Byen Ekipe Konman Bann Ansennyan Parol Bondye
Byen Ekipe Konman Bann Ansennyan Parol Bondye
“Me nou kapasite i sorti kot Bondye . . . ki’n fer nou vin bann serviter.”—2 KORENTYEN 3:5, 6.
1, 2. Ki zefor an rapor avek prese ki parfwa ganny fer, me akoz souvannfwa zot fel?
ESKI ou ti a kontan ganny en louvraz ki ou pa kalifye pour fer? Zis mazinen: Bann materyo ki ou bezwen i la devan ou, e ou kapab ganny nenport zouti ki ou bezwen. Me ou napa okenn lide konman ou kapab akonpli sa latas. Sa ki fer sitiasyon pli konplike ankor se ki sa louvraz i irzan. Dimoun pe kont lo ou. Pa i fer ou fristre!
2 En sitiasyon sitan difisil koumsa pa zis en keksoz imaziner. Annou pran en legzanp. Parfwa, bann legliz Kretyente i sey organiz zot pour pres port-an-port. Me souvannfwa zot zefor i fel, apre detrwa semenn oubyen detrwa mwan zot les tou tonm dan delo. Akoz? Kretyente pa’n ed son bann dimoun pour kalifye pour sa louvraz. Menm bann pret pa kalifye pour fer sa travay predikasyon, malgre ki zot in pas plizyer lannen letid dan bann lekol profann ek bann seminer. Akoz nou kapab dir sa?
3. Ki lekspresyon ki ganny servi de fwa dan 2 Korentyen 3:5, 6, e ki i oule dir par sa?
3 Parol Bondye i eksplike kwa ki fer en vre proklanmater bon nouvel kalifye. Zapot Pol ti ganny enspire pour ekrir: “Non pa akoz nou prop kapasite ki a fer nou dir ki tel keksoz i sorti kot noumenm, me nou kapasite i sorti kot Bondye. Se li ki’n fer nou vin bann serviter.” (2 Korentyen 3:5, 6) Not byen sa lekspresyon ki’n ganny servi de fwa—“kapasite.” Ki i oule dir par sa? Vine’s Expository Dictionary of Biblical Words i dir: “Ler i pe refer avek bann keksoz [sa mo orizinal Grek] i vedir ‘sifi’ . . . ; kan i pe refer avek bann dimoun, i vedir ‘konpetan,’ ‘diny.’ ” Alor, en dimoun ki “kalifye” i konpetan e diny pour akonpli sa travay. Wi, bann vre minis sa bon nouvel i kalifye pour fer sa travay. Zot konpetan, oubyen diny pour prese.
4. (a) Ki mannyer legzanp Pol i montre ki pa zis en pti group ki kapab kalifye pour minister Kretyen? (b) Nonm sa trwa mwayen ki Zeova i servi pour fer nou kalifye konman bann minis.
4 Me kote sa konpetans i sorti? Eski se gras a nou prop talan? Eski se akoz nou pli malen? Akoz en ledikasyon spesyal dan bann gran lekol? I evidan ki zapot Pol ti annan tou sa bann keksoz. (Akt 22:3; Filipyen 3:4, 5) Pourtan, i ti admet avek limilite ki son kalifikasyon konman en minis pa sorti kot bann gran lekol me kot Zeova Bondye. Eski en tel kalifikasyon i zis pour en pti group ki ganny konsidere konman pli meyer? Pol ti ekrir kongregasyon Korentyen konsernan “nou kapasite.” Sirman sa i endike ki Zeova i fer sir ki tou son serviter fidel i konpetan e kapab fer sa travay ki i’n donn zot. Ki mannyer Zeova i fer bann vre Kretyen kalifye ozordi? Annou diskit trwa mwayen ki i servi: (1) son Parol, (2) son lespri sen, ek (3) son lorganizasyon lo later.
Parol Zeova i fer nou kalifye
5, 6. Ki lefe Lekritir sen i annan lo bann vre Kretyen?
