Eski Ou Parmi Bann Ki Bondye I Kontan?

“Sa ki posed mon bann konmannman e obei zot, limenm ki kontan mwan. E mon Papa pou kontan sa ki kontan mwan.” —ZAN 14:21.

1, 2. (a) Konman ki Zeova ti montre son lanmour pour limanite? (b) Ki Zezi ti entrodwir sa zour swar le 14 Nizan lannen 33 N.L.?

ZEOVA i kontan son kreasyon ki apel imen. Anfet, i sitan kontan limanite “ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.” (Zan 3:16) Anmezir ki sa letan pour obzerv Memoryal lanmor Kris i aprose, bann vre Kretyen i devret vin pli konsyan ki Zeova i “kontan nou e ki’n anvoy son Garson konman en viktim pour ki par li nou ganny pardon nou bann pese.”—1 Zan 4:10.

² Sa zour swar le 14 Nizan lannen 33 N.L., Zezi ek son 12 zapot ti rasanble ansanm anler dan en lasanm an Zerizalenm pour selebre Lapak, pour komemor delivrans bann Izraelit an Lezip. (Matye 26:17-20) Apre ki zot ti’n selebre sa lafet Zwif, Zezi ti fer Zida ale e i ti entrodwir en repa komemoratif ki ti pou vin Memoryal lanmor Kris pour bann Kretyen. * An servan dipen san lelven ek diven rouz konman lanblenm oubyen senbol son lekor fizik ek son disan, Zezi ti partaz sa repa konminyon ansanm avek sa 11 zapot ki ti reste. Bann detay lo konman i ti pourswiv i ganny donnen par sa trwa ekriven Levanzil, Matye, Mark, ek Lik, e osi par zapot Pol, ki ti apel sa levennman “repa Senyer.”—1 Korentyen 11:20; Matye 26:26-28; Mark 14:22-25; Lik 22:19, 20.

3. Dan ki fason resi zapot Zan lo bann dernyen moman ki Zezi ti pase avek son bann disip dan sa lasanm anler i diferan avek pour lezot?

³ Remarke ki zapot Zan pa’n mansyonn ditou pas dipen ek diven. Petet sa i akoz sa letan ki i ti ekrir son Levanzil (apepre lannen 98 N.L.), sa prosedir ti’n fini ganny byen etablir parmi bann premye Kretyen. (1 Korentyen 11:23-26) Toutfwa, anba lenspirasyon, zis Zan ki’n fourni nou avek serten lenformasyon tre enportan konsernan sa ki Zezi ti dir e fer zis avan e apre ki I ti entrodwir Memoryal Son lanmor. Sa bann detay tre eksitan i ganny kouver dan plizyer sapit Levanzil Zan. Zot demontre klerman ki kalite dimoun Bondye i kontan. Annou egzamin Zan sapit 13 ziska sapit 17.

Aprann par Legzanp Lanmour ki Zezi in kite

4. (a) Konman ki Zan i met lanfaz lo tenm dominan rankont Zezi avek son bann disip kan i ti entrodwir Memoryal? (b) Ki sa rezon enportan akoz Zeova i kontan Zezi?

⁴ Lanmour i en tenm dominan dan sa bann sapit ki kontyen bann konsey ki Zezi ti donn son bann disip avan ki i ti kit zot. Anfet, diferan laform sa mo “lanmour” i aparet 31 fwa ladan. Lanmour profon ki Zezi i annan pour son Papa, Zeova, e pour son bann disip i pli aparan dan sa bann sapit ki okenn lezot landrwa. Lanmour ki Zezi i annan pour Zeova i evidan dan tou Levanzil ki koz lo son lavi, me zis Zan ki’n sit Zezi pe dir klerman: “Mon kontan mon Papa.” (Zan 14:31) Zezi ti osi dir ki Zeova i kontan li e i ti eksplike  akoz. I ti dir: “Parey mon Papa in kontan mwan, mon’n kontan zot parey, reste dan mon lanmour. Si zot obei mon bann konmannman, zot pou reste dan mon lanmour, parey mwan, mon’n obei konmannman mon Papa e mon reste dan son lanmour.” (Zan 15:9, 10) Wi, Zeova i kontan son Garson akoz son lobeisans total anver li. Sa i en bon leson pour tou disip Zezi Kri!

