Tou Bann Vre Kretyen I Bann Evanzelizater
Tou Bann Vre Kretyen I Bann Evanzelizater
“Sant pour Zeova, beni son non. Sak zour rakont sa bon nouvel son delivrans.”—PSONM 96:2.
1. Ki bon nouvel dimoun i bezwen tande, e konman ki Temwen Zeova in montre legzanp dan proklanmasyon sa nouvel?
DAN en monn kot bann dezas i arive toulezour, i vreman rekonfortan pour konnen ki lager, krim, lafen, ek lopresyon pou byento terminen parey Labib i dir. (Psonm 46:9; 72:3, 7, 8, 12, 16) Fransman, eski sa pa i en bon nouvel ki tou dimoun i bezwen tande? Bann Temwen Zeova i dakor avek sa. Zot renonmen partou konman bann dimoun ki pres bann “bon nouvel konsernan en keksoz meyer.” (Izai 52:7) I vre ki bokou Temwen in sibir persekisyon akoz zot determinasyon pour anons sa bon nouvel. Me zot vreman enterese avek dimoun. E bann Temwen in vreman devlop en rikord zel ek perseverans!
2. Nonm en rezon ki fer Temwen Zeova zele?
2 Zel ki bann Temwen Zeova i demontre ozordi i parey pour bann Kretyen dan premye syek. Konsernan zot, zournal Katolik Romen L’Osservatore Romano ti byen dir: “Osito ki zot ti batize, bann premye Kretyen ti santi ki i zot devwar pour propaz Levanzil. Bann lesklav ti transmet Levanzil avek zot prop labous.” Akoz Temwen Zeova i sitan zele parey sa bann premye Kretyen? Premyerman, se akoz sa bon nouvel ki zot pe anonse i sorti kot Bondye li menm. Eski i annan en pli bon rezon pour annan zel ki sa? Zot predikasyon pe reponn lapel sa psalmis: “Sant pour Zeova, beni son non. Sak zour rakont sa bon nouvel son delivrans.”—Psonm 96:2.
3. (a) Lekel sa dezyenm rezon ki fer Temwen Zeova zele? (b) Kwa ki enplike dan “delivrans [Bondye]”?
3 Parol sa psalmis i fer nou mazin en dezyenm rezon ki fer Temwen Zeova zele. Zot mesaz i en mesaz delivrans. I annan serten dimoun ki travay dan domenn medikal, sosyal, ekonomik, oubyen lezot domenn pour amelyor kalite lavi zot prosen, e bann tel zefor i onorab. Me nenport ki keksoz ki en imen i kapab fer pour en lot i tre limite konpare avek “delivrans [Bondye].” Atraver Zezi Kri, Zeova pou sov bann dimoun dou dan pese, maladi, ek lanmor. Bann ki benefisye pou viv pour touzour! (Zan 3:16, 36; Revelasyon 21:3, 4) Ozordi, delivrans i parmi “bann travay merveye” ki bann Kretyen i koz lo la kan zot reponn sa lapel: “Deklar laglwar [Bondye] parmi bann nasyon, son bann travay merveye parmi tou pep. Parski Zeova i gran e devret ganny loue enfiniman. I enspir lakrent plis ki tou lezot bondye.”—Psonm 96:3, 4.
Legzanp nou Met
4-6. (a) Nonm sa trwazyenm rezon akoz Temwen Zeova i zele? (b) Ki mannyer Zezi ti montre zel dan sa travay pour pres sa bon nouvel?
4 I annan en trwazyenm rezon ki fer Temwen Zeova zele. Zot swiv legzanp Zezi Kri. (1 Pyer 2:21) Sa zonm parfe ti aksepte avek gran ker misyon pour “anons bann bon nouvel pour bann dimoun dou.” (Izai 61:1; Lik 4:17-21) Alors, i ti vin en evanzelizater, en dimoun ki anons bann bon nouvel. I ti vwayaz partou dan Galile ek Zide pour “anons Bonn Nouvel konsernan Rwayonm Bondye.” (Matye 4:23) Lefe ki i ti konnen ki bokou dimoun ti pou byen reazir anver sa bon nouvel, i ti dir son bann disip: “I annan en gran rekolt ki’n pare me napa ase zouvriye. Pour sa rezon, sipliy met rekolt pour anvoy zouvriye.”—Matye 9:37, 38.
