“Aksepte Mon Legzanp”

“Pran mon zoug e aksepte mon legzanp akoz mon dou e mon annan limilite dan mon leker e zot a ganny repo.”—MATYE 11:29.

1. Akoz aprann avek Zezi i kapab agreab e anrisir nou?

ZEZI KRI ti touzour pans, ansenny, e azir dan en bon fason. Son letan lo later ti kourt, me i ti rezwir en karyer ki ti vo lapenn e satisfezan, e i ti reste zwaye. I ti rasanble son bann disip e ansenny zot konman pour ador Bondye, kontan dimoun, e venk lemonn. (Zan 16:33) I ti ranpli zot leker avek lespwar e “i’n revel nou lavi par son levanzil imortel.” (2 Timote 1:10) Si ou konsider ou konman enn son bann disip, ki savedir en disip pour ou? Par konsider sa ki Zezi ti dir konsernan en disip, nou kapab aprann konman pour anrisir nou lavi. Sa i enkli adopte son pwenn-vi e aplik serten prensip debaz.—Matye 10:24, 25; Lik 14:26, 27; Zan 8:31, 32; 13:35; 15:8.

2, 3. (a) Kisisa en disip Zezi? (b) Akoz i enportan pour demann nou lekor, ‘Mon’n vin disip ki sennla?’

² Dan Lekritir Grek Kretyen, sa mo ki’n ganny tradwir “disip” i endik en dimoun ki diriz son lespri ver en keksoz, oubyen en dimoun ki aprann. En lekspresyon ki relye avek sa i aparet dan nou teks kle, Matye 11:29: “Pran mon zoug e aksepte mon legzanp akoz mon dou e mon annan limilite dan mon leker e zot a ganny repo.” Wi en disip i en dimoun ki swiv legzanp en lot dimoun, setadir en dimoun ki aprann. Bann Levanzil i abitye servi sa mo “disip” kan pe refer avek bann ki ti swiv Zezi byen pre, ki ti vwayaz avek li letan i ti pe prese e ki ti ganny ansennyen avek li. Petet serten dimoun ti senpleman aksepte lansennyman Zezi, e menm fer li an sekre. (Lik 6:17; Zan 19:38) Bann ki ti  ekrir Levanzil ti osi refer avek “disip Zan [Batis] ek disip bann Farizyen.” (Mark 2:18) Vi ki Zezi ti averti son bann disip pour “vey zot lekor kont . . . lansennyman bann Farizyen,” nou kapab demann nou lekor, ‘Mon’n vin disip ki sennla?’—Matye 16:12.

³ Si nou bann disip Zezi, si nou pe swiv son legzanp, alors lezot i bezwen santi zot ganny rekonforte spirityelman dan nou prezans. Zot sipoze kapab vwar ki nou’n vin pli dou e pli modes. Si nou annan responsabilite pour donn direktiv dan nou travay, si nou en paran, oubyen nou en ansyen dan kongregasyon Kretyen, eski sa bann ki anba nou responsabilite i santi ki nou pe tret zot parey Zezi ti tret bann ki ti anba son responsabilite?

Konman Zezi ti tret Dimoun

4, 5. (a) Akoz i pa difisil pour konnen konman ki Zezi ti tret bann dimoun ki ti annan problenm? (b) Ki leksperyans Zezi ti pas ladan kan i ti pe dinen kot en Farizyen?

⁴ Nou bezwen konnen konman ki Zezi ti tret dimoun, sirtou bann ki ti annan bann problenm grav. Sa pa devret difisil pour aprann; Labib i kontyen plizyer rapor lo Zezi letan i ti rankontre lezot, dan ki ti annan serten ki ti trouble. Annou osi port latansyon lo konman bann sef relizye, sirtou bann Farizyen ti tret bann dimoun ki ti annan bann problenm enpe parey. Sa diferans pou fer nou aprann en kantite keksoz.

