Kontinyen Servi Zeova Avek En Leker Ferm
Kontinyen Servi Zeova Avek En Leker Ferm
“Mon leker i ferm, O Bondye, mon leker i ferm.”—PSONM 57:7.
1. Akoz nou kapab annan en konviksyon parey pour David?
ZEOVA i kapab fer nou ferm dan lafwa Kretyen afen ki nou a reste atase avek vre lansennyman Kretyen konman son bann serviter ki’n dedye zot lavi. (Romen 14:4) Alors, nou kapab annan sa konviksyon parey psalmis David, ki ti motive pour sante: “Mon leker i ferm, O Bondye.” (Psonm 108:1) Si nou leker i ferm, nou pou motive pour viv an akor avek nou dedikasyon ki nou’n fer avek Bondye. E par depan lo li pour gidans ek lafors, nou determinasyon ek konviksyon i kapab reste stab e ferm, avek “touzour plis lentere dan travay Senyer.”—1 Korentyen 15:58.
2, 3. Ki konsey Pol dan 1 Korentyen 16:13 i enplike?
2 Dan bann parol lankourazman ki Pol ti adres avek bann disip Zezi dan ansyen Korent, me ki sertennman aplikab pour bann Kretyen denozour, i ti dir: “Reste eveye, reste ferm dan lafwa, kondwir zot konman bann zonm, vin for.” (1 Korentyen 16:13, NW ) Dan langaz Grek, sa konsey in ganny ekrir dan letan prezan, alors i pe ankouraz aksyon kontinyel. Ki sa konsey i enplike?
3 Nou kapab “reste eveye” lo plan spirityel par opoz Dyab e reste pros avek Bondye. (Zak 4:7, 8) Kan nou depan lo Zeova, sa i fer nou reste ini e ‘reste ferm dan lafwa Kretyen.’ Nou—enkli sa kantite madanm parmi nou—nou ‘kondwir nou parey bann zonm’ par servi Bondye avek kouraz konman bann proklanmater Rwayonm. (Psonm 68:11) Nou “vin for” par kontinyelman depan lo nou Papa seles pour ganny lafors pour fer son lavolonte.—Filipyen 4:13.
4. Ki bann letap ki ti anmenn nou ziska pour batize konman en Kretyen?
4 Nou ti pran nou pozisyon pour vre lafwa kan nou ti dedye nou lavi san rezerv pour Zeova e senboliz li par ganny plonze anba delo. Me ki bann pa ki ti anmenn nou ziska batenm? Premyerman, nou ti pran konnesans egzakt lo Parol Bondye. (Zan 17:3) Sa ti batir nou lafwa e i ti pous nou pour repantir, demontre en vre regre pour bann keksoz mal ki nou’n fer dan lepase. (Akt 3:19; Ebre 11:6) Apre nou ti sanz nou lavi, lefe ki nou ti detourn kont sa bann move pratik pour nou kapab viv en lavi ki an ankor avek lavolonte Bondye. (Romen 12:2; Efezyen 4:23, 24) Sa ti swiv par en lapriyer kot nou ti dedye nou lavi antyerman avek Zeova. (Matye 16:24; 1 Pyer 2:21) Nou ti demann Bondye en bon konsyans e nou ti batize pour senboliz nou dedikasyon avek li. (1 Pyer 3:21) Kan nou gard sa bann letap antet, sa pou ed nou pour kontinyen konsantre lo bezwen pour kontinyen fer zefor pour viv an akor avek nou dedikasyon e kontinyen servi Zeova avek en leker ferm.
Kontinyen sers Konnesans egzakt
5. Akoz nou devret kontinyen pran konnesans Biblik?
5 Pour viv an akor avek nou dedikasyon avek Bondye, nou bezwen kontinyen ganny konnesans Biblik ki batir nou lafwa. Pa i ti gou pour pran nouritir spirityel kan nou ti fek konmans konn laverite ki sorti kot Bondye! (Matye 24:45-47) Sa bann “manze” ti bon—e zot ti nouri nou byen spirityelman. Aprezan i enportan ki nou kontinyen pran nouritir spirityel byen nourisan afen ki nou gard en leker ferm konman bann serviter Zeova ki’n dedye zot lavi.