5 An armoni avek son prop lapriyer, Zezi ti form lezot dimoun pour vin bann evanzelizater. Avek letan, i ti anvoy son bann zapot lo zot menm e dir zot: “Ale, e prese ki, ‘Rwayonm lesyel i pros!’ ” Eski i ti pou pli pratik si zot ti met an mars bann progranm pour diminyen bann problenm sosyal ki ti egziste dan zot letan? Oubyen eski zot ti devret enplik zot dan politik pour lit kont koripsyon ki ti pe rennyen sa letan? Non. Plito, Zezi ti etablir standar pour tou evanzelizater Kretyen kan i ti dir son bann disip: “Ale, e prese.”—Matye 10:5-7.
6 Plitar, Zezi ti anvoy en lot group disip pour anonse: “Rwayonm Bondye in ariv pre avek zot.” Kan zot ti retournen pour raport sikse ki zot ti’n gannyen pandan zot vwayaz evanzelizasyon, Zezi ti vreman kontan. I ti priye: “Mon Papa, Senyer lesyel ek later, mon rann ou glwar akoz ou’n kasyet sa bann keksoz avek bann malen ek bann entelizan e ou’n revel zot avek bann pti zanfan.” (Lik 10:1, 8, 9, 21) Bann disip Zezi, ki ti bann peser, fermye, e lezot ki ti travay dir, ti parey bann pti zanfan konpare avek bann sef relizye ki ti byen edike. Me bann disip ti ganny formen pour anons pli bon nouvel ki ti annan.
7. Apre ki Zezi ti mont osyel, avek ki son bann disip ti premyerman pres sa bon nouvel?
7 Apre ki Zezi ti mont osyel, son bann disip ti kontinyen propaz sa bon nouvel delivrans. (Akt 2:21, 38-40) Avek ki zot ti prese premyerman? Eski zot ti al kot bann nasyon ki pa ti konn Bondye? Non, zot ti konmans avek Izrael, en pep ki ti’n konn Zeova pour plis ki 1,500 an. Eski zot ti annan drwa pour pres dan en landrwa kot dimoun ti pe deza ador Zeova? Wi. Zezi ti’n dir zot: “Zot a vin mon bann temwen dan Zerizalenm, dan tou rezyon Zide ek Samari e ziska tou bann landrwa pli elwannyen lo later.” (Akt 1:8) Izrael ti bezwen tann sa bon nouvel li osi zis parey tou lezot nasyon.
8. Konman ki Temwen Zeova ozordi pe imit bann disip Zezi dan premye syek?
8 Pareyman, Temwen Zeova ozordi pe pres partou lo later. Zot pe korpere avek sa lanz ki Zan ti vwar “avek en levanzil eternel pour anons tou zabitan later, tou nasyon, tribi, lalang ek pep.” (Revelasyon 14:6) Pandan lannen 2001, zot ti aktif dan 235 pei ek teritwar, enkli serten ki ganny konsidere konman landrwa Kretyen. Eski i mal pour Temwen Zeova pres dan bann landrwa kot Kretyente in deza etabli son bann legliz? Serten i dir ki i mal e zot menm konsider sa travay evanzelizasyon konman en mwayen pour “vol zot mouton.” Parkont, Temwen Zeova i mazin santiman ki Zezi ti annan pour bann Zwif ki ti annan limilite dan son letan. Menm si zot ti deza annan zot bann pret, Zezi pa ti ezite pour anons zot sa bon nouvel. “Son leker ti ranpli avek konpasyon pour lafoul ki i ti war, akoz zot ti fatige e dekouraze parey bann mouton ki napa berze.” (Matye 9:36) Kan bann Temwen Zeova i vwar bann dimoun ki annan limilite e ki pa konn Zeova ek son Rwayonm, eski zot devret refiz sa bann dimoun sa bon nouvel akoz serten larelizyon i reklanm lotorite lo zot? Si nou swiv legzanp bann zapot Zezi, nou pou reponn non. Sa bon nouvel i bezwen ganny prese “avek tou bann nasyon,” san eksepsyon.—Mark 13:10.
