En Pep Pirifye Pour Fer Bann Bon Travay
En Pep Pirifye Pour Fer Bann Bon Travay
“Annou pirifye nou avek tou sa ki sali lekor ek lespri, e fer tou pour nou vin konpletman sen an vivan avek respe devan Bondye.”—2 KORENTYEN 7:1.
1. Ki Zeova i ekspekte avek bann ki ador li?
“LEKEL ki kapab mont lo montanny Zeova, e lekel ki kapab lev dan son landrwa sen?” Lerwa David dan ansyen Izrael ti demann sa kestyon ki fer reflesir, konsernan ladorasyon ki Bondye i aksepte. Apre i ti reponn: “Sa enn ki annan lanmen inosan ek leker pir, ki pa’n anmenn Mon nanm dan sa ki zis initil, ni fer en fo serman.” (Psonm 24:3, 4) Pour ganny aksepte par Zeova, ki personnifikasyon sentete, nou bezwen pir e sen. Pli boner, Zeova ti’n rapel kongregasyon Izrael: “Zot bezwen sangtifye zot lekor e zot bezwen montre zot sen, akoz mon sen.”—Levitik 11:44, 45; 19:2.
2. Konman ki Pol ek Zak ti met lanfaz lo lenportans lapirte dan vre ladorasyon?
2 Plizyer syek plitar, zapot Pol ti ekrir bann konpanyon Kretyen dan lavil Korent, en lavil degradan: “Tou sa bann promes in fer pour nou, byenneme; alor annou pirifye nou avek tou sa ki sali lekor ek lespri, e fer tou pour nou vin konpletman sen an vivan avek respe devan Bondye.” (2 Korentyen 7:1) Ankor enn fwa, sa i fer resorti ki pour annan en relasyon avek Bondye e pour ganny son bann benediksyon ki i’n promet, en dimoun i bezwen pir e san okenn salte ek koripsyon fizik oubyen spirityel. Pareyman, kan disip Zak ti ekrir konsernan ladorasyon ki Bondye i aksepte, i ti dir: “La sa ki Bondye nou Papa i konsider konman en larelizyon pir e san defo: Pran swen bann orflen ek bann vev dan zot soufrans, e pa les zot ganny sali par move lenflians sa monn.”—Zak 1:27.
3. Pour Bondye aksepte nou ladorasyon, avek kwa nou bezwen seryezman santi nou konsernen?
3 Vi ki lapirte, sentete, e san okenn tas, i bann fakter enportan dan vre ladorasyon, alors nenport ki ki anvi ganny laprouvasyon Bondye i devret seryezman santi zot konsernen dan sa domenn. Lefe ki dimoun i annan bokou diferan standar ek konsep lo lapirte, nou bezwen konpran e konform avek sa ki Zeova i konsider pir e akseptab. Nou bezwen rode ki Bondye i demann son bann adorater dan sa domenn e ki i’n fer pour ed zot vin pir e reste pir e akseptab devan li.—Psonm 119:9; Danyel 12:10.
Pir pour vre Ladorasyon
4. Eksplik lide ki Labib i donnen konsernan lapirte.
4 Pour laplipar dimoun, pir i senpleman vedir napa salte oubyen kontaminasyon. Parkont, dan Labib sa lide pir i ganny reprezante par serten mo Ebre ek Grek ki dekrir lapirte pa selman dan son sans fizik me pli souvan dan en sans moral e spirityel. Se pour sa ki en ansiklopedi Labib i dir: “ ‘Pir’ e ‘enpir’ i bann term ki rarman relye avek zis lizyenn me pli souvan avek bann konsep relizye. Alors, prensip ‘lapirte’ i afekte tou laspe lavi.”