⁵ Lannen 31 N.L., letan Zezi ti pe fer en tournen predikasyon an Galile, “en Farizyen ti envit Zezi manze kot li.” Zezi pa ti ezite pour aksepte sa lenvitasyon. “Zezi ti antre dan son lakaz e pran son plas atab. Dan sa lavil ti annan en madanm ki ti pe anmenn en move lavi. Ler i ti’n tande ki Zezi ti kot sa Farizyen, i ti anmenn en fyol albat ranpli avek lesans. I ti debout kot lipye Zezi, e i ti debout plere e mouy lipye Zezi avek son larm, e i ti eswiy avek son seve. I ti anbras son lipye e vid lesans lo la.”—Lik 7:36-38.

6. Akoz ki “en madanm ki ti pe anmenn en move lavi” ti’n vin dan lakaz sa Farizyen?

⁶ Eski ou kapab imazin sa? En referans i dir: “Lefe ki koutim sosyal ti permet bann dimoun ki dan bezwen pour vizit en tel festen pour kapab pran bann restan, sa madanm (v.37) ti profit lanbeli.” Sa i kapab eksplike ki mannyer en dimoun ti kapab antre san ki i ti’n ganny envite. Petet ti annan ankor lezot ki ti pe espere pour pran bann restan apre dinen. Me konportman sa madanm ti enpe drol. I pa ti esper akote ziska ki dinen ti’n fini. I ti napa en bon repitasyon, laplipar dimoun ti konn li konman “en madanm ki ti pe anmenn en move lavi,” ki fer ki Zezi ti dir ki i ti konn “son pese, ki bokou.”—Lik 7:47.

7, 8. (a) Konman ki nou ti a kapab reazir dan bann sirkonstans parey i’n ganny raporte dan Lik 7:36-38? (b) Ki mannyer Simon ti reazir?

⁷ Sipoze ou ti pe viv dan sa letan e ki ou ti dan plas Zezi. Ki mannyer ou ti pou’n reazir? Eski ou ti pou santi ou anbarase letan sa madanm ti’n apros ou? Konman ki en tel sitiasyon ti pou’n afekte ou? (Lik 7:45) Eski ou ti pou’n ofanse?

⁸ Si ou ti enn sa bann envite, eski ou ti pou’n rezonn omwen parey Simon sa Farizyen? “Kan sa Farizyen ki ti’n envit Zezi ti war sa, i ti dir dan limenm, ‘Si sa zonm ti en profet, i ti a konnen ki mannyer sa madanm ki pe tous li i anmenn son lavi, parski i ti anmenn en move lavi.’ ” (Lik 7:39) De lot kote, Zezi ti en zonm ki ti annan bokou konpasyon. I ti konpran sitiasyon dezespere sa madanm e i ti santi son langwas. Nou napa okenn lenformasyon lo konman ki i ti’n tonm dan sa move lavi. Si vreman i ti en prostitye, aparaman bann zonm dan lavil, bann relizye Zwif, pa ti’n ed li.

9. Ki mannyer Zezi ti reazir, e ki rezilta sa ti kapab anmennen?

⁹ Me Zezi ti anvi ed li. I ti dir li: “Ou pese in ganny pardonnen.” Apre i ti azoute: “Ou lafwa in sov ou, al an-pe.” (Lik 7:48-50) Sa  resi i fini la. Petet i annan ki kapab obzekte an dizan ki Zezi pa ti fer gran keksoz pour li. I ti senpleman donn li son benediksyon e fer li ale. Eski ou krwar ki petet i ti retourn dan son lavi deplorab? Menm si nou pa kapab vreman sir, remarke ki Lik i dir apre. I ti rakonte ki Zezi ti vwayaze “dan plizyer lavil ek vilaz pour pres Bonn Nouvel Rwayonm Bondye.” Lik ti osi raporte ki “plizyer bann madanm” ti avek Zezi ek son bann disip, e zot “ti servi zot prop byen pour ed Zezi ek son bann disip.” I posib ki sa madanm rekonesan ti’n repantir, i ti aprezan parmi zot, e i ti’n konmans viv en lavi ki fer plezir Bondye avek en konsyans prop, en nouvo bi dan lavi, ek en pli gran lanmour pour Bondye. —Lik 8:1-3.

