. (Zenez 15:1; Psonm 84:11) Parey nou lafwa, fidelite Bondye i en gran boukliye ki protez nou, i tenny dife tou bann dart alimen ki Dyab i anvoye e i bar bann kou nou lennmi. (Efezyen 6:16) I osi en miray, en tre gro miray ki anpes lennmi antre, deryer ki nou debout ferm.
‘Nou pa pou per’
9. Akoz lannwit i kapab vin en letan ki anmenn lafreyer, me akoz nou pa per?
9 Akoz proteksyon Bondye, sa psalmis i dir: “Ou pa pou per okenn keksoz terifyan pandan lannwit, ni fles ki anvole pandan lazournen, ni lepidemi ki marse dan fernwanr, ni destriksyon ki fer ravaz dan milye lazournen.” (Psonm 91:5, 6) Vi ki anba kouvertir fernwanr bokou move aksyon i ganny komet, lannwit i kapab vin en moman ki anmenn lafreyer. Omilye sa fernwanr spirityel ki pe aktyelman kouver later, nou bann lennmi i souvannfwa fer keksoz anba anba avek lobzektif pour detri nou spirityalite e aret nou travay predikasyon. Me ‘nou pa per okenn keksoz terifyan pandan lannwit’ akoz Zeova i protez nou.—Psonm 64:1, 2; 121:4; Izai 60:2.
10. (a) Sa “fles ki anvole pandan lazournen” i paret pe endik kwa, e konman nou reazir anver li? (b) Kwa sa “lepidemi ki marse dan fernwanr,” e akoz nou pa per li?
10 “Fles ki anvole pandan lazournen” i paret pe endik latak verbal. (Psonm 64:3-5; 94:20) Bann lopozisyon kler kont nou servis sakre pa abouti dan nanryen, osi lontan ki nou kontinyen prezant laverite. Deplis, nou pa per “lepidemi ki marse dan fernwanr.” Sa i en lepidemi senbolik. E i ganny prodwir dan sa monn teneb ki malad moralman e spirityelman e ki dan pouvwar Satan. (1 Zan 5:19) I prodwir en kondisyon lespri ek leker ki mortel, e i kit dimoun inyoran konsernan Zeova, son plan, ek son laranzman ranpli avek lanmour. (1 Timote 6:4) Nou ki antoure avek sa fernwanr, nou pa per, akoz nou rezwir lalimyer spirityel an abondans.—Psonm 43:3.
11. Ki arive avek sa bann ki eksperyans ‘ravaz dan milye lazournen’?
11 Nou pa ni per sa “destriksyon ki fer ravaz dan milye lazournen.” “Dan milye lazournen” i kapab endik sa laklerte ouswa swadizan lasazes ki sa monn i ofer. Sa bann ki swiv son bann pwenn-vi materyalis i soufer destriksyon spirityel. (1 Timote 6:20, 21) Anmezir ki nou anons mesaz Rwayonm avek lardyes, nou pa per okenn nou bann lennmi, akoz Zeova i sa enn ki protez nou.—Psonm 64:1; Proverb 3: 25, 26.
12. Lo kote lekel ki plizyer milye i “tonbe,” e dan ki fason?
12 Sa psalmis i kontinyen: “Mil pou tonbe lo ou kote e dis mil lo ou kote drwat; sa pa pou vin pros avek ou. Se selman avek ou lizye ki ou pou gete e vwar rekonpans bann mesan.” (Psonm 91:7, 8) Parski zot pa fer Zeova zot refiz, bokou i “tonbe” dan lanmor spirityel lanmenm lo nou “kote.” Annefe, ozordi “dis mil” in tonbe lo “kote drwat” bann Izraelit spirityel. (Galat 6:16) Me ki swa nou bann Kretyen swazir oubyen zot konpanyon ki’n dedye zot lavi, nou santi nou an sekirite dan “landrwa sekre” Bondye. Nou senpleman ‘gete e vwar rekonpans bann mesan,’ ki pe rekolte problenm komersyal, relizye, e dan lezot fason. —Galat 6:7.
‘Pa pou ariv nou okenn Maler’
13. Ki bann maler ki pa ariv avek nou, e akoz?
13 Kantmenm sa monn i nepli an sekirite, nou met Bondye premye e ganny kouraz atraver parol sa psalmis: “Akoz ou’n dir: ‘Zeova i mon refiz,’ Ou’n fer Tre O li menm ou demer; pa pou ariv ou okenn maler, e ni menm en fleo pa pou apros ou latant.” (Psonm 91:9, 10) Wi, Zeova i nou refiz. Sepandan, nou osi fer Bondye Tre O ‘nou demer’ kot nou trouv sekirite. Nou loue Zeova konman Souvren Liniver, reste avek li vi ki i nou Sours sekirite, e anons sa bon nouvel lo son Rwayonm. (Matye 24:14) Alors, ‘pa pou ariv nou okenn maler’ —okenn maler ki’n ganny dekrir pli boner dan sa psonm. Menm ler nou eksperyans avek lezot bann maler tel parey tranbleman-d-ter, siklonn, linondasyon, lafamin, domaz lager, sa bann keksoz pa detri nou lafwa oubyen nou sekirite spirityel.