6. Konman ki ou’n kapab ganny led pour devlop en lapresyasyon senser pour laverite Biblik?
6 Nou bezwen fer zefor pour ganny plis konnesans baze lo Labib. I parey letan ou pe rod en trezor kasyet—en keksoz ki demann bokou zefor. Me pa i vo lapenn trouv “konnesans Bondye”! (Proverb 2:1-6) Kan en proklanmater Rwayonm ti konmans etidye Labib avek ou, petet i ti servi sa liv Konnesans Ki Anmenn ver Lavi Eternel. Zot in kapab pran en bon pe letan pour kouver sak sapit, petet plis ki en sesyon. Ou ti benefisye kan bann teks Labib ki ti ganny mansyonnen ti ganny lir e diskite. Si en pwen ti difisil pour konpran, i ti ganny eksplike pour ou. Sa dimoun ki ti kondwir ou letid Labib ti prepar byen, i ti priy pour lespri Bondye, e i ti ed ou pour devlop en leker rekonesan pour laverite.
7. Kwa ki fer en dimoun kalifye pour ansenny laverite Biblik avek lezot?
7 Sa zefor ti apropriye akoz Pol ti ekrir: “Deplis, ki sa enn ki ganny ansennyen laparol oralman i partisip dan tou bann bon keksoz avek sa enn ki donn sa lansennyman oral.” (Galat 6:6, NW ) La sa teks Grek i endike ki lansennyman Parol Bondye ti rezonnen dan lespri ek leker sa dimoun ki ti pe ‘ganny ansennyen oralman.’ Letan ou ganny ansennyen dan sa fason, ou kalifye pour menm ansenny lezot. (Akt 18:25) Pour reste fidel avek ou dedikasyon, ou bezwen mentenir ou lasante spirityel ek ou pozisyon ferm par kontinyen etidye Parol Bondye.—1 Timote 4:13; Tit 1:13; 2:2.
Mazinen ki ou’n repantir e sanz ou Lavi
8. Ki mannyer i posib pour mentenir en bon kondwit?
8 Eski ou rapel ki soulazman ou ti gannyen kan ou ti aprann laverite, repantir, e apre santi ki Bondye in pardonn ou akoz ou lafwa dan sakrifis ranson Zezi? (Psonm 32:1-5; Romen 5:8; 1 Pyer 3:18) Sirman ou pa anvi retourn dan en move lavi. (2 Pyer 2:20-22) Priy Zeova regilyerman. I en keksoz ki pou ed ou pour mentenir ou bon kondwit, pour viv an akor avek ou dedikasyon, e pour kontinyen servi Zeova fidelman.—2 Pyer 3:11, 12.
9. Vi ki nou’n detourn kont bann move pratik, ki semen nou devret pourswiv aprezan?
9 Vi ki ou’n sanz ou lavi par detourn kont bann move pratik, kontinyen rod led Bondye pour gard ou leker ferm. Anfet, ou ti’n tronp semen e apre ki ou’n konsilte en map ki ou kapab kont lo la, ou’n konmans swiv sa bon semen. Aprezan pa perdi sa semen. Kontinyen depan lo gidans Bondye, e determinen pour reste lo semen ki anmenn ver lavi.—Izai 30:20, 21; Matye 7:13, 14.
Pa zanmen oubliy ou Dedikasyon ek Batenm
10. Ki pwen nou bezwen gard antet konsernan nou dedikasyon avek Bondye?
10 Mazinen ki ou’n fer en dedikasyon avek Zeova dan lapriyer, pour servi li fidelman pour touzour. (Zid 20, 21) Dedikasyon i vedir met apar, oubyen separe, pour en rezon sakre. (Levitik 15:31; 22:2) Ou dedikasyon pa ti ni en lagreman tanporer ni en langazman avek zonm. I ti en dedikasyon permanan avek Souvren Iniversel, e viv an akor avek ou dedikasyon i demann fidelite avek Bondye pour lavi. Wi, “nou viv pour Senyer; e si nou mor, nou mor pour limenm.” (Romen 14:7, 8) Nou boner i depan lo nou soumisyon anver li e lo kontinyen servi li avek en leker ferm.
