Akfer Batize?
Akfer Batize?
“Ale e fer tou pep vin mon bann disip. Batiz zot o non di-Per, di-Fis e di-Sent-Espri.”—MATYE 28:19.
1, 2. (a) Dan ki sirkonstans serten batenm in ganny fer? (b) Ki kestyon nou kapab demande konsernan batenm?
AN 775-77 N.L., Lerwa Charlemagne ti fors en kantite Sakson ki i ti’n konkerir pour batize. “I ti fors zot pour konverti e vin bann Kretyen par non selman,” istoryen John Lord ti ekrir. Pareyman, apre ki dirizan Ris Vladimir 1 ti marye avek en prenses Ortodoks Grek an 987 N.L., i ti deside ki son bann size i devret vin “Kretyen.” I ti donn lord pour batiz son pep antye e bann ki pa ti anvi ti ganny menase avek lanmor.
2 Eski sa bann batenm ti apropriye? Eski zot ti vreman fer sans? Eski nenport dimoun i kapab batize?
Batenm—Konman?
3, 4. Akoz aroz oubyen vid en pti gin delo lo latet pa apropriye pour batenm Kretyen?
3 Kan Charlemagne ek Vladimir 1 ti fors bann dimoun pour batize, sa de dirizan pa ti pe azir an armoni avek Parol Bondye. Anfet, si sa dimoun pa’n ganny ansennyen laverite dan Labib, batenm napa okenn benefis ki sa i ganny fer par aroz oubyen vid en pti gin delo lo latet sa dimoun oubyen menm par plonz li konpletman anba delo.
4 Annou vwar ki ti arive kan Zezi ti al kot Zan Batis lannen 29 N.L. Zan ti pe batiz bann dimoun dan Larivyer Zourden. Zot ti’n vin kot li volonterman pour ganny batize. Eski i ti zis fer zot debout dan Larivyer Zourden e aroz oubyen vid en pti gin delo larivyer lo zot latet? Ki ti arive kan Zan ti batiz Zezi? Matye i raporte ki apre ki i ti’n ganny batize, Zezi “ti sorti dan delo.” (Matye 3:16) I ti sorti dan delo vi ki i ti’n ganny plonze dan Larivyer Zourden. Pareyman, sa zofisye Etyopyen devoue ti ganny batize dan “en landrwa kot ti annan delo.” Sa bann landrwa kot i annan delo ti neseser akoz batenm Zezi ek son bann disip ti enplik ganny plonze konpletman anba delo.—Akt 8:36.
5. Konman ki bann premye Kretyen ti batiz bann dimoun?
5 Mo Grek ki’n ganny tradwir “batize,” “batenm,” ensidswit, i refer avek sibmerze, tranpe, oubyen plonz anba delo. Smith’s Bible Dictionary i dir: “Batenm i devret e i literalman vedir ganny plonze.” Alors, serten tradiksyon Labib i refer avek li konman “Zan ki plonz dimoun.” (Matye 3:1; vwar osi Rotherham ek Diaglott interlinear.) Dan son liv History of the Christian Religion and Church, During the Three First Centuries, Augustus Neander i dir: “Okonmansman batenm ti ganny fer par plonz sa dimoun konpletman anba delo.” Larousse du XXe Siècle (Pari, 1928) en travay Franse byen popiler, i fer sa komanter: “Bann premye Kretyen ti pran batenm par ganny plonze partou kot zot ti kapab vwar delo.” E New Catholic Encyclopedia i dir: “I evidan ki Batenm dan Legliz lantikite ti ganny fer par plonz sa dimoun konpletman anba delo.” (1967, Volim II, paz 56) Alors, ozordi batize konman en Temwen Zeova i en pa ki en dimoun i pran volonterman ki enplik ganny plonze konpletman anba delo.
En nouvo Rezon pour batize
6, 7. (a) Pour ki rezon Zan ti batiz lezot? (b) Kwa ki ti nouvo avek batenm bann disip Zezi?
