Nou Glorfifye Zeova Kan Nou Fer Sa Ki I Demann Nou
Nou Glorfifye Zeova Kan Nou Fer Sa Ki I Demann Nou
“Mon pou glorifye li avek remersiman.”—PSONM 69:30.
1. (a) Akoz Zeova i merit ganny glorifye? (b) Konman ki nou glorifye li avek remersiman?
ZEOVA i Bondye Tou Pwisan, Souvren Iniversel, ek Kreater. Se pour sa ki son non ek son plan i merit ganny glorifye. Glorifye Zeova i vedir estim li bokou, loue li, e elev li par nou parol ek nou aksyon. Pour fer sa “avek remersiman,” nou bezwen toultan rekonesan pour sa ki i pe fer pour nou la konmela e pour sa ki i pou fer dan lavenir. Revelasyon 4:11 i montre nou latitid ki nou devret annan, kot bann kreatir spirityel dan lesyel i deklare: “Nou Senyer, nou Bondye, ou merite resevwar laglwar, loner ek pisans, parski ou’n kree tou keksoz, e se par ou lavolonte ki zot egziste e ki zot in ganny kree.” Ki mannyer nou glorifye Zeova? Par aprann konsernan li e fer sa ki i demann nou pour fer. Nou devret santi parey sa psalmis ti santi kan i ti dir: “Ansenny mwan pour fer ou lavolonte, akoz ou mon Bondye.”—Psonm 143:10.
2. Konman ki Zeova i azir avek bann ki glorifye li, e bann ki pa glorifye li?
2 Zeova i vreman apresye bann ki glorifye li. Se pour sa ki i “rekonpans tou bann ki rod li.” (Ebre 11:6) Konman i rekonpans nou? Zezi ti dir dan lapriyer avek son Papa seles: “[Lavi eternel, NW ] savedir ki zot konn ou konman sel vre Bondye, ek Zezi-Kri ki ou’n anvoye.” (Zan 17:3) Wi, bann ki “glorifye [Zeova] avek remersiman” pou “posed later, e zot pou reste lo la pour touzour.” (Psonm 37:29) Lo lot kote, “pou napa okenn lavenir pour okenn move dimoun.” (Proverb 24:20) Dan sa bann dernyen zour, i vreman annan en gran nesesite pour glorifye Zeova akoz byento i pou detrir bann dimoun mesan e prezerv sa bann ki drwat. “Lemonn pou disparet ek tou son bann dezir; me sa ki fer lavolonte Bondye i reste eternelman.”—1 Zan 2:17; Proverb 2:21, 22.
3. Akoz nou devret port latansyon lo liv Malaki?
3 Lavolonte Zeova i ganny trouve dan Labib, parski “tou Lekritir i enspire par Bondye.” (2 Timote 3:16) Parol Bondye i kontyen plizyer resi lo konman ki Zeova i beni bann ki glorifye li e sa ki arive avek bann ki pa glorifye li. Enn sa bann resi i annan pour fer avek sa ki ti arive an Izrael pandan lepok profet Malaki. Malaki ti ekrir sa liv ki port son non, apepre lannen 443 A.N.L., pandan lepok ki Neemya ti gouverner Zida. Sa liv pwisan e enteresan i kontyen lenformasyon ek profesi ki’n “ganny ekri konman en lavertisman pour nou, ki’n ariv dan letan lafen.” (1 Korentyen 10:11) Port latansyon lo parol Malaki i kapab ed nou pour prepar pour “gran zour efreyan Zeova,” letan I pou detrir sa sistenm mesan.—Malaki 4:5.
