Ki savedir Lapropte?
Ki savedir Lapropte?
AKOZ sa kondisyon sokan konsernan move lizyenn dan Lerop ek Leta-z-ini, pandan dizwityenm ek diznevyenm syek, bann misyonner dan sa letan ti pres sa ki ti kapab ganny apele konman “en doktrin lapropte.” Sa doktrin ti konpar salte avek pese, tandis ki lapropte ti anmenn en dimoun pli pre avek Bondye. Petet sanmenm sa ki ti fer sa parol “Lapropte i vin apre devosyon avek Bondye” vin popiler.
Salvation Army, ki ti ganny kree par William ek Catherine Booth ti adopte sa pwenn-vi. Dapre liv Health and Medicine in the Evangelical Tradition, enn bann premye slogan ti: “Savon, Lasoup, ek Delivrans.” Apre, kan Louis Pasteur ek lezot ti etabli avek lasirans konneksyon ant maladi ek bakteri, sa ti donn plis lelan pour pourswiv bann proze pour pli bon lasante piblik.
Serten mezir imedya ki ti ganny pran, ti enkli aret fer en temwen an kour anbras Labib e osi bwar dan menm tas kot bann lekol ek bann stasyon tren ti ganny aboli. Zefor ti ganny fer dan bann servis relizyez pour sakenn servi son prop lakoup olye servi en sel kalis. Wi, i paret ki sa bann premye pionye ti reisi sanz latitid bann dimoun anver lapropte. Latitid
bann dimoun ti’n sitan sanze ki en ekriven ti apel sa rezilta “en zistwar lanmour pour lapropte.”Toutfwa, sa “zistwar lanmour pour lapropte,” ti zis siperfisyel. Pa ti pran bokou letan avan ki bann biznesmenn ti profit lo en prodwi ki ganny servi toulezour tel parey savon e transform li dan en prodwi kosmetik. Bann avertisman byen prepare ti sey fer bann dimoun krwar ki servi serten prodwi lizyenn personnel tel parey savon pou donn sa kliyan en pozisyon sosyal ki lezot pa kapab gannyen san servi sa prodwi, e alor zot a zis zalou sa dimoun ki servi sa prodwi. Televizyon i kontinyen pas sa bann progranm anbeter. Byen rar ki ou pou vwar sa bann dimoun ris e atiran ki enplike dan sa bann avertisman ek episod pe netway lakaz, balye lari, anmas salte, oubyen anmas malpropte zot sat oubyen lisyen.
I annan bann ki dir ki al travay ki pey bann depans, tandis ki travay lakour oubyen lezot netwayaz napa okenn valer finansyel. E lefe ki napa okenn rekonpans finansyel ki enplike, akfer zot devret pran ka avek lanvironnman? En rezon pour sa labitid i ki serten dimoun i krwar ki lapropte i aplik zis avek lizyenn personnel.
Pwenn-vi Bondye lo Lapropte
I napa okenn dout ki sa bann zefor ki ti fer okonmansman pour ansenny lapropte pa ti ed dimoun amelyor zot kondisyon lavi. E i toutafe normal, akoz lapropte i en kalite ki apartenir e ki sorti kot sa Bondye ki sen e pir, Zeova. I ansenny nou pour vin sen e pir dan tou nou bann fason e sa i pour nou prop profi.—Izai 48:17; 1 Pyer 1:15.
Zeova Bondye i egzanpler dan sa domenn. Lapropte, osi byen ki son bann lezot kalite envizib, i ganny revele klerman dan kreasyon vizib Bondye. (Romen 1:20) Nou kapab vwar ki kreasyon li menm pa koz okenn polisyon dirab. Later avek son kantite sirk ekolozik i en sistenm merveye ki netway son lekor, i’n ganny fer pour ki imen i viv dan en kondisyon prop e an bonn sante. En tel travay prop i sorti selman kot en Kreater ki konsyan lapropte. Alor nou kapab tir en konklizyon atraver sa, ki bann adorater Bondye i devret prop dan tou laspe zot lavi.
Kat Laspe Lapropte
Labib i idantifye kat laspe lapropte ki bann adorater Bondye i devret reserse. Annou vwar sak sa bann laspe.
Spirityel. Sa i kapab ganny konsidere konman lapropte pli enportan ki tou lezot, akoz i annan pour fer avek lesperans pour lavi eternel en dimoun. Sepandan, sa i en laspe ki souvan ganny neglize. Pour fer li pli senp, lapropte spirityel i vedir pa zanmen depas sa limit ki Bondye in etabli ant vre ek fo ladorasyon, akoz Bondye i konsider nenport kalite fo ladorasyon konman enpir. Zapot Pol ti ekrir: “Sorti parmi zot, e separe avek zot, Senyer i dir, pa tous okenn keksoz enpir, e mon a resevwar zot.” (2 Korentyen 6:17) Disip Zak i osi tre presi dan sa domenn: “La sa ki Bondye nou Papa i konsider konman en larelizyon pir e san defo: . . . pa les zot ganny sali par move lenflians sa monn.”—Zak 1:27.
Bondye i klerman montre ki i pa aksepte melanz son vre ladorasyon avek fo ladorasyon. Fo ladorasyon i souvan enkli bann pratik enpir, bann zidol ek bondye detestab. (Zeremi 32:35) Alor, bann vre Kretyen i ganny ankouraze pour evite annan okenn partisipasyon avek ladorasyon enpir.—1 Korentyen 10:20, 21; Revelasyon 18:4.
