Kestyon Lekter

Eski i saz pour en vre Kretyen asiste en servis fineray oubyen en seremoni maryaz dan en legliz?

I pa fer plezir Zeova pour vwar son bann serviter pran par dan nenport form fo relizyon e zot devret rezet sa. (2 Korentyen 6:14-17; Revelasyon 18:4) En servis fineray dan legliz i en servis relizye ki souvan enplik en sermon ki siport bann lide ki pa baze lo Labib parey imortalite nanm ek rekonpans dan lesyel pour tou bon dimoun. I kapab osi enkli bann pratik parey fer siny-de-kwa e partisip dan lapriyer avek sa pret oubyen sa paster. Lapriyer ek lezot koutim relizye ki kontrer avek lansennyman Labib i osi kapab ganny enkli dan en seremoni maryaz relizye ki ganny fer dan en legliz oubyen dan en lot landrwa. En Kretyen ki trouv li dan en group kot tou dimoun pe partisip dan en pratik relizye ki fo, i kapab trouv li difisil pour reziste sa presyon pour li pa pran par. I vreman pa saz pour en dimoun ekspoz li anba en tel presyon!

Me si en Kretyen i santi li oblize pour asiste en servis fineray oubyen en seremoni maryaz ki ganny fer dan en legliz? Par egzanp, en mari non krwayan i kapab met presyon lo son madanm Kretyen pour akonpanny li. Eski sa madanm i kapab zwenn li senpleman konman en obzervater silansye? Petet sa madanm i kapab pran an konsiderasyon swe son mari e deside pour al avek li, e anmenmtan i determinen pour pa partisip dan okenn seremoni relizye. Lo lot kote, i kapab deside pour pa ale, vi ki i realize ki presyon emosyonnel sa lokazyon i kapab tro for pour li siporte, e ki petet sa ti a kapab fer li fer konpromi avek bann prensip Bondye. Se sa madanm ki pou deside. Se li ki pou fer sir ki desizyon i oule fer dan son leker pour gard en konsyans kler.—1 Timote 1:19.

Antouka, i pou dan son lavantaz pour eksplik son mari ki son konsyans pa pou permet li pour partisip dan okenn seremoni relizye oubyen sant kantik oubyen bes latet ler lapriyer i ganny fer. Baze lo son leksplikasyon, sa mari i kapab konklir ki prezans son madanm i kapab kree en sitiasyon ki petet pa pou agreab pour li. I kapab deside pour al li tousel akoz lanmour pour son madanm, respe pour son krwayans, oubyen en dezir pour evit okenn lanbarasman. Me si i ensiste ki son madanm i al avek li, i kapab ale senpleman konman en obzervater.

Si nou asiste en servis dan en batiman relizye, nou bezwen mazin osi lefe ki sa i kapab annan lo nou bann konpanyon Kretyen. Eski i kapab afekte konsyans serten? Eski i kapab afeblir zot determinasyon pour evite partisip dan idolatri? Zapot Pol i konseye: “Pour ki zot a kapab verifye bann keksoz pli enportan, afen ki zot a vin pir e zot pa ava fer tonbe lezot ziska zour Kris.”—Filipyen 1:10, NW.

Si sa lokazyon i enplik en fanmiy ki nou pros avek, i kapab annan plis presyon delapar nou fanmiy. Toudmenm, en Kretyen i bezwen balans byen tou fakter ki enplike. Dan serten sirkonstans, en Kretyen i kapab konklir ki pou napa okenn difikilte ki pou arive par asiste en servis fineray oubyen en seremoni maryaz dan en legliz konman en obzervater. Sepandan, i kapab arive ki move lefe ki sa i anmennen lo son konsyans oubyen lo konsyans lezot i depas benefis ki i’n gannyen par asiste sa servis. Dan nenport sitiasyon, sa Kretyen i devret fer sir ki sa desizyon pa pou anpes li gard en bon konsyans devan Bondye e devan zonm.