14. Konman bann serviter Zeova, akoz nou pa ganny afekte par bann fleo mortel?
14 Bann Kretyen swazir i parey bann rezidan etranze ki pe viv dan en latant apar avek sa sistenm. (1 Pyer 2:11) ‘Ni menm en fleo pa apros zot latant.’ Ki swa nou annan lespwar pour viv dan lesyel oubyen lo later, nou pa form parti lemonn, e nou pa ganny afekte par sa bann fleo ki spirityelman fatal parey imoralite, lanmour larzan, fo relizyon, e ladorasyon sa “bebet” ek son ‘zimaz,’ Nasyon Ini. —Revelasyon 9:20, 21; 13:1-18; Zan 17:16.
15. An rapor avek kwa ki nou rezwir led bann lanz?
15 Konsernan sa proteksyon ki nou rezwir, sa psalmis i azoute: “Akoz i [Zeova] pou donn son bann lanz en konmann konsernan ou, pour protez ou dan tou ou semen. Lo zot lebra zot pou anmenn ou, afen ki ou pa tap ou lipye kont okenn ros.” (Psonm 91:11, 12) Bann lanz in ganny pouvwar pour protez nou. (2 Lerwa 6:17; Psonm 34:7-9; 104:4; Matye 26:53; Lik 1:19) Zot protez nou ‘dan tou nou bann semen.’ (Matye 18:10) Nou rezwir gidans ek proteksyon bann lanz konman bann proklanmater Rwayonm e nou pa tonbe spirityelman. (Revelasyon 14:6, 7) Menm ‘bann ros,’ parey bann restriksyon kont nou travay, pa’n fer nou tonbe e nou pa’n perdi faver Bondye.
16. Dan ki fason ki latak “en zenn lyon” i diferan avek sa ki pour “en kobra,” e konman nou reakte anver zot?
16 Sa psalmis i kontinyen: “Lo sa zenn lyon ek kobra ou pou marse; ou pou pyetin sa zenn lyon avek krinyer ek sa gro serpan.” (Psonm 91:13) Zis parey en zenn lyon i atak par devan dan kler, serten nou bann lennmi i montre zot lopozisyon piblikman par pas bann lalwa ki annan pour bi aret nou travay predikasyon. Anmenmtan, bann latak san ekspekte i ganny fer lo nou zis parey en kobra i atake an sortan dan en landrwa kasyet. Kasyet dan lonbraz, bann klerze i parler atak nou atraver bann politisyen, ziz, ek lezot ankor. Me avek sipor Zeova e dan en fason pezib, nou esey redres sitiasyon ankour, dan sa fason nou “defann e konsolid levanzil.”—Filipyen 1:7; Psonm 94:14, 20-22.
17. Ki mannyer nou pyetin sa “zenn lyon avek krinyer”?
17 Sa psalmis i koz konsernan pyetin “sa zenn lyon avek krinyer ek sa gro serpan.” En zenn lyon avek krinyer i kapab vreman feros, e en gro serpan i kapab vin en tre gro reptil. (Izai 31:4) Kantmenm sa zenn lyon avek krinyer i kapab vreman feros ler i pe fer en latak par devan, nou senbolikman pyetin li par obeir Bondye plito ki zonm oubyen bann lorganizasyon ki parey lyon. (Akt 5:29) An konsekans sa “lyon” danzere pa fer nou okenn ditor spirityelman.
18. “Sa gro serpan” i kapab fer nou rapel ki sennla, e ki nou bezwen fer si nou anba son latak?
18 Dan Septant Grek, “sa gro serpan” i ganny apele “en dragon.” Sa i kapab fer nou mazin “sa gro dragon . . . , sa serpan lantikite, ki apel dyab ou satan.” (Revelasyon 12:7-9; Zenez 3:15) I parey en tre gro reptil ki kapab kraz e anval son viktim. (Zeremi 51:34) Ler Satan pe esey ploy li otour nou, kraz nou avek bann presyon sa monn, e anval nou, annou liber nou anba son dominasyon e pyetin sa “gro serpan.” (1 Pyer 5:8) Larestan Kretyen swazir i bezwen fer sa pour zot kapab partisip dan lakonplisman Romen 16:20.