Tou bann premye Kretyen ti pres Levanzil
9. Dan premye syek, lekel dan kongregasyon Kretyen ki ti partisip dan travay predikasyon?
9 Lekel ki ti partisip dan travay predikasyon dan premye syek? Fe i montre ki tou Kretyen ti bann evanzelizater. Ekriven W. S. Williams i fer sa remark: “Laprev zeneral i ki tou Kretyen dan Legliz okonmansman . . . ti pres levanzil.” An rapor avek bann levennman ki ti arive zour Lapannkot lannen 33 N.L., Labib i dir: “Zot tou [zonm ek fanm] zot ti ranpli avek Sent-Espri e zot ti konmans koz dan lezot langaz, selon ki Sent-Espri ti donn zot pouvwar.” Bann evanzelizater ti enkli bann zonm ek fanm, bann zenn ek aze, e bann lesklav ek zonm lib. (Akt 1:14; 2:1, 4, 17, 18; Yoel 2:28, 29; Galat 3:28) Kan persekisyon ti fer bokou Kretyen forse kit Zerizalenm, “bann krwaryan ki ti’n disperse ti al partou pour anons Levanzil.” (Akt 8:4) Tou “bann krwaryan ki ti’n disperse,” pa zis detrwa ki ti’n ganny apwente, ti fer sa travay evanzelizasyon.
10. Ki de lord ki ti ganny akonpli avan destriksyon sistenm Zwif?
10 Sa ti en realite diran sa bann premye lannen. Zezi ti profetize: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” (Matye 24:14) Letan sa parol ti ganny akonpli dan premye syek, sa bon nouvel ti ganny anonse partou avan ki bann larme Romen ti detrir sistenm relizye e politik Zwif. (Kolosyen 1:23) Deplis tou disip Zezi ti obeir son lord: “Ale e fer tou pep vin mon bann disip. Batiz zot o non di-Per, di-Fis e di-Sent-Espri. Ansenny zot pour obei tou sa ki mon’n konmande.” (Matye 28:19, 20) Bann premye Kretyen pa ti enplor bann dimoun dou pour krwar dan Zezi e apre les zot servi Bondye dan zot prop fason, parey serten ki prese i fer ozordi. Okontrer, zot ti ansenny zot pour vin disip Zezi, organiz zot dan bann kongregasyon, e form zot pour ki zot osi zot pres sa bon nouvel e fer disip. (Akt 14:21-23) Temwen Zeova denozour i swiv sa menm model.
11. Lekel ozordi ki pe anons pli bon nouvel pour limanite?
11 An swivan legzanp Pol, Barnabas, ek lezot dan premye syek, bokou Temwen Zeova in al dan bann pei etranze konman bann misyonner. Zot travay in vreman itil, vi ki zot pa’n enplik zot dan politik oubyen dan lezot fason ki ti a kapab egar zot avek sa misyon pour pres sa bon nouvel. Zot in senpleman obeir lord Zezi: “Ale, e prese.” Toudmenm, laplipar Temwen Zeova pa pe servi konman misyonner dan bann pei etranze. Bokou zot i bezwen travay pour ganny zot lavi, e lezot i ankor pe lekol. Serten i bezwen okip zot zanfan. Me tou Temwen i partaz sa bon nouvel ki zot in aprann avek lezot. Zenn konman vye, zonm konman fanm, pe aksepte sa lankourazman sorti dan Labib avek bokou lazwa: “Anons Laparol, ensiste dan tou lokazyon ki prezante, favorab ou pa favorab.” (2 Timote 4:2) Parey zot bann konpatriyot dan premye syek, zot kontinyen “prese . . . e anons Zezi konman Mesi.” (Akt 5:42) Zot pe anons pli bon nouvel ki annan pour limanite.
