Siport “En Pikan Dan Mon Laser”

“Mon lagras i tou sa ki ou bezwen.”—2 KORENTYEN 12:9.

1, 2. (a) Akoz nou pa devret sirprann par lefe ki nou rankontre bann leprev ek problenm? (b) Akoz nou kapab annan konfyans kantmenm nou fer fas avek bann leprev?

“TOU sa ki oule viv en lavi fidel dan Kris Zezi pou ganny persekite.” (2 Timote 3:12) Akoz sa i leka? Akoz Satan i pretann ki dimoun i servi Bondye zis pour bann rezon egois, e i pare pour fer tou sa ki i kapab pour defann son pwen. En fwa Zezi ti averti son bann zapot fidel: ‘Satan in demann pouvwar lo zot, pour li kapab sakouy zot, parey en fermye i sakouy dible pour li separ lagrenn dible ek son lapay.’ (Lik 22:31) Zezi ti konn byen ki Bondye i permet Satan teste nou an servan bann problenm difisil. Byensir, sa pa vedir ki tou difikilte ki nou pas ladan i sorti direkteman kot Satan ek son bann demon. (Eklezyast 9:11) Me Satan i vreman anvi servi tou mwayen ki dan son pouvwar pour kas nou lentegrite.

² Labib i dir nou ki nou pa devret sirprann kan nou rankontre bann leprev. Nenport keksoz ki kapab ariv avek nou, i pa ni drol e pa ni en keksoz ki nou pa pe ekspekte. (1 Pyer 4:12) Anfet, “tou [nou] bann frer dan lemonn antye pe pas par menm soufrans.” (1 Pyer 5:9) Ozordi, Satan pe vreman met bokou presyon lo tou serviter Bondye. Dyab i pran plezir pour vwar nou ganny tourmante avek otan problenm ki parey pikan. Pour arive fer sa, i servi son sistenm dan en fason ki i ava ogmant oubyen agrav nenport ‘pikan ki nou annan dan nou laser.’ (2 Korentyen 12:7, NW ) Me sa pa vedir ki latak Satan i neseserman bezwen kas nou lentegrite. Zis parey Zeova i “donn mwayen” pour nou siport tantasyon, i pou fer parey kan nou fer fas avek bann problenm ki parey pikan dan nou laser.—1 Korentyen 10:13.

Konman pour siport en Pikan

3. Ki reaksyon Zeova kan Pol ti demann li pour retir sa pikan dan son laser?

³ Zapot Pol ti sipliy Bondye pour retir sa pikan ki ti dan son laser. “An trwa fwa mon’n sipliy Senyer pour anlev sa soufrans [oubyen pikan].” Konman ki Zeova ti reazir anver siplikasyon Pol? “Mon lagras i tou sa  ki ou bezwen; parski mon pisans i azir dan lafebles.” (2 Korentyen 12:8, 9) Annou analiz sa larepons e nou a vwar ki mannyer i kapab ed nou pour siport nenport problenm ki kapab ganny konpare avek en pikan ki pe fer nou soufer.

4. Dan ki fason Pol in benefisye avek lagras Bondye?

⁴ Remarke ki Bondye ti ankouraz Pol pour apresye son lagras ki i ti’n deza donn li atraver Kris. Anfet, Pol ti’n ganny beni dan plizyer fason. Avek lanmour, Zeova ti donn li sa loportinite pour vin disip Zezi menm si avan sa i ti aktivman opoz bann disip Zezi. (Akt 7:58; 8:3; 9:1-4) Apre sa, avek bonte Zeova ti donn Pol bokou privilez eksitan. Leson ki nou kapab tire i byen kler. Menm kan nou dan en letan pli kritik, nou annan bokou benediksyon ki nou kapab apresye. Nou bann leprev pa devret zanmen fer nou oubliy tou sa byenfe ki Zeova in fer pour nou.—Psonm 31:19.

