Benefisye Avek Labonte Leker Zeova
Benefisye Avek Labonte Leker Zeova
“Lekel ki saz? I pou . . . montre li atantif anver bann akt labonte leker Zeova.”—PSONM 107:43.
1. Kan ki sa lekspresyon “labonte leker” ti ganny servi pour premye fwa dan Labib, e ki kestyon konsernan sa kalite nou pou egzaminen?
APEPRE 4,000 an pase, neve Abraam, Lot, ti dir sa lo Zeova: “Ou pe ogmant ou labonte leker.” (Zenez 19:19) Sa i premye fwa ki sa lekspresyon “labonte leker” i aparet dan Labib. Zakob, Naomi, David, ek lezot serviter Bondye ti osi koz lo sa kalite ki Zeova i annan. (Zenez 32:10; Rit 1:8; 2 Samyel 2:6) Anfet, sa mo “labonte leker” i aparet apepre 250 fwa dan Traduction du monde nouveau. Me kisisa sa labonte leker ki Zeova i annan? I ti ganny demontre anver lekel dan lepase? E konman nou kapab benefisye avek sa kalite ozordi?
2. Akoz i sitan difisil pour dekrir sa mo Ebre ki’n ganny tradwir “labonte leker,” e ki sa lot fason apropriye pour tradwir li?
2 Dan Labib, “labonte leker” i tradiksyon en mo Ebre ki annan en sinifikasyon sitan ris ki laplipar langaz napa en sel mo ki kapab eksprim son definisyon konplet. Alor, bann tradiksyon parey “lanmour,” “mizerikord,” ek “fidelite” pa donn son definisyon egzakt e konplet. Parkont, dapre Theological Wordbook of the Old Testament, sa lekspresyon “labonte leker” i pli konplet e i “pa lwen avek definisyon konplet sa mo.” Traduction du monde nouveau i donn “lanmour fidel” konman en lot fason apropriye pour tradwir sa mo Ebre “labonte leker.”—Egzod 15:13; Psonm 5:7; not anba lo baz.
Diferan avek Lanmour ek Fidelite
3. Konman ki labonte leker i diferan avek lanmour?
3 Labonte leker, oubyen lanmour fidel, i annan en relasyon pros avek sa de kalite, lanmour ek fidelite. Pourtan i diferan avek zot dan bann laspe enportan. Annou vwar konman ki labonte leker ek lanmour i diferan. Nou kapab kontan en keksoz oubyen lide. Labib i mansyonn “kontan diven ek delwil” e “kontan lasazes.” (Proverb 21:17; 29:3) Me labonte leker i annan pour fer avek dimoun, i napa nanryen pour fer avek bann lide oubyen keksoz. Par egzanp, se bann dimoun ki Egzod 20:6 pe refer avek kan i dir ki Zeova pe “demontre labonte leker anver milyenm zenerasyon.”
4. Konman ki labonte leker i diferan avek fidelite?
4 Mo Ebre ki’n ganny tradwir “labonte leker” i osi annan en sinifikasyon pli larz ki sa mo “fidelite.” Dan serten langaz, “fidelite” i souvan ganny servi pour endik latitid ki en dimoun mwen enportan i devret demontre anver son siperyer. Me parey en serser i fer remarke, dapre fason ki Labib i servi sa mo, labonte leker “i souvan refer avek en relasyon tou lekontrer: sa enn ki pli for i fidel anver sa enn ki pli feb oubyen ki pli dan bezwen oubyen ki depan lo lezot.” Alor, Lerwa David ti kapab sipliy Zeova: “Fer ou figir briye lo ou serviter. Sov mwan dan ou labonte leker.” (Psonm 31:16) Zeova, sa enn ki pwisan, i ganny demande pour demontre labonte leker, oubyen lanmour fidel, anver David, sa enn ki dan bezwen. Vi ki sa enn ki dan bezwen napa okenn lotorite lo sa enn ki pli for, alors dan sa ka labonte leker i ganny demontre volonterman, pa kontreker.
5. (a) Ki bann karakteristik labonte leker Bondye ki byen ganny resorti dan son Parol? (b) Ki nou pou vwar konsernan lafason ki Zeova i eksprim son labonte leker?
5 “Lekel ki saz?” sa psalmis ti demande. “I pou . . . montre li atantif anver bann akt labonte leker Zeova.” (Psonm 107:43) Labonte leker Zeova i kapab sov e prezerv lavi. (Psonm 6:4; 119:88, 159) I en proteksyon e en fakter ki anmenn soulazman pour bann problenm. (Psonm 31:16, 21; 40:11; 143:12) Akoz sa kalite, i posib pour nou ganny libere dan pese. (Psonm 25:7) Par revwar serten resi dan Labib e port latansyon lo lezot pasaz Labib, nou pou vwar ki labonte leker Zeova i (1) ganny eksprimen par bann aksyon spesifik e (2) i ganny eksperyanse par son bann serviter fidel.