4. Ki sa sis pwen ki nou pou port latansyon lo la dan Malaki sapit 1?
4 Konman ki liv Malaki, ki’n ganny ekrir plis ki 2,400 an pase, i ed nou dan sa 21 tyenm syek pour prepar pour sa gran zour efreyan Zeova? Premye sapit i atir nou latansyon lo omwen sis pwen ki tre esansyel afen ki nou a kapab glorifye Zeova avek remersiman pour ganny son faver ek lavi eternel: (1) Zeova i kontan son pep. (2) Nou bezwen montre lapresyasyon pour bann keksoz sakre. (3) Zeova i ekspekte ki nou fer nou mye pour li. (4) Vre ladorasyon i ganny motive par lanmour dezenterese, non pa par vorasite. (5) En servis ki akseptab pour Bondye i pa senpleman en devwar ki poz en fardo lo nou. (6) Nou tou nou bezwen rann kont devan Bondye. Alors, annou vwar sak sa bann pwen par egzamin Malaki sapit 1 dan premye lartik dan sa seri trwa lartik lo liv Malaki.
Zeova i kontan son Pep
5, 6. (a) Akoz Zeova ti kontan Zakob? (b) Si nou imit fidelite Zakob, ki nou kapab ekspekte?
5 Lanmour Zeova i byen kler dan bann premye verse Malaki. Son liv i konmans par sa parol: “En deklarasyon: Parol Zeova konsernan Izrael.” Deplis, Bondye i dir: “Mon’n kontan zot.” An sitan en legzanp, dan sa menm verse, Zeova i dir: “Mon ti kontan Zakob.” Zakob ti en zonm ki ti annan lafwa dan Zeova. Avek letan, Zeova ti sanz non Zakob e apel li Izrael, e i ti vin en zanset nasyon Izrael. Zeova ti kontan Zakob akoz i ti en zonm ki ti annan lafwa. Zeova ti osi kontan lezot Izraelit ki ti demontre menm latitid avek Zakob.—Malaki 1:1, 2.
6 Si nou kontan Zeova e fidelman reste parmi son pep, nou kapab ganny rekonforte par sa deklarasyon ki trouve dan 1 Samyel 12:22: “Zeova pa pou abandonn son pep akoz son gran non.” Zeova i kontan son pep e i rekonpans zot, e finalman avek lavi eternel. Alors nou lir: “Met ou konfyans dan Zeova e fer sa ki byen; reste lo later, e azir avek fidelite. Met ou plezir dan Zeova, e i pou donn ou bann demann ou leker.” (Psonm 37:3, 4) Kontan Zeova i enplik en dezyenm pwen ki Malaki sapit 1 i diriz nou latansyon lo la.
Montre Lapresyasyon pour Keksoz sakre
7. Akoz Zeova ti ay Ezai?
7 Letan nou lir Malaki 1:2, 3, apre ki Zeova i dir, “Mon ti kontan Zakob,” i dir, “Mon ti ay Ezai.” Akoz sa ti leka? Zakob ti glorifye Zeova, me son frer, Ezai, pa ti fer sa. Ezai ti osi ganny apele Edom. Dan Malaki 1:4, pei Edom i ganny apele teritwar mesanste e son bann zabitan i ganny kondannen. Sa non Edom (ki vedir “Rouz”) ti ganny donnen avek Ezai apre ki i ti vann son drwa premye ne ki ti presye avek Zakob pour en styou rouz. Zenez 25:34 i dir: “Ezai ti mepriz son drwa premye ne.” Pol ti enplor son bann konpanyon Kretyen pour fer atansyon ki “personn pa anmenn en lavi imoral e mank respe pour keksoz sakre parey Ezai ki pour en sel repa ti vann son drwa konman en garson premye ne.”—Ebre 12:14-16.