5. Ziska ki degre Lalwa Mozaik ti kontrol lapirte dan lavi en Izraelit?
5 Anfet, Lalwa Mozaik ti enkli bann lareg ek regilasyon lo preski tou laspe lavi bann Izraelit. I ti fer kler kwa ki ti pir e akseptab e kwa ki ti enpir e pa akseptab. Par egzanp, dan Levitik sapit 11 a 15, nou vwar bann lenstriksyon detaye ki annan pour fer avek sa ki pir e sa ki enpir. Serten zannimo ti enpir e bann Izraelit pa ti devret manz zot. En madanm ki ti’n donn nesans ti enpir pour en serten peryod letan ki ti’n ganny spesifye. Serten maladi lapo, sirtou lalep, ek bann desarz avek lorgann seksyel bann zonm ek madanm ti osi fer zot enpir. Lalwa ti osi spesifye ki pou fer dan bann sitiasyon ki ti enplik lenpirte. Par egzanp, dan Nonm 5:2, nou lir: “Demann bann garson Izrael pour anvoy an deor kan tou sa ki annan lalep e tou sa ki annan en desarz avek zot e tou sa ki’n vin enpir akoz en nanm ki’n mor.”
6. Pour ki rezon lalwa lo lapirte ti ganny donnen?
6 San okenn dout, sa bann lalwa ek lezot lalwa ki Zeova ti donnen ti reflekte bann konsep medikal ek en konnesans lo lekor imen, en bon pe letan avan ki zot ti ganny rekonnet par lamedsin modern, e lepep ti benefisye letan zot ti swiv zot. Me sa bann lalwa pa ti ganny donnen senpleman konman en kod lasante oubyen pour servi zis konman bann lenstriksyon medikal. Zot ti form par vre ladorasyon. Lefe ki zot ti tous lavi toulezour bann dimoun—manze, donn nesans, relasyon dan maryaz, eksetera—sa ti senpleman fer vwar ki Zeova konman zot Bondye ti annan drwa pour determinen kwa ki akseptab e pa akseptab dan tou laspe zot lavi, ki ti’n ganny dedye pour Zeova tousel.—Deterononm 7:6; Psonm 135:4.
7. Ki benediksyon nasyon Izrael ti pou gannyen si zot ti gard Lalwa?
7 Lalyans Lalwa ti osi protez bann Izraelit kont bann keksoz koronpi ki bann nasyon otour zot ti fer. Si zot ti fidelman obeir Lalwa, enkli tou bann kondisyon neseser pour reste pir dan lizye Zeova, bann Izraelit ti pou akseptab pour servi Bondye e resevwar son benediksyon. An rapor avek sa, Zeova ti dir sa nasyon: “Si zot strikteman obeir mon lavwa e vreman gard mon lalyans, alors zot pou sirman vin mon propriyete spesyal parmi tou lezot pep, akoz later antye i pour mwan. E zot zot pou vin pour mwan en rwayonm pret e en nasyon sen.”—Egzod 19:5, 6; Deterononm 26:19.
8. Akoz bann Kretyen denozour i devret port latansyon lo sa ki ti ganny dir dan Lalwa konsernan lapirte?
8 Vi ki Zeova ti enkli sa bann detay dan Lalwa pour enstri bann Izraelit lo konman pour vin pir, sen, e akseptab devan li, eski pa i apropriye pour bann Kretyen denozour egzaminen konman ki zot pe fer dan sa domenn? Menm si bann Kretyen pa anba Lalwa, parey Pol ti eksplike, zot devret gard antet ki tou keksoz ki ti’n ganny ekrir dan Lalwa ti “lonbraz keksoz ki pou vini dan lavenir, me se Kris ki larealite.” (Kolosyen 2:17; Ebre 10:1) Si Zeova, ki dir “mon pa’n sanze,” ti konsider pir e san tas konman en fakter enportan dan vre ladorasyon sa letan, ozordi nou devret pran oserye sa size lapirte fizik, moral, e spirityel si nou anvi ganny son laprouvasyon ek benediksyon.—Malaki 3:6; Romen 15:4; 1 Korentyen 10:11, 31.
