Servi Prensip Bondye Pour Gid Ou Lepa
Servi Prensip Bondye Pour Gid Ou Lepa
“[Zeova] pe ansenny ou pour ou prop profi.”—IZAI 48:17.
1. Konman ki nou Kreater i gid nou?
OFIRAMEZIR ki bann syantis i travay dir pour dekouver sekre liniver, zot enpresyonnen par sa kantite lenerzi ki liniver otour nou i kontyen. Nou soley—en zetwal ki en groser mwayenn—i prodwir menm kantite lenerzi avek “100 bilyon bonm idrozenn ki pe eksploze tou le segonn.” Nou Kreater i kapab kontrol e diriz sa bann lekor seles imans gras a son pwisans ki napa limit. (Zob 38:32; Izai 40:26) Me nou bann imen ki’n ganny sa don pour swazir, pour disteng sa ki byen moralman, pour rezonnen, e pour konpran keksoz spirityel, konman ki nou Kreater i swazir pour gid nou? Avek lanmour, i gid nou an servan son lalwa parfe ek son bann prensip tre eleve, ansanm avek nou konsyans ki’n ganny byen formen.—2 Samyel 22:31; Romen 2:14, 15.
2, 3. Ki kalite lobeisans Bondye i kontan?
2 Bondye i kontan bann kreatir entelizan ki swazir pour obeir li. (Proverb 27:11) Olye progranm nou dan en fason ki nou ti pou bezwen soumet san reflesir parey bann robot ki napa lespri, Zeova in donn nou sa abilite pour swazir afen ki nou kapab fer bann desizyon pour fer sa ki byen apre ki nou’n ganny byen enformen.—Ebre 5:14.
3 Zezi ki ti parfetman reflekte son Papa, ti dir avek son bann disip: “Zot mon bann zanmi, si zot obei mon konmannman. Mon nepli apel zot serviter.” (Zan 15:14, 15) Dan letan ansyen, en serviter ti napa bokou swa me pour obeir lord son met. Parkont, en lanmitye i kapab devlope si bann kalite atiran i ganny demontre. Nou kapab vin zanmi Zeova. (Zak 2:23) Sa lanmitye i ganny ranforsi par lanmour. Zezi ti asosye lobeisans anver Bondye avek lanmour kan i ti dir: “Si en dimoun i kontan mwan, i ava obei mon lansennyman. Mon Papa pou kontan li.” (Zan 14:23) Parski i kontan nou e i anvi byen gid nou, Zeova i envit nou pour viv dapre son bann prensip.
Bann Prensip Bondye
4. Konman ou ti a dekrir prensip?
4 Kisisa prensip? En prensip in ganny dekrir konman “en laverite zeneral oubyen fondamantal: en lalwa, doktrin oubyen lide zeneral e fondamantal lo ki lezot [lalwa, doktrin, lide] i baze e dan ki zot sorti.” (Webster’s Third New International Dictionary) En letid aprofondi lo Labib i revele ki nou Papa ki dan lesyel i fourni bann prensip fondamantal ki kouver en varyete sitiasyon ek laspe lavi. I fer sa avek nou byenfe eternel antet. Sa i anliny avek sa ki Lerwa Salomon ti ekrir: “Ekoute, mon garson, e aksepte mon parol. Alors bann lannen lavi pou vin bokou pour ou. Mon pou enstri ou dan semen lasazes; mon pou fer ou mars dan santye ladrwatir.” (Proverb 4:10, 11) Bann prensip debaz ki Zeova in fourni i annan en lefe lo nou relasyon avek li, avek nou prosen, nou ladorasyon, ek nou lavi toulezour. (Psonm 1:1) Annou vwar serten sa bann prensip debaz.
