Pran Plezir Dan Ladrwatir Zeova

“Sa ki resers ladrwatir ek labonte leker pou trouv lavi, ladrwatir ek laglwar.”—PROVERB 21:21.

1. Ki fason azir bann dimoun ozordi ki’n anmenn bann rezilta katastrofik?

“IANNAN en semen ki drwat devan zonm, me apre semen lanmor i son lafen.” (Proverb 16:25) Sa proverb dan Labib i byen dekrir fason azir laplipar dimoun denozour. An zeneral, dimoun i enterese pour fer zis sa ki byen dan zot prop lizye, e zot inyor menm bann bezwen debaz lezot. (Proverb 21:2) Zot dir ki zot respekte bann lalwa ek standar zot pei me zot sezi sak loportinite ki zot gannyen pour evit sa bann lalwa. Rezilta ki sa in anmennen se en sosyete divize e konfize.—2 Timote 3:1-5.

2. Ki bann imen i telman bezwen pour zot prop benefis?

² Pour nou prop benefis—e pour lape ek sekirite lafanmiy imen antye—nou byen bezwen en lalwa oubyen standar ki zis e drwat, enn ki tou dimoun i pare pour aksepte e obeir. I kler ki napa okenn lalwa oubyen standar ki okenn zonm i propoze ki kapab akonpli sa, kantmenm i kapab pli entelizan oubyen senser. (Zeremi 10:23; Romen 3:10, 23) Si vreman en tel standar i egziste, kote ki nou kapab trouv li e ki mannyer i ete? Petet kestyon pli enportan ki nou kapab demande se, Si en tel standar i egziste, eski ou ti pou pran plezir ladan e soumet avek sa standar?

Trouv sa Standar ki drwat

3. Lekel ki pli kalifye pour fourni en standar ki satisfer e benefisye tou dimoun, e akoz?

³ Pour trouv en standar ki satisfer e benefisye tou dimoun, nou bezwen al kot sa enn ki pa ganny afekte par okenn baryer rasyal, kiltirel, e politik, e ki pa ganny afekte par mank prevwayans ek lezot febles imen. San dout, sel personnaz ki kalifye pour sa i nou Kreater tou pwisan, Zeova, ki deklare: “Parski parey lesyel i pli o ki later, demenm mon bann semen i pli o ki pour zot, e mon bann panse ki  zot panse.” (Izai 55:9) Deplis, Labib i dekrir Zeova konman “en Bondye fidelite, avek ki napa lenzistis; i zis e drwat.” (Deterononm 32:4) Partou dan Labib, nou trouv sa lekspresyon “Zeova i drwat.” (Egzod 9:27; 2 Kronik 12:6; Psonm 11:7; 129:4; Lamantasyon 1:18; Revelasyon 19:2, NW, not anba lo paz) Wi, nou kapab depan lo Zeova pour en standar pli onivo akoz i fidel, zis, e drwat.

4. Ki sa mo “drwat” i vedir?

⁴ Dan serten kiltir, pa tou dimoun ki kontan sa mo “drwat” denozour. Anfet, plizyer dimoun napa en bon pwenn-vi lo la, zot menm asosye li avek bann dimoun ki krwar zot pli drwat e pli sen ki lezot. Parkont, dapre Labib ladrwatir i donn lide ki en dimoun i zis, pir, inosan, san pese, i konform avek bann prensip lalwa Bondye oubyen aksepte standar lo moralite, i azir dan en bon fason e en fason zis. Eski ou pa ti pou pran plezir dan en lalwa oubyen standar ki anglob sa bann bon karakteristik?

