Zeova—Pli Gran Legzanp Labonte
Zeova—Pli Gran Legzanp Labonte
“Loue Zeova bann larme, parski Zeova i bon!”—ZEREMI 33:11.
1. Akoz nou santi nou pouse pour loue Bondye pour son labonte?
ZEOVA BONDYE i bon dan en sans parfe. “O! konman son labonte i gran!” profet Zekarya ti eksprimen. (Zekarya 9:17) Anfet, labonte i ganny reflekte dan tou sa ki Bondye ti fer pour prepar later pour nou rezwir lo la. (Zenez 1:31) Nou pa pou zanmen kapab konpran tou bann lalwa konplike ki Bondye in servi kan i ti kree liniver. (Eklezyast 3:11; 8:17) Me sa pti gin ki nou konnen i pous nou pour loue Bondye pour son labonte.
2. Konman ou pou dekrir labonte?
2 Kisisa labonte? I en kalite ki pous en dimoun pour fer sa ki byen. I osi ekselans en dimoun, setadir tou sa ki bon dan sa dimoun. Me, i pa zis labsans tou sa ki move. Labonte, ki form parti fri lespri, i en kalite pozitif. (Galat 5:22, 23) Nou demontre labonte kan nou fer sa ki byen anver lezot ki fer zot benefisye. Dan sa sistenm, sa ki serten group dimoun i konsider byen, lezot i kapab vwar li mal. Toudmenm, si nou anvi eksperyans lape ek lazwa, nou bezwen en standar pour sa ki byen. Lekel ki dan en pozisyon pour byen etablir sa standar?
3. Ki Zenez 2:16, 17 i endike konsernan standar pour sa ki byen?
3 Bondye i etabli standar pour sa ki byen. Okonmansman listwar imen, se Zeova ki ti donn lord premye zonm: “Fri dan tou pye dibwa sa zarden, ou kapab manz ziska satisfaksyon. Me kanta sa pye konnesans bon e move, ou pa devret manze, parski sa zour ki ou manz son fri, sirman ou pou mor.” (Zenez 2:16, 17) Wi, imen i bezwen depan lo zot Kreater pour konn sa ki byen ek sa ki mal.
Demontre Labonte ki nou pa ti merite
4. Ki Bondye in fer pour limanite depi ki Adan ti fer pese?
4 Posibilite pour imen eksperyans boner eternel dan en lavi parfe, ti ganny met an danze kan Adan ti fer pese e refize pour rekonnet drwa Bondye pour etablir standar pour sa ki byen. (Zenez 3:1-6) Toudmenm, avan ki desandans Adan ti konmans ne konman bann zeritye pese ek lanmor, Bondye ti predir ki ti pou annan en Semans parfe ki ti pou vini. Zeova ti dir avek “sa serpan lantikite,” Satan Dyab: “Mon pou met en ostilite ant ou ek sa fanm, ant ou semans ek son semans. I pou kraz ou latet e ou pou kraz son talon.” (Revelasyon 12:9; Zenez 3:15) Zeova ti annan plan pour liber bann imen peser. Anfet, Zeova ti demontre son labonte dan en fason ki nou pa ti merite letan i ti fer en provizyon pour liber bann ki demontre lafwa dan sakrifis ranson son Garson byenneme.—Matye 20:28; Romen 5:8, 12.
5. Menm si nou’n erit en move tandans dan nou leker, akoz nou kapab demontre en serten degre labonte?
5 Byensir, vi ki Adan in fer pese nou’n erit en move tandans dan nou leker. (Zenez 8:21) Erezman, Zeova i ed nou pour demontre en serten degre labonte. Kan nou reste ferm dan sa ki nou’n aprann dan son lekritir sen e presye, sa pa zis ‘donn nou lasazes ki kondir ver delivrans’ e ‘byen ekip nou pour fer tou aksyon ki bon,’ me i osi fer nou kapab fer sa ki byen dan son lizye. (2 Timote 3:14-17) Me pour benefisye atraver lenstriksyon Biblik e pour demontre labonte (ouswa ekselans moral), nou bezwen annan menm latitid avek sa psalmis ki ti sante: “[Ou Zeova] ou bon e pe fer sa ki byen. Ansenny mwan ou bann komannman.”—Psonm 119:68.