8. Kwa ki ti fer Pol konpar Ezai avek en dimoun ki anmenn en lavi imoral?
8 Akoz Pol ti asosye sa ki Ezai ti fer avek en lavi imoral? Parski si nou annan menm mantalite avek Ezai, sa i kapab fer nou mank lapresyasyon pour bann keksoz sakre. An retour, sa i kapab fer nou fer bann pese grav, parey fornikasyon. Alor, nou kapab demann nou lekor: ‘Eski parler mon santi mwan tante pour sanz mon leritaz spirityel—lavi eternel—pour en keksoz tanporer zis parey en bol lantiy? Eski petet mon pe mepriz bann keksoz sakre san ki mon realize?’ Ezai ti enpasyan pour satisfer en dezir fizik. I ti dir avek Zakob: “Depese, silvouple, donn mwan en pe sa rouz.” (Zenez 25:30) Malerezman, serten serviter Bondye in an realite dir: “Depese! Akfer fodre esper en maryaz onorab?” Lanvi pour satisfer zot dezir seksyel, menm si sa i kapab kout zot ser, i’n vin parey sa bol lantiy pour zot.
9. Konman ki nou kapab gard lakrent avek respe profon pour Zeova?
9 Fotespere ki nou pa zanmen mepriz bann keksoz spirityel par mank respe pour lapirte, lentegrite, ek nou leritaz spirityel. Olye ki nou vin parey Ezai, annou fer parey Zakob ki ti fidel e annou gard sa lakrent avek profon respe pour Bondye par montre ki nou vreman apresye bann keksoz sakre. Ki mannyer nou kapab fer sa? Par fer sir ki nou pe fer sa ki Zeova i demann nou pour fer. Lozikman, sa i anmenn nou lo sa trwazyenm pwen ki ganny fer resorti dan Malaki sapit 1. Ki pwen?
Fer nou mye pour Zeova
10. Dan ki fason bann pret ti pe mepriz latab Zeova?
10 Bann pret an Zida ki ti pe servi dan tanp an Zerizalenm dan letan Malaki pa ti pe ofer Zeova bann sakrifis ki pli meyer. Malaki 1:6-8 i dir: “ ‘En garson, lo son par, i onor son papa; e en serviter, son gran met. Alor si mon en papa, oli loner pour mwan? E si mon en gran met, oli lakrent pour mwan?’ Zeova bann larme in dir avek zot, bann pret ki pe mepriz mon non.” “Dan ki fason nou’n mepriz ou non?” bann pret ti demande. “Par prezant lo mon lotel dipen kontaminen,” Zeova ti reponn. “Dan ki fason nou’n kontamin ou?” bann pret ti demande. Alor Zeova ti dir zot: “Par dir: ‘Latab Zeova i en keksoz pour meprize.’ ” Sa bann pret ti montre ki zot mepriz latab Zeova sak fwa ki zot ti prezant en zannimo diform konman sakrifis, an dizan: “I napa nanryen mal.”
11. (a) Ki Zeova ti dir konsernan bann sakrifis ki pa ti akseptab? (b) Dan ki sans bann dimoun an zeneral ti annan tor?
11 Zeova ti apre rezonn avek zot konsernan sa bann sakrifis ki pa ti akseptab: “Anmenn li kot ou gouverner, silvouple. Eski i pou pran plezir dan ou, oubyen eski i pou byen resevwar ou?” Definitivman zot gouverner pa ti pou pran plezir dan en kado koumsa. Alor, ki mannyer Souvren Iniversel i ava aksepte sa bann lofrann diform! E pa zis bann pret ki ti annan tor. I vre ki zot ti pe mepriz Zeova par ofer sa bann sakrifis. Me eski lepep an zeneral ti inosan? Pa ditou! Se zot ki ti’n swazir sa bann zannimo ki pa vwar kler, ki bwate, e ki malad, e anmenn zot kot bann pret pour sakrifye. Pa pese tousala!
12. Konman ki nou ganny led pour fer nou mye pour Zeova?
12 Fer nou mye pour Zeova i sa fason pour montre li ki nou vreman kontan li. (Matye 22:37, 38) Kontrerman avek bann pret difisil dan letan Malaki, lorganizasyon Zeova denozour i transmet lenstriksyon Biblik ki ed nou pour glorifye Zeova avek remersiman par fer sa ki i demann nou pour fer. An rapor avek sa, nou vwar sa katriyenm pwen ki nou kapab tire dan Malaki sapit 1.