5. Konman ki Zezi ti demontre son lanmour pour son bann disip?

⁵ Lanmour profon ki Zezi ti annan pour son bann disip i ganny aksantye okonmansman resi Zan konsernan dernyen rankont ki Zezi ti fer avek son bann zapot. Zan ti rakonte: “Ti lavey lafet Pak. Zezi ti konnen ki ler ti’n arive pour li kit later e al kot son Papa. I ti’n touzour kontan bann dimoun ki ti pour li dan lemonn, e i’n kontan zot ziska lafen.” (Zan 13:1) Pandan sa sware inoubliyab, i ti ansenny zot en leson lo konman pour servi lezot avek lanmour ki zot pa ti pou zanmen oubliye. I ti lav zot lipye. Sa ti en keksoz ki zot tou zot ti devret pare pour fer pour Zezi e pour zot frer, me personn pa ti fer li. Zezi ti fer sa latas senp e i ti dir avek son bann disip: “Alor, si mwan zot Senyer e zot Met, mon’n lav zot lipye, zot osi, zot devre lav lipye kanmarad. Annefe, mon’n donn zot en legzanp pour ki zot osi, zot a fer parey mon’n fer pour zot.” (Zan 13:14, 15) Bann vre Kretyen i devret pare e kontan pour servi zot frer.—Matye 20:26, 27; Zan 13:17.

Swiv sa nouvo Komannman

6, 7. (a) Ki detay enportan Zan i fourni konsernan lentrodiksyon Memoryal? (b) Ki sa nouvo komannman ki Zezi ti donn son bann disip, e ki sa ki ti fer li nouvo?

⁶ Zis resi Zan lo sa ki ti arive dan sa lasanm sa zour swar le 14 Nizan ki mansyonn klerman depar Zida Iskaryot. (Zan 13:21-30) Kan nou met sa bann Levanzil ansanm, i endike ki selman apre ki sa tret ti’n ale ki Zezi ti entrodwir Memoryal Son lanmor. Apre sa, i ti koz pour en bon pe letan avek son bann zapot fidel, i ti donn zot bann konsey ek lenstriksyon avan son depar. La ki nou pe prepar nou pour asiste Memoryal, nou devret vreman enterese avek sa ki Zezi ti dir sa zour, sirtou akoz nou anvi parmi bann ki Bondye i kontan.

⁷ Premye lenstriksyon ki Zezi ti donn son bann disip apre ki i ti’n entrodwir Memoryal son lanmor ti en keksoz nouvo. I ti dir: “La mon donn zot en konmannman nouvo: kontan kanmarad. Zot devre kontan kanmarad parey mwan mon’n kontan zot. Dimoun pou war ki zot mon bann disip si zot kontan kanmarad.” (Zan 13:34, 35) Kwa ki ti nouvo avek sa komannman? En pti pe plitar dan lasware, Zezi ti klarifye keksoz an dizan: “La mon konmannman: kontan kanmarad parey mwan mon’n kontan zot. Pli gran lanmour ki en dimoun i kapab posede: se donn son lavi pour son bann zanmi.” (Zan 15:12, 13) Lalwa Mozaik ti demann bann Izraelit pour ‘kontan zot prosen parey zot prop lekor.’ (Levitik 19:18) Me komannman Zezi ti al pli profon. Bann Kretyen i bezwen kontan kanmarad parey Kris ti kontan zot, zot bezwen pare pour sakrifye zot prop lavi pour zot frer.

8. (a) Ki lanmour dezenterese i enplike? (b) Konman ki ozordi bann Temwen Zeova i demontre lanmour dezenterese?