Labonte Zeova i ganny glorifye
6. Apre ki David ti fer anmenn lars lalyans Zerizalenm, bann Levit ti sant en sanson ki ti kontyen ki parol?
6 Lerwa David dan ansyen Izrael ti rekonnet labonte Bondye e rod Son gidans. David ti dir: “Zeova i bon e drwat. Se pour sa ki i enstri bann peser dan sa semen.” (Psonm 25:8) Lenstriksyon divin ki bann Izraelit ti gannyen ti enkli dis lalwa enportan—sa Dis Komannman—ki ti ganny ekrir lo de tablet an ros e ganny garde dan en bwat sakre ki ti ganny apele lars lalyans. Apre ki David ti fer anmenn sa Lars dan kapital Izrael, Zerizalenm, bann Levit ti sant en sanson ki ti enkli sa parol: “Remersye Zeova, zot lepep, parski i bon, parski son labonte leker i pour letan endefini.” (1 Kronik 16:34, 37-41) I ti bezwen vreman en gran plezir pour tann sa bann parol sorti dan labous sa bann Levit ki ti pe sante.
7. Ki ti arive apre ki Lars ti’n ganny anmennen dan Tre Sen e apre lapriyer dedikasyon ki Salomon ti fer?
7 Sa bann menm parol ti ganny met lanfaz lo la pandan dedikasyon tanp Zeova ki ti ganny konstri par Salomon, garson David. Apre ki lars lalyans ti’n ganny plase dan Tre Sen sa tanp ki ti’n fek ganny konstri, bann Levit ti konmans loue Zeova, “parski i bon, parski son labonte leker i pour letan endefini.” Pour sa lokazyon, tanp ti ranpli avek en nyaz dan en fason mirakile ki ti senboliz prezans glorye Zeova. (2 Kronik 5:13, 14) Apre ki Salomon ti fer son lapriyer dedikasyon, “dife ti desann sorti dan lesyel e konmans detri lofrann brile ek bann sakrifis.” Kan zot ti vwar sa, “tou bann garson Izrael ti . . . imedyatman azenou avek zot figir anba, lo pave e ti prosternen e remersye Zeova, ‘parski i bon, parski son labonte leker i pour letan endefini.’ ” (2 Kronik 7:1-3) Apre 14 zour lafet, bann Izraelit ti retourn se zot “zwaye e avek leker kontan akoz labonte ki Zeova ti’n demontre anver David e anver Salomon e anver Izrael son pep.”—2 Kronik 7:10.
8, 9. (a) Kantmenm bann Izraelit ti loue Zeova pour son labonte, ki zot ti fer avek letan? (b) Ki ti ganny predir konsernan Zerizalenm atraver Zeremi, e ki mannyer sa profesi ti ganny akonpli?
8 Malerezman, bann Izraelit pa ti kontinyen viv an armoni avek sa bann kantik ki zot ti sante pour loue Bondye. Avek letan, bann dimoun an Zida ti ‘glorifye Zeova senpleman avek zot lalev.’ (Izai 29:13) Olye konform zot avek standar Bondye pour sa ki byen, zot ti konmans fer sa ki mal. Ki zot ti pe fer ki ti mal? Zot ti koupab pour idolatri, imoralite, lopresyon bann pov, ek lezot pese grav! An rezilta, Zerizalenm ti ganny detri e bann zabitan Zida ti ganny egzile an Babilonn an 607 A.N.L.