Diferans ant Zezi ek bann Farizyen

10. Akoz i itil pour egzamin sa resi lo Zezi ek sa madanm kot Simon?

¹⁰ Ki nou kapab aprann atraver sa resi vivan? Eski i pa tous nou? Sipoze ou ti kot Simon sa zour. Ki mannyer ou ti pou santi? Eski ou ti pou reazir parey Zezi, ouswa ou ti pou santi enpe parey sa Farizyen ki ti’n envit li? Zezi ti Garson Bondye, alors nou pa kapab santi oubyen azir egzakteman parey li. Lo lot kote, nou pa ti pou anvi mazin nou konman Simon, sa Farizyen. Napa bokou dimoun ki ti pou fyer pour vin parey en Farizyen.

11. Akoz nou pa ti a kontan ganny klasifye konman bann Farizyen?

¹¹ Apre ki nou’n vwar bann levidans Biblik e profann, nou kapab konklir ki bann Farizyen ti pans tro bokou lo zot menm e zot ti krwar ki se zot ki ti la pour protez byennet lepep. Zot pa ti aksepte ki an zeneral Lalwa Bondye ti kler e fasil pour konpran. Kan Lalwa pa ti paret sitan presi pour zot, zot ti esey azout lezot bout avek lentansyon pour elimin okenn nesesite pour dimoun desid dapre zot konsyans. Sa bann sef relizye ti esey envant en lareg pour gouvern kondwit bann dimoun dan tou laspe, menm dan bann keksoz ki pa ti vreman enportan. *

12. Ki lopinyon bann Farizyen ti annan lo zot menm?

¹² Josephus, en istoryen Zwif ki ti viv dan premye syek, ti fer li kler ki bann Farizyen ti konsider zot konman zantiy, dou, zis, e kalifye pour zot latas. San dout, serten antre zot ti pres pour koumsa. Petet ou mazin Nikodenm. (Zan 3:1, 2; 7:50, 51) Avek letan, serten parmi zot ti aksepte lavi Kretyen. (Akt 15:5) Zapot Pol ti ekrir konsernan serten Zwif, tel parey bann Farizyen: “Zot ranpli avek motivasyon pour Bondye, me zot motivasyon pa baze lo en vre konnesans.” (Romen 10:2) Toudmenm, Levanzil i portre zot parey bann dimoun ordiner ti vwar zot—orgeye, arogan, krwar zot tro zis, touzour pe rod fot, kontan ziz e abes lezot.

Pwenn-vi Zezi

13. Ki Zezi ti annan pour dir lo bann Farizyen?

¹³ Zezi ti dir avek bann profeser Lalwa ek bann Farizyen ki zot ipokrit. “Zot met fardo lour lo zepol dimoun, me zotmenm, zot pa pare pour lev menm en ledwa pour tous li.” Wi, sa pwa ti lour, e sa zoug ki ti ganny enpoze lo dimoun ti dir. Zezi ti kontinyen par dir bann profeser Lalwa ek bann Farizyen ki zot ti “ensanse.” En dimoun ensanse i en menas pour kominote. Zezi ti osi apel bann profeser Lalwa ek bann Farizyen bann gid “aveg” e  dir ki zot ti “negliz sa ki pli enportan dan Lalwa, tel ki lazistis, konpasyon, ek fidelite.” Lekel ki ti pou anvi Zezi konsider li parey en Farizyen?—Matye 23:1-4, 16, 17, 23.

14, 15. (a) Lafason ki Zezi ti tret Matye Levi i revel kwa konsernan latitid bann Farizyen? (b) Ki leson enportan nou kapab aprann atraver sa resi?

¹⁴ Preski tou dimoun ki lir bann Levanzil i kapab vwar sa move personnalite ki laplipar Farizyen ti annan. Apre ki Zezi ti’n envit Matye Levi, sa kolekter taks pour vin son disip, Levi ti fer en gran festen pour li. Sa resi i dir: “Bann Farizyen ek bann profeser Lalwa, ti mirmire kont disip Zezi. Zot ti dir, ‘Akoz, zot manze e bwar avek kolekter taks ek bann ki viv dan pese?’ Zezi ti reponn zot, ‘. . . Mon pa’n vini pour apel bann zis, me bann peser, pour ki zot sanz zot lavi.’ ”—Lik 5:27-32.

