Eski Kris I Vreman En Lider Pour Ou?

“Pa fer apel zot ‘sef’ akoz zot annan en sel ‘Sef’, limenm Mesi.”—MATYE 23:10.

1. Lekel sa sel Sef oubyen Lider tou bann vre Kretyen?

TI MARDI le 11 Nizan. Trwa zour plitar, Zezi Kri ti pou ganny met amor. Sa ti son dernyen vizit dan tanp. Sa zour, Zezi ti ansenny sa lafoul ki ti’n rasanble laba e osi son bann disip en lansennyman enportan. I ti dir: “Zot, zot pa devre apel personn ‘Met’ akoz zot tou, zot frer e zot annan zis en sel Met. E pa apel personn isi lo later ‘Papa’, akoz zot annan zis en sel Papa ki dan lesyel. Pa fer apel zot ‘sef’ akoz zot annan en sel ‘Sef’, limenm Mesi.” (Mat. 23:8-10) I kler ki Zezi Kri i Sef oubyen Lider bann vre Kretyen.

2, 3. Kan nou ekout Zeova e aksepte sa Lider ki i’n apwente, ki lefe sa i annan lo nou lavi?

² Kan nou aksepte Zezi konman nou Lider, sa i vreman anmenn bann lefe pozitif dan nou lavi! Zeova ti anons larive sa Lider kan atraver Izai i ti deklare: “Ela! zot tou ki swaf ! Vin kot delo. E bann ki napa larzan! Vini, aste e manze. Wi, vini, aste diven ek dile san larzan e san pri. . . . Ekout mwan atantivman, e manz sa ki bon, e ki zot nanm i trouv bokou plezir dan lagres. . . . Regarde! Konman en temwen pour bann kominote nasyonal mon’n donn li, konman en lider ek komandan pour bann kominote nasyonal.”—Izai 55:1-4.

³ Izai ti servi bann likid ki dimoun i familye avek—delo, dile, ek diven—konman bann keksoz pour montre ki lefe i annan lo nou lavi personnel kan nou ekout Zeova e swiv sa Lider ek Komandan ki i’n donn nou. Rezilta se ki i rafresi nou. I parey ler nou bwar en ver delo fre kan i fer so. Nou laswaf pour laverite e pour ladrwatir i ganny satisfe. Parey dile i fortifye bann pti baba e ed zot pour devlope, ‘dile parol Bondye’ i fortifye nou e promot devlopman spirityel dan nou relasyon avek Bondye. (1 Pyer 2:1-3) E lekel ki kapab demanti ki diven i kontribye pour anmenn lazwa dan bann lafet? Pareyman, ador sa vre Bondye e swiv lepa sa Lider ki i’n apwente i fer lavi “annan ryen ki lazwa.” (Deterononm 16:15) I vreman enportan, alor, ki nou tou—zenn konman vye, zonm konman fanm—nou montre ki Zezi i reel konman en lider pour nou. Me, ki mannyer nou kapab demontre dan nou lavi toulezour ki Mesi i nou Lider?

Zenn—Kontinyen “devlope an Sazes”

4. (a) Ki ti arive kan Zezi alaz 12 an ti vizit Zerizalenm alokazyon Lapak? (b) Ki kantite Zezi ti konnen kan i ti annan zis 12 an?

⁴ Annou vwar legzanp ki nou Lider in kite pour bann zenn. Menm si nou pa konn bokou lo lanfans Zezi, i annan en lensidan ki dir nou bokou keksoz. Kan Zezi ti annan 12 an, parey labitid tou le zan son paran ti anmenn li Zerizalenm pour selebre Lapak. Sa voyaz i ti’n angaze dan en diskisyon lo Lekritir, e san pran kont, son fanmiy ti retournen san li. Trwa zour plitar son paran Zozef ek Mari, ki ti dan lenkyetid, ti vwar li dan tanp, “pe asize parmi bann profeser, i ti pe ekout zot e kestyonn  zot.” Deplis, “tou dimoun ki ti tann li, ti etonnen par son lentelizans ek son repons.” Zis mazinen, alaz 12 an, Zezi pa ti zis kapab demann bann kestyon spirityel ki fer reflesir me i ti osi kapab donn bann larepons entelizan! San dout, formasyon ki son paran ti’n donn li ti ed li fer sa.—Lik 2:41-50.