Konverti lezot oubyen pres zot Levanzil?
12. Ki mannyer serten i konsider konversyon?
12 Denozour, serten i dir ki konversyon i en keksoz danzere. En dokiman ki’n ganny pibliye par World Council of Churches i menm dir ki konverti lezot i en pese. Akoz? Catholic World Report i dir ki anba presyon persistan bann konplent Legliz Ortodoks, konverti lezot in vin en keksoz negatif ki vedir fors lezot.
13. Donn serten legzanp ki montre ki konversyon i kapab danzere?
13 Eski konversyon i danzere? I kapab. Zezi ti dir ki konversyon ki ganny fer par bann profeser Lalwa ek bann Farizyen ti danzere pour bann dimoun ki zot konverti. (Matye 23:15) Byensir, i pa byen pour ‘fors’ en dimoun pour konverti. Par egzanp, dapre istoryen Josephus, kan Makabeen John Hyrcanus ti kaptir bann Idimeen, i “ti permet zot pour reste dan zot pei akondisyon ki zot sirkonsi e pare pour obzerv lalwa bann Zwif.” Si bann Idimeen ti anvi viv anba lotorite Zwif, zot ti pou bezwen pratik larelizyon Zwif. Bann istoryen i rakonte ki dan wityenm syek N.L., Charlemagne ti konkerir Saksonn dan nor Lerop ki ti en rezyon payen e i ti britalman fors zot pour konverti. * Me eski bann Saksonn oubyen bann Idimeen ti vreman senser dan zot konversyon? Par egzanp, eski Lerwa Erod, en Idimeen—ki ti esey touy Zezi —ti vreman atase avek Lalwa Moiz ki ti’n ganny divinman enspire?—Matye 2:1-18.
14. Ki mannyer serten misyonner dan Kretyente i met presyon lo dimoun pour konverti?
14 Eski konmela dimoun i ganny forse pour konverti? Dan en sans, wi, serten pe gannyen. I annan rapor ki serten misyonner dan Kretyente i ofer labours aletranze pour bann ki zot krwar i kapab konverti. Oubyen zot fer en refizye ki pe mor lafen asize pour ekout en sermon afen ki i kapab ganny en rasyon manze. Dapre en deklarasyon ki ti pibliye an 1992 par en lasanble pour bann Levek Ortodoks, “konversyon i parfwa ganny fer par atir lezot avek bann keksoz materyel e parfwa par diferan form vyolans.”
15. Eski Temwen Zeova i konverti dan fason ki bokou dimoun i konpran sa mo? Eksplike.
15 I mal pou met presyon lo dimoun pour sanz zot larelizyon. Sirman, Temwen Zeova pa azir dan sa fason. * Alors, zot pa konverti dimoun dan fason ki bokou i konpran sa mo ozordi. Plito, parey bann premye Kretyen, zot pres sa bon nouvel avek tou dimoun. Okenn dimoun ki pare pour ekoute i ganny envite pour pran plis konnesans atraver en letid Labib. Sa bann dimoun enterese i aprann met lafwa, ki solidman baze lo konnesans egzakt Labib, dan Bondye e dan son plan. An rezilta, zot apel lo non Bondye, Zeova, pour delivrans. (Romen 10:13, 14, 17) I en desizyon personnel si zot pou aksepte sa bon nouvel oubyen non. Zot pa oblize fer nanryen si zot pa anvi. Si non, konversyon pa ti pou fer sans. Pour fer plezir Bondye, ladorasyon ki en dimoun i ofer i devret sorti ofon son leker.—Deterononm 6:4, 5; 10:12.