5, 6. (a) Ki mannyer Zeova ti ansenny Pol ki Son pwisans i “azir dan lafebles”? (b) Konman ki legzanp Pol i prouve ki Satan i en manter?

⁵ Lagras Zeova ti ase dan en lot fason. Pwisans Bondye i plis ki sifi pour ed nou dan nou bann leprev. (Efezyen 3:20) Zeova ti ansenny Pol ki Son pwisans i “azir dan lafebles.” Konman? Avek lanmour, i ti donn Pol lafors ki i ti bezwen pour siport son leprev. An retour, perseverans Pol ek son konfyans total dan Zeova in demontre tou Kretyen ki pwisans Bondye ti pe dominen dan ka sa zonm feb e peser. Ki lefe sa ti fer lo Dyab, li ki ti’n dir ki zonm i servi Bondye zis letan lavi i oke e napa problenm? Lentegrite Pol ti parey en kalot dan figir sa manter!

⁶ Avan sa, Pol ti en alye Satan dan son konba kont Bondye, en persekiter ensolan bann Kretyen, en Farizyen zele, ki san dout ti rezwir bokou konfor dan lavi akoz i ti sorti dan en fanmiy ris. Aprezan Pol ti pe servi Zeova ek Kris konman “dernyen parmi tou bann zapot.” (1 Korentyen 15:9) Dan sa fason, i ti pe soumet li avek limilite anba lotorite konsey direkter dan premye syek. E i ti pe persevere fidelman kantmenm i ti annan son pikan dan son laser. Satan ti bezwen vreman dezapwente pour vwar ki bann leprev dan lavi toulezour pa ti refrwadir zel Pol. Pol pa ti zanmen oubliy lespwar ki i ti annan pour renny avek Kris dan Rwayonm seles. (2 Timote 2:12; 4:18) Napa okenn pikan, kantmenm i ti kapab pli fer mal, ki ti pou kapab diminyen son zel. Fotespere ki nou osi nou zel i kontinyen reste solid! Par kontinyen soutenir nou dan nou leprev, Zeova i onor nou avek privilez pour ede prouve ki Satan i en manter.—Proverb 27:11.

Bann Provizyon Zeova i vreman esansyel

7, 8. (a) Par ki mwayen Zeova i donn lafors son bann serviter denozour? (b) Pour siport en pikan dan nou laser, akoz i esansyel pour lir e etidye Labib sak zour?

⁷ Denozour, Zeova i donn lafors bann Kretyen fidel par mwayen son lespri sen, son Parol, ek nou lasosyasyon Kretyen. Parey zapot Pol, nou kapab larg nou fardo lo Zeova dan lapriyer. (Psonm 55:22) Menm si petet Bondye pa pou retir nou bann leprev, i kapab donn nou lasazes pour nou siport zot, menm bann ki vreman difisil pour siporte. Zeova i osi kapab donn nou kouraz—“sa pisans ki napa son parey”—pour ed nou andire.—2 Korentyen 4:7.

⁸ Ki mannyer nou ganny sa led? Nou bezwen etidye seryezman Parol Bondye, parski ladan nou pou trouv son konsolasyon sir. (Psonm 94:19) Dan Labib, nou lir bann parol tousan bann serviter Bondye ki ti sipliy Li pour ed zot. Larepons Zeova, ki souvan enkli bann parol rekonfortan, i fer nou reflesir bokou. Etidye Parol Bondye pou fortifye nou afen ki “sa pisans ki napa son parey i ava sorti kot Bondye e non pa kot nou.” Zis parey nou bezwen nouritir fizik toulezour pour nouri nou e pour ganny lafors,  pareyman nou bezwen nouri nou avek Parol Bondye regilyerman. Eski nou pe fer sa? Si nou pe fer li, alors nou pou vwar ki kan nou ganny “sa pisans ki napa son parey” i pou ed nou pour siport nenport pikan senbolik ki kapab pe fer nou soufer.