⁸ Peryod Memoryal i en letan apropriye pour egzamin nou lekor, endividyelman oubyen konman en kongregasyon, pour vwar si nou vreman annan sa mark ki disteng nou  konman vre Kretyen—en lanmour parey pour Kris. En tel lanmour dezenterese i kapab vedir, dan serten ka in vreman arive, ki en Kretyen i riske son lavi olye trai son bann frer. Normalman i vedir pare pour sakrifye nou lentere personnel pour arive ed e servi nou bann frer ek lezot. Zapot Pol ti en bon legzanp dan sa domenn. (2 Korentyen 12:15; Filipyen 2:17) Bann Temwen Zeova i renonmen partou dan lemonn pour zot lespri sakrifis, pour ed zot bann frer ek zot prosen e depans zot letan ek lenerzi pour anmenn laverite Biblik kot zot prosen. *—Galat 6:10.

Bann Relasyon pour nou seri

9. Ki nou kontan pour fer pour mentenir nou relasyon presye avek Bondye ek son Garson?

⁹ Napa nanryen ki kapab pli presye pour nou ki ganny lanmour Zeova ek son Garson, Zezi Kri. Me pour annan e resanti sa lanmour, nou bezwen fer en keksoz. Sa dernyen sware ki i ti pase avek son bann disip, Zezi ti dir: “Sa ki posed mon bann konmannman e obei zot, limenm ki kontan mwan. E mon Papa pou kontan sa ki kontan mwan, e mwan mon pou kontan li e mon pou revel mwan avek li.” (Zan 14:21) Vi ki nou seri nou relasyon avek Bondye e avek son Garson, nou kontan pour obeir zot komannman. Sa i enkli sa nouvo komannman pour demontre en lanmour dezenterese e osi sa lord ki Kris ti donnen apre son rezireksyon pour “prese e anons bann dimoun,” e sey nou mye pour fer bann ki aksepte sa bon nouvel ‘vin bann disip.’—Akt 10:42; Matye 28:19, 20.

10. Ki relasyon presye ki posib pour bann Kretyen swazir ek ‘lezot mouton’?

¹⁰ Pour reponn en kestyon ki Zida (Tade), en zapot fidel, ti demann li plitar dan lasware, Zezi ti dir: “Si en dimoun i kontan mwan, i ava obei mon lansennyman. Mon Papa pou kontan li, e nou pou vin kot li e nou pou reste avek li.” (Zan 14:22, 23) Menm kan zot ankor lo later, bann Kretyen ki’n ganny swazir pour renny avek Kris dan lesyel, i annan en relasyon entim avek Zeova e avek son Garson. (Zan 15:15; 16:27; 17:22; Ebre 3:1; 1 Zan 3:2, 24) Me zot konpanyon, ‘lezot mouton,’ ki annan lespwar pour viv pour touzour lo later, i osi annan en relasyon presye avek zot “sel berze,” Zezi Kri, e avek Bondye, Zeova, akondisyon ki zot montre zot obeisan.—Zan 10:16; Psonm 15:1-5; 25:14.

“Zot pa fer Parti Lemonn”

11. Ki lavertisman ki Zezi ti donn son bann disip ki fer reflesir?

¹¹ Pandan sa dernyen rankont avek son bann disip fidel avan son lanmor, Zezi ti donn en lavertisman ki fer reflesir: Si Bondye i kontan en dimoun, lemonn pou ay sa dimoun. I ti deklare: “Si lemonn i ay zot, mazinen ki i’n ay mwan avan zot. Si zot, zot ti  fer parti lemonn, lemonn ti pou kontan son byen. Me parski, zot pa fer parti lemonn, parski mon’n swazir zot e mon’n retir zot dan lemonn, sanmenm rezon akoz ki i ay zot. Rapel byen sa ki mon dir zot: ‘Okenn serviter pa pli gran ki son met.’ Si zot in persekit mwan, zot osi, zot pou ganny persekite, si sa bann dimoun in obei mon lansennyman, zot pou obei lansennyman ki zot osi zot pou donnen.”—Zan 15:18-20.