5 Premyerman, konman ki Parol Bondye i fer nou kalifye konman bann minis? Pol ti ekrir: “Tou Lekritir i enspire par Bondye e i itil pour ansennyen, pour koriz lerer, pour remet drwat, e pour formen pour viv byen selon Bondye, pour ki dimoun ki servi Bondye i byen prepare e byen ekipe pour fer tou aksyon ki bon.” (2 Timote 3:16, 17) Alor Lekritir Sen i kapab fer nou “byen prepare e byen ekipe” pour fer “aksyon ki bon,” ki enplik ansenny dimoun konsernan Parol Bondye. Me tou sa bann dimoun dan bann legliz Kretyente? Pa zot annan akse avek Labib? Ki mannyer en liv i kapab ed serten dimoun pour vin bann minis konpetan tandis ki lezot non? Larepons i trouve dan nou latitid anver Labib.
6 Malerezman, bokou dimoun ki al legliz pa aksepte mesaz Labib “konman parol Bondye parey i ete.” (1 Tesalonisyen 2:13) Kretyente i vreman fer onte dan sa domenn. Apre ki bann pret in pas plizyer lannen letid dan bann lenstitisyon relizye, eski sa in fer zot byen ekipe konman bann ansennyan Parol Bondye? Pa vreman. Serten etidyan i konmans zot letid seminer konman bann ki krwar dan Labib me zot ganny diplonmen konman bann ki annan bokou dout! Apre, olye pres parol Bondye—ki laplipar zot nepli krwar ladan—zot diriz zot minister dan lezot domenn, pran kote dan bann deba politik, promot sa ki zot apel levanzil sosyal, oubyen atir latansyon lo bann filozofi sa monn dan zot sermon. (2 Timote 4:3) Parkont, bann vre Kretyen i swiv legzanp Zezi Kri.
7, 8. Konman ki latitid Zezi anver Parol Bondye ti diferan avek latitid bann sef relizye dan son letan?
7 Zezi pa ti les bann sef relizye dan son letan fasonn son panse. Ki swa i ti pe ansenny en pti group, parey son bann zapot, oubyen en gran lafoul, Zezi ti servi byen lekritir sen. (Matye 13:10-17; 15:1-11) Sa ti fer li diferan avek bann sef relizye dan son letan. Zot ti vreman dekouraz bann dimoun ordiner pour etidye bann keksoz profon Bondye. Anfet, pandan sa letan ti normal pour en ansennyan panse ki serten pasaz dan Labib ti tro profon pour diskit avek okenn lezot dimoun apard ki son etidyan pli pros—e menm dan sa ka, i ti koz dousman e kouver son latet! Sa latitid siperstisye pour diskit serten porsyon Labib ti’n ariv preski menm degre avek servi non divin!
8 Zezi pa ti koumsa. I ti krwar ki, pa zis en pti minorite ki’n ganny swazir, me dimoun an zeneral i bezwen egzamin “tou parol ki sorti dan labous Bondye.” Zezi pa ti enterese pour donn okenn lakle konnesans avek en group spesyalis Labib. I ti dir son bann disip: “Sa ki mon dir zot dan fernwanr, repet an plen-zour; e sa ki zot tande an sekre pibliy li lo twa lakaz.” (Matye 4:4; 10:27) Zezi ti vreman annan sa dezir pour partaz konnesans lo Bondye avek otan dimoun posib.
9. Kan ki bann vre Kretyen i servi Labib?
9 Parol Bondye i devret vin pwen santral nou lansennyman. Par egzanp, kan nou pe donn en diskour dan Lasal Rwayonm bann Temwen Zeova, i pa sifi zis pour lir serten verse dan Labib. Petet nou bezwen eksplike, servi legzanp, e aplik en teks Labib dapre son konteks. Nou lobzektif se pour tir sa mesaz lo sa paz e fer li grave dan leker bann ki pe ekout nou. (Neemya 8:8, 12) Labib i devret osi ganny servi kan i neseser pour donn konsey oubyen pour administre disiplin. Kantmenm pep Zeova i koz diferan langaz e sorti dan diferan lorizin, nou tou nou respe sa pli gran liv—Labib.
