Kris I Diriz Son Kongregasyon

‘Konnen ki mwan mon avek zot toulezour, ziska konklizyon sa sistenm.’—Matye 28:20.

1, 2. (a) Kan i ti donn lord pour fer disip apre ki i ti’n resisite, ki Zezi ti promet son bann disip? (b) Konman ki Zezi ti aktivman diriz sa kongregasyon Kretyen ki ti’n fek formen?

APRE ki i ti’n resisite, Zezi Kri nou Lider, ti aparet avek son bann disip avan i ti mont dan lesyel, e dir: ‘Mon’n ganny tou pouvwar dan lesyel ek lo later. Ale e fer tou pep vin mon bann disip. Batiz zot o non di-Per, di-Fis e di-Sent-Espri. Ansenny zot pour obei tou sa ki mon’n konmande. E konnen ki mwan mon avek zot toulezour, ziska konklizyon sa sistenm.’—Matye 23:10; 28:18-20.

² Zezi pa ti zis donn son bann disip sa travay pour fer disip ki sov lavi, me i ti osi promet ki i pou avek zot. Listwar bann premye Kretyen, parey i’n ganny rikorde dan liv Akt dan Labib, i montre ki Kris ti san dout servi lotorite ki i ti’n gannyen pour diriz sa kongregasyon ki ti fek ganny formen. I ti anvoy sa “asistan” ki i ti promet—lespri sen—pour fortifye son bann disip e pour gid zot bann zefor. (Zan 16:7, NW; Akt 2:4, 33; 13:2-4; 16:6-10) Zezi ki ti’n resisite ti servi bann lanz ki ti a son dispozisyon pour soutenir son bann disip. (Akt 5:19; 8:26; 10:3-8, 22; 12:7-11; 27:23, 24; 1 Pyer 3:22) Deplis, nou Lider ti servi bann zonm kalifye ki ti form en konsey direkter pour donn direktiv kongregasyon.—Akt 1:20, 24-26; 6:1-6; 8:5, 14-17.

3. Ki bann kestyon ki pou ganny diskite dan sa lartik?

³ Me dan nou letan, dan ‘konklizyon sa sistenm’? Konman ki Zezi Kri pe diriz kongregasyon Kretyen ozordi? E konman nou kapab montre ki nou aksepte li konman nou Lider?

Met i annan en Lesklav fidel

4. (a) Lekel ki form parti ‘lesklav fidel e pridan’? (b) Ki Met in konfye dan lanmen sa lesklav?

⁴ Kan i ti pe donn sa profesi konsernan  siny son prezans, Zezi ti dir: “Lekel sa [lesklav fidel e pridan, NW ] ki son met in plas ansarz tou lezot serviter pour donn zot zot manze kan i ler? Ere sa [lesklav, NW ] ki son met i war li pe fer son devwar ler i arive! An verite mon dir zot, son met pou met li ansarz tou son byen.’ (Matye 24:45-47) Sa “met” i nou Lider, Zezi Kri, e i’n apwent ‘lesklav fidel e pridan’—sa group Kretyen swazir lo later—pour pran swen avek tou son bann zafer ki relye avek later.

5, 6. (a) Dan en vizyon ki zapot Zan ti vwar, ki “sa set sandelye an-or” ek “sa set zetwal” i reprezante? (b) Lefe ki “sa set zetwal” i dan lanmen drwat Zezi, ki sa i endike?

⁵ Liv Labib Revelasyon i montre ki sa lesklav fidel e pridan i direkteman anba kontrol Zezi Kri. Dan en vizyon konsernan “Zour Senyer,” zapot Zan ti vwar “set sandelye an-or. Omilye sa set sandelye ti annan en personaz ki ti annan resanblans en Fis-de-Lonm” ki “dan son lanmen drwat ti annan set zetwal.” Kan i ti pe eksplik Zan sa vizyon, Zezi ti dir: “Sa ki konsern mister sa set zetwal ki ou’n war dan mon lanmen drwat, e sa set sandelye an-or: Sa set zetwal i bann lanz sa set Legliz; e sa set sandelye, i sa set Legliz.”—Revelasyon 1:1, 10-20.