Delivrans—En fason pour eksprim Labonte Leker
6, 7. (a) Konman ki Zeova in ogmant son labonte leker dan ka Lot? (b) Kan ki Lot ti mansyonn labonte leker Zeova?
6 Petet pli bon fason pour determin grander labonte leker Zeova se par egzamin bann resi dan Labib ki montre sa kalite. Dan Zenez 14:1-16, nou vwar ki Lot, neve Abraam, ti ganny pran par bann lennmi. Me Abraam ti sov Lot. Ankor enn fwa, lavi Lot ti an danze kan Zeova ti deside pour detrir lavil Sodonm kot Lot ek son fanmiy ti reste, ki ti ranpli avek mesanste.—Zenez 18:20-22; 19:12, 13.
7 Zis avan ki Sodonm ti ganny detrir, bann lanz Zeova ti eskort Lot ek son fanmiy an deor sa lavil. Se pour sa ki Lot ti dir: “Ou serviter in trouv faver dan ou lizye ki fer ki ou pe ogmant ou labonte leker, ki ou’n demontre anver mwan pour gard mon nanm vivan.” (Zenez 19:16, 19) Par sa parol, Lot ti rekonnet ki Zeova in demontre en labonte leker eksepsyonnel par sov li. Dan sa ka, labonte leker Bondye ti ganny eksprimen atraver delivrans ek proteksyon.—2 Pyer 2:7.
Labonte Leker Zeova ek son Gidans
8, 9. (a) Ki latas Abraam ti donn son serviter? (b) Akoz sa serviter ti priy pour labonte leker Bondye, e ki ti arive letan i ti pe priye?
8 Dan Zenez sapit 24, nou lir konsernan en lot fason ki Zeova i eksprim son labonte leker, oubyen lanmour fidel. Sa resi i rakonte ki Abraam ti fer son serviter al dan sa pei kot bann fanmiy Abraam i reste pour rod en madanm pour son garson Izaak. (Verse 2-4) Sa misyon ti difisil, me sa serviter ti ganny lasirans ki lanz Zeova ti pou gid li. (Verse 7) Finalman sa serviter ti ariv kot en pwi an deor “lavil Naor” (swa Arann oubyen en landrwa pre lanmenm) zis omoman ki bann madanm ti pe aprose pour vin rod delo. (Verse 10, 11) Kan i ti vwar sa bann madanm pe vin pli pre, i ti konnen ki moman enportan son misyon ti’n arive. Me ki mannyer i ti pou kapab idantifye sa enn ki apropriye?
9 Vi ki i ti konnen ki i bezwen led divin, serviter Abraam ti priye: “Zeova, Bondye mon met Abraam, silvouple fer sa arive, devan mwan ozordi e demontre labonte leker anver mon met Abraam.” (Verse 12) Konman ki Zeova ti pou eksprim son labonte leker? Sa serviter ti demann en siny spesifik pour li kapab idantifye sa zenn fiy ki Bondye in swazir. (Verse 13, 14) Enn sa bann madanm ti fer egzakteman sa ki sa serviter ti’n demann Zeova. Konmsi i ti’n tann son lapriyer! (Verse 15-20) Byen sirprann, sa serviter ti “pe get li avek sezisman.” Toudmenm, ti annan serten fe enportan ki ti bezwen ganny determinen. Eski sa zoli madanm ti trouv fanmiy avek Abraam? Eski i pa ti ankor marye? Alors, sa serviter ti “reste trankil, pour vwar si Zeova ti’n fer son vwayaz en sikse oubyen non.”—Verse 16, 21.
10. Akoz serviter Abraam ti konklir ki Zeova in eksprim son labonte leker anver son met?
10 En pti pe letan apre, sa zenn madanm ti idantifye son lekor konman “fiy Betouel garson Milka, ki i’n ganny atraver Naor [frer Abraam].” (Zenez 11:26; 24:24) Sa menm moman, sa serviter ti realize ki Zeova ti’n reponn son lapriyer. Touse oprofon, i ti bes anba e dir: “Beni Zeova Bondye mon met Abraam, ki pa’n abandonn son labonte leker ek son konfyans anver mon met. Letan mon ti dan semen, Zeova ti gid mwan ver lakaz bann frer mon met.” (Verse 27) Par fourni gidans, Bondye ti demontre labonte leker anver Abraam, met sa serviter.
Labonte Leker Bondye i anmenn Soulazman ek Proteksyon
11, 12. (a) Dan ki bann leprev ki Zozef ti eksperyans labonte leker Zeova? (b) Konman ki Bondye ti eksprim son labonte leker dan ka Zozef ?