6 Batenm ki Zan ti fer ti annan en diferan rezon avek sa batenm ki bann disip Zezi ti fer. (Zan 4:1, 2) Zan ti batiz bann dimoun konman en senbol piblik zot repantans pour pese ki zot ti fer kont Lalwa. * (Lik 3:3) Me batenm bann disip Zezi ti enplik en nouvo keksoz. Zour Lapannkot lannen 33 N.L., zapot Pyer ti enplor bann dimoun ki ti pe ekout li: “Sanz zot lavi e ki sakenn ant zot i ganny batize o non Zezi-Kri pour ki zot ganny pardon zot bann pese.” (Akt 2:37-41) Kantmenm i ti pe adres bann Zwif ek bann ki ti’n konverti dan larelizyon Zwif, Pyer pa ti pe koz lo batenm ki senboliz repantans pour pese kont Lalwa, e i pa ni ti oule dir ki batenm onon Zezi i reprezant efas pese.—Akt 2:10.
7 Sa zour, Pyer ti servi premye “lakle Rwayonm.” Pour ki rezon? Pour revel avek son bann oditer konnesans konsernan loportinite pour antre dan Rwayonm lesyel. (Matye 16:19) Vi ki bann Zwif ti’n rezet Zezi konman Mesi, repantir e demontre lafwa dan li ti en nouvo fakter esansyel pour rod e resevwar pardon Bondye. Zot ti pou kapab montre levidans en tel lafwa an piblik par ganny plonze konpletman anba delo onon Zezi Kri. Dan sa fason zot ti pou senboliz zot dedikasyon personnel avek Bondye atraver Kris. Tou sa ki anvi laprouvasyon Bondye dan nou letan i bezwen demontre en lafwa parey, dedye zot lavi avek Zeova, e aksepte batenm Kretyen pour senboliz zot dedikasyon san rezerv avek Bondye Tre O.
Konnesans egzakt i esansyel
8. Akoz pa tou dimoun ki kalifye pour batenm Kretyen?
8 Pa tou dimoun ki kalifye pour batenm Kretyen. Zezi ti donn lord son bann disip: “Ale e fer tou pep vin mon bann disip. Batiz zot o non di-Per, di-Fis e di-Sent-Espri. Ansenny zot pour obei tou sa ki mon’n konmande.” (Matye 28:19, 20) Avan ki bann dimoun i ganny batize, zot bezwen ganny ‘ansennyen pour obei tou sa ki Zezi ti konmann son bann disip.’ Alors, i pa fer sans pour fors bann ki napa lafwa baze lo konnesans egzakt pour batize e i kontrer avek sa lord ki Zezi ti donn son bann vre disip.—Ebre 11:6.
9. Ki savedir ganny batize “o non di-Per”?
9 Ki savedir ganny batize “o non di-Per”? Savedir sa dimoun ki pe batize i rekonnet pozisyon ek lotorite nou Papa seles. Zeova i alor ganny rekonnet konman nou Kreater, “Tre O lo tou later,” ek Souvren Iniversel.—Psonm 83:18; Izai 40:28; Akt 4:24.
10. Ki savedir ganny batize ‘o non di-Fis’?
10 Pour ganny batize ‘o non di-Fis’ i vedir rekonnet pozisyon ek lotorite Zezi konman sel Garson Bondye. (1 Zan 4:9) Bann ki kalifye pour batenm i aksepte Zezi konman sa enn atraver ki Bondye in fourni en “pri pour liberasyon bokou dimoun.” (Matye 20:28; 1 Timote 2:5, 6) Bann kandida batenm i bezwen osi rekonnet ki ‘Bondye in elev son Garson pli o ki tou.’—Filipyen 2:8-11; Revelasyon 19:16.
11. Ki savedir ganny batize ‘o non di-Sent-Espri’?
11 Ki savedir ganny batize ‘o non di-Sent-Espri’? Sa i endike ki bann kandida batenm i rekonnet ki lespri sen i lafors aktif Zeova, ki ganny servi dan diferan fason an armoni avek son plan. (Zenez 1:2; 2 Samyel 23:1, 2; 2 Pyer 1:21) Bann ki kalifye pour batenm i rekonnet ki lespri sen i ed zot pour konpran “menm plan Bondye pli sekre,” kontinyen sa travay predikasyon, e demontre fri lespri ki enplik “lanmour, lazwa, lape, pasyans, labonte, fidelite, ladouser, kontrol lo son prop lekor.”—1 Korentyen 2:10; Galat 5:22, 23; Yoel 2:28, 29.