5. Dekrir sa kalite ki apel ladrwatir parey Labib i eksprimen.

⁵ Konsernan sa kalite ki apel ladrwatir, Encyclopaedia Judaica i fer sa remark: “Ladrwatir pa en konsep entelektyel ki difisil pour konpran me i plito baze lo fer sa ki zis e drwat dan tou relasyon.” Par egzanp, ladrwatir pa senpleman en kalite ki Zeova i posede anndan oubyen personnelman, parey sentete ek lapirte. Okontrer ladrwatir i en lekspresyon son natir dan bann fason ki drwat e zis. Nou kapab dir ki akoz Zeova i sen e pir, tou sa ki i fer e tou keksoz ki sorti kot li i drwat. Parey Labib i dir, “Zeova i drwat dan tou son semen e fidel dan tou son travay.”—Psonm 145:17.

6. Ki Pol ti dir konsernan serten Zwif ki pa ti krwar dan son letan, e akoz?

⁶ Zapot Pol ti met lanfaz lo sa pwen dan son let ki i ti ekrir bann Kretyen an Ronm. Konsernan serten Zwif ki pa ti krwar, i ti ekrir: “Dan zot linyorans ki mannyer Bondye i rann dimoun [drwat, NW ] devan li, zot in esey rod zot prop fason pour vin [drwat, NW ]. Alor zot pa’n soumet zot dan fason ki Bondye i rann zonm [drwat, NW ].” (Romen 10:3) Akoz Pol ti refer avek sa bann dimoun konman ‘dan linyorans ki mannyer Bondye i rann dimoun drwat devan li’? Eski zot pa ti’n ganny enstri bann standar drwat Bondye dapre Lalwa? Wi. Me kantmenm sa, laplipar zot ti vwar ladrwatir zis konman en kalite ki nou kapab devlope personnelman par fer bokou zefor pour obzerv bann lareg relizye, olye ki en standar pour gid zot dan zot relasyon avek zot prosen. Parey bann sef relizye dan letan Zezi, zot ti mal konpran vre sans lazistis ek ladrwatir.—Matye 23:23-28.

7. Konman ladrwatir Zeova i ganny eksprimen?

⁷ Kontrerman, ladrwatir Zeova i ganny eksprimen e ganny vwar klerman dan tou sa ki i fer. Menm si son ladrwatir pa permet li pour senpleman ferm lizye lo bann dimoun ki volonterman kas son lalwa, sa pa fer li vin en Bondye endiferan ki demann tro bokou, en Bondye ki nou bezwen per e gard serten zistans avek. Okontrer, son ladrwatir in fourni en baz lo ki bann imen i kapab apros li e ganny sove dan bann konsekans pese ki terib. Alor, i tou apropriye ki Zeova i ganny dekrir konman “en Bondye drwat e en Sover.”—Izai 45:21.

Ladrwatir ek Delivrans

8, 9. Dan ki fason Lalwa ti eksprim ladrwatir Bondye?

⁸ Pour konpran relasyon ant ladrwatir Bondye ek son akt delivrans, annou konsider Lalwa ki i ti donn nasyon Izrael atraver Moiz. Napa okenn dout ki sa Lalwa pa ti drwat. Dan son bann dernyen parol, Moiz ti rapel bann Izraelit: “Ki sa gran nasyon ki annan bann lareg ek desizyon zizman ki drwat parey sa lalwa ki mon pe met devan zot ozordi?” (Deterononm 4:8) Plizyer syek plitar, Lerwa David an Izrael ti deklare: “Bann desizyon zizman  Zeova i vre; zot tou zot in ganny revele drwat.”—Psonm 19:9.

⁹ Zeova ti fer kler son standar parfe pour sa ki byen ek sa ki mal atraver Lalwa. Lalwa ti spesifye an detay konman ki bann Izraelit ti bezwen kondwir zot, pa zis dan domenn relizye, me osi dan tranzaksyon ek relasyon biznes, relasyon dan maryaz, labitid alimanter ek lizyenn, e byensir dan bann desizyon zizman. Lalwa ti osi kontyen bann sanksyon sever kont bann ki ti vyol lalwa, dan serten ka i ti menm enpoz santans lanmor. * Me eski bann legzizans drwat Bondye, parey i ti ganny eksprimen dan Lalwa ti en fardo ki ti dir e fatigan pour lepep, ki ti priv zot zot liberte ek lazwa, parey bokou dimoun i dir ozordi?