9 Alors, Bondye ti disiplin son pep. Toudmenm, i ti predir atraver profet Zeremi, ki an Zerizalenm zot ti pou tann ankor lavwa bann ki pe dir: “Loue Zeova bann larme, parski Zeova i bon; parski son labonte leker i pour letan endefini!” (Zeremi 33:10, 11) E sa ti vreman arive. Apre ki sa pei ti’n reste an rin pour 70 lannen, en restan Zwif ti retourn an Zerizalenm lannen 537 A.N.L. (Zeremi 25:11; Danyel 9:1, 2) Zot ti rebatir lotel kot tanp ti sitye lo montanny Moria e la zot ti konmans ofer sakrifis. Fondasyon tanp ti ganny poze dezyenm lannen apre ki zot ti’n retournen. Pa sa ti en letan eksitan! Ezra ti rakonte: “Kan bann konstrikter ti poz fondasyon tanp Zeova, alor bann pret dan lenz ofisyel, avek tronpet, ek bann Levit bann garson Azaf, avek senbal, ti leve pour loue Zeova dapre direktiv David lerwa Izrael. E zot ti konmans reponn par loue e remersye Zeova, ‘parski i bon, parski son labonte leker anver Izrael i pour letan endefini.’ ”—Ezra 3:1-11.
10. Ki lekspresyon remarkab Psonm 118 i konmans e fini avek?
10 En lekspresyon louanz enpe parey konsernan labonte Zeova i aparet plizyer fwa dan bann psonm. Psonm 118 i enn parmi, ki ti ganny sante par bann fanmiy Izraelit pour konklir selebrasyon Lapak. Sa psonm i konmans e fini avek sa parol: “Remersye Zeova, zot lepep, parski i bon; parski son labonte leker i pour letan endefini.” (Psonm 118:1, 29) Petet sa ti bann dernyen parol ki Zezi Kri avek son bann zapot fidel ti sante sa zour swar avan son lanmor lannen 33 N.L.—Matye 26:30.
“Silvouple, fer mwan vwar ou Laglwar”
11, 12. Kan Moiz ti ganny en apersi laglwar Bondye, ki deklarasyon i ti tande?
11 En konneksyon ant labonte Zeova (son ekselans) ek son labonte leker ti ganny fer pour premye fwa plizyer santenn lannen avan letan Ezra. Zis apre ki bann Izraelit ti ador sa pti bef annor dan dezer e bann ki ti’n vyol lalwa ti ganny egzekite, Moiz ti demann Zeova: “Silvouple, fer mwan vwar ou laglwar.” Vi ki i ti konnen ki Moiz pa ti pou kapab vwar Son figir e kontinyen viv, Zeova ti dir: “Mwan, mon pou fer pas devan ou figir tou mon labonte.”—Egzod 33:13-20.
12 Labonte Zeova ti pas devan figir Moiz son lannmen lo montanny Sinai. Sa zour, Moiz ti ganny en apersi laglwar Bondye e i ti tann sa deklarasyon: “Zeova, Zeova, en Bondye mizerikord e konpasyon, pa ankoler vitman, e ris an labonte leker e an verite, prezerv labonte leker pour plizyer milye, pardonn fot ek transgresyon ek pese, me dan okenn ka i pa pou akord gras pour pinisyon, anmenn pinisyon pour fot bann papa lo bann garson e lo bann pti zanfan, lo trwazyenm zenerasyon e lo katriyenm zenerasyon.” (Egzod 34:6, 7) Sa parol i fer vwar ki labonte Zeova (son ekselans) i relye avek son labonte leker ek lezot laspe son personnalite. Egzamin zot pou ed nou pour demontre labonte. Annou premyerman egzamin sa kalite ki’n ganny mansyonnen de fwa dan sa deklarasyon merveye ki’n ganny fer lo labonte Bondye.
“En Bondye . . . ris an Labonte Leker”
13. Dan sa deklarasyon lo labonte Bondye, ki kalite ki ganny mansyonnen de fwa, e akoz sa i apropriye?
13 “Zeova, [i] en Bondye . . . ris an labonte leker . . . , prezerv labonte leker pour plizyer milye.” Sa mo Ebre ki’n ganny tradwir “labonte leker” i osi vedir “lanmour fidel.” I sa sel kalite ki’n ganny mansyonnen de fwa dan sa deklarasyon ki Bondye ti fer avek Moiz. Sa i byen apropriye vi ki kalite dominan Zeova i lanmour! (1 Zan 4:8) Sa lekspresyon louanz byen koni ki ganny adrese avek Zeova, “parski i bon, parski son labonte leker i pour letan endefini,” i met lanfaz lo sa kalite.