Lenportans repantir e sanz nou Lavi
12. Konman ki batenm Kretyen i ganny asosye avek repantans?
12 Eksepte dan ka Zezi, ki pa ti fer okenn pese, batenm i en senbol aprouve par Bondye, ki annan pour fer avek repantans. Kan nou repantir, nou santi en gran regre oubyen nou repantir pour en keksoz ki nou’n fer oubyen ki nou pa’n fer. Bann Zwif dan premye syek ki ti anvi fer plezir Bondye ti bezwen repantir pour zot pese kont Kris. (Akt 3:11-19) Serten krwayan non-Zwif an Korent ti repantir pour zot fornikasyon, idolatri, vol, ek lezot pese grav. Parski zot ti repantir, zot ti “ganny lave” dan disan Zezi; zot ti “ganny pirifye,” oubyen “sangtifye” (NW ) setadir met apar, pour servis Bondye; e zot ti “ganny zistifye” onon Kris e avek lespri Bondye. (1 Korentyen 6:9-11) Repantans i en pa esansyel ver en bon konsyans ek soulazman ki Bondye i donnen avek kilpabilite pour pese.—1 Pyer 3:21.
13. An rapor avek batenm, ki transformasyon nou bezwen fer?
13 Avan ki en dimoun i batize konman Temwen Zeova, i bezwen sanz oubyen transform son lavi. I fer sa volonterman apre ki i’n fer son prop desizyon pour swiv Zezi Kri. Sa dimoun i rezet son move fason viv e determinen pour fer sa ki byen dan lizye Bondye. Dan Labib, verb Ebre ek Grek ki relye avek sa sanzman i donn lide retournen oubyen vire. Sa aksyon i enplik kit en move fason viv pour retourn kot Bondye. (1 Lerwa 8:33, 34) Pour sanz nou lavi, nou bezwen ‘pratik bann keksoz ki montre vreman ki nou’n repanti.’ (Akt 26:20) Nou bezwen abandonn fo ladorasyon, azir an akor avek komannman Bondye, e donn Zeova en latasman zis pour li tousel. (Deterononm 30:2, 8-10; 1 Samyel 7:3) Sa transformasyon i fer nou sanz nou fason panse, nou lobzektif, ek nou personnalite. (Ezekyel 18:31) Nou “revin ver Bondye” kan nou ranplas bann move tre avek en nouvo personnalite.—Akt 3:19; Efezyen 4:20-24; Kolosyen 3:5-14.
I esansyel pour dedye nou antyerman
14. Ki dedikasyon bann disip Zezi i sinifye?
14 Avan ki bann disip Zezi i batize zot bezwen osi dedye zot lavi antyerman avek Bondye. Dedikasyon i vedir met apar pour en rezon sakre. Sa letap i sitan enportan ki nou devret eksprim avek Zeova dan lapriyer nou desizyon pour donn li en latasman pour li tousel pour touzour. (Deterononm 5:9) Byensir, nou pa’n dedye nou avek en travay, oubyen avek okenn imen, me avek Bondye li menm.
15. Akoz bann kandida batenm i ganny plonze anba delo?
15 Kan nou dedye nou lavi avek Bondye atraver Kris, nou eksprim en determinasyon pour servi nou lavi pour fer lavolonte Bondye parey i’n ganny devwale dan Labib. Pour senboliz sa dedikasyon, bann kandida batenm i ganny plonze anba delo, parey Zezi ti ganny batize dan Larivyer Zourden pour montre senbolikman ki i pe prezant son lekor avek Bondye. (Matye 3:13) I byen pour note ki Zezi ti pe priye sa zour vreman enportan.—Lik 3:21, 22.