10. Konman ki bann ki ti kontan Zeova ti santi anver son lalwa?

¹⁰ Bann ki ti kontan Zeova ti pran bokou plezir dan son bann lalwa ek desizyon drwat. Par egzanp, Lerwa David, pa ti senpleman rekonnet ki bann desizyon zizman Zeova i vre e drwat, parey nou’n trouve, me ofon son leker i ti osi kontan e apresye zot. Konsernan bann lalwa ek desizyon zizman Zeova, i ti ekrir: “Zot pli dezirab ki lor, wi, plis ki bokou lor rafinen; e pli dou ki dimyel e ki dimyel ki koule sorti dan gof. Ou serviter in osi ganny averti par zot; gard zot i anmenn en gran rekonpans.”—Psonm 19:7, 10, 11.

11. Konman ki Lalwa ti vreman en “gardyen ziska ler Kris ti arive”?

¹¹ Plizyer syek plitar, Pol ti fer resorti en pli gran valer ki Lalwa i annan. Dan son let ki i ti ekrir bann Galat, i ti dir: “Lalwa ti nou gardyen ziska ler Kris ti arive, pour ki nou ganny zistifye devan Bondye par lafwa.” (Galat 3:24) Dan letan Pol, en gardyen ti en serviter oubyen en lesklav dan en gran fanmiy. Son responsabilite ti pour protez bann zanfan e anmenn zot lekol. Pareyman, Lalwa ti protez bann Izraelit kont pratik moral e relizye degradan bann nasyon dan zalantour. (Deterononm 18:9-13; Galat 3:23) Deplis, Lalwa ti fer bann Izraelit konsyan zot leta peser e sa bezwen pour zot ganny pardonnen e delivre. (Galat 3:19) Bann laranzman ki ti ganny fer pour sakrifis ti atir latansyon lo nesesite pour en sakrifis ranson e ti fourni en model profetik par ki sa vre Mesi ti pou ganny idantifye. (Ebre 10:1, 11, 12) Alors, menm si Zeova ti eksprim son ladrwatir atraver Lalwa, i ti fer li an mazinan byennet ek delivrans eternel lepep.

Bann ki ti ganny konsidere drwat devan Bondye

12. Ki bann Izraelit ti pou’n gannyen si zot ti obzerv Lalwa avek bokou latansyon?

¹² Vi ki Lalwa ki Zeova ti donnen ti drwat dan tou sans, par obeir li bann Izraelit ti pou kapab ganny konsidere konman bann dimoun drwat devan Bondye. Letan zot ti pe al antre dan Later Promiz, Moiz ti rapel  bann Izraelit: “I pou vedir ladrwatir pour nou, ki nou pran swen pour pratik tou sa komannman devan Zeova nou Bondye, zis parey i’n komann nou.” (Deterononm 6:25) Deplis, Zeova ti’n promet: “Zot devret gard mon bann lalwa ek mon bann desizyon zizman, si en zonm i fer sa, i devret osi viv gras a zot. Mwan mon Zeova.”—Levitik 18:5; Romen 10:5.

13. Eski Zeova ti enzis pour demann son pep pour gard son Lalwa drwat? Eksplike.

¹³ Malerezman, bann Izraelit konman en nasyon, pa ti “pratik tou sa komannman devan Zeova” e alor zot ti perdi bann benediksyon ki zot ti’n ganny promet. Zot pa ti arive gard tou komannman Bondye akoz Lalwa Bondye ti parfe me zot zot ti enparfe. Eski sa i vedir ki Bondye pa zis oubyen drwat? Non. Pol ti ekrir: “Alor eski nou pou dir? Ki Bondye i enzis? Pa ditou!” (Romen 9:14) Laverite se ki, bann endividi avan e apre ki Lalwa ti ganny donnen, ti ganny konsidere drwat devan Bondye menm si zot ti enparfe e fer pese. Lalis sa bann dimoun ki ti annan lakrent pour Bondye i enkli Noe, Abraam, Zob, Raab, ek Danyel. (Zenez 7:1; 15:6; Zob 1:1; Ezekyel 14:14; Zak 2:25) Alor kestyon ki nou kapab demande se: Lo ki baz sa bann dimoun ti ganny konsidere konman drwat devan Bondye?