12. (a) Akoz Zezi ti averti son bann disip ki lemonn pou ay zot? (b) Kwa ki pou byen pour nou tou reflesir lo la anmezir ki Memoryal i aprose?

¹² Zezi ti donn sa lavertisman afen ki son 11 zapot ek tou bann vre Kretyen ki ti pou vini apre zot pa ava dekouraze e abandonnen akoz laenn ki lemonn i annan pour zot. I ti azoute: “Mon’n dir zot tousala pour ki zot pa abandonn zot lafwa. Zot pou ganny met deor sinagog, e i pou ariv en letan kan nenport ki ki pou touy zot, pou krwar ki an fezan sa zot pe servi Bondye. E zot pou fer sa akoz zot pa’n konn ni mon Papa, ni mwan.” (Zan 16:1-3) En leksik Labib i eksplike ki en laform sa verb ki’n ganny tradwir la konman “dekouraze e abandonnen” i vedir “fer en dimoun konmans perdi konfyans e abandonn sa enn ki i ti sipoze annan konfyans ladan e obeir; fer elwannyen.” Anmezir ki sa letan pour obzerv Memoryal i aprose, i ti a byen si nou tou nou reflesir lo lavi bann serviter fidel, dan lepase e dan nou letan, e imit zot legzanp fidelite dan leprev. Pa les lopozisyon oubyen persekisyon fer ou abandonn Zeova ek Zezi, me determinen pour annan konfyans dan zot e obeir zot.

13. Ki Zezi ti demande pour son bann disip dan en lapriyer ki i ti fer avek son Papa?

¹³ Dan son lapriyer final avan i ti kit sa lasanm an Zerizalenm, Zezi ti dir son Papa: “Mon’n donn zot ou mesaz, e lemonn in ay zot, parski zot pa fer parti lemonn parey mwan mon pa fer parti lemonn. Mon pa demann ou pour tir zot dan lemonn, me mon demann ou, pour prezerv zot kont sa enn ki apel Malen. Zot pa fer parti lemonn parey mwan mon pa fer parti lemonn.” (Zan 17:14-16) Nou kapab asire ki Zeova i vey bann ki i kontan, pour fortifye zot pandan ki zot reste separe avek lemonn.—Izai 40:29-31.

Reste dan Lanmour Papa e dan Lanmour Garson

14, 15. (a) Avek ki Zezi ti konpar li, an konparezon avek ki ‘pye rezen dezenere’? (b) Lekel “bann brans” sa “vre pye rezen”?

¹⁴ Dan sa konversasyon entim ki i ti annan avek son bann disip fidel sa zour swar le 14 Nizan, Zezi ti konpar li avek en “vre pye rezen,” ki diferan avek ‘pye rezen dezenere’ Izrael enfidel. I ti dir: “Mwanmenm vre pye rezen, e mon Papa i zardinyen.” (Zan 15:1) Plizyer syek avan, profet Zeremi ti rikord sa parol ki Zeova ti annan pour dir son pep rebel: “Mon’n plant ou konman en pye rezen rouz bon kalite . . . Alor konman ki ou’n sanze anver mwan pour vin bourzon en pye rezen etranze ki’n dezenere?” (Zeremi 2:21) E  profet Osea ti ekrir: “Izrael i en pye rezen ki pe dezenere. I kontinyen port fri pour li menm. . . . Zot leker in vin ipokrit.”—Osea 10:1, 2.

¹⁵ Olye prodwir fri vre ladorasyon, Izrael ti tonm dan lapostazi e prodwir fri pour li menm. Trwa zour avan dernyen rankont ki i ti fer avek son bann disip fidel, Zezi ti dir avek bann sef relizye Zwif ipokrit: “Mon dir zot, zot pou ganny arase Rwayonm Bondye, e ganny donnen a en lot nasyon ki pou prodwi son fri.” (Matye 21:43) Sa nouvo nasyon i “Izrael Bondye,” ki konpoze avek 144,000 Kretyen swazir e ki ganny konpare avek “bann brans” sa “vre pye rezen,” Zezi Kri.—Galat 6:16, NW; Zan 15:5; Revelasyon 14:1, 3.