11. Akoz ou devret mazin ou batenm ek son sinifikasyon?
11 Touzour mazin ou batenm ki reprezant ou dedikasyon san rezerv ki ou’n fer avek Bondye. I pa ti en batenm forse parski ou ti fer ou desizyon ou menm. Aprezan eski ou determinen pour akonpli ou lavolonte an armoni avek lavolonte Bondye pour larestan ou lavi? Ou ti demann Bondye en bon konsyans e ou ti batize pour senboliz ou dedikasyon avek li. Prezerv sa bon konsyans par viv an akor avek ou dedikasyon, e benediksyon ris Zeova pou repoz lo ou.—Proverb 10:22.
Ou Lavolonte i zwe en Rol
12, 13. Konman ki nou prop lavolonte i relye avek dedikasyon ek batenm?
12 Anfet, dedikasyon ek batenm in anmenn bann gran benediksyon pour plizyer milyon dimoun partou dan lemonn. Kan nou senboliz nou dedikasyon avek Bondye par ganny batize dan delo, nou mor an rapor avek nou lavi lepase me pa an rapor avek nou prop lavolonte. Konman bann krwayan ki’n ganny byen enstri, nou ti an realite egzers nou prop lavolonte kan nou ti dedye nou lavi avek Bondye dan lapriyer e batize. Dedye nou lavi e batize i enplik determinen kisisa lavolonte Bondye e apre swazir pour fer li volonterman. (Efezyen 5:17) Dan sa fason, nou imit Zezi ki ti egzers son lavolonte kan i ti kit son bann zouti sarpantye deryer, e dedye son lekor antyerman pour fer lavolonte son Papa ki dan lesyel.—Psonm 40:7, 8; Zan 6:38-40.
13 I ti dan plan Zeova ki son Garson i vin “parfe atraver lasoufrans.” Alors, Zezi ti bezwen egzers son lavolonte pour andir sa bann soufrans fidelman. Pour arive fer sa, i ti “ofer son lapriyer ek son siplikasyon, avek leokri ek larm . . . Bondye ti egzos li avek son lobeisans.” (Ebre 2:10, 18; 5:7, 8) Si nou montre menm lakrent avek respe profon pour Bondye, nou osi nou kapab asire ki nou pou ganny ‘egzose,’ e nou kapab annan konfyans ki Zeova pou fer nou ferm konman son bann Temwen ki’n dedye zot lavi avek li.—Izai 43:10.
Ou kapab gard en Leker ferm
14. Akoz nou devret lir Labib toulezour?
14 Kwa ki kapab ed ou pour gard en leker ferm e alors viv an akor avek ou dedikasyon ki ou’n fer avek Bondye? Avek lobzektif pour pran plis konnesans lo Parol Bondye, lir Labib toulezour. Sa i en keksoz ki ‘lesklav fidel e pridan’ i kontinyelman enplor nou pour fer. En tel konsey i ganny donnen akoz pour viv an akor avek nou dedikasyon i neseser ki nou kontinyen mars dan laverite Bondye. Si lorganizasyon Zeova ti volonterman siport bann fo lansennyman, zot pa ti pou zanmen konsey bann Temwen Zeova ensi ki bann dimoun ki zot pres avek pour lir Labib.
15. (a) Ki nou devret reflesir lo la kan nou pe fer desizyon? (b) Akoz nou kapab dir ki travay profann i en aktivite ki okip dezyenm plas dan lavi en Kretyen?
15 Kan ou fer desizyon, touzour reflesir konman ki zot kapab afekte ou dedikasyon ki ou’n fer avek Zeova. Sa i kapab annan pour fer avek ou travay. Eski ou sey ou mye pour servi ou travay pour ed ou progrese dan vre ladorasyon? Menm si bann anplwayer an zeneral i vwar ki bann Kretyen ki’n dedye zot lavi avek Bondye i bann dimoun ki zot kapab depan lo la e zot travay byen, zot osi remarke ki bann Temwen Zeova pa tro anbisye pour al pli devan dan sa monn e zot pa pe fer konpetisyon avek lezot pour ganny bann pos ki pey pli byen. Sa i akoz lobzektif bann Temwen se pa pour ganny larises, popilarite, prestiz, oubyen pouvwar. Pour bann ki pe viv an akor avek zot dedikasyon avek Bondye, keksoz pli enportan se pour fer lavolonte Bondye. En travay profann ki fer zot ganny bann nesesite dan lavi i en aktivite oubyen en lokipasyon ki okip dezyenm plas dan zot lavi. Parey zapot Pol, zot karyer oubyen travay prensipal, i minister Kretyen. (Akt 18:3, 4; 2 Tesalonisyen 3:7, 8; 1 Timote 5:8) Eski ou gard lentere Rwayonm premye dan ou lavi?—Matye 6:25-33.