9. Konman ki bann ansyen i kapab soutenir bann ki pe rankontre problenm?

⁹ Bann ansyen ki annan lakrent pour Bondye i kapab “parey en landrwa kasyet kont divan e en labri kont tanpet lapli,” setadir en proteksyon kont ladetres ek problenm. Bann ansyen ki anvi koresponn avek sa deskripsyon enspire i demann Zeova senserman e avek limilite pour donn zot “lalang bann ki’n ganny ansennyen,” pour ki zot kapab reponn bann ki pe soufer avek bann bon parol. Parol bann ansyen i kapab parey en pti lapli ki rafresi e rekonfort nou lespri pandan bann moman difisil dan lavi. Par koz “dan en fason rekonfortan avek bann ki dekouraze,” bann ansyen i kapab vreman soutenir zot bann frer ek ser spirityel ki epwize e dekouraze akoz serten pikan dan zot laser.—Izai 32:2; 50:4; 1 Tesalonisyen 5:14, NW.

10, 11. Konman ki bann serviter Bondye i kapab ankouraz lezot ki pe pas atraver bann leprev dir?

¹⁰ Tou serviter Zeova i form par avek son fanmiy Kretyen ini. Wi, nou “form bann manm ini parey dan en sel lekor,” e nou “bezwen kontan kanmarad.” (Romen 12:5; 1 Zan 4:11) Ki mannyer nou fer sa? Dapre 1 Pyer 3:8, nou fer sa par annan “menm santiman; kontan kanmarad konman frer, annan konpasyon” pour tou bann ki asosye avek nou dan lafwa. Nou tou nou kapab annan en konsiderasyon spesyal pour bann ki pe fer fas avek en pikan ki vreman fer mal, ki swa zot zenn oubyen aze. Konman?

¹¹ Nou devret fer bokou zefor pour sansib anver zot soufrans. Si nou pa sansib oubyen nou endiferan, nou kapab pe fer zot soufer plis ankor san ki nou realize. Letan nou konsyan ki leprev zot pe pas ladan, sa i devret fer nou fer atansyon sa ki nou dir, konman nou dir li, e osi sa ki nou fer. Kan nou pozitif e ankourazan sa i kapab ede pour apez sa douler entans ki sa pikan pe koze pour zot. Alors, nou kapab demontre ki nou en led fortifyan pour zot.—Kolosyen 4:11.

Konman ki serten in arive siporte

12-14. (a) Ki en Kretyen ti fer pour fer fas avek kanser? (b) Konman ki bann frer ek ser spirityel sa madanm ti soutenir e ankouraz li?

¹² Anmezir ki nou apros lafen sa bann dernyen zour, “douler” i ogmante sak zour. (Matye 24:8) Alors, nou ekspekte ki tou  dimoun lo later i rankontre leprev, sirtou bann serviter fidel Zeova, ki pe sey fer son lavolonte. Annou vwar legzanp en Kretyen ki ti pe servi dan minister aplentan. I ti dekouver ki i ti ganny kanser e i ti fer en loperasyon pour retir son glann lakras ek son glann lenfatik. Kan li ek son mari ti aprann ki i annan sa maladi, deswit zot ti tourn ver Zeova dan en gran siplikasyon. I ti dir plitar ki en lape enkrwayab ti repoz lo zot. Kantmenm sa, i ti eksperyans bann dekourazman, sirtou letan i ti pe sibir bann lefe sa tretman ki i ti pe pran.

¹³ Pour fer fas avek son sitiasyon, sa ser ti sey aprann otan ki i kapab lo kanser. I ti rod konsey avek son bann dokter. I ti trouv bann resi ki montre konman ki serten endividi in fer fas avek sa maladi emosyonelman. I ti osi lir bann pasaz Labib apropriye ki montre ki Zeova i annan sa abilite pour soutenir son pep dan bann difikilte, ek lezot lenformasyon itil dan Latour Veyer, Réveillez-vous! ek lezot piblikasyon Kretyen.