¹⁵ Levi li menm ti’n konpran en lot keksoz ki Zezi ti dir sa zour: “Al rode ki savedir: ‘Se konpasyon ki mon oule, e pa sakrifis zannimo.’ ” (Matye 9:13) Menm si bann Farizyen ti dir ki zot krwar dan bann lekritir bann profet Ebre, zot pa ti aksepte sa parol ki trouve dan Osea 6:6. Si zot ti pou fer en fot, zot ti fer sir ki zot ki’n fer sa fot akoz lobeisans anver tradisyon. Nou tou endividyelman nou kapab demann nou lekor, ‘Eski mon annan repitasyon pour toultan met serten lareg, menm dan bann pwenn-vi ki personnel oubyen dan lafason ki nou  abord serten size? Oubyen eski lezot i pans lo mwan konman en dimoun ki premyerman annan pitye e bon?’

16. Ki latitid bann Farizyen ti annan, e ki mannyer nou kapab evite vin parey zot?

¹⁶ Toultan pe tir lizye lo tou keksoz. Se koumsa ki bann Farizyen ti ete. Bann Farizyen ti vey tou defo—ki swa reel ou imaziner. Zot ti fer dimoun toultan reste lo zot defans e fer zot rapel zot febles. Bann Farizyen ti fyer pour donn en dizyenm lo sak pti lerb parey lanmant, lannet, ek kimen. Zot ti servi zot rob pour atir latansyon lo zot fidelite e zot ti esey kontrol lepep. Sirman, si nou anvi ki nou aksyon i vin an armoni avek sa ki pour Zezi, nou bezwen evit sa tandans pour toultan rod oubyen atir latansyon lo defo lezot.

Ki mannyer Zezi ti rezourd Problenm?

17-19. (a) Eksplike konman ki Zezi ti tret en sitiasyon ki ti’n kapab annan bann konsekans tre grav. (b) Kwa ki ti fer sa sitiasyon difisil e pa agreab? (c) Si ou ti prezan kan sa madanm ti apros Zezi, ki mannyer ou ti pou’n reazir?

¹⁷ Fason ki Zezi ti abord bann problenm ti tre diferan avek bann Farizyen. Reflesir lo konman ki Zezi ti tret en sitiasyon ki ti kapab vin tre serye. Sa ti enplik en madanm ki ti pe perdi disan depi 12 an. Ou kapab lir sa resi dan Lik 8:42-48.

¹⁸ Resi ki Mark ti ekrir i dir ki sa madanm “ti vini tranblan avek lafreyer.” (Mark 5:33) Akoz? San dout sa i akoz i ti konnen ki i ti’n kas Lalwa Bondye. Dapre Levitik 15:25-28, en madanm ki ti pe sennyen dan en fason ki pa ti normal ti enpir ziska en semenn apre ki sa disan ti arete. Tou sa ki i ti touse e tou dimoun ki i ti vin an kontak avek ti vin enpir. Sa madanm ti bezwen fer bokou zefor pour kapab trouv son semen parmi lafoul pour ariv kot Zezi. Kan nou get sa resi 2,000 an apre, nou senpatiz avek li pour lenkonvenyans ki i ti ladan.

¹⁹ Si ou ti prezan sa zour, ki mannyer ou ti pou vwar sa sitiasyon? Ki ou ti pou’n dir? Remarke ki Zezi ti tret sa madanm dan en fason zantiy, avek lanmour ek konsiderasyon, e i pa ti ni menm mansyonn okenn problenm ki i ti’n kapab koze.—Mark 5:34.

20. Si dan nou letan nou ti bezwen obeir Levitik 15:25-28, ki defi nou ti pou bezwen fer fas avek?

 ²⁰ Eski nou kapab aprann en keksoz atraver sa lensidan? Sipoze ou ti en ansyen dan en kongregasyon Kretyen ozordi. Anplis ki sa, meton ki nou ti bezwen obeir Levitik 15:25-28 e ki en madanm Kretyen ti’n vyol sa lalwa, i pe trakase e i santi li san okenn defans. Ki mannyer ou ti pou reazir? Eski ou ti pou imilye li an piblik par ou bann kritik? Petet ou a dir, “Mon pa ti pou zanmen fer sa! Mon ti pou fer mon mye pour swiv legzanp Zezi, pour montre labonte, lanmour, ek konsiderasyon.” Tre byen! Me sa ki pli difisil se pour fer li, pour imit legzanp Zezi.