⁶ “Sa set sandelye an-or” i reprezant tou kongregasyon vre Kretyen ki’n egziste pandan “Zour Senyer,” ki ti konmans an 1914. Me sa “set zetwal”? Okonmansman, zot ti senboliz tou bann sirveyan, ki ti’n ganny swazir par lespri, ki ti okip bann kongregasyon dan premye syek. * Bann sirveyan ti dan lanmen drwat Zezi, setadir anba son kontrol ek direksyon. Wi, Zezi Kri ti diriz sa group lesklav. Me konmela i annan zis en pti gin sirveyan ki bann Kretyen swazir. Ki mannyer lotorite Kris i ariv lo sa 93,000 kongregasyon Temwen Zeova partou dan lemonn?

7. (a) Konman ki Zezi i servi Konsey Direkter pour fourni direktiv dan bann kongregasyon partou lo later? (b) Akoz nou kapab dir ki bann sirveyan Kretyen i ganny apwente par lespri sen?

⁷ Parey dan premye syek, en pti group zonm kalifye parmi bann sirveyan swazir pe aprezan servi konman Konsey Direkter, ki reprezant sa group lesklav fidel e pridan. Nou Lider i servi sa Konsey Direkter pour apwent bann zonm kalifye—ki swa zot bann Kretyen swazir ou non—konman bann ansyen dan bann kongregasyon lokal. Lespri sen ki Zeova in donn Zezi lotorite pour servi, i zwe en gran rol dan sa domenn. (Akt 2:32, 33) Premyerman, sa bann sirveyan i bezwen ranpli bann kalifikasyon ki’n ganny prezante dan Parol Bondye, ki’n ganny enspire par lespri sen. (1 Timote 3:1-7; Tit 1:5-9; 2 Pyer 1:20, 21) Sa bann rekomandasyon ek nominasyon i ganny fer apre lapriyer e anba gidans lespri sen. Deplis, sa bann endividi ki ganny apwente i montre levidans ki zot in kiltiv fri lespri. (Galat 5:22, 23) Konsey Pol  i aplik pareyman pour tou ansyen, ki swa zot Kretyen swazir ou non: “Vey byen zot lekor e pran swen troupo ki Sent-Espri in konfye zot konman bann gardyen.” (Akt 20:28) Sa bann zonm ki’n ganny apwente i ganny direktiv sorti kot Konsey Direkter e zot vey kongregasyon volonterman. Dan sa fason, Kris i aktyelman la avek nou e i pe aktivman diriz kongregasyon.

8. Konman ki Kris i servi bann lanz pour diriz son bann disip?

⁸ Zezi i osi servi bann lanz pour diriz son bann disip ozordi. Dapre ilistrasyon dible ek move zerb, rekolt pou ariv dan ‘konklizyon sa sistenm.’ Lekel ki Met pou servi pour fer sa rekolt? “Bann travayer se bann lanz,” Kris ti dir. I ti azoute: “Fis-de-Lonm pou anvoy son bann lanz dan son Rwayonm pour retir tou sa ki okazyonn lemal e bann ki fer lemal zotmenm.” (Matye 13:37-41) Deplis, zis parey en lanz ti diriz lepa Filip pour li trouv sa zofisye Etyopyen, i annan bokou levidans ozordi ki Kris pe servi son bann lanz pour diriz travay bann vre Kretyen pour trouv bann dimoun ki annan leker senser.—Akt 8:26, 27; Revelasyon 14:6.

9. (a) Par ki mwayen Kris i diriz kongregasyon Kretyen ozordi? (b) Ki kestyon nou devret pran an konsiderasyon si nou anvi benefisye atraver gidans Kris?

⁹ Pa i rasir nou pour konnen ki Zezi Kri i fourni gidans pour son bann disip ozordi atraver Konsey Direkter, lespri sen, ek bann lanz! Menm si serten adorater Zeova i separe avek Konsey Direkter pour enpe letan akoz persekisyon oubyen lezot keksoz parey, Kris pou kantmenm sa fourni son direktiv par mwayen lespri sen ek soutyen bann lanz. Parkont nou benefisye avek son gidans selman kan nou aksepte li. Konman nou kapab montre ki nou vreman aksepte Kris konman nou Lider?