10. Ki lefe mesaz enspire Labib i annan lo nou?
10 Kan i ganny servi avek en tel respe, Parol Bondye i pwisan. (Ebre 4:12) I pous dimoun pour fer bann sanzman dan zot lavi, tel konman abandonn bann pratik ki kontrer avek Labib parey fornikasyon, adilter, idolatri, bwar an ekse, ek vol. I’n ed en kantite dimoun pour rezet sa vye personnalite e kiltiv enn ki nouvo. (Efezyen 4:20-24) Wi, si nou respekte li plis ki okenn pwenn-vi oubyen tradisyon zonm e servi li fidelman, Labib i kapab fer nou vin konpetan, byen ekipe konman bann ansennyan Parol Bondye.
Lespri Zeova i fer nou kalifye
11. Akoz ki i apropriye ki lespri sen Zeova i ganny apele “asistan”?
11 Dezyenmman, annou diskite ki rol lespri sen Zeova, oubyen son lafors aktif, i zwe pour fer nou byen ekipe. Nou pa devret zanmen oubliye ki lespri Zeova i lafors pli pwisan ki egziste. Zeova in donn son Garson byenneme pouvwar pour egzers menm lafors enpresyonan an faver tou vre Kretyen. Alor i apropriye pour Zezi refer avek lespri sen konman “asistan.” (Zan 16:7, NW ) I ti enplor son bann disip pour demann Zeova sa lespri, e i ti asir zot ki Zeova pou donn li avek zenerozite.—Lik 11:10-13; Zak 1:17.
12, 13. (a) Akoz i enportan ki nou priy pour lespri sen pour asiste nou dan nou minister? (b) Konman ki bann Farizyen ti montre ki lespri sen pa ti pe travay dan zot?
12 Toulezour nou bezwen priy pour lespri sen, sirtou pour ed nou dan nou minister. Ki lefe sa lafors aktif i kapab annan lo nou? I kapab travay dan nou lespri ensi ki dan nou leker, ed nou pour sanze, pour progrese, e pour ranplas sa vye personnalite avek enn ki nouvo. (Kolosyen 3:9, 10) I kapab ed nou pour kiltiv bann kalite ki Kris ti annan, ki annan valer. Bokou nou i kapab resit Galat 5:22, 23 parker. Sa bann verse i nonm bann fri lespri Bondye. Premye se lanmour. Sa kalite i esansyel dan nou minister. Akoz?
13 Lanmour i en santiman ki motiv nou bokou. Nou lanmour pour Zeova e pour lezot dimoun i pous bann vre Kretyen pour partaz sa bon nouvel. (Mark 12:28-31) San sa lanmour, nou pa kapab vreman kalifye konman bann ansennyan parol Bondye. Remark diferans ki ti annan ant Zezi ek bann Farizyen. Matye 9:36 i dir konsernan Zezi: “Son leker ti ranpli avek konpasyon pour lafoul ki i ti war, akoz zot ti fatige e dekouraze parey bann mouton ki napa berze.” Ki pwenn-vi bann Farizyen ti annan lo bann dimoun ordiner? Zot ti dir: “Sa lafoul pa konn Lalwa Moiz e zot en bann dimoun modi.” (Zan 7:49) Sa bann Farizyen ti napa okenn lanmour pour dimoun, zot ti plito mepriz sa bann dimoun en kantite. I kler ki lespri Zeova pa ti pe travay dan zot.
14. Konman ki legzanp Zezi pour montre lanmour dan son minister i devret motiv nou?
14 Zezi ti resanti sa ki bann dimoun ti pe santi. I ti konn zot douler. I ti konnen ki zot ti’n ganny abize, zot ti fatige e dekouraze parey bann mouton ki napa berze. Zan 2:25 i dir nou ki Zezi ti “konnen ki i annan dan leker dimoun.” Vi ki i ti Zouvriye Abil Zeova pandan kreasyon, Zezi ti annan en konprenezon profon lo natir imen. (Proverb 8:30, 31) Sa konprenezon in fer son lanmour vin pli profon. Fotespere ki lanmour i touzour reste sa lafors ki motiv nou dan nou aktivite predikasyon! Si nou santi ki nou bezwen amelyore dan sa domenn, annou priy pour lespri Zeova e apre annou azir an armoni avek nou lapriyer. Zeova pou reponn. I pou anvoy sa lafors irezistib pour ed nou pour vin pli parey Kris, ki ti pli kalifye ki tou pour pres sa bon nouvel.
