Kontinyen Demontre Labonte
Kontinyen Demontre Labonte
“Lalimyer i fer prodwi bokou kalite: labonte, ladrwatir, ek laverite.”—EFEZYEN 5:9.
1. Konman ki plizyer milyon dimoun pe montre ki zot dakor avek Psonm 31:19?
PLI bon keksoz ki okenn dimoun i kapab fer se rann glwar Zeova. Ozordi, plizyer milyon dimoun pe fer sa par loue Bondye pour son labonte. Konman bann Temwen fidel Zeova, nou senserman dakor avek sa psalmis ki ti sante: “Konman ou labonte i an abondans, ki ou’n prezerve avek swen pour bann ki annan lakrent pour ou!”—Psonm 31:19.
2, 3. Ki ti pou arive si nou travay pour fer disip pa ti ganny apiye par en bon kondwit?
2 Lakrent avek respe profon pour Zeova i motiv nou pour loue li pour son labonte. I osi pous nou pour ‘loue Zeova, beni li, e fer konnen laglwar son rwayote.’ (Psonm 145:10-13) Se pour sa ki nou partisip avek zel dan sa travay predikasyon konsernan Rwayonm e osi dan travay pour fer disip. (Matye 24:14; 28:19, 20) Byensir, nou aktivite predikasyon i bezwen ganny apiye par en bon kondwit. Sansan nou kapab anmenn repros lo non sen Zeova.
3 Bokou dimoun i dir ki zot ador Bondye, me zot kondwit pa an akor avek bann standar ki trouve dan son Parol enspire. Konsernan serten ki pa ti pe viv an akor avek zot parol pour fer sa ki byen, zapot Pol ti ekrir: “Alor, ou ki ansenny lezot, akoz ou pa ansenny ou prop lekor? Ou ki ansennyen ki fodre pa vole akoz ou vole? Ou ki ansennyen ki fodre pa fer adilter, akoz ou fer li? . . . Parski Lekritir i dir, ‘Se akoz zotmenm, bann Zwif, ki lezot pep i koz kont Bondye.’ ”—Romen 2:21, 22, 24.
4. Ki lefe nou bon kondwit i annan?
4 Olye anmenn repros lo non Zeova, nou sey nou mye pour glorifye li par nou bon kondwit. Sa i annan en bon lefe lo bann ki pa form parti avek kongregasyon Kretyen. Premyerman, i ed nou pour pa donn nou bann adverser rezon pour kritik nou. (1 Pyer 2:15) Sa ki pli enportan ankor, se ki nou bon kondwit i atir bann dimoun dan lorganizasyon Zeova, e sa i ouver semen pour zot rann li glwar e ganny lavi eternel.—Akt 13:48.
5. Ki kestyon ki nou devret egzaminen aprezan?
5 Vi ki nou enparfe, ki mannyer nou kapab evite kondwir nou dan en fason ki kapab anmenn dezonner pour Zeova e fer tonbe bann ki pe rod laverite? Anfet, konman nou kapab arive demontre labonte?
En Fri Lalimyer
6. Nonm serten sa “bann aksyon initil, ki zot fer zis dan fernwanr,” me ki kalite fri ki devret evidan parmi bann Kretyen?
6 Konman bann Kretyen ki’n dedye nou lavi, nou rezwir en keksoz ki ed nou pour evit “bann aksyon initil, ki zot fer zis dan fernwanr.” Sa i enkli bann aksyon tel konman koz manti, vole, ensilte, fer bann konversasyon sal lo sèks, annan en kondwit ki fer onte, fer bann dyok sal, e bwar pour sou. (Efezyen 4:25, 28, 31; 5:3, 4, 11, 12, 18) Olye enplik nou dan sa bann aktivite, nou kontinyen “mars konman zanfan lalimyer.” Zapot Pol ti dir ki “lalimyer i fer prodwi bokou kalite: labonte, ladrwatir, ek laverite.” (Efezyen 5:8, 9) Alors, se par mars dan lalimyer ki nou pou kapab kontinyen demontre labonte. Me ki kalite lalimyer ki nou pe koz lo la?