5. Konman ki bann zenn i kapab egzamin zot latitid anver letid Labib an fanmiy?

⁵ Petet ou en zenn. Si ou paran i en serviter Bondye ki devoue, petet i annan en letid an fanmiy ki deroule kot ou lakour. Ki latitid ou annan anver letid fanmiy? Akoz ou pa reflesir lo bann kestyon parey: ‘Eski mon pe soutenir avek tou mon leker sa laranzman pour letid Labib dan mon fanmiy? Eski mon donn mon korporasyon pour sa letid, e pa fer nanryen pour deranz sa progranm?’ (Filipyen 3:16) ‘Eski mon partisip aktivman dan sa letid? Eski mon demann kestyon kan i apropriye lo sa ki pe ganny etidye e fer komanter lo son laplikasyon? Anmezir ki mon progrese spirityelman, eski mon kiltiv en lanvi pour “nouritir solid [ki] pour bann adilt”?’—Ebre 5:13, 14.

6, 7. Ki kantite enportan en progranm lektir Labib i ete pour bann zenn?

⁶ I osi enportan pour annan en progranm lektir Labib sak zour. En psalmis ti sante: “Ere sa zonm ki pa’n mars dan konsey bann mesan, . . . me son plezir i dan lalwa Zeova e dan son lalwa i lir lavwa ba lizour ek aswar.” (Psonm 1:1, 2) Zozye, sikseser Moiz, ti ‘lir liv lalwa lavwa ba zour ek nwit.’ Sa ti fer li kapab azir avek sazes e reisi akonpli sa latas ki Bondye ti donn li. (Zozye 1:8) Nou lider, Zezi Kri, ti dir: “Dan Lekritir i’n dir: ‘Zonm pa viv zis lo dipen tousel me lo tou parol ki sorti dan labous Bondye.’ ” (Matye 4:4) Si nou bezwen nouritir fizik toulezour, konbyen plis nou bezwen nouritir spirityel regilyerman!

⁷ Vi ki i ti konsyan son bezwen spirityel, Nicole ki ti annan 13 an ti konmans lir Labib sak zour. * Aprezan, alaz 16 an, i’n deza fini lir Labib an antye e i’n ariv lanmwatye lo son dezyenm fwa. Son metod i senp. “Mon fer li en lobzektif pour lir omwen en sapit toulezour,” i dir. Konman ki son lektir Labib sak zour in ed li? I reponn: “I annan bokou move lenfliyans denozour. Toulezour mon fer fas avek presyon kot lekol ek lezot landrwa ki met mon lafwa odefi. Kan mon lir Labib sak zour, sa i ed mwan  pour rapel bann lenstriksyon ek prensip dan Labib ki ankouraz mwan pour reziste sa bann presyon. An rezilta, mon santi mwan pli pre avek Zeova ek Zezi.”

8. Ki Zezi ti abitye fer an rapor avek sinagog, e konman bann zenn i kapab imit li?

⁸ Zezi ti abitye ekout e partisip dan lektir Lekritir dan sinagog. (Lik 4:16; Akt 15:21) Pa i byen pour bann zenn swiv sa legzanp par regilyerman asiste bann renyon Kretyen, kot Labib i ganny lir e etidye! Richard ki annan 14 an i eksprim lapresyasyon pour sa bann renyon an dizan: “Bann renyon i annan en gran valer pour mwan. La dan renyon, mon kontinyelman ganny rapele kwa ki byen e kwa ki mal, kwa ki byen moralman e kwa ki imoral, ki Kris ti pou fer e ki i pa ti pou fer. Mon pa bezwen aprann sa par move leksperyans.” Wi, “rapel Zeova i diny konfyans, i fer sa ki napa leksperyans saz.” (Psonm 19:7) Nicole osi i fer li en lobzektif pour asiste tou le senk renyon sak semenn. I osi pas de a trwa er-d-tan pour prepar zot.—Efezyen 5:15, 16.