Lapirte fizik i koz dan nou Faver
9, 10. (a) Akoz lapirte fizik i enportan pour en Kretyen? (b) Ki bann komanter ki souvan ganny fer lo bann lasanble Temwen Zeova?
9 Eski lapirte fizik i ankor en fakter enportan dan vre ladorasyon? Menm si lapirte fizik lo li menm pa fer en dimoun vin en vre adorater Bondye, sirman i apropriye pour en vre adorater pir fizikman otan ki son sitiasyon i permet li. Sirtou konmela, kot en kantite dimoun pa fatig zot pour gard zot lekor, zot lenz, oubyen zot lanvironnman prop, bann ki fer li i souvan ganny remarke par dimoun otour li. Sa i kapab anmenn bon rezilta parey Pol ti dir bann Kretyen an Korent: “Nou pa oule plas okenn lobstak devan personn, pour ki nou servis pour Bondye pa ganny blanmen. Me okontrer nou fer tou nou posib pour viv konman bann serviter Bondye.”—2 Korentyen 6:3, 4.
10 Souvan Temwen Zeova i ganny felisite avek bann lotorite pour zot kondwit ek labitid prop, annord, e respektab, ki ganny vwar sirtou dan bann gran lasanble. Par egzanp, konsernan en lasanble ki ti ganny fer dan provens Savona, Itali, zournal La Stampa ti fer sa komanter swivan: “Sa ki ou ti kapab remarke toudswit kan ou ti mars dan sa bann fasilite se lapropte ek lord sa bann dimoun ki ti pe servi zot.” Apre en lasanble kot en stad an São Paulo, Brezil, administrater sa stad ti dir avek sef lekip netwayaz: “Aprezan nou anvi stad ganny netwaye parey bann Temwen Zeova in fer.” En lot administrater kot sa menm stad ti dir: “Kan Temwen Zeova i anvi lwe stad, sel keksoz ki nou konsernen avek se dat ki zot pou servi li. Napa nanryen ki trakas nou ankor.”
11, 12. (a) Ki prensip Labib ki nou devret kit antet an rapor avek nou lapropte personnel? (b) Ki kestyon nou kapab demande konsernan nou bann labitid ek nou fason viv?
11 Si lapropte ek lord dan landrwa kot nou ador Bondye i kapab anmenn loner pour sa Bondye ki nou adore, byensir i osi enportan pour nou demontre sa bann kalite dan nou lavi personnel. Lo lot kote, nou kapab santi ki nou annan drwa fer konman nou oule se nou, kot personn pa war nou. Konsernan nou labiyman ek kwafir, byensir nou annan sa liberte pour swazir sa ki nou santi i konfortab e atiran! Me, dan en gran degre, sa liberte i relatif. Mazinen ki kan Pol ti pe diskit liberte ki en Kretyen i annan pour manz serten manze, i ti averti son bann konpanyon Kretyen: “Fer atansyon ki, par ou liberte dan ou aksyon i pa fer enn ki pli feb tonbe.” Apre i ti sit en prensip tre itil: “ ‘Tou i permet,’ me pa tou ki itil. ‘Tou i permet,’ me pa tou ki konstriktif.” (1 Korentyen 8:9; 10:23) Konman ki konsey Pol i aplikab pour nou dan domenn lapropte?
12 I normal pour dimoun ekspekte en minis Bondye pour prop e annord dan son fason viv. Alors, nou bezwen fer sir ki nou lakour ek son lanvironnman pa diminyen sa ki nou dir nou ete, setadir minis Parol Bondye. Ki kalite temwannyaz nou lakour i donnen lo nou e lo nou krwayans? Eski i montre ki nou vreman anvi viv dan sa nouvo monn prop e annord, ki nou koz lo la avek lezot, avek bokou lantouzyasm? (2 Pyer 3:13) Pareyman, nou laparans—ki swa dan nou letan detant oubyen dan predikasyon—i kapab fer nou mesaz swa pli atiran ouswa mwen atiran. Par egzanp, remark sa komanter ki en zournalis ti fer an Meksiko: “Anfet, i annan en gran poursantaz zenn parmi Temwen Zeova, e sa ki remarkab se lafason ki zot koup zot seve e sanze, e zot lapropte.” Pa i en lazwa pour annan sa bann zenn parmi nou!