7. Ki nou bezwen fer pour kontinyen demontre labonte?
7 Kantmenm nou enparfe, nou kapab demontre labonte (ouswa ekselans moral) si nou mars dan lalimyer spirityel. “Ou parol i en lalanp pour mon lipye, e en lalimyer pour mon semen,” en psalmis ti sante. (Psonm 119:105) Si nou anvi kontinyen demontre ‘fri lalimyer’ atraver ‘tou sort labonte,’ nou bezwen servi o maksimonm sa lalimyer spirityel ki trouve dan Parol Bondye, ki ganny egzaminen dan bann piblikasyon Kretyen, e ki ganny regilyerman diskite dan nou bann renyon Kretyen. (Lik 12:42; Romen 15:4; Ebre 10:24, 25) Nou bezwen osi donn en latansyon spesyal legzanp ek lansennyman Zezi Kri, “lalimyer lemonn” e ‘refleksyon laglwar Bondye.’—Zan 8:12; Ebre 1:1-3.
En Fri Lespri
8. Akoz nou kapab demontre labonte?
8 Lalimyer spirityel i definitivman ed nou pour azir avek labonte. Deplis, nou kapab demontre sa kalite akoz nou ganny gide par lespri sen Bondye, oubyen son lafors aktif. Labonte i form par “fri Lespri.” (Galat 5:22, 23) Si nou soumet avek gidans lespri sen Zeova, i pou prodwir dan nou son fri admirab, labonte.
9. Ki mannyer nou kapab azir an armoni avek parol Zezi ki ganny rikorde dan Lik 11:9-13?
9 Nou dezir profon pour fer plezir Zeova par demontre sa fri lespri ki apel labonte i devret pous nou pour azir an armoni avek parol Zezi: “Demande e zot a gannyen; rode e zot a trouve; frape e laport i a ouver. En dimoun ki demande i resevwar, sa ki rode i trouve, e laport i ouver pour sa ki frape. Lekel sa papa parmi zot, ki si son garson i demann li en pwason, i a donn li en serpan olye en pwason; oubyen si i demann li en dizef, i a donn li en skorpyon? Si, zot, [enparfe e alor] move konman zot ete, zot kapab donn bon keksoz zot zanfan, i annan plis rezon pour ki zot Papa ki dan lesyel pou donn son Lespri Sen tou bann ki demann li?” (Lik 11:9-13) Annou swiv konsey Zezi par demann Zeova son lespri afen ki nou a kapab kontinyen demontre son fri, labonte.
Kontinyen “fer sa ki byen”
10. Ki laspe labonte Zeova ki ganny site dan Egzod 34:6, 7?
10 Avek lalimyer spirityel ki sorti dan Parol Bondye e avek led lespri sen Bondye, nou kapab kontinyen “fer sa ki byen.” (Romen 13:3) Atraver letid Labib regilye, nou toultan aprann plis konman pour imit labonte Zeova. Lartik presedan ti egzamin bann laspe labonte Bondye ki ti ganny deklare avek Moiz e ki’n ganny rikorde dan Egzod 34:6, 7, kot nou lir: “Zeova, Zeova, en Bondye mizerikord e konpasyon, pa ankoler vitman, e ris an labonte leker e an verite, prezerv labonte leker pour plizyer milye, pardonn fot ek transgresyon ek pese, me dan okenn ka i pa pou akord gras pour pinisyon.” Regard sa bann laspe labonte Zeova en pe pli pre, pou ed nou pour kontinyen “fer sa ki byen.”
11. Kan nou konnen ki Zeova i annan mizerikord ek konpasyon, ki mannyer sa i devret enfliyans nou?
11 Sa deklarasyon divin i atir nou latansyon lo nesesite pour imit Zeova par devlop mizerikord ek konpasyon. Zezi ti dir: “Byennere bann ki pran pitye pour lezot, akoz Bondye pou pran pitye pour zot.” (Matye 5:7; Lik 6:36) Ler nou konsyan ki Zeova i annan konpasyon, nou santi nou pouse pour demontre konpasyon e pour zantiy dan fason ki nou tret lezot, enkli bann ki nou pres avek. Sa i an armoni avek konsey Pol: ‘Ki zot parol i touzour agreab e sezonnen avek disel, pour zot kapab donn bann repons valab tou dimoun.’—Kolosyen 4:6.