Moral. La osi, Bondye in etabli en distenksyon kler ant sa ki pir ek sa ki enpir. An gro, lemonn i parey sa ki ganny dekrir dan Efezyen 4:17-19: “Zot lespri i dan fernwanr, zot napa okenn par dan sa nouvo lavi ki Bondye i donnen . . . Zot in perdi tou pider, zot in abandonn zot lekor dan tou sort vis e zot fer tou sort move keksoz san okenn kontrol.” Bann move panse koumsa i manifeste son lekor dan diferan fason, ouvertman e dan kasyet, alor bann Kretyen i bezwen fer atansyon.
Bann ki kontan Bondye i konnen ki prostitisyon, omoseksyalite, sèks avan maryaz, ek pornografi i vyol standar Zeova konsernan lapropte moral. Parkont, sa bann pratik i souvan ganny eksprimen dan divertisman e stil lemonn. Bann Kretyen i bezwen alors reste an gard kont bann tel tandans. Met bann pti lenz kourt, bann lenz ki fer vwar parti lekor dan renyon Kretyen oubyen dan bann rankont sosyal, i atir latansyon ki pa neseser lo lekor imen e i montre ki sa dimoun in elwannyen avek lapirte moral. Apard ki anmenn bann panse sal sa monn dan lasosyasyon Kretyen, sanz dan sa fason i annan potansyel pour form bann panse sal dan lespri lezot. Sa i en domenn kot bann Kretyen i bezwen travay dir pour demontre “lasazes ki sorti dan lesyel.”—Zak 3:17.
Mantal. En dimoun pa devret gard bann panse sal dan son lespri. Zezi ti averti kont bann panse sal kan i ti dir: “En dimoun ki get madanm en lot zonm avek dezir in deza komet adilter avek li dan son leker.” (Matye 5:28; Mark 7:20-23) Sa parol i egalman aplik avek regard bann portre ek film pornografi, lir bann liv lo aktivite seksyel obsenn, e ekout parol bann sanson ki annan tandans pour promot bann keksoz ki pa apropriye. Alor, bann Kretyen i devret evite sali zot lekor par kiltiv bann panse sal ki kapab promot bann langaz ek aksyon sal.—Matye 12:34; 15:18.
Fizik. Sentete ek lapropte fizik i etrwatman relye ansanm dan Labib. Par egzanp, Pol ti ekrir: “Byenneme, alor annou pirifye nou avek tou sa ki sali lekor ek lespri, e fer tou pour nou vin konpletman sen an vivan avek respe devan Bondye.” (2 Korentyen 7:1) Alor, bann vre Kretyen, i devret esey gard zot lekor, lakaz ek lanvironnman prop e annord, osi lontan ki sirkonstans i permet. Menm dan bann landrwa kot i difisil pour ganny delo pour lave oubyen bennyen, bann Kretyen i devret esey zot mye pour reste prop e prezantab.
Lapropte fizik i osi enterdi servi taba dan okenn fason, bwar lalkol an ekse, e okenn form labi drog, ki sali e detri lekor. Sa berze ki ganny dekrir dan Kantik Salomon ti apresye sa bonloder dan lenz sa fiy Soulamit. (Kantik Salomon 4:11) Pran ka avek nou lizyenn personnel i en bon keksoz pour fer, lefe ki nou pa anvi afekte lezot otour nou avek bann move loder. Lesans i kapab agreab, me i pa ranplas bennyen regilyerman ek lenz prop.
Gard en Pwenn-vi balanse
An sa ki konsern lapropte fizik, dimoun i kapab al dan lekstrenm. Lot en kote, kan nou vin fanatik lapropte, sa i kapab fer nou perdi nou lazwa pour viv. I kapab osi pran en kantite nou letan presye. Lo lot kote, en lakaz ki sal e dezord i kapab kout ser pour repare. Ant sa de ekstrenm i annan sa lapros ekilibre e pratik pour gard nou lakour prop e prezantab.
Gard ou lakour senp. En lakaz oubyen en lasanm ki dezord i difisil pour netwaye, e i kapab pa fasil pour detekte salte dan en lanvironnman ankonbre. I pa pran bokou letan pour netway en lakaz ki senp e ki annord. Labib i rekomann en stil lavi ki senp: “Annan manze ek lenz sa i ase.”—1 Timote 6:8.
Gard li annord. I responsabilite tou dimoun ki pe reste dan en lakaz pour gard li prop. Bann lakaz dezord i souvan konmans avek bann lasanm dezord. Annord i vedir ki tou keksoz i dan son plas apropriye. Par egzanp, ater dan lasanm pa devret en landrwa pour met bann lenz sal. E pli grav, les bann zouzou ek zouti partou ater i vreman danzere. En kantite aksidan i arive dan lakour akoz bann labitid dezord.
Klerman, lapropte ek fason viv en Kretyen i enseparab. Konsernan en fason viv ki fer Bondye plezir, profet Izai i koz lo “Semen Sentete.” E i azout sa panse ki fer reflesir, ki “sa enn ki enpir pa pou pas lo la.” (Izai 35:8) Wi, kiltiv bann bon labitid lapropte konmela i donn levidans nou lafwa dan promes Bondye ki tre byento i pou etabli en paradi prop lo later. Alor, dan tou parti sa zoli plannet, tou dimoun pou glorifye Zeova Bondye par konform plennman avek son bann standar parfe konsernan lapropte.—Revelasyon 7:9.
[Portre lo paz 6]
I responsabilite tou dimoun ki pe reste dan en lakaz pour gard li prop
[Portre lo paz 7]
Later i en mervey ki netway son lekor