Pa zanmen tro vye pour aprann

KSENIYA ti ne an 1897. I annan 3 fiy, en garson, 15 pti zanfan, ek 25 aryer pti zanfan. Tou son lavi i ti fer sa ki son paran ti ansenny li pour fer. Menm si i ti’n vin Mosko konman en refizye sorti Repiblik Abkhaz ki sitye ant Lanmer Nwanr ek Caucasus, ki ti pe ganny desire par lager, Kseniya ti ase satisfe avek son lavi, sirtou avek son larelizyon ki son paran ti’n met li ladan.

An 1993, Meri, fiy Kseniya, ti vin en Temwen Zeova. Meri ti konmans koz avek Kseniya lo Zeova ek Labib, me i pa ti oule ekoute. Kseniya ti kontinyen dir avek son fiy, “Mon tro vye pour aprann nouvo keksoz.”

Kantmenm sa, son fiy Meri; madanm son pti zanfan, Londa; ek son aryer pti zanfan Nana ek Zaza, ki zot tou zot ti’n vin Temwen Zeova, ti kontinyen koz avek li lo Labib. En zour swar an 1999, zot ti lir en teks Labib avek li ki ti tous son leker. Dan sa teks ti annan bann parol tousan ki Zezi ti dir avek son bann zapot fidel kan i ti pe entrodwir Repa Senyer. (Lik 22:19, 20) Sa zour swar, alaz 102 an, Kseniya ti deside pour konmans etidye Labib.

“Apre ki mon’n viv pour 102 an,” Kseniya i dir, “Mon’n finalman konpran bi lavi. Aprezan mon realize ki napa nanryen pli meyer ki servi nou Bondye merveye e bon. Mon ankor atantif e an bonn sante. Mon kapab lir san servi linet e mon fer bann aktivite avek mon fanmiy.”

Le 5 Novanm, 2000, Kseniya ti batize. I dir: “Aprezan mon donn mon lavi avek Zeova pour servi li avek lanmour. Mon plas bann magazin ek trak letan mon asize kot bèstòp pre kot mon reste. Bann manm fanmiy i souvan vin vizit mwan, e mon kontan pour partaz avek zot laverite lo Zeova.”

Kseniya pe vreman esper sa zour kan ‘son laser pou vin pli fre ki dan son zenes, e ki i retourn dan bann zour son viger zenes.’ (Zob 33:25) Si en dimoun ki annan plis ki 100 an i santi ki i pa tro vye pour aprann bi lavi dan Labib, me ou, ki ou pou dir?