9. Konman ki bann zenn i kapab kontinyen “devlope an sazes”?

⁹ Lazenes i en bon letan pour obtenir ‘konnesans lo sa sel vre Bondye, e lo sa enn ki i’n anvoye, Zezi Kri.’ (Zan 17:3) Petet ou konn serten zenn ki pas bokou letan pour lir bann liv komik, get televizyon, zwe video, oubyen pas letan lo Internet. Akoz ou bezwen imit zot kan ou kapab imit legzanp parfe nou Lider? Letan i ti ankor en pti garson, i ti pran plezir pour aprann lo Zeova. Avek ki rezilta? Parski i ti annan lanmour pour keksoz spirityel, Zezi “ti devlope an sazes.” (Lik 2:52) Ou osi ou kapab fer parey.

“Aksepte volonterman pour obei Kanmarad”

10. Kwa ki pou ed lavi lafanmiy pour vin en sours lape ek boner?

¹⁰ En lakour i kapab vin en landrwa an sekirite kot i annan lape ek lakontantman oubyen i kapab vin en teren batay pour dispit. (Proverb 21:19; 26:21) Ler nou aksepte Zezi konman nou lider, sa i kontribye pour anmenn lape ek boner dan lafanmiy. Anfet, legzanp Zezi i sa model pour relasyon fanmiy. Labib i dir: “Aksepte volonterman pour obei kanmarad, akoz sa respe ki zot annan pour Kris. Bann madanm, zot devre obei zot mari, parey zot obei Senyer. Parski en mari i sef son madanm parey Kris i sef legliz. Kris in sov legliz ki son lekor. . . . Zot, bann mari, kontan zot madanm parey Kris in kontan legliz e in donn son lavi pour li.” (Efezyen 5:21-25) Zapot Pol ti ekrir kongregasyon an Kolos: “Zanfan, obei zot paran dan tou keksoz, parski sa i fer plezir Senyer.”—Kolosyen 3:18-20.

11. Konman ki en mari i kapab montre ki Zezi i reel konman en Lider pour li?

¹¹ Swiv sa konsey i vedir ki en mari i diriz lafanmiy, son madanm i siport li fidelman, e bann zanfan i obeir zot paran. Parkont, lotorite en mari i anmenn boner selman kan i ganny egzerse dan en bon fason. En mari ki saz i aprann konman pour egzers lotorite par imit son prop Sef ek Lider, Zezi Kri. (1 Korentyen 11:3) Menm si  Zezi ti plitar vin ‘sef lo tou keksoz kongregasyon,’ i “pa’n vin pour ganny servi, me pour servi.” (Efezyen 1:22; Matye 20:28) Pareyman, en mari Kretyen pa egzers son lotorite zis pour son prop lavantaz, me i pran swen avek lentere son madanm ek son bann zanfan—wi, avek lafanmiy antye. (1 Korentyen 13:4, 5) I esey imit bann bon kalite ki son sef, Zezi Kri, ti demontre. I dou e annan limilite parey Zezi. (Matye 11:28-30) Bann parol parey “eskiz mwan” oubyen “ou annan rezon” i pa difisil pour li dir letan i mal fer. Son bon legzanp i fer pli fasil pour en madanm vin en “led,” en “konpleman,” ek en “partner” pour en tel zonm, pour aprann avek li e travay akote li.—Zenez 2:20; Malaki 2:14.

12. Kwa ki pou ed en madanm pour aksepte prensip lotorite?

¹² En madanm lo son par, i bezwen soumet avek son mari. Me si lespri lemonn pe enfliyans li, sa i kapab konmans afekte son pwenn-vi lo prensip lotorite, e i kapab pa tro kontan sa lide pour soumet avek en zonm. Labib pa dir ki en zonm i devret otoriter, me i demande ki bann madanm i soumet avek zot mari. (Efezyen 5:24) Labib i osi tenir bann mari oubyen papa responsab, e kan son konsey i ganny aplike, sa i kontribye pour anmenn lape ek lord dan lafanmiy.—Filipyen 2:5.