14. Lekel ki sirtou eksperyans labonte ek labonte leker Bondye?
14 En fason ki Zeova i demontre son labonte i ki i “ris an labonte leker.” Sa i sirtou evidan dan swen ranpli avek tandres ki i donn son bann serviter fidel ki’n dedye zot lavi avek li. (1 Pyer 5:6, 7) Parey bann Temwen Zeova i kapab afirmen, i pe “prezerv labonte leker” pour bann ki kontan li e servi li. (Egzod 20:6) Nasyon Izrael ti aret eksperyans labonte leker Zeova, oubyen son lanmour fidel, akoz zot ti rezet son Garson. Me labonte Bondye ek son lanmour fidel anver bann Kretyen fidel dan tou nasyon pou dir pour touzour.—Zan 3:36.
Zeova—Mizerikord e Konpasyon
15. (a) Avek ki parol sa deklarasyon ki Moiz ti tande lo montanny Sinai ti konmanse? (b) Ki mizerikord i enplike?
15 Sa deklarasyon ki Moiz ti tande lo montanny Sinai ti konmans avek sa parol: “Zeova, Zeova, en Bondye mizerikord e konpasyon.” Sa mo Ebre ki’n ganny tradwi “mizerikord” i kapab refer avek “bann trip” e i relye etrwatman avek sa mo ki ganny tradwir “matris.” Alor mizerikord i enkli konsiderasyon ranpli avek tandres ki en dimoun i resanti ofon pour lezot. Me mizerikord i enplik plis ki resanti en pitye senser. I devret motiv nou pour fer serten keksoz pour soulaz soufrans lezot. Par egzanp, bann ansyen dan kongregasyon i vwar sa nesesite pour montre mizerikord anver zot bann konpanyon Kretyen, ‘montre mizerikord avek lazwa’ kan i apropriye.—Romen 12:8; Zak 2:13; Zid 22, 23.
16. Akoz nou kapab dir ki Zeova i annan konpasyon?
16 Labonte Bondye i osi ganny demontre dan son konpasyon. En dimoun ki annan konpasyon i “montre konsiderasyon pour santiman en lot dimoun” e montre li ‘zantiy sirtou anver bann ki par anba son lotorite.’ Zeova i demontre pli gran legzanp konpasyon dan son relasyon avek son bann serviter fidel. Par egzanp, an servan bann lanz Bondye ti fortifye profet Danyel ki ti byen aze e enform Mari, ki ti ankor en zenn fiy, son privilez pour donn nesans Zezi. (Danyel 10:19; Lik 1:26-38) Konman pep Zeova, nou san dout rekonesan pour sa fason ki i enplor nou avek konpasyon dan bann paz Labib. Nou loue li pour sa labonte ki i demontre e nou sey montre konpasyon dan nou fason fer avek lezot. Kan bann ki annan kalifikasyon spirityel i redres en konpanyon Kretyen “avek en lespri ladouser,” zot sey fer li zantiman e avek konpasyon.—Galat 6:1.
En Bondye ki pa ankoler vitman
17. Akoz nou rekonesan ki Zeova “pa ankoler vitman”?
17 “En Bondye . . . pa ankoler vitman.” Sa parol i atir nou latansyon lo en lot laspe labonte Zeova. Avek pasyans, Zeova i siport nou bann febles e donn nou letan pour sirmont nou bann defo grav e fer progre spirityel. (Ebre 5:12–6:3; Zak 5:14, 15) Pasyans Bondye i osi benefisye bann dimoun ki pa ankor vin son bann serviter. Zot ankor annan letan pour reponn lapel mesaz Rwayonm e repantir. (Romen 2:4) Me kantmenm Zeova i annan pasyans, son labonte i parfwa pous li pour eksprim son lakoler, parey i ti fer kan bann Izraelit ti ador sa pti bef annor lo Montanny Sinai. Lakoler Bondye pou byento ganny eksprimen dan en pli gran fason kan i pou anmenn en lafen avek sistenm mesan Satan.—Ezekyel 38:19, 21-23.
