Eski Rezonnman Lozik i devret Baz Pour Lafwa?

“I annan tro bokou dimoun relizye ki swiv bann pratik en larelizyon zis pour evite servi zot abilite pour rezonnen,” direkter en seminar teolozik an Letazini ti ekrir. “Zot senpleman oule aksepte tou keksoz ‘san demann laprev,’ ” i ti azoute.

LENPLIKASYON se ki laplipar dimoun ki dir i annan en krwayans relizye pa mazin konsernan bann rezon akoz zot krwar sa ki zot krwar oubyen si i annan sifizaman rezon pour siport zot lafwa. I pa etonnan ki larelizyon in vin en topik ki en kantite dimoun i ezite pour koz lo la.

I regretab pour dir, ki bann pratik parey servi zidol e repet lapriyer parker e san reflesir i osi dekouraz en dimoun pour reflesir dan en fason lozik. Sa bann pratik, ansanm avek larsitektir enpresyonan, bann vit an kouler ki konplike, ek lanmizik atiran, i plizoumwen bann sel keksoz ki annan dan larelizyon plizyer milyon dimoun. Kantmenm serten legliz i dir ki zot lafwa i baze lo Labib, zot mesaz ‘krwar dan Zezi e ou pou ganny sove’ i dekouraz letid serye lo Labib. Lezot i pres en levanzil baze lo politik oubyen led sosyal. Ki rezilta tou sa bann keksoz?

Konsernan sa sitiasyon dan Nor Lanmerik, ekriven en larelizyon ti dir: “Kristyanism . . . i paret mank konnesans, [e] son bann krwayan pa ganny byen edike dan lafwa.” En zonm ki fer sondaz ti menm al ziska dekrir Letazini konman “en nasyon ki pa konn Labib.” Onnetman, sa bann obzervasyon i osi aplik pour lezot pei kot swadizan Kristyanism i popiler. Pareyman, en kantite larelizyon ki pa Kretyen i dekouraz dimoun rezonn dan en fason lozik, e zot plito met lanfaz lo sante, lapriyer rityel, ek diferan form meditasyon ki enplik spirityalite, olye ki panse lozik e konstriktif.

Toutfwa, dan zot lavi toulezour, sa bann menm dimoun ki pa mazin bokou lo si zot krwayans relizye i egzakt oubyen laverite, zot souvan egzamin lezot keksoz oprofon. Eski pa ou vwar li drol pour en dimoun ki fer resers oprofon zis pour aste en loto—ki en zour pou ganny zete dan salte—dir sa konsernan son larelizyon, ‘Si i ti bon pour mon paran, i osi bon pour mwan’?

Si nou vreman enterese pour fer plezir Bondye, eski pa nou devret egzamin seryezman si sa ki nou krwar lo li i egzakt? Zapot Pol ti koz lo serten dimoun relizye dan son letan ki ti “ranpli avek motivasyon pour Bondye, me zot motivasyon pa baze lo en vre konnesans.” (Romen 10:2) Bann tel dimoun i kapab ganny konpare avek en  pennter, ki travay dir pour penn lakaz en dimoun me i pa servi sa kouler apropriye akoz i pa’n ekout lenstriksyon sa propriyeter. Sa pennter i kapab satisfe avek son travay, me eski sa propriyeter pou aksepte sa travay?

Kwa ki akseptab pour Bondye konsernan vre ladorasyon? Labib i reponn: “Sa i bon e i fer plezir Bondye nou sover, ki oule ki tou dimoun i ganny sove e ganny konnesans laverite.” (1 Timote 2:3, 4) Serten i kapab panse ki i enposib pour trouv en tel konnesans parmi sa kantite larelizyon ozordi. Me mazinen—si i lavolonte Bondye ki dimoun i ganny en konnesans egzakt lo laverite, eski i ti pou kasyet zot sa laverite? Pa dapre Labib, ki dir: “Si ou resers [Bondye], i pou les li ganny trouve par ou.”—1 Kronik 28:9.

Konman ki Bondye i revel li avek sa bann ki sers li senserman? Sa lot lartik pou donn larepons.