 ‘Obei . . . swiv Lord’

10. Konman nou kapab montre konsiderasyon pour bann ansyen ki’n ganny apwente dan kongregasyon?

¹⁰ Nou Lider in donn kongregasyon “bann don an zonm”—“serten konman evanzelizater, serten konman berze e serten konman ansennyan.” (Efezyen 4:8, 11, 12, NW ) Nou latitid ek nou aksyon anver zot i demontre klerman si nou aksepte Kris konman nou Lider. I byen ki nou ‘montre nou rekonesan’ pour sa bann zonm spirityelman kalifye ki Kris in fourni. (Kolosyen 3:15) Zot osi merit nou respe. Zapot Pol ti ekrir: “Bann ansyen ki diriz byen Legliz, i merit resevwar en doub loner.” (1 Timote 5:17) Konman ki nou kapab montre nou rekonesans ek lestim pour bann ansyen oubyen sirveyan dan kongregasyon? Pol i reponn: “Obei zot bann dirizan e swiv zot lord.” (Ebre 13:17) Wi, nou bezwen obeir zot e soumet avek zot.

11. Akoz respe pour sa laranzman ansyen i form parti avek viv an akor avek nou dedikasyon?

¹¹ Nou Lider i parfe. Sa bann zonm ki i’n fourni konman bann don, zot zot pa parfe. Alors, zot kapab fer fot parler. Toudmenm i vreman enportan ki nou reste fidel avek laranzman ki Kris in fer. Anfet, viv an armoni avek nou dedikasyon ek batenm i vedir ki nou rekonnet lotorite ki’n ganny apwente par lespri sen dan kongregasyon e pare pour soumet avek. Nou batenm ‘o non di-Sent-Espri’ i en deklarasyon piblik ki nou konnen kisisa lespri sen e ki nou rekonnet rol ki i zwe dan plan Zeova. (Matye 28:19) En tel batenm i vedir ki nou korpere avek lespri e pa fer nanryen pour anpes li oper parmi bann disip Kris. Vi ki lespri sen i zwe en rol enportan dan rekomandasyon ek nominasyon bann ansyen, eski nou kapab vreman fidel avek nou dedikasyon si nou pa korpere avek sa laranzman ansyen ki’n ganny etabli dan kongregasyon?

12. Ki legzanp konsernan mank respe pour lotorite ki Zid i site, e ki zot ansenny nou?

¹² Dan Labib i annan bann legzanp ki ansenny nou valer lobeisans ek soumisyon. Disip Zid ti fer resorti trwa lavertisman kan i ti pe refer avek bann ki ti malparl bann zonm ki ti’n ganny apwente dan kongregasyon, an dizan: “Maler pour zot! Zot pe swiv menm semen ki Kaen ti pran. Pour larzan, zot in livre zot dan menm fot ki Balaam, e zot in ganny detri akoz zot in revolte parey Kore.” (Zid 11) Kaen ti inyor konsey ranpli avek lanmour ki Zeova ti donn li e i ti volonterman devlop en laenn ki ti fer li komet mert. (Zenez 4:4-8) Kantmenm i ti ganny lavertisman divin plizyer fwa, Balaam ti esey modi pep Bondye pour en rekonpans finansyel. (Nonm 22:5-28, 32-34; Deterononm 23:5) Kora ti okip en serten responsabilite onorab an Izrael, me i pa ti satisfe avek sa. I ti ensit rebelyon kont serviter Bondye, Moiz, sa zonm ki ti annan plis limilite lo later. (Nonm 12:3; 16:1-3, 32, 33) Maler ti ariv lo Kaen, Balaam, ek Kora. Sa bann legzanp frapan i ansenny nou lenportans pour ekout konsey bann ki Zeova i servi pour desarz responsabilite e pour annan respe pour zot.

