De Frer Ki Ti Devlop En Latitid diferan

DESIZYON ki paran i fer i san dout afekte zot zanfan. Sa i en realite ozordi zis parey i ti leka dan zarden Edenn. Latitid rebel ki Adan ek Ev ti pourswiv in annan en gro lenpak lo tou imen. (Zenez 2:15, 16; 3:1-6; Romen 5:12) Toudmenm, nou tou nou annan loportinite pour devlop en bon relasyon avek nou Kreater si nou anvi. Sa i ganny demontre klerman par resi lo Kaen ek Abel, sa de premye frer dan listwar imen.

Napa okenn levidans dan Labib ki Bondye ti koz avek Adan ek Ev apre ki zot ti’n ganny retire dan zarden Edenn. Kantmenm sa, Zeova pa ti refize pour koz avek zot garson. San dout, Kaen ek Abel ti aprann sa ki ti’n arive atraver zot paran. Zot ti kapab vwar “bann seriben ek en lepe avek son lanm an flanm ki ti pe kontinyen tournen pour vey sa semen ki anmenn ver pye lavi.” (Zenez 3:24) Sa de zonm ti osi kapab vwar pour zot menm ki Bondye ti’n koz laverite kan i ti dir ki rente ek douler ti pou vin realite lavi.—Zenez 3:16, 19.

Kaen ek Abel ti bezwen konn sa parol ki Zeova ti’n dir avek sa serpan: “Mon pou met en ostilite ant ou ek sa fanm, ant ou semans ek son semans. I pou kraz ou latet e ou pou kraz son talon.” (Zenez 3:15) Sa ki Kaen ek Abel ti konnen konsernan Zeova ti pou fer li posib pour zot devlop en relasyon avek li ki akseptab.

Kan zot ti reflesir lo profesi Zeova e lo son bann kalite konman en Bondye ki fer tou pour zot prop benefis, sa ti’n bezwen prodwir dan Kaen ek Abel en dezir pour ganny son laprouvasyon. Me aki degre zot ti pou kiltiv sa dezir? Eski zot ti pou satisfer zot dezir natirel pour ador Bondye e devlop zot spirityalite ziska ki zot ti pou demontre lafwa dan li?—Matye 5:3.

Sa de Frer i anmenn zot Lofrann

Avek letan, Kaen ek Abel ti prezant Bondye bann lofrann. Kaen ti ofer bann fri, e Abel ti ofer bann premye ne dan son troupo. (Zenez 4:3, 4) I kapab ki sa letan sa de zonm ti annan apepre 100 an vi ki Adan ti annan 130 an kan son garson Set ti ne.—Zenez 4:25; 5:3.

Lefe ki zot ti ofer lofrann, sa ti endike ki Kaen ek Abel ti rekonnet zot kondisyon peser e zot ti anvi laprouvasyon Bondye. Zot ti’n bezwen omwen reflesir enpe lo promes Zeova konsernan sa serpan ek Semans sa madanm. Napa okenn lendikasyon lo konbyen letan ek zefor Kaen ek Abel ti dedye pour devlop en relasyon akseptab avek Zeova. Me reaksyon Bondye anver zot lofrann i fer nou konpran enpe ki ti annan par deryer zot lespri.

Serten spesyalis i sizere ki Ev ti krwar ki Kaen i sa “semans” ki ti pou detrir sa serpan, parski kan Kaen ti ne, i ti dir: “Mon’n prodwir en zonm avek led Zeova.” (Zenez 4:1) Si Kaen ti krwar sa li osi, i ti tronpe. Parkont, sakrifis Abel ti ganny ofer avek lafwa. Alors, “par lafwa, Abel ti ofer en sakrifis meyer ki sa ki pour Kaen.”—Ebre 11:4.

 Disernman spirityel pa ti sel diferans ki ti egziste ant sa de frer. Zot ti diferan dan zot latitid osi. Alor, “tandis ki Zeova ti pe get avek faver lo Abel ek son lofrann, i pa ti get avek faver lo Kaen ek son lofrann.” I kapab ki Kaen pa ti reflesir seryezman lo son lofrann e i ti zis ofer li koumsa menm. Me Bondye pa ti aksepte en ladorasyon ki senpleman formel. Kaen ti’n devlop en move leker, e Zeova ti kapab remarke ki i ti annan bann move motivasyon. Reaksyon ki Kaen ti annan letan son sakrifis ti ganny rezete ti reflekte son vre latitid. Olye esey koriz son latitid ek son motivasyon, “Kaen ti anflanmen avek en gran lakoler, e i ti fer son figir long.” (Zenez 4:5) Fason ki i ti konport li ti demontre son bann move lide ek lentansyon.

Lavertisman ek Reaksyon

Vi ki i ti konn latitid Kaen, Bondye ti donn li en konsey, an dizan: “Akoz ou anflanmen avek lakoler e akoz ou’n fer ou figir long? Si ou byen azir, eski ou pa pou ganny eleve? Me si ou pa byen azir, pese pe tranpe dan larantre, e son dezir i lo ou; e ou lo ou par, eski ou pou vin met lo li?”—Zenez 4:6, 7.

Nou kapab aprann en leson atraver sa. Anfet, pese pe kasyet nou deryer laport pour devor nou. Me Bondye in donn nou sa liberte pour swazir, e nou kapab swazir pour fer sa ki byen. Zeova ti envit Kaen pour “byen azir,” me I pa ti fors li pour sanze. Kaen ti swazir son prop fason.