¹⁴ En lartik lo konman pour fer fas avek dezespwar ti sit sa parol saz: “Sa ki izol son lekor pou rod son prop dezir egois.” (Proverb 18:1) Alor, sa lartik ti donn sa konsey: “Evite izol nou lekor.” * Sa ser i rakonte: “Bokou frer ek ser ti dir ki zot pe priy pour mwan; lezot ti telefonn mwan. De ansyen ti telefonn mwan souvan pour vwar konman mon ete. Mon ti resevwar fler ek en kantite kart. Serten ti menm prepar mon repa. Deplis, en kantite ti ofer pour anmenn mwan pran mon tretman.”

15-17. (a) Ki mannyer en Kretyen ti fer fas avek bann difikilte ki i ti gannyen apre aksidan? (b) Ki soutyen bann dan kongregasyon ti donnen?

¹⁵ En ser ki’n servi Zeova pour en bon pe letan e ki reste New Mexico, Letazini, ti enplike dan de aksidan loto. I ti ganny blese dan son likou ek zepol, ki ti agrav en problenm lanflanmasyon zwentir ki i ti’n siporte pour 25 an. I rakonte: “Ti vreman difisil pour mwan tenir mon latet drwat e anmenn okenn keksoz ki pez plis ki 2 kilo. Me lapriyer senser avek Zeova in soutenir mwan en kantite. Bann lartik Latour Veyer osi parey. En komanter ki ti ganny fer lo Mika 6:8 dan en Latour Veyer, ti fer remarke ki mars avek Bondye avek modesti i vedir konn nou limit. Sa ti ed mwan pour realize ki malgre mon sitiasyon, mon pa devret dekouraze, menm si mon pas pli pti gin letan dan predikasyon ki mon ti a swete. Servi li avek bann bon motivasyon ki konte.”

¹⁶ I osi dir: “Bann ansyen ti toultan felisit mwan pour zefor ki mon fer pour asiste bann renyon e pour al predikasyon. Bann zenn ti vin dir mwan bonzour e may mwan. Bann pionye ti pran bokou pasyans avek mwan e souvannfwa zot ti rearanz zot plan kan mon ti tro malad pour sorti dan predikasyon. Kan ti annan movetan, zot ti anmenn mwan fer retourn vizit avek zot oubyen envit mwan pour asiste zot letid Labib. E vi ki mon pa ti kapab anmenn en sak liv, lezot proklanmater ti met mon liv dan zot sak kan mon ti sorti dan predikasyon.”

¹⁷ Remarke konman ki bann ansyen dan kongregasyon ek bann konpanyon Kretyen ti ed sa de ser pour siport zot problenm lasante ki ti parey en pikan. Zot ti ofer bann bon led pratik avek bi pour konble bann bezwen spirityel, fizik, e emosyonnel. Eski sa pa ankouraz ou pour ed ou bann frer ek ser ki pe rankontre problenm? Zenn, zot osi zot kapab vin en soutyen pour bann dan zot kongregasyon ki pe lite avek en pikan dan zot laser.—Proverb 20:29.

18. Ki lankourazman nou kapab vwar dan leksperyans bann frer ek ser ki ganny pibliye dan magazin Latour Veyer ek Réveillez-vous!?

¹⁸ Magazin Latour Veyer ek Réveillez-vous! in pibliy plizyer leksperyans bann Temwen ki’n siport serten problenm dan lavi e zot  ankor pe siporte. Letan ou lir sa bann lartik regilyerman, ou pou vwar ki bokou ou bann frer ek ser spirityel partou dan lemonn in siport bann difikilte ekonomik, lanmor en dimoun ki zot ti pros avek dan dezas, ek bann kondisyon danzere dan letan lager. Lezot i viv avek bann maladi ki andikap zot. Bokou pa kapab fer bann keksoz senp dan lavi ki bann dimoun an bonn sante i pran alalezer. Zot maladi i severman met zot a leprev, sirtou kan zot pa kapab partisip dan bann aktivite Kretyen parey zot ti a kontan. Konman zot apresye led ek soutyen ki zot bann frer ek ser, zenn konman vye, i donn zot!