5. Donn ennde legzanp serten prensip debaz.
5 Konsernan nou relasyon avek Zeova, Zezi ti dir: “Kontan Senyer ou Bondye avek tou ou leker, avek tou ou lam, e avek tou ou lespri.” (Matye 22:37) Deplis, Bondye i fourni bann prensip ki annan pour fer avek nou relasyon avek nou prosen, parey Lareg d-or: “Fer pour lezot sa ki ou oule lezot i fer pour ou.” (Matye 7:12; Galat 6:10; Tit 3:2) An rapor avek ladorasyon, nou ganny ankouraze: “Annou rode konman pous kanmarad pour annan lanmour e fer sa ki byen. Pa abandonn zot lasanble parey labitid serten parmi zot.” (Ebre 10:24, 25) Konsernan lezot laspe dan lavi toulezour, zapot Pol i dir: “Alor, ki ou manze, oubyen bwar, ou nenport kwa ki ou fer, fer tou pour laglwar Bondye.” (1 Korentyen 10:31) I annan ankor bokou bokou lezot prensip dan Parol Bondye.
6. Konman ki prensip i ganny diferansye avek lalwa?
6 Prensip i bann laverite vivan e esansyel, e bann Kretyen ki saz i aprann kontan zot. Zeova ti enspir Salomon pour ekrir: “Port latansyon lo mon parol. Avans ou zorey anver mon parol. Fodre ki i pa elwannyen avek ou lizye. Gard zot dan milye ou leker. Parski zot lavi pour bann ki trouv zot e lasante pour tou zot laser.” (Proverb 4:20-22) Konman ki prensip i diferan avek lalwa? Prensip i fourni fondasyon pour lalwa. Bann lareg, ki tant pour pli presi, i kapab aplikab pour serten letan oubyen sitiasyon, me bann prensip i pour touzour. (Psonm 119:111) Bann prensip Bondye pa demode oubyen mor. Parol enspire profet Izai i en realite: “Zerb ver in sek, fler in fletri, me parol nou Bondye, li i pou dir pour letan endefini.”—Izai 40:8.
Reflesir e azir dapre bann Prensip
7. Konman ki Parol Bondye i ankouraz nou pour reflesir e azir dapre bann prensip debaz?
7 Souvannfwa, “parol nou Bondye” i ankouraz nou pour reflesir e azir dapre bann prensip. Kan Zezi ti ganny demande pour fer en rezimen lo Lalwa, i ti fer de deklarasyon bref—enn pour met lanfaz lo lanmour pour Zeova, e lot pour aksantye lanmour pour nou prosen. (Matye 22:37-40) An fezan sa, Zezi ti pe refer avek en rezimen an bref ki ti’n deza ganny fer lo serten prensip debaz dan Lalwa Mozaik, ki trouve dan Deterononm 6:4, 5: “Zeova nou Bondye i en sel Zeova. E ou devret kontan Zeova ou Bondye avek tou ou leker, avek tou ou nanm, avek tou ou lespri, e avek tou ou lafors.” Probableman, Zezi ti pe osi mazin direktiv Bondye ki trouve dan Levitik 19:18. Dan konklizyon kler, bref, e pwisan liv Eklezyast, parol Lerwa Salomon i anglob en kantite lalwa Bondye: “Konklizyon sa size, tou keksoz in ganny antann, se: Annan lakrent pour sa vre Bondye e gard son bann komannman. Akoz sa i tou lobligasyon zonm. Akoz sa vre Bondye li menm pou anmenn tou sort kalite travay an zizman an relasyon avek tou keksoz kasyet, konsernan sa ki bon ou move.”—Eklezyast 12:13, 14; Mika 6:8.
8. Akoz i en proteksyon kan nou byen konpran bann prensip debaz dan Labib?
8 Letan nou konpran byen sa bann prensip debaz, sa i kapab ed nou pour konpran e aplik bann prensip pli presi. Deplis, si nou pa konpran byen bann prensip debaz e aksepte zot, nou pa pou kapab fer bann bon desizyon e nou lafwa i kapab fasilman ganny afebli. (Efezyen 4:14) Si nou met sa bann prensip dan nou leker ek nou lespri, nou pou pare pour servi zot pour fer bann desizyon. Kan nou aplik zot avek konprenezon, zot anmenn sikse.—Zozye 1:8; Proverb 4:1-9.