11 Aprezan, annou egzamin Zenez sapit 39. I konsantre lo aryer pti zanfan Abraam, Zozef, ki ti ganny vann an lesklavaz Lezip. Toudmenm, Zeova ti avek Zozef. (Verse 1, 2) Anfet, menm Potifar, met Zozef ki ti en Ezipsyen, ti konklir ki “Zeova ti avek li.” (Verse 3) Me Zozef ti fer fas avek en leprev vreman serye. I ti ganny akize konmkwa i’n fors madanm Potifar pour annan relasyon seksyel avek li e i ti ganny met dan prizon. (Verse 7-20) Se “dan kaso” ki “zot ti tortir son lipye avek lasenn, son nanm ti antre dan [kolye] feray.”—Zenez 40:15; Psonm 105:18.
12 Ki ti arive kan i ti pas atraver sa leksperyans vreman difisil? “Zeova ti kontinyen avek Zozef e i ti kontinyen ofer li labonte leker.” (Verse 21a) En akt labonte leker an partikilye ti konmans en seri levennman ki ti anmenn soulazman pour Zozef dan sa bann problenm ki i ti pe rankontre. Zeova ti fer Zozef “trouv faver dan lizye sef zofisye prizon.” (Verse 21b) An rezilta, sa zofisye ti fer li okip en plas enportan. (Verse 22) Apre sa, Zozef ti rankontre sa zonm ki avek letan ti fer Faraon, dirizan Lezip, remark li. (Zenez 40:1-4, 9-15; 41:9-14) Avek letan, lerwa ti promot Zozef konman dezyenm dirizan dan Lezip, ki ti fer li fer en travay ki ti sov lavi ler lafamin ti frap Lezip. (Zenez 41:37-55) Soufrans Zozef ti konmans letan i ti annan 17 an e i ti dir pour plis ki en douzenn lannen! (Zenez 37:2, 4; 41:46) Me pandan tou sa bann lannen ladetres ek douler, Zeova ti demontre son labonte leker anver Zozef par protez li kont maler total e par prezerv son lavi pour ki i annan en rol privilezye dan Son plan.
Labonte Leker Bondye i dir pour touzour
13. (a) Dapre Psonm 136, konman ki Zeova in eksprim son labonte leker? (b) Kisisa vreman labonte leker?
13 Zeova ti konstaman eksprim son labonte leker anver bann Izraelit konman en pep. Psonm 136 i dir ki dan son labonte leker, i ti delivre zot (Verse 10-15), i ti gid zot (Verse 16), e protez zot. (Verse 17-20) Bondye ti osi demontre son labonte leker anver serten endividi. En dimoun ki demontre labonte leker anver son prosen i fer li volonterman pour satisfer en bezwen esansyel. Konsernan labonte leker, en travay referans lo Labib i dir: “I en aksyon ki prezerv oubyen promot lavi. I en lentervansyon an faver en dimoun ki pe sibir en maler oubyen detres.” En spesyalis i dekrir li konman “lanmour an aksyon.”
14, 15. Akoz nou kapab asire ki Lot ti en serviter ki Bondye ti aprouve?
14 Sa bann resi dan Zenez ki nou’n egzaminen i montre ki Zeova pa zanmen aret demontre labonte leker anver bann ki kontan li. Lot, Abraam, ek Zozef ti viv dan diferan sirkonstans e zot ti fer fas avek diferan leprev. Zot ti bann imen enparfe, me zot ti bann serviter Zeova ki i ti aprouve, e zot ti bezwen son led. Nou kapab tir rekonfor dan lefe ki nou Papa seles i demontre labonte leker anver bann tel endividi.
15 Lot ti fer serten desizyon ki pa ti saz, ki ti anmenn difikilte pour li. (Zenez 13:12, 13; 14:11, 12) Me lo lot kote, i ti osi demontre bann bon kalite. Kan de lanz Bondye ti ariv Sodonm, Lot ti demontre lospitalite anver zot. (Zenez 19:1-3) Avek lafwa i ti averti son de zann konsernan destriksyon Sodonm ki ti pe al arive. (Zenez 19:14) Nou kapab vwar pwenn-vi Bondye lo Lot dan 2 Pyer 2:7-9, kot nou lir: “[Zeova] ti delivre Lot, en zis, ki ti byen sagrinen par kondwit deregle bann move dimoun dan son lepok. Annefe, sa zonm zis ki ti viv parmi zot, ti soufer ler i ti war e tann zot bann move laksyon; alor Bondye i konnen ki mannyer i pou delivre bann dimoun ki atase avek li dan difikilte.” Wi, Lot ti en zonm drwat, e sa ki nou’n fek lir lo li i endike ki i ti en dimoun ki ti atase avek Bondye. Parey li, nou kapab rezwir labonte leker Bondye kan nou “anmenn en lavi sen e annan respe pour Bondye.”—2 Pyer 3:11, 12.