13. Ki legzanp soumisyon Zezi in kite pour bann zanfan?

¹³ Bann zanfan i bezwen obeir zot paran. Zezi ti donn en legzanp ekselan dan sa domenn. Apre sa lensidan kot Zezi, alaz 12 an, ti ganny kit deryer pour 3 zour, i “ti retourn Nazaret avek [son paran]. I ti kontinyen obei zot.” (Lik 2:51) Kan zanfan i soumet avek zot paran, sa i kontribye pour anmenn lape ek larmoni dan lafanmiy. Kan tou dimoun dan lafanmiy i soumet avek Kris konman zot Lider, sa fanmiy i vin en fanmiy ere.

14, 15. Kwa ki pou ed nou pour reisi kan nou fer fas avek en sitiasyon difisil dan lakour? Donn en legzanp.

¹⁴ Menm kan bann sitiasyon difisil i leve dan lakour, imit Zezi e aksepte son gidans i lakle pour reisi. Par egzanp, maryaz Jerry aze 35 an avek Lana, manman en fiy adolesan, ti anmenn en difikilte ki zot tou le de pa ti’n mazin lo la. Jerry i eksplike: “Mon ti konnen ki pour vin en bon sef, mon ti bezwen aplik menm prensip Labib ki anmenn sikse dan lezot fanmiy. Me pa ti pran bokou letan pour mwan dekouver ki mon ti bezwen aplik zot avek plis sazes ek disernman.” Fiy son madanm ti vwar li konman en dimoun ki’n pran son plas e i pa ti kontan li. Jerry ti bezwen disernman pour vwar ki sa latitid ti afekte sa ki sa fiy ti dir e fer. Konman ki i ti mannyen sa sitiasyon? Jerry i reponn: “Nou de Lana nou ti tonm dakor ki omwen pour lemoman, Lana ti pou okip kote disiplin tandis ki mwan mon ti konsantre lo batir en bon relasyon avek son fiy. Avek letan, sa lapros ti anmenn bann bon rezilta.”

¹⁵ Kan nou fer fas avek bann sitiasyon difisil dan lakour, nou bezwen disernman pour konnen akoz serten manm fanmiy i koz e azir dan en fason. Nou osi bezwen lasazes pour byen aplik bann prensip divin. Par egzanp, Zezi ti disernen klerman akoz sa madanm ki ti pe soufer avek en maladi disan ti tous li, e i ti tret li avek sazes ek konpasyon. (Levitik 15:25-27; Mark 5:30-34) Lasazes ek disernman i bann karakteristik ki nou Lider i annan. (Proverb 8:12) Si nou azir parey i ti pou azir, nou pou ere.

“Rod plito Rwayonm Bondye”

16. Kwa ki devret okip premye plas dan nou lavi, e konman ki par son legzanp Zezi ti montre sa?

¹⁶ Zezi ti fer kler kwa ki devret okip premye plas dan lavi bann ki aksepte li konman zot Lider. I ti dir: “Rod plito Rwayonm  Bondye ek son lazistis.” (Matye 6:33) E i ti montre nou konman pour fer sa par son prop legzanp. Alafen sa 40 zour kot i ti zennen, medite, e priye apre son batenm, Zezi ti ganny tante. Satan Dyab ti ofer li dominasyon lo “tou bann rwayonm partou lo later.” Mazin sa lavi ki Zezi ti kapab gannyen si i ti aksepte lof Dyab! Me Zezi ti plito konsantre lo fer lavolonte son Papa. I ti realize osi ki sa lavi dan lemonn Satan ti pou zis en pti gin letan. I ti deswit rezet lof Satan, an dizan: “I’n ekri: ‘Se Senyer ou Bondye ki ou devre adore e li tousel ki ou devre servi!’ ” Apre sa, Zezi ti “konmans prese an dizan ‘Sanz zot lavi, akoz Rwayonm Lesyel i pros!’ ” (Matye 4:2, 8-10, 17) Larestan son lavi lo later, Kris ti en proklanmater aplentan Rwayonm Bondye.