Perseverans i anmenn Boner

19. Akoz Pol ti kapab rezwir malgre son bann leprev ek febles ki ti parey en pikan?

¹⁹ Pol ti kontan pour vwar konman Bondye ti fortifye li. I ti dir: “Alor mon prefere vant mon lekor lo size mon febles, pour ki pisans Kris i repoz lo mwan. Pour sa rezon mon satisfe avek febles, bann lensilt, bann detres, bann persekisyon, avek bann lenkyetid; parski ler mon feb, lanmenm ler ki mon for.” (2 Korentyen 12:9, 10) Akoz son prop leksperyans, Pol ti kapab dir avek konfyans: “Mon pa pe dir sa akoz mon santi mwan ganny neglize. Annefe mwan, mon aprann kontant mwan avek sa ki mon annan. Mon konn viv dan lamizer, e mon konn viv osi dan labondans. Mon aprann kontant mwan partou dan tou sirkonstans, kan mon annan an-tro ou kan mon lafen, dan labondans konman dan lamizer. Mon kapab fer fas avek tou par Kris ki donn mwan lafors.”—Filipyen 4:11-13.

20, 21. (a) Akoz nou kapab trouv lazwa kan nou medit lo “sa ki nou pa war”? (b) Ki keksoz “ki nou pa war” ki ou pe esper avek enpasyans pour vwar dan Paradi?

²⁰ Alor, kan nou siport nenport ki pikan senbolik ki annan dan nou laser, nou kapab trouv bokou lazwa pour montre tou dimoun ki pwisans Zeova pe azir dan nou febles. Pol ti ekrir: ‘Pour sa rezon nou pa perdi kouraz. . . . Lo kote spirityel nou pe ganny renouvle de zour an zour. Annefe, nou bann pti soufrans aktyel pe prepar pour nou en mas laglwar ki napa okenn konparezon, akoz nou pe konsern nou avek . . . sa ki nou pa war. Wi, keksoz . . . ki nou pa war i pour touzour.’—2 Korentyen 4:16-18.

²¹ Laplipar pep Zeova ozordi i swete viv dan son Paradi lo later e rezwir bann benediksyon ki i’n promet. Sa bann benediksyon i kapab ganny konsidere konman bann keksoz “ki nou pa war” ozordi. Toudmenm, letan pe apros byen vit kot nou pou vwar sa bann benediksyon avek nou prop lizye e rezwir zot pour leternite. Enn parmi sa bann benediksyon, se soulazman pour pa zanmen bezwen viv ankor avek okenn problenm ki parey en pikan! Garson Bondye pou “detri bann travay dyab” e “detri sa enn ki annan pouvwar donn lanmor.”—1 Zan 3:8; Ebre 2:14.

22. Ki konfyans ek determinasyon nou devret annan?

²² Alor, nenport ki pikan dan nou laser ki pe fer nou soufer ozordi, annou kontinyen siport li. Parey Pol, nou pou ganny lafors pour fer sa avek Zeova ki touzour pare pour donn nou lafors. Kan nou pou dan Paradi lo later, nou pou beni Zeova nou Bondye sak zour pour tou son bann travay merveye ki i’n fer pour nou.—Psonm 103:2.

[Not anba lo paz]

Ki ou pou reponn?

• Akoz e konman Dyab i esey kas lentegrite bann vre Kretyen?

• Konman ki pwisans Zeova i “azir dan lafebles”?

• Konman ki bann ansyen ek lezot i ankouraz bann ki pe soufer avek zot problenm?

[Study Questions]

[Portre lo paz 13]

Trwa fwa Pol ti priye pour Bondye retir sa pikan dan son laser