13. Ki nou kapab fer pour fer sir ki nou prop e annord dan tou laspe nou lavi?
13 Byensir, fer sir ki nou lekor, nou bann keksoz, ek nou lakour i touzour prop e annord i pli fasil dir ki fer. Nou pa bezwen en kantite lekipman konplike e ser pour fer sa, me en bon progranm ek zefor kontinyel. Nou bezwen rezerv en letan pour okip nou lekor, nou lenz, nou lakour, nou loto, ensidswit. Predikasyon, renyon, letid personnel, ensi ki lezot responsabilite toulezour, pa devret vin en leskiz pour nou pa reste prop e akseptab devan Bondye e devan zonm. Sa prensip familye “pour tou keksoz i annan en letan fikse” i osi aplik byen dan sa laspe nou lavi.—Eklezyast 3:1.
En Leker san Tas
14. Akoz nou kapab dir ki lapirte moral e spirityel i pli enportan ki lapirte fizik?
14 Zis parey i enportan pour nou pran ka avek lapirte fizik, i menm pli enportan ankor pour nou konsernen avek lapirte moral e spirityel. Nou retir sa konklizyon lefe ki Zeova pa ti rezet nasyon Izrael akoz zot pa ti pir fizikman, me akoz zot ti koronpi moralman e spirityelman. Atraver profet Izai, Zeova ti dir zot ki akoz zot ti en “nasyon peser, sa pep ki sarze avek fot,” zot sakrifis, zot obzervasyon nouvel lin ek saba, e menm zot lapriyer ti pou vin en fardo pour li. Ki zot ti bezwen fer pour reganny faver Bondye? Zeova ti dir: “Lav zot; fer zot prop; retir devan mon lizye mesanste dan zot fason azir; aret fer sa ki move.”—Izai 1:4, 11-16.
15, 16. Kwa ki Zezi ti dir i fer en zonm enpir, e konman nou kapab benefisye avek parol Zezi?
15 Pour konpran plis lenportans lapirte moral e spirityel, annou vwar sa ki Zezi ti dir kan bann Farizyen ek bann profeser lalwa ti dir ki son bann disip ti enpir akoz zot pa ti lav zot lanmen avan manze. Zezi ti koriz zot par dir: “Pa sa ki antre dan labous en dimoun ki fer li enpir. Me sa ki sorti dan son labous ki fer li enpir.” Zezi ti apre eksplike: “Sa ki sorti dan son labous i sorti dan son leker, e sa i fer en dimoun enpir. Akoz dan leker i sorti move panse ki fer dimoun touye, fer adilter, e fer bann move laksyon, vole, kalomni, e malparl dimoun. Se sa bann keksoz ki rann en dimoun enpir. Me manz san lav lanmen, sa pa rann en dimoun enpir.”—Matye 15:11, 18-20.
16 Ki nou kapab aprann atraver parol Zezi? Zezi ti pe fer resorti ki se bann move santiman dan leker ki pous en dimoun pour fer bann move aksyon, bann aksyon imoral, e enpir. Disip Zak i met li koumsa: “Tou dimoun i ganny tante ler i les li ganny antrennen e atire par son prop move dezir.” (Zak 1:14, 15) Alors, si nou pa anvi tonm dan sa bann pese grav ki Zezi in dekrir, nou bezwen konpletman retir e anpes nou leker ganny okenn tandans pour sa bann keksoz. Sa i vedir ki nou devret vey byen sa ki nou lir, gete, e ekoute. Ozordi, bann lendistri piblisiter e divertisman i servi sa swadizan laliberte bann artis pour eksprimen pour prodwir en sitan gran kantite son ek zimaz ki satisfer dezir laser enparfe. Nou devret determinen pour pa les okenn sa bann lide pran rasin dan nou leker. Pwen enportan se ki pour fer plezir Bondye e pour li aksepte nou, nou bezwen kontinyen reste vizilan pour nou gard nou leker prop e san tas.—Proverb 4:23.