16. Konman ki Labib i koz dan en fason favorab lo Abraam ek Zozef ?
16 Sa resi dan Zenez sapit 24 i montre klerman sa relasyon entim ki Abraam ti annan avek Zeova. Premye verse i dir ki “Zeova ti’n beni Abraam dan tou keksoz.” Serviter Abraam ti apel Zeova “Bondye mon met Abraam.” (Verse 12, 27) E disip Zak i dir ki Abraam ti “ganny konsidere konman zis” e “ganny apele zanmi Bondye.” (Zak 2:21-23) Menm keksoz i kapab ganny dir lo Zozef. Sa relasyon pros ant Zeova ek Zozef i remarkab toudilon Zenez sapit 39. (Verse 2, 3, 21, 23) Deplis, disip Etyenn ti dir sa konsernan Zozef: “Bondye ti avek li.”—Akt 7:9.
17. Ki nou kapab aprann atraver legzanp Lot, Abraam ek Zozef ?
17 Sa bann dimoun ki ti eksperyans labonte leker Zeova ki nou’n fek vwar ti bann endividi ki ti annan en bon relasyon avek Zeova e zot ti ganny servi dan plan Bondye dan diferan fason. Zot ti fer fas avek bann lobstak ki zot pa ti pou kapab sirmonte lo zot menm. Lavi Lot, kontinyasyon laliny desandans Abraam ek rol ki Zozef ti pou zwe ti dan risk. Zis Zeova ki ti kapab ranpli bezwen sa bann zonm ki ti atase avek li, e i ti fer sa par entervenir avek bann akt labonte leker. Si nou anvi eksperyans labonte leker Zeova pour touzour, nou bezwen annan en relasyon personnel e pros avek li, e kontinyen fer son lavolonte.—Ezra 7:28; Psonm 18:50.
Serviter Bondye i ganny son Faver
18. Ki diferan teks Labib i endike konsernan labonte leker Zeova?
18 Labonte leker Zeova “in ranpli later,” e konman nou apresye sa kalite dan Bondye! (Psonm 119:64) Avek tou nou leker nou reponn refren sa psalmis: “O ki dimoun i remersye Zeova pour son labonte leker e pour son bann travay merveye an faver bann garson zonm.” (Psonm 107:8, 15, 21, 31) Nou rezwir ki Zeova i ofer son labonte leker son bann serviter ki annan son laprouvasyon—swa endividyelman oubyen konman en group. Dan lapriyer, profet Danyel ti adres Zeova konman sa “vre Bondye, sa Enn ki gran e sa Enn ki enspir lakrent, ki gard lalyans ek labonte leker pour bann ki kontan li e pour bann ki gard son bann komannman.” (Danyel 9:4) Lerwa David ti priye: “Kontinyen ou labonte leker pour bann ki konn ou.” (Psonm 36:10) Konman nou rekonesan ki Zeova i eksprim son labonte leker anver son bann serviter!—1 Lerwa 8:23; 1 Kronik 17:13.
19. Ki kestyon ki nou pou diskite dan prosen lartik?
19 Konman pep Zeova, nou vreman benefisye avek son faver! Apard ki benefisye avek lanmour Bondye ki i’n demontre anver limanite an zeneral, nou rezwir bann benediksyon spesyal gras a labonte leker oubyen lanmour fidel nou Papa seles. (Zan 3:16) Nou benefisye avek sa kalite presye dan Zeova sirtou dan bann moman kritik. (Psonm 36:7) Me konman nou kapab imit labonte leker Zeova? Eski nou pe personnelman demontre sa kalite remarkab? Sa bann kestyon ek lezot kestyon ki annan pour fer avek sa, pou ganny diskite dan prosen lartik.
Eski ou rapel?
• Ki sa lot fason ki nou kapab tradwir “labonte leker”?
• Konman ki labonte leker i diferan avek lanmour ek fidelite?
• Konman ki Zeova ti demontre labonte leker anver Lot, Abraam, ek Zozef?
• Ki lasirans nou kapab gannyen letan nou vwar lafason ki Zeova ti eksprim son labonte leker dan lepase?
[Study Questions]
[Portre lo paz 10]
Eski ou konnen konman ki Bondye ti montre labonte leker anver Lot?
[Portre lo paz 12]
Dan son labonte leker, Zeova ti gid serviter Abraam
[Portre lo paz 13]
Zeova ti eksprim labonte leker par protez Zozef