Ki ou Pwenn-vi lo Lanmor?

LIDE ki nou pou mor en zour i swiv nou partou dan nou bann preokipasyon lavi toulezour. Sa i leka menm si nou an bonn sante oubyen ris. I kapab ariv avek nou laprosenn fwa ki nou koup semen oubyen ki nou al dormi. Bann dezas parey sa latak teroris le 11 Septanm, 2001, ki ti arive dan lavil New York ek Washington, D.C., i fer nou realize ki nou “dernyen lennmi,” lanmor, i ariv lo dimoun ki sorti dan diferan ran sosyal e nenport laz, parler i pran plizyer milye lavi dan zis detrwa minit.—1 Korentyen 15:26.

Kantmenm sa, i paret ki dimoun i enterese avek sa size lanmor. I paret ki bann raportaz lo lanmor, sirtou kot en gran kantite dimoun i perdi lavi dan bann sirkonstans sokan, i fer bann zournal vann plis e atrakte plis dimoun pour get nouvel lo televizyon. I sanble ki dimoun pa zanmen ganny ase avek bann raportaz lo lanmor, ki swa lanmor par lager, dezas natirel, krim, oubyen maladi. Sa obsesyon avek lanmor i ganny eksprimen dan en fason ankor pli difisil pour konpran par sa gran lemosyon ki ganny demontre ler bann dimoun enportan e popiler i mor.

I difisil pour demanti sa. Lanmor, e sirtou lanmor lezot i reste konman en size enteresan ek en preokipasyon pour bokou dimoun. Sepandan, ler zot fer fas avek zot prop lanmor, zot evite mazin lo la. Nou prop lanmor i en size ki laplipar nou pa anvi mazin lo la.

Konfize par Lanmor?

Pans lo nou prop lanmor pou toultan reste konman en keksoz ki pa gou. Akoz sa i leka? Parski Bondye in met dan nou sa gran dezir pour viv pour touzour. Dapre Anchor Bible, Eklezyast 3:11 i dir ki “I’n met leternite dan zot leker.” Vi ki lanmor i en keksoz ki pa kapab ganny evite, sa in kree en konfli dan imen, en dezakor kontinyel. Pour rekonsilye sa konfli dan zot e pour satisfer sa lanvi natirel pour kontinyen viv, imen in fabrik tou sort kalite krwayans, depi krwayans ki nanm pa zanmen mor ziska krwayans reenkarnasyon.

Antouka, lanmor i en levennman troublan, en keksoz ki fer per, e sa lafreyer i egziste partou. Alors, nou pa devret sirprann ki sosyete imen an zeneral i trakase letan zot mazin lo sa posibilite ki en zour zot pou mor. En rezon pour sa, se ki lanmor i demontre ki i initil pour en dimoun devwe son lavi zis pour rod larises ek pouvwar.

 Mor tousel

Lontan, en dimoun ki ti pe al mor akoz en maladi oubyen en aksidan grav ti normalman mor kot li dan lanvironnman ki i ti abitye avek. Sa ti souvan leka dan letan ki Labib ti ganny ekrir, e i ankor egziste dan serten kiltir. (Zenez 49:1, 2, 33) Dan bann tel ka, lafanmiy i zwenn ansanm, e bann zanfan i partisip dan konversasyon. Sa i donn sak manm fanmiy sa santiman ki zot pa pe soufer zot tousel e i rekonfortan pour konnen ki responsabilite ek sagrinasyon pe ganny partaze.

Sa i vreman diferan avek sa ki arive dan en sosyete kot diskisyon lo lanmor i ganny evite, kot ordinerman dimoun pa kontan koz lo sa topik, e kot zanfan pa ganny enkli dan bann tel konversasyon pangar i ava “afekte” zot emosyonnelman. Ozordi, fason ki dimoun i mor i tre diferan, e souvan tousel. Kantmenm laplipar ti pou kontan pour mor kot zot, anpe, e pe ganny bon swen avek fanmiy, pour bokou larealite i ki zot mor dan en lopital, souvan izole e dan douler, konnekte avek bann masin sofistike e efreyan. Lo lot kote, plizyer milyon dimoun i zis mor san ki personn i konnen—bann viktim zenosid, lafamin, Sida, lager sivil, oubyen lapovrete.

En Size pour reflesir lo la

Labib pa dekouraz nou pour mazin lo lanmor. Annefe, Eklezyast 7:2 i dir nou: “Plito al dan lakaz dey ki al dan lakaz festen, akoz sa i lafen tou bann imen.” Ler nou fer fas avek realite lanmor, nou kapab aret nou bann preokipasyon oubyen aktivite toulezour e reflesir lo konman ki lavi i kourt. Sa i kapab ed nou pour viv nou lavi dan en fason ki annan plis sans olye ki senpleman viv san okenn gidans oubyen bi.

Ki ou pwenn-vi lo lanmor? Eski ou’n egzamin ou santiman, krwayans, lespwar, ek lafreyer vizavi lafen ou lavi?

Parey lavi, lanmor i en size ki an deor abilite zonm pour eksplike e konpran. Sa enn ki kapab koz lo sa size avek lasirans total i nou Kreater. “Sours lavi” i avek li e avek li i “apartenir lasorti lanmor.” (Psonm 36:9; 68:20) Kantmenm i kapab paret sirprenan, egzamin sa ki Parol Bondye i annan pour dir lo serten krwayans komen lo lanmor, pou anmenn rekonfor ek soulazman. I pou devwale ki lanmor i pa neseserman lafen tou keksoz.

[Ekstre lo paz 4]

Larealite lo lanmor i ed nou pour viv nou lavi dan en fason ki annan plis sans