16. Ki nou kapab fer si tro bokou traka pe fer li difisil pour nou viv an akor avek nou dedikasyon avek Bondye?
16 Petet serten ti pros pour ganny inonde avek diferan traka avan ki zot ti aprann laverite. Me konman zot leker ti deborde avek lazwa, rekonesans, ek lanmour pour Bondye kan zot ti aksepte sa lespwar pour Rwayonm! Si zot reflesir lo bann benediksyon ki zot in eksperyanse depi sa letan, sa i kapab ed zot pour viv an akor avek zot dedikasyon ki zot in fer avek Zeova. Me si tro bokou traka lo bann problenm toulezour ki nou rankontre dan sa sistenm i menase pour touf “parol Bondye,” zis parey bann pikan i kapab anpes bann pti plant pouse pour vin bann pye dibwa ki raport fri? (Lik 8:7, 11, 14; Matye 13:22; Mark 4:18, 19) Si ou santi ki sa pe konmans arive avek ou oubyen ou fanmiy, larg ou traka lo Zeova e priye pour li ed ou pour ogmant ou lanmour ek lapresyasyon. Si ou larg ou fardo lo li, i pou soutenir ou e donn ou lafors pour kontinyen servi li dan lazwa avek en leker ferm.—Psonm 55:22; Filipyen 4:6, 7; Revelasyon 2:4.
17. Konman i posib pour nou fer fas avek bann leprev sever?
17 Kontinyen priy Zeova regilyerman, parey ler ou ti priye pour fer ou dedikasyon avek li. (Psonm 65:2) Kan ou ganny tante pour fer sa ki mal oubyen kan ou fer fas avek en leprev sever, rod gidans Bondye ek son led pour swiv sa gidans. Kit antet sa nesesite pour annan lafwa, parski disip Zak ti ekrir: “Si i annan parmi zot ki mank lasazes [pour fer fas avek en leprev], ki i demann Bondye e Bondye a donn li parski i donn tou dimoun zenerezman san fer okenn repros. Me fodre ki i demann avek lafwa san doute, parski en dimoun ki doute i parey laroul lo lanmer ki divan i anmennen e pous dan tou direksyon. En tel dimoun fodre pa ki i mazinen ki i pou ganny okenn keksoz avek Senyer, parski i en dimoun endesi e enserten dan sa ki i fer.” (Zak 1:5-8) Si en leprev i paret pli for ki nou, nou kapab met nou konfyans dan sa parol: “Tou tantasyon ki’n ariv zot i arive normalman avek en dimoun. Me Bondye i fidel dan son promes, e i pa pou permet ki nou ganny tante plis ki nou kapab siporte, me avek tantasyon i osi donn mwayen pour sorti pour ki ou kapab siporte.”—1 Korentyen 10:13.
18. Ki nou kapab fer si en pese grav ki nou’n kasyet pe afebli nou rezolisyon pour viv an akor avek nou dedikasyon ki nou’n fer avek Zeova?
18 Me si en pese grav ki ou’n kasyet pe fatig ou konsyans e afebli ou rezolisyon pour viv an akor avek ou dedikasyon avek Bondye? Si ou vreman regrete, ou kapab tir rekonfor dan konnesans ki Zeova ‘pa pou mepriz en leker brize.’ (Psonm 51:17) Rod led avek bann ansyen, e konnen ki zot pou imit Zeova par pa tret alalezer ou dezir pour reganny en bon relasyon avek ou Papa seles. (Psonm 103:10-14; Zak 5:13-15) Apre sa, avek en nouvo lafors spirityel ek en leker ferm, ou pou kapab fer bann santye drwat pour ou lipye e ou pou vwar li posib pour viv an akor avek ou dedikasyon avek Bondye.—Ebre 12:12, 13.