13. Ki benediksyon profet Izai ti predir pour bann ki soumet avek sa laranzman ansyen?

¹³ Lekel ki pa ti a anvi benefisye atraver sa laranzman merveye pour sirveyans ki nou Lider in etabli dan kongregasyon Kretyen? Profet Izai ti predir bann benefis ki sa laranzman ti pou anmennen, an dizan: “Gete! En lerwa pou renny pour ladrwatir; e bann prens zot, zot pou diriz konman bann prens pour lazistis. E sakenn i devret parey en landrwa kasyet kont divan e en labri kont tanpet lapli, parey delo ki pe koule dan en later sek, parey lonbraz en gro ros dan en later epize.” (Izai 32:1, 2) Sak sa bann ansyen i sipoze vin parey “en landrwa” proteksyon ek sekirite. Menm si i difisil pour nou  soumet avek lotorite, annou priy lo sa size e fer bokou zefor pour obeir e soumet avek sa lotorite ki Bondye in apwente dan kongregasyon.

Konman ki bann Ansyen i soumet avek Kris konman Lider

14, 15. Konman ki bann ki dirize dan kongregasyon i montre ki zot soumet avek lotorite Kris?

¹⁴ Tou Kretyen—sirtou bann ansyen—i bezwen swiv Kris konman zot Lider. Bann sirveyan oubyen ansyen i annan en serten degre lotorite dan kongregasyon. Me zot pa esey ‘konmann lafwa zot bann konpanyon Kretyen’ par esey kontrol zot lavi. (2 Korentyen 1:24) Bann ansyen i pran aker parol Zezi: “Zot konnen ki bann ki konmann bann nasyon i domin lo zot konman met, e bann ki sef i fer santi zot lotorite. Me i pa devret koumsa parmi zot.” (Matye 20:25-27) Anmenmtan ki bann ansyen i desarz zot responsabilite, zot sey servi lezot avek senserite.

¹⁵ Bann Kretyen i ganny ankouraze: “Mazin zot bann dirizan . . . get zot mannyer viv, e imit zot lafwa.” (Ebre 13:7) Nou pa pe ganny demande pour imit bann ansyen akoz se zot ki diriz kongregasyon. Zezi ti dir: “Pa fer apel zot ‘sef’ akoz zot annan en sel ‘Sef’, limenm Mesi.” (Matye 23:10) Se lafwa bann ansyen ki nou devret imite akoz zot menm zot pe imit nou vre Lider, Kris. (1 Korentyen 11:1) Annou vwar serten fason ki bann ansyen i esey fer parey Kris dan zot relasyon avek lezot dan kongregasyon.

16. Kantmenm i ti annan lotorite, ki mannyer Zezi ti tret son bann disip?

¹⁶ Menm si Zezi ti pli siperyer ki bann imen enparfe dan tou sans e i ti posed en lotorite enkonparab sorti kot son Papa, i ti tret son bann disip avek modesti. I pa ti demoraliz bann dimoun ki ti pe ekout li par montre ki i annan en gran konnesans. Zezi ti montre senpati ek konpasyon pour son bann disip, e i ti pran zot bezwen an konsiderasyon. (Matye 15:32; 26:40, 41; Mark 6:31) I pa ti zanmen ekspekte son bann disip pour donn plis ki sa ki zot ti kapab donnen, e i pa ti zanmen enpoz okenn keksoz lo zot ki zot pa ti pou kapab anmennen. (Zan 16:12) Zezi ti ‘dou e annan limilite dan son leker.’ I pa sirprenan alor ki bokou dimoun ti vwar li rekonfortan.—Matye 11:28-30.

17. Konman ki bann ansyen i devret montre modesti parey Kris dan lafason ki zot tret lezot dan kongregasyon?

¹⁷ Si nou Lider, Kris, ti demontre modesti, konbyen plis bann ki diriz kongregasyon i devret montre! Wi, zot bezwen fer atansyon pour pa abiz okenn lotorite ki zot in ganny konfye. E pa servi “parol konplike” kan zot koze zis pour enpresyonn lezot. (1 Korentyen 2:1, 2) Okontrer, zot esey zot mye pour koz parol laverite Biblik avek senplisite ek senserite. Deplis, bann ansyen i esey vin rezonnab dan sa ki zot ekspekte avek lezot e pli atantif anver zot bezwen. (Filipyen 4:5) Konsyan ki tou dimoun i annan son febles, zot konpran mankman zot bann frer. (1 Pyer 4:8) Pa bann ansyen ki annan limilite ek douser i vreman en rekonfor? Sirman.