14. Ki Labib i oule dir letan i refer avek en dimoun konman “drwat”?

¹⁴ Kan Labib i refer avek en dimoun konman “drwat,” i pa pe dir ki sa dimoun napa pese oubyen i parfe. Plito, i pe dir ki sa dimoun i akonpli son lobligasyon devan Bondye e devan zonm. Par egzanp, Noe ti ganny apele “en zonm drwat” e i ti “san defo parmi son bann kontanporen” akoz i “ti fer tou sa ki Bondye ti’n demann li. I ti fer egzakteman parey.” (Zenez 6:9, 22; Malaki 3:18) Zekarya ek Elizabet, paran Zan Batis, “toulede ti mars byen (“ti drwat,” NW ) devan Bondye. Zot ti swiv tou konmannman ek bann Lalwa Senyer, dan en fason parfe.” (Lik 1:6) E Korney, ki pa ti en Izraelit, me en zofisye larme Italyen, ti ganny dekrir konman “en zonm drwat ki annan lakrent pour Bondye.”—Akt 10:22, NW.

15. Ladrwatir i annan bokou pour fer avek kwa?

¹⁵ Deplis, ladrwatir dan en dimoun i annan bokou pour fer avek sa ki dan son leker—son lafwa, son lapresyasyon, ek son lanmour pour Zeova ek son promes—pa zis si i fer sa ki Bondye i demande. Labib i dir ki Abraam “ti met lafwa dan Zeova; alor i ti konsider li konman enn ki drwat.” (Zenez  15:6) Abraam pa ti zis annan lafwa dan legzistans Bondye me osi dan son promes konsernan sa “semans.” (Zenez 3:15; 12:2; 15:5; 22:18) Akoz en tel lafwa ek aksyon ki an armoni avek sa lafwa, Zeova ti kapab annan en relasyon avek Abraam e beni li ek lezot serviter fidel menm si zot ti enparfe.—Psonm 36:10; Romen 4:20-22.

16. Ki lafwa dan ranson in fer posib?

¹⁶ Finalman, ladrwatir dan imen i depan lo lafwa ki zot annan dan sakrifis ranson Zezi Kri. Pol ti ekrir sa lo bann Kretyen dan premye syek: “Zot in ganny zistifye par lagras ki [Bondye] in donn gratwitman, par Kris Zezi ki’n delivre zot.” (Romen 3:24) La Pol ti pe koz lo bann Kretyen ki ti’n ganny swazir pour vin bann zeritye Rwayonm avek Kris dan lesyel. Me sakrifis ranson Zezi in osi donn loportinite plizyer milyon lezot dimoun pour ganny zistifye. Dan en vizyon, zapot Zan ti vwar “en gran lafoul, ki personn pa ti kapab konte, . . . debout devan tronn e devan Lanyo, dan rob blan.” Zot rob blan i endike ki zot pir e drwat devan Bondye akoz “zot in lav zot rob e blansi li dan disan Lanyo.”—Revelasyon 7:9, 14.