12. (a) Vi ki Bondye pa ankoler vitman, ki mannyer nou devret reazir anver lezot? (b) Labonte leker Zeova i motiv nou pour fer kwa?
12 Vi ki Bondye pa ankoler vitman, nou dezir pour kontinyen “fer sa ki byen” i pous nou pour siport bann pti defo ki nou bann konpanyon Kretyen i annan e pour konsantre lo zot bon kalite. (Matye 7:5; Zak 1:19) Labonte leker Zeova i motiv nou pour demontre lanmour fidel, menm dan bann sitiasyon pli difisil. Sirman, sa i en keksoz tre dezirab.—Proverb 19:22.
13. Ki mannyer nou devret konport nou pour reflekte Zeova konman en Bondye ki ‘ris an verite’?
13 Vi ki nou Papa seles i ‘ris an verite,’ nou sey ‘fer tou nou posib pour viv konman bann serviter Bondye par parol laverite.’ (2 Korentyen 6:3-7) “En lalang mansonz” ek “en fo temwen ki respir bann mansonz” i parmi set keksoz ki Zeova i deteste. (Proverb 6:16-19) Alor nou dezir pour fer plezir Bondye in pous nou pour ‘rezet mansonz e koz laverite.’ (Efezyen 4:25) Annou pa aret demontre labonte dan sa laspe enportan.
14. Akoz nou devret pare pour pardonnen?
14 Sa deklarasyon ki Bondye ti fer avek Moiz i devret motiv nou pour pardonnen, parski Zeova i pare pour pardonnen. (Matye 6:14, 15) Byensir, Zeova i pini bann peser ki pa oule repantir. Alors, nou bezwen mentenir son standar pour sa ki byen an sa ki konsern gard kongregasyon pir spirityelman.—Levitik 5:1; 1 Korentyen 5:11, 12; 1 Timote 5:22.
“Fer byen atansyon”
15, 16. Ki mannyer konsey Pol ki’n ganny rikorde dan Efezyen 5:15-19 i ed nou pour kontinyen demontre labonte?
15 Pour nou kontinyen azir avek labonte malgre bann mesanste ki annan otour nou, nou bezwen ranpli avek lespri Bondye e vey nou fason viv. An rapor avek sa, Pol ti enplor bann Kretyen an Efez: “Fer byen atansyon ki mannyer zot viv. Pa viv konman bann dimoun inyoran, me konman bann dimoun saz. Servi byen tou bann lokazyon ki prezant devan zot, parski sa letan ki nou pe viv ladan i move. Pour sa rezon pa bezwen viv konman bann enbesil, me fer tou zot posib pour zot konpran konman Senyer i oule zot azir. Pa bezwen soul zot avek diven, akoz sa pou zis antrenn zot dan en lavi dezordonnen; okontrer, zot devre ranpli avek Lespri. Ankouraz kanmarad par bann Psonm, par bann kantik; sant bann Psonm ek kantik sakre, e remersi Bondye dan zot leker.” (Efezyen 5:15-19) San dout, sa konsey i byen apropriye pour nou dan sa bann dernyen zour kritik.—2 Timote 3:1.
16 Pour nou kontinyen demontre labonte, nou bezwen touzour vey byen ki nou viv konman bann dimoun ki annan lasazes divin. (Zak 3:17) Nou bezwen evite fer bann pese grav, e nou bezwen ranpli avek lespri sen e les li gid nou. (Galat 5:19-25) Par aplik bann lenstriksyon spirityel ki ganny donnen dan bann renyon Kretyen ek bann diferan lasanble nou kapab kontinyen fer sa ki byen. Parol ki Pol ti dir bann Efezyen i kapab osi fer nou rapel ki dan laplipar nou bann rasanbleman Kretyen, nou benefisye avek nou bann “kantik sakre”—dan ki bokou i konsantre lo bann kalite spirityel, parey labonte.