18. An rapor avek laverite, ki diferans i annan ant Zeova ek bann dirizan imen?
18 “Zeova [i] en Bondye . . . ris an . . . verite.” Pa Zeova i vreman diferan avek bann dirizan imen, ki fer bann gran gran promes e apre pa kapab realiz zot! Parkont, bann adorater Zeova i kapab depan lo tou sa ki’n ganny dir dan son Parol enspire. Vi ki Bondye i ris an verite, nou kapab touzour met konfyans dan son bann promes. Par son labonte, nou Papa seles i touzour reponn nou lapriyer pour laverite spirityel par fourni li an abondans.—Psonm 43:3; 65:2.
19. Konman ki Zeova in demontre son labonte dan en fason remarkab anver bann peser ki repantir?
19 “Zeova [i] en Bondye . . . pardonn fot ek transgresyon ek pese.” Dan son labonte, Zeova i pare pour pardonn bann peser ki repantir. Sirman, nou tre rekonesan ki nou bon Papa seles in fer provizyon pour pardonn nou atraver sakrifis Zezi. (1 Zan 2:1, 2) Nou vreman kontan ki tou dimoun ki demontre lafwa dan sa ranson i kapab rezwir en bon relasyon avek Zeova, avek lespwar pour viv eternelman dan son nouvo monn ki i’n promet. Sa i bann bon rezon pour loue Zeova pour son labonte ki i demontre anver limanite!—2 Pyer 3:13.
20. Ki laprev nou annan ki Bondye pa ferm lizye lo sa ki mal?
20 “Dan okenn ka [Zeova] pa pou akord gras pour pinisyon.” Anfet, sa i en lot rezon pour loue Zeova pour son labonte. Akoz? Parski en laspe enportan labonte (ekselans) i ki i pa ferm lizye lo sa ki mal dan okenn fason. Deplis, “kan Senyer Zezi pou paret dan lesyel avek son bann lanz pisan,” vanzans pou ganny anmennen “lo bann ki pa konn Bondye ek bann ki pa obei levanzil.” Zot “pou ganny konman pinisyon destriksyon eternel.” (2 Tesalonisyen 1:6-9) Bann adorater Zeova ki pou sirviv pou alor kapab rezwir lavi plennman san ganny deranze par bann dimoun mesan, ki “lennmi sa ki fer dibyen.”—2 Timote 3:1-3.
Imit Labonte Zeova
21. Akoz nou devret demontre labonte?
21 San dout, nou annan bokou rezon pour loue e remersye Zeova pour son labonte. Vi ki nou son bann serviter, eski pa nou devret fer nou mye pour demontre sa kalite? Wi, parski zapot Pol ti enplor son bann konpanyon Kretyen: “Parski zot bann zanfan ki Bondye i kontan, fer tou zot zefor pour fer tou parey li.” (Efezyen 5:1) Nou Papa seles i touzour demontre labonte, nou osi nou devret fer parey.
22. Ki nou pou egzaminen dan prosen lartik?
22 Si nou’n dedye nou lavi avek Zeova avek tou nou leker, san dout nou annan en gran dezir pour imit son labonte. Vi ki nou bann desandans Adan peser, nou pa vwar li fasil pour fer sa ki byen. Dan nou prosen lartik, nou pou vwar akoz nou kapab demontre labonte. Nou pou osi egzamin diferan fason ki nou kapab e devret imit Zeova—pli gran legzanp labonte.
Konman ou pou reponn?
• Kisisa labonte?
• Ki lekspresyon dan Labib ki met lanfaz lo labonte Bondye?
• Nonm serten laspe dan ki Zeova i demontre son labonte.
• Akoz nou devret imit legzanp Zeova an sa ki konsern labonte?
[Study Questions]
[Portre lo paz 10]
Zeova ti disiplin son pep ansyen akoz zot pa ti viv an akor avek zot parol ki zot ti dir pour loue Zeova
[Portre lo paz 10]
En restan fidel ti retourn an Zerizalenm
[Portre lo paz 11]
Moiz ti tann en deklarasyon merveye lo labonte Bondye
[Portre lo paz 13]
Labonte Zeova i ganny vwar dan lafason ki i enplor nou dan bann paz Labib