15. Konman ki sa parol dan Izai 61:1-3 i aplik avek Zezi e anmenmtan ekspoz bann profeser Lalwa ek bann Farizyen?
15 Kote Zezi ti ganny son kalifikasyon? I ti dir: “Lespri Senyer i lo mwan.” (Lik 4:17-21) Wi, se Zeova li menm ki ti apwent Zezi par mwayen son lespri sen. Zezi pa ti bezwen okenn lezot sertifika. Eski bann sef relizye dan son letan ti’n ganny apwente par lespri sen? Non. E zot pa ti ni ekipe pour akonpli Izai 61:1-3, ki Zezi ti lir aotvwa e aplik lo li menm. Silvouple lir sa bann verse e vwar pour ou menm ki sa bann profeser lalwa ek Farizyen ti napa kalifikasyon neseser. Zot ti napa okenn bon nouvel pour anons bann pov. Konman ki zot ti pou proklanm delivrans pour bann prizonnyen, e fer bann aveg war kler? Dan en sans spirityel, zot menm zot ti aveg e esklav avek bann tradisyon zonm! Kontrerman avek sa bann zonm, eski nou kalifye pour ansenny bann dimoun?
16. Ki konfyans pep Zeova i santi ozordi an rapor avek zot kalifikasyon konman bann minis?
16 I vre ki nou pa’n etidye dan bann gran lekol Kretyente. Nou pa’n ganny nominen konman ansennyan par en seminer teolozik. Alor, eski nou mank kalifikasyon? Pa ditou! Nou nominasyon konman Temwen i sorti kot Zeova. (Izai 43:10-12) Si nou priy pour son lespri e azir an armoni avek nou lapriyer, nou annan pli gran kalifikasyon. Byensir, etan donnen ki nou enparfe nou pa kapab swiv parfetman legzanp ki nou Gran Ansennyan, Zezi Kri, in kite pour nou. Toudmenm, pa nou kontan ki Zeova i servi son lespri pour fer nou kalifye e ekipe konman bann ansennyan son Parol?
Lorganizasyon Zeova i fer nou kalifye
17-19. Konman ki sa senk renyon ki lorganizasyon Zeova i fourni tou le semenn i ede ekip nou konman bann minis?
17 Annou aprezan diskit trwazyenm fason ki Zeova i servi pour ekip nou konman bann ansennyan son Parol—son kongregasyon oubyen lorganizasyon lo later ki form nou pour vin bann minis. Ki mannyer i fer sa? Zis mazin sa progranm lenstriksyon ki nou benefisye avek! Dan en semenn, nou normalman annan senk renyon Kretyen. (Ebre 10:24, 25) Nou rasanble ansanm dan bann pti group Letid Liv pour etidye Labib oprofon an servan en liv letid ki’n ganny fourni par lorganizasyon Zeova. Nou aprann e ankouraz kanmarad kan nou ekoute e fer bann komanter. Nou osi ganny en lenstriksyon ek latansyon enpe pli personnel avek sa sirveyan letid liv. Dan Renyon Piblik ek Letid Latour Veyer, nou resevwar en labondans nouritir spirityel ki byen nourisan.
18 Nou Lekol Minister Teokratik in ganny prepare pour donn nou lenstriksyon konman pour ansennyen. Kan nou prepar nou bann ekspoze, nou aprann konman servi Parol Bondye pour ansenny diferan size. (1 Pyer 3:15) Eski ou’n deza ganny en ekspoze pour fer lo en size ki paret ase familye pour ou, me apre ou dekouver ki ou’n aprann en nouvo keksoz lo la? Sa i en leksperyans ki komen. Napa nanryen ki pli perfeksyonn nou konnesans lo en size ki ansenny li avek lezot. Menm kan nou napa en prezantasyon pour fer nou menm, nou kapab aprann pour vin bann pli bon ansennyan. Nou obzerv bann bon kalite dan sak zelev e nou mazinen konman nou kapab imit sa bann kalite.