9. Akoz i pa touzour fasil pour rekonnet e aplik bann prensip Labib?
9 I pa si fasil pour rekonnet e aplik bann prensip Labib parey i leka avek lalwa. Vi ki nou bann imen enparfe, nou kapab evite fer zefor neseser pour rezonn lo bann prensip. Petet nou ti a prefer en lareg spesifik kan nou annan en desizyon pour fer oubyen kan nou trouv nou dan en sitiasyon difisil. Parfwa nou kapab rod konsey avek en Kretyen mir—petet en ansyen dan kongregasyon—e nou ekspekte ganny en lareg spesifik ki aplik avek nou sitiasyon. Toudmenm, petet Labib oubyen bann piblikasyon ki baze lo Labib pa pou fourni en lareg spesifik, e menm si i donn enn, i kapab ki i pa pou aplikab tou letan e dan tou sirkonstans. Petet ou mazin sa zonm ki ti demann Zezi: “Met, dir mon frer partaz avek mwan bann byen ki nou’n erite.” Olye donn en lalwa pour rezourd dispit ant bann frer ek ser, Zezi ti donn en prensip zeneral: “Fer atansyon, lavaris.” Alor, Zezi ti fourni en gidans ki ti itil sa letan e konmela osi.—Lik 12:13-15.
10. Konman ki azir an armoni avek bann prensip i revel motivasyon ki nou annan dan nou leker?
10 Probableman ou’n deza vwar dimoun ki menm si zot obeir lalwa zot fer li kontreker, akoz zot per pinisyon. Respe pour bann prensip pa permet en tel latitid. Natir bann prensip i pous bann ki ganny gide par zot pour reazir avek tou zot leker. Anfet, pour laplipar prensip, napa en pinisyon imedya pour bann ki pa konform avek zot. Sa i donn nou loportinite pour montre akoz nou obeir Zeova, ki motivasyon i annan dan nou leker. Nou vwar en legzanp dan ka Zozef kan i ti refiz bann lapros imoral ki madanm Potifar ti fer avek li. Kantmenm Zeova pa ti ankor donn en lalwa an ekri kont adilter e ti napa okenn pinisyon ki i ti’n preskrir pour bann ki annan relasyon avek madanm en lot zonm, Zozef ti konsyan prensip fidelite dan maryaz ki Bondye li menm ti’n etabli. (Zenez 2:24; 12:18-20) Par son reaksyon nou kapab vwar ki sa bann prensip ti enfliyans li bokou: “Konman mon a kapab komet sa keksoz sitan mal e vreman fer pese kont Bondye?”—Zenez 39:9.
11. Dan ki domenn bann Kretyen i anvi ganny gide par prensip Zeova?
11 Denozour, bann Kretyen i anvi les prensip Zeova gid zot an rapor avek zot lavi personnel tel konman zot frekantasyon, divertisman, lanmizik, ek sa ki zot lir. (1 Korentyen 15:33; Filipyen 4:8) Anmezir ki nou konnesans, konprenezon ek lapresyasyon pour Zeova ek son standar i ogmante, nou konsyans ek nou sans moral pou ed nou pour aplik son bann prensip dan nenport ki sitiasyon nou ladan, menm dan bann domenn ki tre personnel. Si nou ganny gide par prensip, nou pa pou rod bann pti defo dan lalwa Bondye e nou pa ni pou imit bann ki sey vwar ki zistans zot kapab ale san vreman kas en serten lalwa. Nou realize ki en tel fason panse i anmenn problenm lo nou menm e i danzere.—Zak 1:22-25.
12. Kwa ki neseser afen ki nou kapab ganny gide par bann prensip Bondye?
12 Bann Kretyen ki matir i rekonnet ki lakle pour swiv bann prensip Bondye se konnen konman ki Zeova i santi lo en serten keksoz. En psalmis i ankouraz nou: “Zot ki kontan Zeova, ay sa ki move.” (Psonm 97:10) Proverb 6:16-19 i nonm bann keksoz ki Bondye ti pou klasifye konman move, an dizan: “I annan sis keksoz ki Zeova i deteste; wi, set keksoz ki detestab pour son nanm: bann lizye arogan, en lalang mansonz e bann lanmen ki pe vers disan inosan, en leker ki pe fer bann plan malisye, bann lipye ki vitman tay ver lemal, en fo temwen ki larg bann mansonz e nenport ki ki senm kerel ant bann frer.” Kan en dezir pour reflekte lafason ki Zeova i santi lo sa bann keksoz debaz i gid nou lavi, viv an akor avek bann prensip i vin en pratik kontinyel.—Zeremi 22:16.
