Bann Prensip Bondye i kapab benefisye ou

SAN dout ou konnen ki zannimo i ganny dirize par zot lensten. En kantite masin in ganny fer pour obei bann lenstriksyon. Me imen in ganny kree pour ganny gide par bann prensip. Me konman ki ou kapab sir? Byen, Zeova, Kreater tou bann prensip drwat, ti anons sa kan i ti kree premye imen: “Annou kree zonm dan nou resanblans.” Kreater i en lespri; i napa en lekor fizik parey nou, alor nou’n ganny kree dan son “resanblans” dan le sans ki nou kapab reflekte son personnalite, demontre en serten degre son bann bon kalite. Bann imen i annan sa kapasite pour gid zot lavi dapre bann prensip, savedir, dapre sa ki zot krwar i en bon kod kondwit. Zeova in fer en kantite sa bann prensip ganny rikorde dan son Parol.—Zenez 1:26; Zan 4:24; 17:17.

Me en dimoun i kapab dir: ‘Labib i kontyen plizyer santenn prensip. I enposib pour mwan rapel zot tou.’ I vre. Kantmenm  sa, konsider sa fe: Menm si tou bann prensip Bondye i benefisye nou, serten i pli enportan ki lezot. Ou kapab vwar sa atraver Matye 22:37-39, kot Zezi ti montre ki parmi bann komannman ek bann prensip dan Lalwa Mozaik, serten ti pli enportan ki lezot.

Lekel bann prensip ki pli enportan? Bann prensip ki pli enportan dan Labib i bann ki direkteman afekte nou relasyon avek Zeova. Si nou pran sa bann prensip aker, Kreater pou vin sa pli gran lenfliyans lo nou gid moral. I osi annan bann prensip ki afekte nou relasyon avek lezot dimoun. Aplik sa bann prensip pou ed nou opoz sa latitid mwan premye, dan nenport ki fason ki i kapab egziste.

Annou konmans avek en laverite ki pli enportan dan Labib. Lekel sa laverite, e konman ki i fer lefe lo nou?

“Tre O lo tou Later”

Labib i fer kler ki Zeova i nou Gran Kreater, e Bondye Tou Pwisan. Napa okenn kreatir ki kapab vin egal avek li oubyen ranplas li. Sa i en laverite enportan ki ganny rikorde dan Labib.—Zenez 17:1; Eklezyast 12:1.

Enn parmi bann ekriven liv Psonm ti fer sa remark lo Zeova: “Ou tousel ki Tre O lo tou later.” David ki ti en Lerwa dan letan ansyen ti dir: “Rwayonm i pour ou, O Zeova, sa Enn ki osi elev ou menm konman sef lo tou.” E sa profet byen koni Zeremi ti ganny motive pour rikorde: “Napa personn ki parey ou, dan okenn fason, O Zeova. Ou gran, e ou non i gran an pwisans.”—Psonm 83:18; 1 Kronik 29:11; Zeremi 10:6.

Konman ki nou devret aplik sa bann laverite lo Bondye dan nou lavi toulezour?

I kler lekel ki devret vreman pli enportan dan nou lavi—Sa ki’n kree nou e sa ki’n donn nou lavi. Eski pa i pou byen alors, pour reziste okenn tandans pour port latansyon lo nou—en tandans ki kapab pli for dan serten dimoun ki dan lezot? En prensip saz ki nou devret swiv se pour “fer tou pour laglwar Bondye.” (1 Korentyen 10:31) Profet Danyel in kit en bon legzanp dan sa domenn.

Fe istorik i dir ki en fwa Lerwa Babilonn, Neboukadnetsar, ti ganny trouble par en rev e i ti oule konnen ki i vedir. Tou dimoun ti konfize, tandis ki Danyel li, i ti eksplik lerwa korekteman sa ki i ti oule konnen. Eski Danyel ti glorifye son lekor pour sa? Non, i ti donn loner “Bondye dan lesyel ki en Revelater bann sekre.” Danyel ti kontinyen: “Se pa atraver okenn lasazes ki egziste dan mwan plis ki dan okenn lezot vivan ki sa sekre in ganny revele avek mwan.” Danyel ti en zonm ki ti viv dapre prensip. I pa etonnan ki dan liv Danyel, i ganny dekrir trwa fwa konman “vreman dezirab” devan lizye Bondye.—Danyel 2:28, 30; 9:23; 10:11, 19.

Ou pou benefisye si ou imit Danyel. Pour swiv legzanp Danyel, keksoz ki esansyel i nou motivasyon. Lekel ki devret ganny loner pour sa ki ou fer? Nenport ki sitiasyon ki ou ladan, ou kapab azir an armoni avek sa prensip Labib ki vreman enportan—Zeova i Souvren Senyer. Kan ou fer sa, ou pou vin “vreman dezirab” devan son lizye.

 Aprezan annou konsider de prensip debaz ki kapab gid nou dan domenn relasyon imen. Lefe ki en kantite lanfaz pe ganny mete lo sa latitid mwan premye, relasyon ant imen i vin vreman difisil.

“Avek Limilite”

Bann ki met zot lekor premye i rarman satisfe. Laplipar dimoun i oule en lavi pli meyer ankor, e zot oule li la konmela. Pour zot, modesti i endik febles. Zot konsider pasyans konman en keksoz ki selman lezot ki devret demontre. Kot i konsern zot latitid pour ganny rekonnet, tou keksoz i akseptab. Eski ou panse ki ou annan okenn rezon pour azir parey zot?