Sa resi enspire i kontinyen: “Apre sa Kaen ti dir avek Abel son frer: ‘Annou al dan bitasyon.’ E se sa ki ti arive: pandan ki zot ti dan bitasyon, Kaen ti atak Abel son frer e touy li.” (Zenez 4:8) Alor, Kaen ti vin en kriminel dezobeisan e san pitye. I pa ti montre ni menm en pti remor-d-konsyans kan Zeova ti demande: “Oli Abel ou frer?” Okontrer, dan en fason brit e ensolan, Kaen ti reponn: “Mon pa konnen. Eski mwan mon gardyen mon frer?” (Zenez 4:9) Sa gro mansonz e mank responsabilite lo son par ti ekspoz leker dir ki Kaen ti annan.

Zeova ti modi Kaen e pous li dan zalantour Edenn. Sa malediksyon ki ti ganny prononse lo later ti aparaman pli for lo Kaen, e  later pa ti pou prodwir kantmenm i ti kiltiv li. I ti bezwen vin en vagabon e en dimoun ki pe toultan sove dan en landrwa pour al dan en lot. Kaen ti eksprim lenkyetid ki akoz mert son frer, en dimoun ti kapab revanz lo li kan i ti pe konplent ki son santans ti tro dir, me i pa ti demontre okenn repantans senser. Zeova ti etabli “en siny” pour Kaen—petet en lord ofisyel ki bann dimoun ti okouran e obzerve pour li pa ganny touye par vanzans.—Zenez 4:10-15.

Alor Kaen ti “elwanny li avek figir Zeova e i ti al reste dan pei Fizitif, ki sitye les avek Edenn.” (Zenez 4:16) Apre ki i ti’n pran enn son ser oubyen nyes konman son madanm, i ti batir en lavil e apel li apre son premye garson, Enok. Desandans Kaen, Lamek, ti vin osi vyolan ki son zanset mesan. Me bann desandans Kaen ti ganny efase zour Deliz dan letan Noe.—Zenez 4:17-24.

Leson pour nou

Nou kapab tir leson dan resi Kaen ek Abel. Zapot Zan ti ankouraz bann Kretyen pour kontan kanmarad, pa “fer konman Kaen. I ti apartenir a dyab e i ti touy son frer.” “Laksyon [Kaen] ti move, e pour son frer ti bon e zis.” Deplis, Zan ti dir: “Dimoun ki ay son frer i en kriminel e zot konnen ki napa kriminel ki posed lavi eternel dan li.” Wi, lafason ki nou tret nou bann konpanyon Kretyen i annan en lefe lo nou relasyon avek Bondye e lo nou lespwar pour lavenir. Nou pa kapab ay nou frer e anmenmtan ganny laprouvasyon Bondye.—1 Zan 3:11-15; 4:20.

Kaen ek Abel ti’n bezwen ganny elve apepre menm fason, me Kaen ti mank lafwa dan Bondye. Anfet, i ti demontre lespri Dyab, sa ‘kriminel orizinal e papa tou mansonz.’ (Zan 8:44) Latitid Kaen i montre ki nou tou nou annan en swa, ki bann ki swazir pour fer pese i elwanny zot avek Bondye, e ki Zeova i egzekit son zizman lo bann ki pa repantir.

Lo lot kote, Abel ti demontre lafwa dan Zeova. Anfet, “par lafwa, Abel ti ofer en sakrifis meyer ki sa ki pour Kaen. Akoz sa Bondye ti deklar li konman en zis, parski i ti aprouv son lofrann.” Kantmenm dan Labib napa okenn parol ki Abel ti dir, par son lafwa, i “pe kontinyen koze.”—Ebre 11:4.

Abel ti premye dan en gran laliny bann serviter Bondye ki ti reste fidel. Son disan dan later ‘ki ti kriy ver Zeova,’ pa’n ganny oubliye. (Zenez 4:10; Lik 11:48-51) Si nou demontre lafwa parey Abel ti fer, nou osi nou kapab rezwir en relasyon presye e dirab avek Zeova.

[Bwat lo paz 20]

FERMYE EK GARDYEN MOUTON

Kiltiv later e pran swen avek bann zannimo ti parmi bann responsabilite ki Bondye ti donn Adan. (Zenez 1:28; 2:15; 3:23) Son garson Kaen ti vin en fermye, e Abel ti vin en gardyen mouton. (Zenez 4:2) Vi ki avan Deliz bann imen ti manz zis fri ek legim, akoz zot ti sonny mouton?—Zenez 1:29; 9:3, 4.

Mouton i bezwen ganny swen imen pour zot devlop byen. Lokipasyon Abel i prouve ki zonm ti sonny sa bann zannimo domestik depi konmansman listwar imen. Labib pa dir si bann premye zonm ti servi dile zannimo konman en sours nouritir, me menm bann vezetaryen i kapab servi lalenn mouton. E kan mouton i mor, zot lapo i kapab ganny servi dan en fason itil. Par egzanp, Zeova ti fourni ‘bann gran lenz fer avek lapo’ pour Adan ek Ev mete.—Zenez 3:21.

Antouka, i paret rezonnab pour krwar ki Kaen ek Abel ti korpere avek kanmarad okonmansman. Zot ti prodwir en keksoz ki lezot dan lafanmiy ti bezwen pour servi konman lenz ek nouritir.

[Portre lo paz 21]

“Laksyon [Kaen] ti move, e pour son frer ti bon e zis”