Vre Ladorasyon i ganny motive par Lanmour, pa par Vorasite
13. Ki bann pret ti pe fer ki montre ki zot ti ganny motive par vorasite?
13 Bann pret dan letan Malaki ti egois, zot ti mank lanmour e zot ti voras larzan. Ki mannyer nou konn sa? Malaki 1:10 i dir: “ ‘Lekel ankor parmi zot ki pou ferm bann laport? E zot bann zonm zot pa pou alim mon lotel—pour nanryen. Mon pa pran okenn plezir dan zot,’ Zeova bann larme in dir, ‘e mon pa pran plezir dan lofrann ki sorti dan zot lanmen.’ ” Wi, sa bann pret voras ti al ziska pour demann en lapey pour bann pli pti servis ki zot ti rann dan tanp, menm pour ferm laport e alim dife lo lotel! I pa etonnan ki Zeova pa ti pran okenn plezir dan bann lofrann ki ti sorti dan zot lanmen!
14. Akoz nou kapab dir ki Temwen Zeova i ganny motive par lanmour?
14 Vorasite ek legoism sa bann pret peser dan ansyen Zerizalenm i kapab fer nou rapel ki Labib i dir ki bann dimoun voras pa pou erit Rwayonm Bondye. (1 Korentyen 6:9, 10) Kan nou reflesir lo latitid egois sa bann pret, sa i ogmant nou lapresyasyon pour sa travay predikasyon ki Temwen Zeova pe fer dan lemonn antye. I en travay volonter; nou pa zanmen demann okenn lapey pour nou travay predikasyon. Non, “nou pa parey sa kantite lezot dimoun ki [vann, NW ] parol Bondye.” (2 Korentyen 2:17) Parey Pol, nou tou nou kapab vreman dir: “Mon ti anons zot gratwitman Levanzil Bondye.” (2 Korentyen 11:7) Dan Traduction du monde nouveau, i dir ki Pol ti “anons zot sa bon nouvel Bondye avek plezir.” Sa i anmenn nou lo sa senkyenm pwen ki Malaki sapit 1 i atir nou latansyon lo la.
Servis Bondye pa en Devwar ki poz en Fardo lo nou
15, 16. (a) Ki latitid bann pret ti annan anver ofer sakrifis? (b) Konman ki bann Temwen Zeova i ofer zot sakrifis?
15 Bann pret enfidel dan ansyen Zerizalenm ti vwar lofrann sakrifis konman en devwar ki ti fatigan. I ti en fardo pour zot. Parey nou remarke dan Malaki 1:13, Bondye ti dir zot: “Zot in dir, ‘Gete! Pa i fatigan!’ e zot in montre en mepri pour sa.” Sa bann pret ti montre en mepri pour bann keksoz sakre Bondye. Annou priye ki nou personnelman nou pa zanmen vin parey zot. Plito, annou touzour manifeste sa latitid ki evidan dan 1 Zan 5:3: “Annefe, la lanmour Bondye: ki nou obei son konmannman; e son bann konmannman i pa en fardo.”
16 Annou pran plezir pour ofer Bondye bann sakrifis spirityel, e pa zanmen konsider li konman en fardo, en keksoz ki fatigan. Annou port latansyon lo sa parol profetik: “Dir avek [Zeova], zot tou, ‘Ki ou pardonn fot; e aksepte sa ki bon, e an retour nou pou ofer bann zenn toro nou lalev.’ ” (Osea 14:2) Sa lekspresyon “zenn toro nou lalev” pe endik bann sakrifis spirityel, sa ki nou dir kan nou loue Zeova e kan nou koz lo son bann plan. Ebre 13:15 i dir: “Atraver [Zezi Kri], annou touzour [ofer Bondye bann sakrifis louanz, NW ], setadir, annou toultan loue son non par nou labous.” Pa nou vreman kontan ki nou bann sakrifis spirityel pa senpleman en devwar, me i en fason pour demontre nou gran lanmour pour Bondye! Sa i anmenn nou lo en sizyenm pwen ki nou kapab aprann dan Malaki sapit 1.