21. Ki Zezi ti ansenny dimoun konsernan Lalwa?

²¹ An zeneral, Zezi ti fer bann dimoun santi zot pli byen, i ti rekonfort zot e ankouraz zot. Kot Lalwa Bondye ti defini, sa ki i ti dir ti vedir sanmenm. Kan i ti paret zeneral, dimoun ti bezwen servi plis zot konsyans e zot ti kapab montre zot lanmour pour Bondye par bann desizyon ki zot ti fer. Lalwa ti fleksib. (Mark 2:27, 28) Bondye ti kontan son pep, i ti touzour travay pour zot byennet, e i ti pare pour montre mizerikord kan zot ti fer fot. Zezi ti koumsa.—Zan 14:9.

Rezilta Lansennyman Zezi

22. Ki kalite latitid bann disip Zezi ti gannyen atraver lansennyman Zezi?

²² Bann ki ti ekout Zezi e vin son disip ti apresye laverite son deklarasyon: “Mon zoug i fasil e mon fardo i leze.” (Matye 11:30) Zot pa ti zanmen santi ki i ti met en fardo lo zot, fatig zot, oubyen reprimann zot zanmen fini. Zot ti pli lib, pli ere, e zot ti annan plis konfyans an rapor avek zot relasyon avek Bondye e avek enn a lot. (Matye 7:1-5; Lik 9:49, 50) Zot ti aprann avek li ki en sef relizye i sipoze rekonfort lezot e demontre limilite.—1 Korentyen 16:17, 18; Filipyen 2:3.

23. Vi ki bann disip Zezi ti avek li, ki leson enportan ki zot ti aprann e ki konklizyon zot ti tire?

²³ Deplis, bokou ti enpresyonnen avek lenportans pour reste an linyon avek Kris e adopte sa leta lespri ki i ti montre. I ti dir son bann disip: “Parey mon Papa in kontan mwan, mon’n kontan zot parey, reste dan mon lanmour. Si zot obei mon bann konmannman, zot pou reste dan mon lanmour, parey mwan, mon’n obei konmannman mon Papa e mon reste dan son lanmour.” (Zan 15:9, 10) Pour zot vin bann minis ek serviter Bondye ki vreman reisi, zot ti pou bezwen aplik seryezman sa ki zot ti’n aprann avek Zezi, dan predikasyon e dan lansennyman piblik ensi ki dan lafason ki zot ti tret zot fanmiy ek zanmi. Anmezir ki bann kongregasyon ti formen, zot ti pou bezwen souvan rapel zot lekor ki fason fer Zezi ti sa bon fason. Sa ki i ti ansennyen ti laverite, sa lavi ki zot ti obzerve dan li ti vreman sa kalite lavi pour aspire.—Zan 14:6; Efezyen 4:20, 21.

24. Ki bann keksoz ki nou devret pran aker dan legzanp Zezi?

²⁴ Letan ou reflesir lo serten keksoz ki nou’n diskite, eski ou vwar kote pour amelyore? Eski ou dakor ki Zezi ti touzour pans, ansenny oubyen azir dan en bon fason? Alor, pran kouraz. I annan en keksoz tre ankourazan pour li dir nou: “Aprezan ki zot konn sa, zot ere si zot met li an pratik.”—Zan 13:17.

[Not anba lo paz]

Konman ou pou reponn?

• Ki savedir en disip Zezi pour ou?

• Ki mannyer Zezi ti tret bann dimoun?

• Ki nou kapab aprann atraver fason ki Zezi ti ansennyen?

• Ki mannyer bann Farizyen ek Zezi ti diferan?

[Study Questions]

[Portre lo paz 16, 17]

Konman latitid Zezi anver bann dimoun ti diferan avek bann Farizyen!