Kontinyen servi avek en Leker ferm
19, 20. Akoz i esansyel ki nou kontinyen viv an akor avek nou dedikasyon?
19 Dan sa bann letan difisil, nou bezwen travay dir pour viv an akor avek nou dedikasyon e kontinyen servi Bondye avek en leker ferm. Zezi ti dir: “Sa ki reste fidel ziska lafen pou ganny sove.” (Matye 24:13) Vi ki nou pe viv dan “bann dernyen zour,” lafen i kapab vini nenport ki ler. (2 Timote 3:1) Deplis, napa personn antre nou ki kapab asire ki i pou vivan demen. (Zak 4:13, 14) Alors, i tre enportan ki nou kontinyen viv an akor avek nou dedikasyon ozordi!
20 Zapot Pyer ti met lanfaz lo sa dan son dezyenm let. I ti montre ki parey bann dimoun mesan ti mor dan Deliz, sa later senbolik, oubyen lasosyete imen mesan, pou ganny detrir ‘zour Zeova.’ Alors, avek lafors Pyer ti dir: “Ki kalite lavi zot devre viv? Zot devre anmenn en lavi sen e annan respe pour Bondye”! I ti osi enplor zot: “Mon bann byenneme, zot in ganny averti. Fer byen atansyon, pangar zot ganny antrennen par lerer sa bann move dimoun [ek fo ansennyan] e ki zot perdi zot pozisyon solid.” (2 Pyer 3:5-17) Pa i ti pou tris pour en dimoun ki’n batize ganny antrennen e termin son lavi konman en dimoun ki pa’n reisi gard en leker ferm!
21, 22. Konman ki parol dan Psonm 57:7 i vre dan ka David ensi ki bann vre Kretyen?
21 Ou determinasyon pour viv an akor avek ou dedikasyon avek Bondye i kapab ganny fortifye si ou gard antet sa zour zwaye ki ou ti batize e rod led Bondye afen ki ou parol ek ou aksyon i fer son leker zwaye. (Proverb 27:11) Zeova pa zanmen dezapwent son pep, e byensir nou devret reste fidel avek li. (Psonm 94:14) I ti montre konpasyon ek pitye par kontrarye plan bann lennmi e delivre David. Avek rekonesans pour sa, David ti deklare konman son lanmour pour son Sover i ferm e solid. Avek bokou santiman, i ti sante: “Mon leker i ferm, O Bondye, mon leker i ferm. Mon pou sante e fer melodi.”—Psonm 57:7.
22 Parey David, bann vre Kretyen pa’n fer okenn konpromi avek zot devosyon pour Bondye. Avek en leker ferm, zot rekonnet Zeova konman sa enn ki delivre e protez zot, e avek lazwa zot sant bann louanz avek li. Si ou leker i ferm, i pou depan lo Bondye, e avek son led ou pou kapab viv an akor avek ou dedikasyon. Wi, ou kapab vin parey “sa enn ki drwat” ki sa psalmis ti sant sa lo li: “I pa pou per move nouvel. Son leker i ferm, i’n met konfyans dan Zeova.” (Psonm 112:6, 7) Avek lafwa dan Bondye ek konfyans total dan li, ou kapab viv an akor avek ou dedikasyon e kontinyen servi Zeova avek en leker ferm.
Eski ou rapel?
• Akoz nou bezwen kontinyen pran konnesans egzakt dan Labib?
• Akoz nou devret mazinen ki nou’n repantir e sanz nou lavi?
• Konman ki nou benefisye kan nou mazin nou dedikasyon ek batenm?
• Kwa ki pou ed nou pour kontinyen servi Zeova avek en leker ferm?
[Study Questions]
[Portre lo paz 28]
Eski ou pe mentenir ou lasante spirityel par lir Parol Bondye toulezour?
[Portre lo paz 28]
Fer minister Kretyen nou travay prensipal i ed nou pour kontinyen servi Zeova avek en leker ferm