16. Ki mannyer nou kapab eksprim nou lazwa dan en fason apropriye kan nou vwar bann dimoun pe batize?
16 Batenm Zezi ti en lokazyon serye me zwaye. I menm parey pour batenm Kretyen ozordi. Kan nou vwar bann dimoun pe senboliz zot dedikasyon avek Bondye, nou kapab eksprim nou lazwa par bat lanmen dan en fason respektab e senserman felisit sa bann dimoun. Me pour rezon sakre sa lekspresyon lafwa nou devret evite kriye, soufle, oubyen fer lezot keksoz parey. Nou devret eksprim nou lazwa avek dinite.
17, 18. Kwa ki determinen si serten endividi i kalifye pour batize?
17 Kontrerman avek bann ki vid en pti gin delo lo latet bann pti baba oubyen fors en kantite dimoun pour batize san ki zot ganny en konnesans lo Labib, Temwen Zeova pa zanmen fors personn pour batize. Anfet, zot pa batiz bann ki pa kalifye spirityelman pour fer li. Avan ki okenn dimoun i vin en proklanmater non batize, bann ansyen i fer sir ki i konpran bann lansennyman debaz dan Labib, ki i pe viv an armoni avek zot, e ki i reponn wi en kestyon parey, “Eski ou vreman anvi vin en Temwen Zeova?”
18 Apar ki ennde eksepsyon, kan bann dimoun pe partisip regilyerman dan predikasyon e zot eksprim en dezir pour batize, bann ansyen i fer ennde diskisyon avek zot pour fer sir ki zot en bann krwayan ki’n fer en dedikasyon avek Zeova e ki zot ranpli bann kondisyon divin pour batenm. (Akt 4:4; 18:8) Zot larepons personnel pour plis ki 100 kestyon baze lo lansennyman Labib i ed bann ansyen pour determinen si sa bann dimoun i ranpli bann kondisyon Biblik pour batenm. Serten pa kalifye e alor zot pa ganny aksepte pour batize konman en Kretyen.
Eski okenn Keksoz pe anpes ou?
19. An rapor avek Zan 6:44, lekel ki pou renny avek Zezi dan Rwayonm seles?
19 Petet bokou dimoun ki’n ganny forse pour batize in ganny dir ki zot pou al dan lesyel kan zot mor. Me kan i ti pe refer avek son bann disip, Zezi ti dir: “Personn pa kapab vin kot mwan, si mon Papa ki’n anvoy mwan, pa atir li kot mwan.” (Zan 6:44) Zeova in atir 144,000 endividi ver Kris pour renny avek li dan Rwayonm seles. Bann batenm forse pa’n zanmen sangtifye personn pour sa plas manifik dan laranzman Bondye.—Romen 8:14-17; 2 Tesalonisyen 2:13; Revelasyon 14:1.
20. Kwa ki kapab ed serten ki pa ankor batize?
20 Depi dan milye bann lannen 1930 an partikilye, en kantite dimoun ki swete sirviv ‘gran ladetres’ e viv pour touzour lo later in zwenn ansanm avek ‘lezot mouton’ Zezi. (Revelasyon 7:9, 14; Zan 10:16) Zot kalifye pour batenm akoz zot in konform zot lavi avek Parol Bondye e zot kontan li ‘avek tou zot leker, tou zot lam, tou zot lafors ek tou zot lespri.’ (Lik 10:25-28) Kantmenm serten dimoun i realize ki Temwen Zeova i ‘ador Bondye an-espri e an verite,’ zot pa ankor swiv legzanp Zezi e montre piblikman zot lanmour senser ek latasman ki zot annan pour Zeova tousel par batize. (Zan 4:23, 24; Deterononm 4:24; Mark 1:9-11) Lapriyer ardan e presi konsernan sa pa enportan i kapab donn zot motivasyon ek kouraz pour konform zot antyerman avek Parol Bondye, pour fer en dedikasyon san rezerv avek Zeova e pour batize.
21, 22. Akoz serten i ezite pour dedye zot lavi e batize?