Pres Levanzil dan Letan modern
16. Konman ki travay evanzelizater bann Temwen Zeova in ogmante dan letan modern?
16 Dan letan modern, Temwen Zeova in pres sa bon nouvel lo Rwayonm dan en fason ki Matye 24:14 in trouv en pli gran lakonplisman. Magazin Latour Veyer in en lenstriman remarkab ki zot in servi dan zot travay evanzelizasyon. * An 1879, kan bann premye nimero Latour Veyer ti pibliye, en total 6,000 magazin ti ganny distribye dan en langaz. Lannen 2001, 122 an plitar, 23,042,000 kopi in ganny distribye dan 141 langaz. Sa ogmantasyon in ganny akonpannyen par en lagrandisman dan aktivite evanzelizasyon bann Temwen Zeova. Konpar sa detrwa mil er-d-tan ki ti ganny depanse tou-le-zan dan travay evanzelizasyon dan 19 vyenm syek avek sa 1,169,082,225 er-d-tan ki ti ganny dedye dan travay predikasyon pandan lannen 2001. Mazin sa 4,921,702 letid Labib gratwit ki ti ganny fer an mwayenn tou le mwan. Pa i en gran travay ki’n ganny akonpli! E sa ti ganny fer par apepre 6,117,666 proklanmater Rwayonm aktif.
17. (a) Ki kalite fo bondye ki ganny adore ozordi? (b) Malgre zot langaz, nasyonalite, oubyen ran sosyal, ki dimoun i devret konnen?
17 En psalmis i dir: “Tou bondye bann pep i bann bondye ki napa valer; me Zeova li, i’n fer lesyel.” (Psonm 96:5) Dan sa monn ozordi, nasyonalism, lanblenm nasyonal, bann dimoun enportan, bann keksoz materyel, e menm larises in vin bann lobze ladorasyon. (Matye 6:24; Efezyen 5:5; Kolosyen 3:5) En fwa, Mohandas K. Gandhi ti dir: “Mon vreman konvenki ki . . . Lerop ozordi i Kretyen zis par non. An realite i pe ador Mammon [larises].” Laverite i ki sa bon nouvel i bezwen ganny tande partou. Tou dimoun, nenport ki langaz, nasyonalite, oubyen ran sosyal ki zot ladan, i bezwen konn konsernan Zeova ek son plan. Nou swete ki tou dimoun i reazir favorableman anver parol sa psalmis: “Donn Zeova laglwar ek lafors. Donn Zeova sa laglwar ki pour son non”! (Psonm 96:7, 8) Temwen Zeova i ed lezot pour aprann konsernan Zeova pour ki zot kapab donn li laglwar parey zot devret. E bann dimoun ki reazir favorableman i benefisye en kantite. Ki benefis ki zot eksperyanse? Sa pou ganny diskite dan lartik swivan.
[Not anba lo paz]
^ par. 13 Dapre The Catholic Encyclopedia, pandan sa lepok ki apel Lareform, enpoz en larelizyon par-d-fors lo en dimoun ti ganny eksprimen par sa moto: Cuius regio, illius et religio (ki vedir: “Sa ki diriz pei i osi desid son larelizyon.”)
^ par. 15 Dan en miting United States International Religious Freedom Commission ki ti fer le 16 Novanm, 2000, en partisipan ti fer en distenksyon ant bann ki esey fors dimoun pour konverti ek aktivite bann Temwen Zeova. Ti annan en remark ki kan Temwen Zeova i pres avek lezot, zot fer li dan en fason ki en dimoun i kapab senpleman dir “Mon pa enterese” e ferm laport.
^ par. 16 Tit an antye sa magazin i Latour Veyer pe anons Rwayonm Zeova.
Eski ou kapab eksplike?
• Akoz bann Temwen Zeova i bann evanzelizater zele?
• Akoz Temwen Zeova i pres menm dan bann landrwa kot Kretyente in etabli son bann legliz?
• Akoz Temwen Zeova pa konverti dan fason ki bokou dimoun i konpran sa mo konmela?
• Konman ki travay evanzelizasyon Temwen Zeova in agrandi dan letan modern?
[Study Questions]
[Portre lo paz 19]
Zezi ti en evanzelizater zele e i ti form lezot pour fer menm travay
[Portre lo paz 20]
Tou dimoun dan kongregasyon premye syek ti partisip dan travay evanzelizasyon
[Portre lo paz 21]
I mal pour fors dimoun sanz zot larelizyon