Bann Prensip ki ou swazir

ESKI ou en dimoun ki ganny gide par prensip? Oubyen eski ou konsider bann prensip moral konmsi zot nepli annan valer denozour? Larealite i se ki tou dimoun i ganny gide par serten kalite prensip, ki zot panse i enportan. Dapre The New Shorter Oxford English Dictionary, en prensip i kapab ganny defini konman “en bon kod kondwit personnel.” Bann prensip i enfliyans nou desizyon e determin direksyon ki nou pran dan lavi. Bann prensip i kapab azir konman en konpa.

Par egzanp, Zezi ti ankouraz son bann disip pour gard Lareg d-or, ki ganny trouve dan Matye 7:12: “Alor fer pour lezot sa ki ou oule lezot i fer pour ou.” Bann disip Confucius i obzerv bann prensip li (savwar viv) ek jen (byenveyans), ki adres bann kalite parey labonte, limilite, respe ek fidelite. Menm bann dimoun ki pa relizye i annan serten priyorite oubyen gidans ki determin zot kondwit.

Ki Kalite Prensip ki nou devret swazir?

Parkont, nou devret kit antet ki bann prensip i kapab swa bon oubyen move. Par egzanp, en kantite dimoun in ganny motive par sa latitid mwan premye ki’n egziste pandan sa dernyen 10 an. Menm si en kantite dimoun pa konn sa term oubyen zot santi ki i pa aplik pour zot, sa latitid mwan premye i en kod kondwit ki en kantite dimoun i servi konman en rekour kan zot abandonn bann standar kondwit eleve. Ki swa sa bann kondwit i ganny idantifye par sa term oubyen non, sa latitid mwan premye i en siny egois, i souvan ganny akonpannyen par lanmour pour larzan. En reprezantan televizyon an Sin ti dir: “Nou annan zis de prensip. Enn i pour satisfer demann. Lot se pour fer larzan.”

Sa latitid mwan premye i kapab azir konman en lema. E konman en lema i afekte en konpa? Kan sa de keksoz i obor kanmarad, zegwiy sa konpa i mal ganny dirize. Dan sa menm fason, sa latitid mwan premye i kapab konfiz gidans moral en dimoun oubyen son kod bon kondwit par fer tou keksoz vin dezyenm dapre dezir sa dimoun.

Eski ou pou sirprann pour aprann ki sa latitid mwan premye pa’n konmans dan nou letan? Sa lapros anver lavi ti konmans dan zarden Edenn kan nou premye paran ti abandonn standar kondwit ki ti ganny etabli par nou Kreater. Sa ti sanz zot gidans moral. Konman bann desandan Adan ek Ev, imen i ganny trouble avek sa menm lapros anver lavi, ki tou resanman zot in apel li “mwan premye.”—Zenez 3:6-8, 12.

Sirtou dan sa letan ki profesi Labib i apel “bann dernyen zour,” ki ganny marke par “letan difisil” ki nou kapab remarke ki distans sa latitid in propaze. En  kantite dimoun in “vin egois.” I pa sirprenan ki nou trouv nou anba presyon pour kopi sa latitid mwan premye.—2 Timote 3:1-5.

Petet ou pou dakor avek en zenn ki apel Olaf, ki ti ekrir en biro brans Temwen Zeova Lerop: “I vreman difisil pour reste drwat moralman, sirtou pour nou bann zenn. Silvouple kontinyen rapel nou sa nesesite pour reste atase avek bann prensip Labib.”

Pwenn-vi Olaf i demontre ki i’n byen reflesir. Bann prensip Bondye i kapab ed nou—zenn konman vye—pour gard bann standar kondwit eleve. Zot osi kapab ed nou pour evite azir dapre sa prensip mwan premye, ki swa i ganny apele koumsa oubyen non. Si ou oule aprann plis lo konman ki bann prensip Labib i kapab vreman ed ou, silvouple egzamin byen sa lot lartik.

[Caption on page 4]

En kantite dimoun ozordi napa konsiderasyon pour bezwen lezot