17. Ki bann Kretyen ki annan en maladi grav i kapab asire, menm si zot sitiasyon i anpes zot asiste renyon regilyerman?
17 Me konsernan nou bann konpanyon Kretyen ki pa kapab asiste bann renyon Kretyen regilyerman akoz en maladi kronik ki grav? Petet zot santi zot vreman dekouraze lefe ki pa toultan ki zot kapab ador Zeova ansanm avek zot bann frer ek ser spirityel. Me zot kapab asire ki Zeova i konpran zot sitiasyon, i pou gard zot dan lalimyer, i pou donn zot son lespri sen, e i pou ed zot pour kontinyen fer sa ki byen.—Izai 57:15.
18. Kwa ki pou ed nou pour azir avek labonte?
18 Kan nou oule azir avek labonte, nou bezwen vey nou frekantasyon e pa swiv bann ki “lennmi sa ki fer dibyen.” (2 Timote 3:2-5; 1 Korentyen 15:33) Aplik en tel konsey i ed nou pour evite “sagrin lespri sen Bondye” par al kont son gidans. (Efezyen 4:30, NW ) Deplis, nou pou ganny led pour fer sa ki byen si nou devlop en relasyon pros avek bann ki zot lavi i demontre ki zot kontan sa ki byen e ki zot pe ganny gide par lespri sen Zeova.—Amos 5:15; Romen 8:14; Galat 5:18.
Labonte i anmenn bann bon Rezilta
19-21. Rakont serten leksperyans ki montre ki lefe i kapab annan kan nou demontre labonte.
19 Mars dan lalimyer spirityel, soumet avek gidans lespri Bondye, e vey byen lafason ki nou viv pou ed nou pour evite fer sa ki mal e pour kontinyen “fer sa ki byen.” An retour, sa i kapab prodwir bann bon rezilta. Pran par egzanp, Zongezile, en Temwen Zeova ki reste Sidafrik. En zour bomaten kan i ti pe al lekol, i ti verifye ki kantite larzan i annan lo son kont labank. Par lerer, sa pti papye ki ti sorti dan sa masin otomatik ti endike ki i ti annan 42,000 ran an plis, apepre 6000 dolar Ameriken. En gard sekirite dan labank ek lezot endividi ti ankouraz li pour tir sa larzan e depoz li dan en lot labank pour li menm. Zis sa koup Temwen ki i ti reste avek ki ti dir li ki i’n byen fer pour pa tous sa larzan ditou.
20 Son lot zour travay, Zongezile ti raport sa fot avek labank. Zot ti dekouver ki i ti annan en nimero kont ki ti preski parey pour en biznesmenn ki ti ris e ki ti’n depoz sa larzan par lerer dan en lot kont. Vi ki i ti tre enpresyonnen ki Zongezile pa ti’n depans en sou lo sa larzan, sa biznesmenn ti demann li: “Ki larelizyon ou ladan?” Zongezile ti eksplike ki i ti en Temwen Zeova. Bann administrater labank ti felisit li senserman e zot ti dir: “Nou swete ki tou dimoun ti a osi onnet parey bann Temwen Zeova.” San dout, azir avek lonnekte ek labonte i kapab fer lezot glorifye Zeova.—Ebre 13:18.
21 Nou pa bezwen fer bann keksoz ekstraordiner pour labonte annan en bon lefe. Par egzanp, en zenn Temwen ki ti servi konman en proklanmater aplentan lo en zil Samoa ti bezwen al lopital kot i ti reste. Bann dimoun ti pe espere pour vwar dokter, e sa Temwen ti remarke ki en madanm aze ki ti pe asiz obor li ti byen malad. I ti aranze pour fer sa madanm al dan son plas pour li vwar dokter avan. En lot zour, sa Temwen ti zwenn sa madanm aze dan bazar. I ti rapel li e dibyen ki i ti fer anver li lopital. I ti dir, “Aprezan mon konnen ki Temwen Zeova i vreman kontan zot prosen.” Oparavan i pa ti byen resevwar sa mesaz Rwayonm, me labonte ki sa Temwen ti demontre anver li ti fer en bon lefe lo li. I ti aksepte pour etidye Labib e i ti konmans pran konnesans lo Parol Bondye.
