Kestyon Lekter

Ziska ki pwen sa restriksyon lo maryaz antre fanmiy ki ganny trouve dan Lalwa ki ti ganny donnen atraver Moiz, i aplik pour bann Kretyen ozordi?

Lalwa ki Zeova ti donn nasyon Izrael pa al an detay lo bann seremoni ek prosedir maryaz. Parkont, i enterdi serten linyon maryaz. Par egzanp, dan Levitik 18:6-20, i annan en lalis relasyon antre “fanmiy pros selon laser” ki ganny enterdi. Sa pasaz ki byen detaye, i fer vwar lekel dan fanmiy ki pa devret annan en relasyon seksyel avek kanmarad. Byensir, bann Kretyen pa anba Lalwa Mozaik, zot pa ni ganny restrikte par son bann lareg. (Efezyen 2:15; Kolosyen 2:14) Me sa pa vedir ki bann Kretyen i kapab senpleman inyor sa size kan zot swazir en dimoun pour marye. I annan plizyer rezon pour sa.

Premyerman, i annan serten lalwa gouvernman ki restrikte maryaz ant fanmiy pros, e an zeneral bann Kretyen i oblize obeir lalwa sa pei kot zot reste. (Matye 22:21; Romen 13:1) Byensir, lalwa i varye dan diferan landrwa. Laplipar lalwa lo sa size i baze prensipalman lo bann rezon zenetik. I en fe byen koni ki kan de dimoun ki fanmiy pros avek kanmarad i marye, sa i kapab ekspoz zot zanfan avek serten anormalite ek maladi erediter. Pour sa rezon, e deplis akoz zot ‘soumet zot avek bann lotorite ki gouvernen,’ bann Kretyen ki anvizaze marye i obeir lalwa maryaz ki egziste dan zot pei.

Deplis i annan sa fakter kwa ki akseptab e ki pa akseptab dan kominote kot en dimoun i reste. Preski tou kiltir i annan bann lalwa ek koutim ki enterdi maryaz ant de fanmiy pros, e souvan bann tel linyon i ganny konsidere konman lensest ek tabou. Menm si bann relasyon spesifik ki ganny enterdi i kapab varye en kantite dapre diferan kiltir, “konman en lareg zeneral, pli sa de dimoun i pros dan fanmiy, pli sa tabou ki enterdi oubyen dekouraz relasyon seksyel antre zot i vin pli for e pli sokan,” The Encyclopædia Britannica i dir. Alors, menm dan bann ka kot relasyon antre fanmiy pa enplike, bann Kretyen pa anvi azir konmsi zot napa okenn konsiderasyon pour bann koutim ki egziste oubyen pour santiman lezitim kominote, pour ki zot pa anmenn repros lo kongregasyon Kretyen oubyen lo non Bondye.—2 Korentyen 6:3.

Nou pa devret inyor nou konsyans ki Bondye in donn nou. Tou dimoun in ne avek en abilite pour santi kwa ki byen e kwa ki mal, kwa ki bon e kwa ki move. (Romen 2:15) Zot konsyans i dir zot kwa ki normal e byen e kwa ki pa natirel e sokan, amwen ki i’n ganny deformen oubyen i’n vin ensansib par bann move pratik ki sokan. Zeova ti refer avek sa realite kan i ti donn bann Izraelit son lalwa kont maryaz antre fanmiy pros. Nou lir: “Lafason ki pei Lezip i fer, kot zot ti pe reste, zot pa devret fer parey; e lafason ki pei Kanaan i fer, kot mon pe anmenn zot, zot pa devret fer parey; e pa mars dapre zot lareg.” (Levitik 18:3) Bann Kretyen i atas en gran valer avek zot konsyans ki baze lo Labib e zot pa ti anvi les li ganny koronpi par zizman bann nasyon lo sa ki byen ek mal, ki’n ganny deformen.—Efezyen 4:17-19.

Alors, ki konklizyon nou kapab tire? Menm si bann Kretyen pa anba Lalwa Mozaik, zot konsyans i dir zot klerman ki maryaz ant fanmiy pros—par egzanp ant en papa ek son fiy, en manman ek son garson, e frer ek ser—i pa akseptab ditou dan kominote Kretyen. * Kan fanmiy pa sitan pros, bann Kretyen i rekonnet ki i annan serten lalwa ki gouvern maryaz legal e ki i annan serten standar ki akseptab dan lasosyete e dan en serten kiltir. Sa i devret ganny pran an konsiderasyon pour ki nou kapab konform avek sa rekomandasyon Biblik: “Ki maryaz i ganny onore par tou dimoun.”—Ebre 13:4.

[Not anba lo paz]