Zeova—Nou Sours Delivrans
19. Akoz nou pran refiz dan Zeova?
19 Konsernan vre adorater, sa psalmis i reprezant Bondye an dizan: “Parski i’n donn mwan son lafeksyon, mon pou fer li sape. Mon pou protez li parski i’n arive konn mon non.” (Psonm 91:14) Sa fraz “mon pou protez li” i an realite vedir, “mon pou met li anler,” savedir, kot personn pa pou ganny akse avek li. Konman son bann adorater nou pran refiz dan Zeova sirtou akoz ‘nou’n donn li nou lafeksyon.’ (Mark 12:29, 30; 1 Zan 4:19) An retour, Bondye i ‘fer nou sape’ kont nou bann lennmi. Zanmen nou pou ganny eliminen lo later. Okontrer, nou pou ganny sove parski nou konn non Bondye e apel lo son non avek lafwa. (Romen 10:11-13) E nou determinen pour ‘mars onon Zeova pour touzour.’—Mika 4:5; Izai 43:10-12.
20. Dan konklizyon Psonm 91, ki Zeova i promet son bann serviter fidel?
20 Psonm 91 i konklir avek sa parol ki Zeova i dir avek son bann fidel serviter: “I pou apel mwan, e mon pou reponn li. Mon pou avek li dan detres. Mon pou delivre li e glorifye li. Avek longer bann zour mon pou satisfer li, e mon pou fer li vwar mon delivrans.” (Psonm 91:15, 16) Ler nou priy Bondye an akor avek son lavolonte, i reponn nou. (1 Zan 5:13-15) Nou’n deza pas atraver bokou detres akoz ostilite ki Satan i provoke kont nou. Me sa parol “mon pou avek li dan detres” i prepar nou pour plis leprev e asir nou ki Bondye pou soutenir nou ler sa sistenm mesan i ganny detri.
21. Konman bann Kretyen swazir in deza ganny glorifye?
21 Kantmenm lopozisyon entans delapar Satan, sa larestan Kretyen swazir ki parmi nou pou ganny glorifye dan lesyel dan letan apropriye Zeova—apre en “longer bann zour” lo later. Toudmenm, bann delivrans remarkab par Zeova in deza anmenn laglwar spirityel pour bann Kretyen swazir. E ki loner zot annan pour diriz bann Temwen Zeova lo later dan sa bann dernyen zour! (Izai 43:10-12) Me pli gran delivrans Zeova pour son pep pou ariv pandan son gran lager Amargedon ler i pou zistifye son souvrennte e santifye son non sen.—Psonm 83:18; Ezekyel 38:23; Revelasyon 16:14, 16.
22. Lekel ki pou ‘vwar delivrans par Zeova’?
22 Ki swa nou bann Kretyen swazir oubyen zot bann konpanyon ki’n dedye zot lavi, nou get ver Bondye pour delivrans. Pandan sa “gran zour Zeova ki enspir lafreyer,” sa bann ki pe fidelman servi Bondye pou ganny sove. (Yoel 2:30-32) Sa bann parmi nou ki pou form parti sa “gran lafoul” sirvivan dan nouvo monn Bondye e ki reste fidel pandan test final pou ganny ‘satisfe avek longer bann zour’ —lavi pour touzour. I pou osi resisit en gran kantite dimoun. (Revelasyon 7:9; 20:7-15) Vreman i pou en gran plezir pour Zeova ‘fer nou vwar delivrans’ atraver Zezi Kri. (Psonm 3:8) Avek bann lespwar sitan merveye devan nou, annou kontinyen rod led avek Bondye pour kont nou bann zour dan en fason pour rann li laglwar. Par nou parol ek aksyon, annou kontinyen prouve ki Zeova i nou refiz.
[Not anba lo paz]
^ par. 2 Bann ekriven bann Lekritir Grek pa ti konsider e aplik Psonm 91 konman en profesi Mesyanik. Byensir, Zeova ti en refiz e en forteres pour Zezi Kri letan i ti en zonm, zis parey I ete pour bann disip swazir Zezi ek zot bann konpanyon ki’n ganny dedye konman en group dan sa “letan lafen.”—Danyel 12:4.
Konman ou pou reponn?
• Kwa sa “landrwa sekre sa enn Tre O”?
• Akoz nou pa per?
• Dan ki sans ki ‘pa pou ariv nou okenn maler’?
• Akoz nou kapab dir ki Zeova i nou sours delivrans?
[Kestyon]
[Portre lo paz 15]
Eski ou konnen ki mannyer fidelite Zeova i en gran boukliye pour nou?
[Portre lo paz 16]
Kobra: A. N. Jagannatha Rao, Trustee, Madras Snake Park Trust
[Portre lo paz 16]
Zeova i ed son bann serviter akonpli zot minister kantmenm bann latak souden ek lopozisyon direk