Bon Motivasyon i esansyel
13. Ki kalite rezonnman Zezi ti met lanfaz lo la dan son Sermon lo montanny?
13 Letan nou konn bann prensip e nou aplik zot, sa i osi protez nou pour pa tonm dan sa pyez pour donn Zeova en ladorasyon vid ki zis en routin. I annan en diferans ant swiv bann prensip e obeir bann lalwa strikteman. Zezi ti klerman montre sa dan son Sermon lo montanny. (Matye 5:17-48) Mazinen ki Zezi ti pe koz avek bann Zwif, alors zot ti devret annan en kondwit ki’n ganny enfliyanse avek Lalwa Mozaik. Me an realite zot ti annan en fo konsep lo Lalwa. Zot ti’n met plis lanfaz lo bann detay ki ti mwen enportan olye lo vre sans Lalwa. E zot ti met lanfaz lo zot tradisyon, zot ti konsider li pli enportan ki lansennyman Bondye. (Matye 12:9-12; 15:1-9) Alors, bann dimoun an zeneral pa ti ganny ansennyen pour reflesir an servan bann prensip.
14. Konman ki Zezi ti ed bann ki ti ekout li pour reflesir an servan bann prensip?
14 Parkont, dan son Sermon lo montanny Zezi ti enkli bann prensip dan senk domenn moralite: lakoler, maryaz ek divors, promes, revanz, e lanmour ek laenn. Dan sak ka, Zezi ti montre byenfe ki nou gannyen kan nou swiv en prensip. Dan sa fason, Zezi ti elev standar moral pour son bann disip. Par egzanp, konsernan adilter, i ti donn en prensip ki pa zis protez nou aksyon me osi nou panse ek dezir: “En dimoun ki get madanm en lot zonm avek dezir in deza komet adilter avek li dan son leker.”—Matye 5:28.
15. Konman ki nou kapab evit okenn tandans pour met tro bokou lanfaz lo tou pti detay lalwa?
15 Sa legzanp i montre ki nou pa devret zanmen oubliy lentansyon ek rezon par deryer bann prensip Zeova. Nou pa devret esey ganny faver Bondye zis atraver nou bann aktivite ladorasyon ki nou fer zis par routin. Zezi ti fer vwar ki en tel latitid ti mal an referan avek mizerikord ek lanmour Bondye. (Matye 12:7; Lik 6:1-11) Kan nou swiv bann prensip Labib, nou pou evite esey viv (oubyen ekspekte lezot pour viv) dapre en lalis lalwa sever ki al pli lwen ki sa ki lansennyman Labib i demande. Nou pou pli konsernen avek bann prensip lanmour ek lobeisans anver Bondye ki avek en ladorasyon ki met lanfaz lo zis laparans.—Lik 11:42.
Bon Rezilta
16. Donn legzanp serten prensip par deryer serten lalwa dan Labib.
16 Anmezir ki nou sey nou mye pour obeir Zeova, i enportan pour rekonnet ki son lalwa i baze lo bann prensip debaz. Par egzanp, bann Kretyen pa devret annan nanryen pour fer avek idolatri, limoralite seksyel, e servi disan. (Akt 15:28, 29) Ki rezon en Kretyen i annan ki siport son pozisyon lo sa bann size? Bondye i merit ganny nou latasman total; nou devret reste fidel avek nou konzwen; e Zeova i sa Enn ki donn nou lavi. (Zenez 2:24; Egzod 20:5; Psonm 36:9) Kan nou konpran prensip par deryer en lalwa, i fer li pli fasil pour nou aksepte e swiv sa lalwa.