21 Serten dimoun i ezite pour dedye zot lavi e batize akoz zot sitan absorbe dan bann keksoz lemonn oubyen pe resers larises ki fer zot annan en pti gin letan pour keksoz spirityel. (Matye 13:22; 1 Zan 2:15-17) Konman zot ti pou ere si zot ti sanz zot pwenn-vi ek lobzektif ! Apros avek Zeova ti pou anrisir zot spirityelman, ti pou ed zot pour apez zot lenkyetid, e ti pou anmenn zot sa lape ek satisfaksyon ki en dimoun i gannyen kan i fer lavolonte Bondye.—Psonm 16:11; 40:8; Proverb 10:22; Filipyen 4:6, 7.
22 Lezot i dir ki zot kontan Zeova me zot pa fer en dedikasyon e batize akoz zot krwar ki dan sa fason zot pa bezwen rann kont devan Bondye. Me nou tou nou bezwen rann kont Bondye. Dek ki nou antann parol Zeova responsabilite i vin lo nou. (Ezekyel 33:7-9; Romen 14:12) Konman en ‘pep swazir,’ bann ansyen Izraelit ti ne dan en nasyon ki ti’n ganny dedye avek Zeova, e alors zot ti annan en lobligasyon pour servi li fidelman an akor avek son bann lalwa. (Deterononm 7:6, 11) Denozour, napa personn ki ne dan en tel nasyon, me si nou’n ganny lenstriksyon Biblik ki egzakt, nou bezwen reazir avek lafwa.
23, 24. Ki lafreyer ki pa devret fer dimoun ezite pran batenm?
23 Serten i kapab ezite pour batize akoz zot pa asire si zot annan ase konnesans. Pourtan, nou tou nou annan bokou pour aprann akoz ‘bann imen pa pou zanmen dekouver travay ki sa vre Bondye in fer depi konmansman ziska lafen.’ (Eklezyast 3:11) Annou pran legzanp sa zofisye Etyopyen. Vi ki i ti’n konverti dan larelizyon Zwif, i ti annan serten konnesans lo Lekritir, me i pa ti kapab reponn tou kestyon konsernan plan Bondye. Me apre ki i ti’n aprann konsernan laranzman Zeova pour delivrans atraver ranson sakrifis Zezi, sa zofisye ti deswit batize dan delo.—Akt 8:26-38.
24 Serten dimoun i ezite pour dedye zot lavi avek Bondye akoz zot per pangar zot pa reisi reste fidel. Monique ki annan 17 an i dir: “Mon ti pe ezite pour batize akoz mon ti per pangar mon pa ava kapab viv an akor avek mon dedikasyon.” Me si nou met tou nou konfyans dan Zeova, ‘i pou fer drwat tou nou santye.’ I pou ed nou pour “swiv laverite” parey son bann serviter fidel ki’n dedye zot lavi.—Proverb 3:5, 6; 3 Zan 4.
25. Ki kestyon ki nou devret egzaminen aprezan?
25 Akoz konfyans total dan Zeova e lanmour senser pour li, tou le-z-an plizyer mil dimoun i santi zot pouse pour dedye zot lavi e batize. E sirman tou serviter Bondye ki’n dedye zot lavi avek li i anvi reste fidel avek li. Toudmenm, nou pe viv dan bann letan kritik, e nou fer fas avek diferan leprev ki teste nou lafwa. (2 Timote 3:1-5) Ki nou kapab fer pour viv an akor avek nou dedikasyon ki nou’n fer avek Zeova? Nou pou egzamin sa dan nou prosen lartik.
[Not anba lo paz]
^ par. 6 Vi ki Zezi pa ti fer okenn pese, son batenm pa ti senboliz repantans. Son batenm ti montre dan en sans senbolik ki i pe prezant son lekor avek Bondye pour fer lavolonte son Papa.—Ebre 7:26; 10:5-10.
Eski ou rapel?
• Konman ki batenm Kretyen i ganny fer?
• Ki konnesans en dimoun i bezwen pour li batize?
• Ki bann letap ki anmenn ver batenm bann vre Kretyen?
• Akoz serten i ezite batize, me konman ki zot kapab ganny led?
[Study Questions]
[Portre lo paz 24]
Eski ou konnen ki savedir ganny batize ‘o non di-Fer, e di-Fis, e di-Sent-Espri’?