Nou tou nou bezwen rann Kont
17, 18. (a) Akoz Zeova ti modi “sa enn ki ti pe azir avek riz”? (b) Ki bann ki ti azir avek riz pa ti pran an konsiderasyon?
17 Bann dimoun ki ti viv dan letan Malaki ti responsab pour sa ki zot ti fer, e nou osi parey. (Romen 14:12; Galat 6:5) Se pour sa ki Malaki 1:14 i dir: “Modi sa enn ki pe azir avek riz kan sa ler i annan en mal [san defo] dan son troupo, e i pe fer en ve e sakrifye avek Zeova enn ki annan defo.” En zonm ki ti annan en troupo ti napa zis en sel zannimo—par egzanp, en sel mouton—ki fer ki i ti napa swa. Kan i ti pe swazir en zannimo pour sakrifye, i pa ti oblize swazir enn ki pa vwar kler, enn ki bwate, oubyen enn ki malad. Me si vreman i ti swazir enn ki diform, sa ti pou montre ki i mepriz laranzman ki Zeova ti’n fer pour sakrifis, akoz en zonm ki ti annan en troupo zannimo ti pou kapab sirman trouv enn ki ti napa defo!
18 Zeova ti annan rezon, alor, pour modi sa enn ki ti pe azir avek riz, sa enn ki ti annan en zannimo mal ki apropriye me ki ti anmenn—menm petet trenn—enn ki pa vwar kler, ki bwate, oubyen ki malad ziska kot pret pour sakrifye. Pourtan, napa okenn lendikasyon ki okenn pret ti sit Lalwa Bondye pour montre ki bann zannimo avek diformite pa ti akseptab. (Levitik 22:17-20) Nenport dimoun ki rezonn byen ti konnen ki zot ti pou mal pase si zot ti’n esey donn zot gouverner en tel kado. Me an realite, se avek Souvren Iniversel, Zeova, ki bokou pli gran ki okenn gouverner imen, ki zot ti pe ofer sa kado. Malaki 1:14 i met li koumsa: “ ‘Mon en gran Lerwa,’ Zeova bann larme in dir, ‘e mon non pou enspir lakrent parmi bann nasyon.’ ”
19. Ki nou pe vreman espere, e ki nou devret pe fer?
19 Etan bann serviter fidel Bondye, nou pe vreman esper sa zour kan tou imen pou onor nou gran Lerwa, Zeova. Sa letan, “later pou ranpli avek konnesans Zeova parey delo i kouver lanmer.” (Izai 11:9) Antretan, annou fer nou mye pour fer sa ki Bondye i demande par imit sa psalmis ki ti dir: “Mon pou glorifye li avek remersiman.” (Psonm 69:30) Pour arive fer sa, Malaki i annan ankor konsey ki kapab benefisye nou. Annou alor egzamin lezot porsyon liv Malaki dan sa de lartik ki pou swiv.
Eski ou rapel?
• Akoz nou devret glorifye Zeova?
• Akoz bann sakrifis ki bann pret ti pe ofer dan letan Malaki pa ti akseptab pour Zeova?
• Konman nou ofer Zeova en sakrifis louanz?
• Ki motivasyon nou devret annan dan vre ladorasyon?
[Study Questions]
[Portre lo paz 18]
Profesi Malaki i al ziska nou letan
[Portre lo paz 19]
Ezai pa ti apresye bann keksoz sakre
[Portre lo paz 20]
Bann pret ek lepep ti ofer bann sakrifis ki pa ti akseptab
[Portre lo paz 21]
Temwen Zeova partou dan lemonn pe volonterman ofer sakrifis louanz