Pirifye pour fer bann bon Travay
17. Akoz Zeova in pirifye son pep?
17 Sirman i en benediksyon ek en proteksyon ki, avek led Zeova, nou kapab rezwir en kondisyon pir devan li. (2 Korentyen 6:14-18) Nou osi konpran ki Zeova in pirifye son pep pour en rezon spesifik. Pol ti dir Tit ki Zezi Kri in “donn son prop lavi pour nou, pour delivre nou dan tou mal e pirifye nou konman en pep ki apartenir a li, en pep zele pour fer [bann bon travay, NW ].” (Tit 2:14) Konman en pep pirifye, ki bann travay ki nou devret zele ladan?
18. Ki mannyer nou kapab montre ki nou zele pour bann bon travay?
18 Premyerman, nou devret fer bokou zefor pour anons sa bon nouvel lo Rwayonm Bondye avek bann dimoun. (Matye 24:14) An fezan sa, nou prezant avek dimoun partou sa lespwar pour viv pour touzour lo en later ki pou napa okenn kalite polisyon. (2 Pyer 3:13) Nou bann bon travay i osi enkli demontre fri lespri Bondye dan nou lavi toulezour, ki glorifye nou Papa ki dan lesyel. (Galat 5:22, 23; 1 Pyer 2:12) E nou pa oubliy bann ki pa dan laverite ki kapab ganny ravaze par bann dezas natirel oubyen par bann trazedi ki frap limanite. Nou gard antet konsey Pol: “Pandan ki nou annan lokazyon, annou fer dibyen tou dimoun, sirtou nou bann frer dan lafwa.” (Galat 6:10) Sa bann servis i fer plezir Bondye kan i sorti dan en leker pir e i ganny fer avek en motivasyon pir.—1 Timote 1:5.
19. Ki bann benediksyon ki pe esper nou si nou kontinyen mentenir en standar lapirte fizik, moral e spirityel ki tre onivo?
19 Konman bann serviter Tre O, nou pran aker parol Pol: “Mon bann frer, mon sipliy zot par konpasyon Bondye pour nou, ofer zot lekor konman en sakrifis vivan, sen e agreab devan Bondye, ki ava en kilt ki fer li bokou plezir.” (Romen 12:1) Fotespere ki nou kontinyen apresye sa privilez pour ganny pirifye par Zeova e ki nou fer nou mye pour mentenir en standar lapirte spirityel, moral e fizik ki tre onivo. Kan nou fer sa, nou pa pou zis ganny respe pour nou lekor ek satisfaksyon konmela menm me nou pou osi annan lespwar pour vwar “lemonn ansyen”—sa sistenm mesan e koronpi—disparet kan Bondye pou “refer tou keksoz a-nef.”—Revelasyon 21:4, 5.
Eski ou rapel?
• Akoz bann Izraelit ti ganny donnen en kantite lalwa lo lapirte?
• Konman ki lapirte fizik i fer sa mesaz ki nou prese pli atiran?
• Akoz lapirte moral e spirityel i pli enportan ki lapirte fizik?
• Konman nou kapab montre ki nou en pep ‘zele pour bann bon travay’?
[Study Questions]
[Portre lo paz 29]
Lapirte fizik i fer sa mesaz ki nou prese pli atiran
[Portre lo paz 30]
Zezi ti averti ki bann move panse i fer nou fer bann move keksoz
[Portre lo paz 31]
Konman en pep pirifye, Temwen Zeova i zele pour bann bon travay