17. Ki mannyer nou kapab montre ki bann lentere Rwayonm i annan premye plas dan nou lavi?

¹⁷ Nou devret imit nou Lider e pa les lemonn Satan tant nou pour fer en profesyon ki pey byen vin nou lobzektif prensipal dan lavi. (Mark 1:17-21) I ti pou vreman bet pour nou sitan pri dan bann keksoz ki lemonn pe reserse ki bann lentere Rwayonm i vin selman apre sa bann keksoz! Zezi in konfye nou avek sa travay pour pres lo Rwayonm e fer disip. (Matye 24:14; 28:19, 20) Petet nou annan en fanmiy oubyen lezot responsabilite pour desarze, me eski nou pa kontan pour servi bann sware oubyen wikenn pour desarz nou responsabilite konman Kretyen pour prese e ansennyen? E pa i ankourazan pour vwar ki pandan lannen servis 2001, apepre 780,000 ti kapab servi konman bann minis aplentan, oubyen pionye!

18. Kwa ki ed nou pour trouv lazwa dan predikasyon?

¹⁸ Bann Levanzil i portre Zezi konman en zonm ki pran aksyon kan i neseser ensi ki en dimoun ki annan tandres. Kan i ti vwar bezwen spirityel bann dimoun otour li, i ti pran pitye pour zot e pare pour ofer son led. (Mark 6:31-34) Nou predikasyon i vin en lazwa kan nou partisip ladan akoz nou annan lanmour pour lezot e nou senserman anvi ed zot. Me ki mannyer nou kapab kiltiv en tel dezir? En zennonm ki apel Jayson i dir: “Kan mon ti dan mon laz adolesan, mon pa ti tro kontan predikasyon.” Kwa ki ti ed li pour kiltiv lanmour pour sa travay? Jayson i reponn: “Mon fanmiy ti toultan dedye Sanmdi bomaten  pour predikasyon. Sa ti byen pour mwan akoz pli mon ti sorti dan predikasyon, pli mon ti vwar dibyen ki i ti anmennen e pli mon ti kontan li.” Nou osi nou devret partisip dan predikasyon regilyerman e avek zel.

19. Ki determinasyon nou devret annan an rapor avek nou Lider Kris?

¹⁹ Aksepte Zezi konman nou Lider i vreman rekonfortan e vo lapenn. Kan nou fer li, nou zenes i vin en letan pour progrese dan konnesans ek sazes. Lavi fanmiy i vreman vin en sours lape ek boner, e predikasyon i en aktivite ki anmenn lazwa ek satisfaksyon. Alor, annou vreman determinen pour montre dan nou lavi toulezour e dan bann desizyon ki nou fer ki Kris i reel konman en Lider pour nou. (Kolosyen 3:23, 24) Me Zezi i nou Lider dan ankor en lot fason—dan kongregasyon Kretyen. Lartik swivan pou diskite konman ki nou kapab benefisye avek sa provizyon.

[Not anba lo paz]

Eski ou mazinen?

• Konman ki swiv nou Lider ki Bondye in apwente i benefisye nou?

• Konman bann zenn i kapab montre ki zot anvi swiv Zezi konman zot Lider?

• Ki lefe lotorite Kris i annan lo lavi fanmiy bann ki soumet avek li?

• Konman ki nou predikasyon i kapab montre ki Kris i reel konman en Lider pour nou?

[Study Questions]

[Portre lo paz 10]

Lazenes i en bon letan pour ganny konnesans lo Bondye e lo sa Lider ki i’n apwente

[Portre lo paz 11]

Soumet avek Zezi konman nou Lider i promot en lavi fanmiy ere

[Portre lo paz 13]

Zezi ti rod Rwayonm premye. Eski ou osi tou?