Bann serviter Bondye i rankontre sa latitid toulezour, me i pa devret detenn lo zot. Bann Kretyen matir i aksepte sa prensip ki dir “se pa sa ki annan en gran lopinyon lo zot lekor ki ganny vreman aprouve, me sa enn ki Senyer i rekonmande.”—2 Korentyen 10:18.

Aplik sa prensip dan Filipyen 2:3, 4 pou ede. Sa teks i ankouraz ou pour “pa fer nanryen par lespri egois e vantar, me avek limilite konsider lezot pli enportan ki ou.” Alor ou pa pou ‘pran ka zis avek ou prop lentere, me osi avek lentere lezot.’

En dimoun ki ti annan en bon pwenn-vi lo li e ki ti fer en egzaminasyon rezonnab lo sa ki i ti vreman ete, ti Gideonn, en ziz parmi bann ansyen Ebre. I pa ti demande pour li vin sef an Izrael. Toutfwa, kan i ti ganny swazir pour ranpli sa rol, Gideonn ti  fer resorti ki i pa vo sa responsabilite. “Mon milye i sa pli pti gin an Manase, e mon sa enn pli pti dan lakour mon papa,” i ti eksplike.—Ziz 6:12-16.

Deplis, apre ki Zeova ti donn Gideonn en laviktwar, bann zonm Efraim ti provok en dispit avek li. Konman ki Gideonn ti reakte? Eski sa laviktwar ti fer li santi ki i pli enportan? Non. I ti evit maler par donn en larepons dou. “Kwa ki mon’n kapab fer konpare avek zot?” Gideonn ti en dimoun ki ti annan limilite.—Ziz 8:1-3.

I vre ki bann levennman ki ti enplik Gideonn ti arive en kantite letan pase. Kantmenm sa, i vo lapenn konsider sa resi. Ou kapab vwar ki Gideonn ti annan en latitid ki ti tre diferan avek sa ki sitan komen ozordi, e i ti viv an armoni avek sa latitid, ki ti fer li benefisye.

Sa latitid ki egziste ozordi ki konsantre lo dezir sak endividi i kapab deform nou pwenn-vi lo nou prop valer. Bann prensip Labib i koriz sa deformasyon, i ansenny nou nou vre valer an relasyon avek Kreater ek lezot.

Par aplik bann prensip Labib, nou pou sirmont sa latitid mwan premye. Nou nepli ganny gouvernen par nou bann santiman oubyen personnalite. Kan nou aprann plis bann prensip drwat, nou pou vin pli familye avek nou Kreater. Wi, i vo lapenn not bann prensip divin kan nou pe lir Labib.—Vwar bwat.

Zeova in fer imen pli siperyer ki zannimo, ki prensipalman servi zot lensten pour fer bann keksoz. Swiv lavolonte Bondye i enplik aplik son bann prensip. Alor nou kapab fer nou gid moral travay byen, en gid ki pou diriz nou dan en nouvo sistenm ki Bondye pe fer. Labib i donn nou rezon pour ekspekte tre byento en nouvo sistenm mondyal kot “pou annan lazistis.”—2 Pyer 3:13.

[Box/Picture on page 6]

Serten Prensip Labib ki itil

Dan Fanmiy:

“Personn pa devret rod son prop lentere, me lentere son prosen.”—1 Korentyen 10:24.

“Lanmour pa rod son prop lentere.”—1 Korentyen 13:4, 5.

“Fodre ki sak mari i kontan son madanm parey son prop lekor.”—Efezyen 5:33.

“Bann madanm, soumet zot avek zot mari.”—Kolosyen 3:18.

“Ekout ou papa ki’n koz ou nesans, e pa mepriz ou manman senpleman akoz in vin vye.”—Proverb 23:22.

Kot Lekol, dan Travay, oubyen dan bann Landrwa Biznes:

“En balans tronper i en keksoz detestab . . . Sa enn mesan pe fer bann fo saler.”—Proverb 11:1, 18.

“Sa ki abitye vole fodre i aret vole e travay pour ganny son lavi.”—Efezyen 4:28.

“En dimoun ki pa oule travay, pa devre manze nonpli.”—2 Tesalonisyen 3:10.

“Dan tou sa ki zot fer, fer li avek tou zot leker, konmsi zot pe travay pour Senyer.”—Kolosyen 3:23.

“Nou oule fer sa ki byen dan tou sirkonstans.”—Ebre 13:18.

Latitid anver Larises:

“Sa ki pe depese pour ganny larises pa pou reste inosan.”—Proverb 28:20.

“En dimoun ki kontan larzan pa pou satisfe avek larzan.”—Eklezyast 5:10.

Annan en Pwenn-vi apropriye lo sa ki nou ete:

“Pour dimoun resers zot prop laglwar, eski i laglwar?”—Proverb 25:27.

“Les en etranze loue ou, pa ou prop labous.”—Proverb 27:2.

“Mon dir avek zot tou: pa bezwen ki zot ganny en tro gran lopinyon lo zot menm.”—Romen 12:3.

“Si en dimoun i krwar ki i enportan, kan i en nanryen ditou, i pe anbet son prop lekor.”—Galat 6:3.

[Portre lo paz 5]

Danyel ti donn loner Bondye

[Portre lo paz 7]

Azir avek lezot dapre bann prensip Bondye i kontribye ver bann relasyon agreab e ere

[Lo paz 7 portre par]

U.S. Fish & Wildlife Service, Washington, D.C./Robert Bridges