19 Renyon Servis osi in ganny prepare pour ekip nou konman bann ansennyan Parol Bondye. Semenn apre semenn, nou apresye bann diskour, diskisyon ek demonstrasyon vivan ki ganny prepare pour nou minister. Ki prezantasyon nou pou servi? Ki mannyer nou kapab fer fas avek bann defi ki nou rankontre partikilyerman dan predikasyon? Ki posibilite pour prese ki nou annan ki petet nou bezwen eksplor li enpe plis? Kwa ki pou fer nou vin bann ansennyan pli efikas kan nou fer bann retourn vizit e kondwir letid Labib? (1 Korentyen 9:19-22) Bann kestyon parey i ganny trete e diskite an detay dan nou Renyon Servis. Bokou size ki ganny trete dan sa renyon i baze lo bann lartik dan Nou Minister Rwayonm, en lot zouti ki ganny fourni pour ekip nou pour sa travay enportan.
20. Konman ki nou kapab tir plis benefis dan bann renyon ek lasanble?
20 Ler nou prepar e asiste nou bann renyon, e apre aplik sa ki nou’n aprann dan nou travay lansennyman, nou resevwar en formasyon entansif pour ekip nou. Me sa pa tou. Nou annan osi bann pli gran renyon—bann lasanble—ki ganny prepare pour ekip nou konman bann ansennyan Parol Bondye. Konman nou esper avek enpasyans pour ekout atantivman e met sa bann konsey an pratik!—Lik 8:18.
21. Ki levidans ki montre ki nou formasyon in efikas, e loner i al pour ki sennla?
21 Eski sa formasyon ki Zeova in donnen in vreman efikas? Les levidans koz pour li menm. Tou-le-zan plizyer santenn milye dimoun pe ganny led pour aprann bann doktrin debaz dan Labib e pour viv an armoni avek sa ki Bondye i demande. Nou pe kontinyen ogmante, me loner pa vin pour nou. Nou bezwen get keksoz dan en fason realistik, parey Zezi ti fer. I ti dir: “Personn pa kapab vin kot mwan, si mon Papa ki’n anvoy mwan, pa atir li kot mwan.” Parey bann zapot dan letan ansyen, laplipar nou i bann dimoun ordiner ki napa gran ledikasyon. (Zan 6:44; Akt 4:13) Nou sikse i depan lo Zeova, ki atir bann dimoun ki annan leker senser ver laverite. Zapot Pol ti rezim sa byen: “Mwan mon’n plante, Apolos in aroze, me Bondye li in fer pouse.”—1 Korentyen 3:6.
22. Akoz nou pa devret tro dekouraze pour partisip plennman dan minister Kretyen?
22 Wi, Zeova i aktivman enplike dan nou travay konman bann ansennyan son Parol. Parfwa nou kapab annan sa santiman ki nou pa kalifye konman en ansennyan. Me mazinen ki se Zeova ki atir bann dimoun ver li ek son Garson. Se Zeova ki fer nou kalifye pour pres avek bann nouvo par mwayen son Parol, son lespri sen, ek son lorganizasyon lo later. Annou les Zeova form nou par aplik sa bann bon keksoz ki i pe fourni nou aktyelman pour fer nou byen ekipe konman bann ansennyan Parol Bondye!
Ki ou pou reponn?
• Konman ki Labib i ekip nou pour prese?
• Ki rol lespri sen i zwe pour fer nou kalifye konman bann minis?
• Dan ki fason lorganizasyon Zeova in ed ou pour kalifye konman en proklanmater sa bon nouvel?
• Akoz nou kapab annan konfyans kan nou partisip dan predikasyon?
[Study Questions]
[Portre lo paz 19]
Konman en ansennyan Parol Bondye, Zezi ti demontre lanmour pour dimoun