16. Ki Zezi ti enplor sa 11 zapot fidel pour fer, e ki nou kapab dir lo sa larestan Kretyen fidel dan sa letan lafen?

¹⁶ Zezi ti dir sa 11 zapot ki ti avek li dan sa lasanm anler: “Tou brans ki atase avek mwan e ki pa raport fri i koupe. Tou brans ki raporte i tay zot pou fer zot raport ankor plis fri. Reste atase avek mwan parey mon reste atase avek zot. En brans pa kapab raport fri par limenm, amwen ki i reste atase avek son pye. Zot osi parey, zot pa kapab raport fri si zot pa reste atase avek mwan.” (Zan 15:2, 4) Listwar modern pep Zeova i montre ki larestan Kretyen swazir fidel in an realite reste atase avek zot Sef, Zezi Kri. (Efezyen 5:23) Zot in aksepte pour ganny netwaye e taye. (Malaki 3:2, 3) Depi 1919, zot in prodwir fri Rwayonm an abondans, premyerman lezot Kretyen swazir, e depi 1935, en “gran lafoul” konpoze avek lezot konpanyon ki pe kontinyen ogmante.—Revelasyon 7:9; Izai 60:4, 8-11.

17, 18. (a) Ki parol ki Zezi ti dir ki ed bann Kretyen swazir ek lezot mouton pour reste dan lanmour Zeova? (b) Ki mannyer asiste Memoryal pou ed nou?

¹⁷ Parol swivan Zezi i aplik pour tou Kretyen swazir ek zot konpanyon: “Mon Papa i ganny glorifye ler zot raport bokou fri e par sa zot montre ki zot mon bann disip. Parey mon Papa in kontan mwan, mon’n kontan zot parey, reste dan mon lanmour. Si zot obei mon bann konmannman, zot pou reste dan mon lanmour, parey mwan, mon’n obei konmannman mon Papa e mon reste dan son lanmour.”—Zan 15:8-10.

¹⁸ Nou tou nou anvi reste dan lanmour Bondye, e sa i ensit nou pour vin bann Kretyen prodiktif. Nou fer sa par sezi tou loportinite pour pres “sa Bonn Nouvel Rwayonm.” (Matye 24:14) Nou osi fer nou mye pour demontre “fri Lespri” dan nou lavi personnel. (Galat 5:22, 23) Asiste Memoryal lanmor Kris pou fortifye nou dan nou rezolisyon pour fer sa, parski nou pou ganny rapel konsernan sa gran lanmour ki Bondye ek Kris i annan pour nou.—2 Korentyen 5:14, 15.

19. Ki sa lot led ki nou pou diskite dan lartik swivan?

¹⁹ Apre ki i ti entrodwir Memoryal, Zezi ti promet ki son Papa pou anvoy en “Konseyer, [oubyen asistan] Lespri-sen” pour son bann disip fidel. (Zan 14:26) Dan lartik swivan nou pou egzaminen konman ki sa lespri i ed bann Kretyen swazir ek lezot mouton pour reste dan lanmour Zeova.

[Not anba lo paz]

Kestyon Revizyon

• Ki leson pratik Zezi ti donn son bann disip an rapor avek servi lezot avek lanmour?

• Peryod Memoryal i en letan apropriye pour egzamin nou lekor an rapor avek kwa?

• Akoz nou pa devret dekouraze par sa lavertisman ki Zezi ti donnen konsernan laenn ek persekisyon delapar lemonn?

• Lekel sa “vre pye rezen”? Lekel sa “bann brans,” e ki zot ekspekte fer?

[Study Questions]

[Portre lo paz 23]

Zezi ti donn son bann zapot en leson inoubliyab lo konman servi lezot avek lanmour

[Portre lo paz 24]

Bann disip Kris i obeir son konmann pour demontre lanmour dezenterese