18. Ki bann ansyen i kapab aprann atraver fason ki Zezi ti tret bann zanfan?

¹⁸ Menm bann senp dimoun ti kapab apros Zezi fasilman. Gete konman i ti reazir kan son bann disip ti reprimann bann  dimoun akoz zot ti “pe anmenn bann pti zanfan kot Zezi.” Zezi ti dir: “Les bann zanfan vin kot mwan, pa anpes zot.” Apre i ti “pran bann zanfan dan son lebra, enpoz lanmen lo zot e beni zot.” (Mark 10:13-16) Zezi ti annan bokou lafeksyon ek labonte, e lezot ti santi zot atire ver li. Dimoun pa ti per Zezi. Menm bann zanfan ti santi zot alez dan son prezans. Bann ansyen osi i bann dimoun ki ou kapab fasilman al ver zot, e ler zot demontre lafeksyon ek labonte, lezot—menm bann zanfan—i santi zot alez avek zot.

19. Kwa ki enplike dan annan “Lespri Kris,” e ki zefor i demande pour fer sa?

¹⁹ Kantite ki bann ansyen i kapab imit Zezi Kri i depan lo ki degre zot konn li. “Lekel ki konn Lespri Senyer pour kapab ansenny li?” Pol ti demande. Apre i ti kontinyen: “Me nou, nou annan Lespri Kris.” (1 Korentyen 2:16) Annan lespri Kris i enplik konn son fason panse ek tou laspe son personnalite afen ki nou a konnen ki i ti a fer dan en serten sitiasyon. Zis mazinen si nou ti konn nou Lider sitan byen koumsa! Wi, pour arive fer sa nou bezwen port byen latansyon lo bann Levanzil e regilyerman ranpli nou lespri avek bann keksoz ki kapab ed nou konpran lavi ek legzanp Zezi. Kan bann ansyen i fer zefor pour swiv Kris konman zot Lider ziska sa degre, sa i fer ki bann dan kongregasyon i pli anvi imit zot lafwa. E bann ansyen pou ganny satisfaksyon letan zot vwar lezot pe swiv lepa nou Lider avek bokou lazwa.

Kontinyen soumet avek Kris konman nou Lider

20, 21. Ki nou devret determinen pour fer vi ki nouvo monn promiz i zis la devan nou?

²⁰ I vreman enportan pour nou tou kontinyen soumet avek Kris konman nou Lider. Anmezir ki nou apros lafen sa sistenm, nou sitiasyon i parey avek pour bann Izraelit lo Laplenn Moab an 1473 A.N.L. Zot ti pros pour antre dan Later Promiz, e Bondye ti dir atraver profet Moiz: “Se ou [Zozye] ki pou anmenn sa pep dan sa landrwa ki Zeova ti zire avek zot zanset pour donn zot.” (Deterononm 31:7, 8) Zozye ti sa enn ki ti’n ganny apwente konman lider. Pour antre dan Later Promiz, bann Izraelit ti bezwen soumet avek Zozye konman zot lider.

²¹ Labib i dir avek nou: “Pa fer apel zot ‘sef’ akoz zot annan en sel ‘Sef’, limenm Mesi.” Se zis Kris ki pou anmenn nou dan sa nouvo monn promiz kot pou annan lazistis. (2 Pyer 3:13) Alors, annou determinen pour soumet avek li konman nou Lider dan tou laspe nou lavi.

[Not anba lo paz]

Eski ou rapel?

• Konman ki Kris ti diriz sa premye kongregasyon?

• Konman ki Kris i diriz son kongregasyon ozordi?

• Akoz nou devret soumet avek bann ki pe diriz kongregasyon?

• Dan ki bann fason bann ansyen i kapab demontre ki Kris i zot Lider?

[Study Questions]

[Portre lo paz 15]

Kris i diriz son kongregasyon e bann sirveyan i dan son lanmen drwat

[Portre lo paz 16]

“Obei zot bann dirizan e swiv  zot lord”

[Portre lo paz 19]

Zezi ti annan bokou lafeksyon e ti fasil pour apros li. Bann ansyen i esey zot mye pour imit li