22. Nonm en fason pour kontinyen “fer sa ki byen” ki partikilyerman enportan?
22 Pareyman, ou osi ou kapab rakont serten leksperyans ki montre valer azir avek labonte. En fason pour kontinyen “fer sa ki byen” ki partikilyerman enportan se pour partisip regilyerman dan proklanmasyon sa bon nouvel Rwayonm. (Matye 24:14) Fotespere ki nou kontinyen partisip avek zel dan sa aktivite tre enportan, an rekonesan ki sa i en fason pour fer dibyen, sirtou anver bann dimoun ki byen akeyir sa mesaz. Pli enportan ankor, nou predikasyon ek nou bon kondwit i glorifye Zeova, sours prensipal labonte.—Matye 19:16, 17.
Kontinyen “fer Dibyen”
23. Akoz predikasyon ki bann Kretyen i fer i en bon travay?
23 San dout, nou predikasyon i en bon travay. I kapab fer nou ek bann ki ekout sa mesaz Labib ganny sove e alor mars lo sa semen ki anmenn ver lavi eternel. (Matye 7:13, 14; 1 Timote 4:16) Kan nou annan bann desizyon pour fer, sa dezir pour fer sa ki byen i kapab fer nou demann nou lekor: ‘Konman ki sa desizyon i kapab afekte mon aktivite predikasyon? Eski sa ki mon pe mazinen pour fer i vreman byen? Eski i pou ed mwan pour asiste lezot pour aksepte “levanzil eternel” e annan en bon relasyon avek Zeova?’ (Revelasyon 14:6) En desizyon ki promot lentere Rwayonm pou anmenn nou bokou lazwa.—Matye 6:33; Akt 20:35.
24, 25. Nonm serten fason ki nou kapab fer dibyen dan kongregasyon, e ki nou kapab asire si nou kontinyen demontre labonte?
24 Annou pa zanmen sou estim bann byenfe ki labonte i kapab anmennen. Nou kapab kontinyen demontre sa kalite par soutenir kongregasyon Kretyen e fer sa ki nou kapab pour okip son lentere ek byennet. Sirman nou pe fer sa ki byen kan nou regilyerman asiste e partisip dan bann renyon Kretyen. Zis nou prezans i ankouraz nou bann konpanyon Kretyen e nou komanter byen prepare i batir zot spirityelman. Nou pe osi fer dibyen kan nou servi nou bann resours pour mentenir Lasal Rwayonm e kan nou ede pour pran bon swen avek li. (2 Lerwa 22:3-7; 2 Korentyen 9:6, 7) Anfet, “pandan ki nou annan lokazyon, annou fer dibyen tou dimoun, sirtou nou bann frer dan lafwa.”—Galat 6:10.
25 Nou pa kapab prevwar tou sitiasyon kot nou bezwen demontre labonte. Alor, anmezir ki nou rankontre bann nouvo defi, annou rod leklersisman dan Labib, priy pour lespri sen Zeova, e fer nou mye pour akonpli son lavolonte parfe e bon. (Romen 2:9, 10; 12:2) Nou kapab asire ki Zeova pou beni nou an abondans anmenmtan ki nou kontinyen demontre labonte.
Ki ou pou reponn?
• Ki mannyer nou kapab akonpli pli bon keksoz?
• Akoz labonte i ganny apele en ‘fri lalimyer’?
• Akoz labonte i ganny apele en ‘fri lespri’?
• Ki lefe nou bon kondwit i annan?
[Study Questions]
[Portre lo paz 15]
Parol Bondye ek son lespri sen i ed nou pour demontre labonte
[Portre lo paz 16]
Azir avek labonte i anmenn bon rezilta