Plezir dan Ladrwatir Zeova

17. Ki bann pa ki nou bezwen fer letan nou pe resers ladrwatir?

¹⁷ Kantmenm avek lanmour Zeova in donn son Garson, Zezi Kri, konman en mwayen pour bann imen ganny konsidere drwat devan li, sa pa vin otomatikman. En dimoun i bezwen demontre lafwa dan ranson, fer son lavi vin an armoni avek lavolonte Bondye, dedye son lavi avek Bondye e senboliz sa par batenm delo. Apre i bezwen kontinyen resers ladrwatir, ensi ki lezot kalite spirityel. Timote, en Kretyen batize ki ti’n ganny apele pour al viv osyel, ti ganny bokou ankouraze avek Pol: “Fer tou ou posib pour atas ou avek [ladrwatir, NW ] atas ou avek Bondye, gard lafwa dan Kris, annan lanmour pour lezot ek perseverans e tret lezot avek labonte.” (1 Timote 6:11; 2 Timote 2:22) Zezi ti osi met lanfaz lo nesesite pour kontinyen fer zefor kan i ti dir: ‘Kontinyen, rod plito Rwayonm Bondye ek son ladrwatir.’ Petet nou travay byen dir pour rod bann benediksyon Rwayonm Bondye, me eski nou pe travay osi dir pour resers bann prensip drwat Zeova?—Matye 6:33.

18. (a) Akoz i pa fasil pour resers ladrwatir? (b) Ki nou kapab aprann atraver legzanp Lot?

¹⁸ Byensir, i pa fasil pour resers ladrwatir. Sa i akoz nou tou nou enparfe e nou annan en tandans natirel pour fer sa ki pa drwat. (Izai 64:6) Deplis, nou antoure avek bann dimoun ki napa okenn respe pour bann prensip drwat Zeova. Nou sitiasyon i resanble bokou avek sa ki pour Lot, ki ti viv dan lavil Sodonm ki ti renonmen pour son mesanste. Zapot Pyer ti eksplike akoz Zeova ti vwar li apropriye pour delivre Lot dan sa destriksyon ki ti pe al arive. Pyer ti dir: “En zis, ki ti byen sagrinen par kondwit deregle bann move dimoun dan son lepok. Annefe, sa zonm zis ki ti viv parmi zot, ti soufer ler i ti war e tann zot bann move laksyon.” (2 Pyer 2:7, 8) Alors, i ti a byen si nou tou endividyelman nou demande, ‘Eski ofon mon leker mon pa war nanryen mal avek bann pratik imoral ki annan otour nou? Eski bann sport ek divertisman vyolan ki popiler i senpleman pa mon gou? Oubyen eski bann kondwit ki pa drwat i tourmant mwan parey Lot?’

19. Ki benediksyon nou kapab gannyen si nou pran plezir dan ladrwatir Bondye?

 ¹⁹ Dan sa letan ranpli avek danze ek lensertitid, pran plezir dan ladrwatir Zeova i en sours sekirite ek proteksyon. Pour reponn sa kestyon: “O Zeova, lekel ki pou vin en envite dan ou latant? Lekel ki pou reste dan ou montanny sen?” Lerwa David ti dir: “Sa ki pe mars dan en fason fidel e pe pratik ladrwatir.” (Psonm 15:1, 2) Par resers ladrwatir Bondye e pran plezir ladan, nou kapab gard en bon relasyon avek li e kontinyen ganny son faver ek benediksyon. Alor, nou lavi pou ranpli avek kontantman, respe pour nou prop lekor, ek lape lespri. Parol Bondye i dir: “Sa ki resers ladrwatir ek labonte leker pou trouv lavi, ladrwatir ek laglwar.” (Proverb 21:21) Deplis, fer nou mye pour fer sa ki zis e drwat i anmenn bann relasyon ere e personnel e en pli bon lavi—moralman e spirityelman. Sa psalmis ti deklare: “Ere bann ki obzerv lazistis, ki pe toultan fer sa ki drwat.”—Psonm 106:3.

[Not anba lo paz]

Eski ou kapab eksplike?

• Kisisa ladrwatir?

• Konman ki delivrans i relye avek ladrwatir Bondye?

• Lo ki baz bann imen i ganny konsidere drwat devan Bondye?

• Konman ki nou kapab pran plezir dan ladrwatir Zeova?

[Study Questions]

[Portre lo paz 23]

Lerwa David ti eksprim son lanmour senser pour lalwa Bondye

[Portre lo paz 24]

Noe, Abraam, Zekarya ek Elizabet, ek Korney ti ganny konsidere konman drwat devan Bondye. Eski ou konnen akoz?