17. Ki bon rezilta nou kapab gannyen kan nou rekonnet e aplik bann prensip Labib?
17 Kan nou rekonnet bann prensip par deryer en lalwa e aplik zot, nou realize ki zot pour nou prop dibyen. Bann benediksyon spirityel ki pep Bondye i rezwir i souvan ganny akonpannyen par bann byenfe reel. Par egzanp, bann ki pa fimen, ki viv en lavi moralman prop, e ki respekte karakter sakre disan i evite vin viktim serten maladi. Pareyman, kan nou viv an armoni avek laverite ki nou’n aprann dan Labib, nou kapab benefisye dan sa trwa domenn: ekonomik, sosyal, e familyal. Tou sa bann byenfe reel i prouv valer standar Zeova, ki zot vreman pratik. Me ganny sa bann lavantaz i pa rezon prensipal pour nou aplik bann prensip Bondye. Bann vre Kretyen i obeir Zeova akoz zot kontan li, akoz i merit zot ladorasyon e akoz sa i keksoz apropriye pour fer.—Revelasyon 4:11.
18. Si nou anvi reisi konman en Kretyen, kwa ki devret gid nou lavi?
18 Les nou lavi ganny gide par bann prensip Labib i fer nou viv en kalite lavi pli siperyer, ki dan li menm i kapab atir lezot dimoun ver semen Bondye. Pli enportan ankor, nou lavi i anmenn loner pour Zeova. Nou realize ki Zeova i vreman en Bondye ki ranpli avek lanmour e ki anvi sa ki meyer pour nou. Kan nou fer bann desizyon an akor avek bann prensip Labib e vwar konman ki Zeova i beni nou, nou santi nou pli pre avek li. Wi, nou devlop en relasyon ranpli avek lanmour avek nou Papa ki dan lesyel.
Eski ou rapel?
• Kisisa en prensip?
• Konman ki prensip i diferan avek lalwa?
• Akoz i benefisye nou kan nou reflesir e azir dapre bann prensip?
[Study Questions]
[Bwat lo paz 14]
Wilson, en Kretyen sorti Gana, ti ganny averti ki i ti pou perdi son travay dan detrwa zour. Son dernyen zour travay, i ti ganny anvoye pour lav loto personnel direkter lakonpanni. Kan Wilson ti trouv en sonm larzan dan loto, son siperyer ti dir li ki Bondye ki’n anvoy sa larzan akoz Wilson ti pe al arete travay sa zour. Me Wilson ti aplik bann prensip Labib lo lonnekte e i ti remet sa larzan dan lanmen son direkter. Sa direkter ki ti byen sirprann e enpresyonnen, pa ti zis ofer Wilson en plas travay permanan deswit me i ti osi promot li dan en pli bon plas dan lakonpanni.—Efezyen 4:28.
[Bwat lo paz 15]
Rukia i en madanm Albane ki dan son 60 keksoz. Akoz en dezakor ki ti arive dan fanmiy, i pa ti koz avek son frer pour plis ki 17 an. I ti konmans etidye Labib avek Temwen Zeova e aprann ki bann vre Kretyen i viv anpe avek lezot, e zot pa gard rankin. I ti priye tou lannwit, e avek son leker ki ti pe bat for, i ti al vwar son frer seli. Son nyes ti ouver laport. Byen sirprann, i ti demann Rukia: “Lekel ki’n mor? Ki ou pe fer la?” Rukia ti demande pour vwar son frer. Avek kalm, i ti eksplike ki apre ki i’n aprann bann prensip Labib e konsernan Zeova i ti santi li motive pour fer lape avek son frer. Apre ki zot ti plere e may kanmarad, zot ti selebre sa reinyon spesyal!—Romen 12:17, 18.
[Portre lo paz 17]
[Portre lo paz 17]
Matye 5:3, NW
[Portre lo paz 17]
[Portre lo paz 17]
“Kan Zezi ti war sa lafoul i ti mont lo en montanny e i ti asize. Son bann disip ti vin otour li e i ti konmans ansenny zot.”—MATYE 5:1, 2