Kestyon Lekter

Si en dimoun i komet swisid, eski i byen pour en minis Kretyen donn en diskour lanterman?

Sak minis Kretyen i bezwen deside pour li menm si i kapab fer en diskour lanterman avek en konsyans kler devan Bondye, pour en dimoun ki’n paret komet swisid. Ler i pe fer sa desizyon, i devret egzamin sa bann kestyon swivan: Ki pwenn-vi Zeova lo swisid? Eski sa dimoun ti vreman touy son lekor? Eski en problenm mantal oubyen emosyonnel in kapab lakoz sa swisid? Konman ki dimoun i vwar swisid dan ou kominote?

Konman Kretyen, nou enterese konnen konman ki Zeova i konsider swisid. Pour Zeova, lavi imen i presye e sakre. (Zenez 9:5; Psonm 36:9) En dimoun ki volonterman touy son lekor savedir i’n komet krim kont son prop lekor, e sa i en keksoz ki Bondye pa kontan. (Egzod 20:13; 1 Zan 3:15) Eski pwenn-vi Bondye lo swisid i anpes en minis Kretyen donn en diskour lanterman pour en viktim swisid?

Konsider ka Lerwa Sail an Izrael. Ler i ti realize ki i pa ti pou sirviv son batay final kont bann Filisten, olye les son lennmi tret li dan en fason kriyel, “Sail ti pran lepe e tonm lo la.” Ler bann Filisten ti trouv son lekor, zot ti anmar li lo miray lavil Betsann. Ler bann zabitan Yabes-gilead ti dekouver sa ki bann Filisten ti’n fer, zot ti retir lekor Sail e bril li. Apre zot ti pran son lezo e antere. Zot ti menm pa manze pour set zour, en seremoni tradisyonnel pour bann Izraelit ler zot an dey. (1 Samyel 31:4, 8-13; Zenez 50:10) Ler David, ki Zeova ti’n swazir pour vin lerwa, ti konnen ki bann zabitan Yabes-gilead ti’n fer, i ti dir: “Ki Zeova i beni zot akoz zot in demontre labonte leker anver zot Senyer, anver Sail, akoz zot in anter li. E aprezan ki Zeova i demontre anver zot labonte leker ek fidelite.” (2 Samyel 2: 5, 6) Labib pa endike ki bann zabitan Yabes-gilead ti ganny kondannen pour fer sa ki kapab ganny konsidere konman en servis lanterman pour Lerwa Sail. Konpar sa avek bann ki pa ti ganny en servis lanterman akoz zot mesanste. (Zeremi 25:32, 33) En minis Kretyen i kapab konsider sa resi konsernan Sail pour deside si i kapab donn en diskour lanterman pour en viktim swisid.

Sa minis i kapab osi anvi konsider lobzektif en diskour lanterman. Kontrerman avek dimoun ki krwar ki nanm i imortel, Temwen Zeova pa fer servis lanterman avek sa fo lide pour anvoy sa defen dan en lot monn. Olye benefisye sa defen, rezon prensipal pour fer en servis lanterman se pour rekonfort bann ki an dey e pour donn en temwannyaz konsernan kondisyon bann mor avek sa bann ki pe asiste. (Eklezyast 9:5, 10; 2 Korentyen 1:3-5) En lot rezon enportan pour fer en diskour lanterman se pour ed bann ki pe asiste pour reflesir konman ki lavi i kourt. (Eklezyast 7:2) Eski sa bann lobzektif pou ganny akonpli par fer en diskour lanterman pour sa viktim swisid?

I vre, serten i kapab krwar ki sa dimoun ti touy son lekor volonterman, e ki i ti byen konsyan ki i ti pe fer pese kont Zeova. Me eski i toultan posib pour konfirm en tel santiman? Eski petet sa aksyon in ganny fer san reflesir? Serten dimoun ki’n deza esey komet swisid in santi regre e zot in nobou evite fer sa. Apre ki en dimoun in mor i pa kapab repantir pour sa ki i’n fer.

En lot fakter enportan i problenm mantal e emosyonnel ki enplike dan bokou ka swisid. Zot kapab vreman ganny apele bann viktim swisid. Dapre serten statistik, 90 poursan sa bann ki komet  swisid i annan serten problenm mantal e emosyonnel oubyen zot adikt avek serten sibstans. Pour sa bann ki dan en tel kondisyon mantal e ki touy zot lekor, eski Zeova pou pardonn sa krim ki zot in komet kont zot prop lekor? Nou pa dan en pozisyon pour determinen si sa defen in komet en pese ki Zeova pa kapab pardonnen. En minis Kretyen i kapab pran an konsiderasyon sirkonstans ek listwar medikal sa defen letan i pe deside si i pou fer en diskour lanterman pour sa viktim swisid.

I annan ankor en lot laspe pour konsidere: Konman ki dimoun dan kominote i konsider swisid ek lanmor sa dimoun? Sirtou bann ansyen i bezwen konsernen avek sa, vi ki zot enterese avek repitasyon sa kongregasyon Temwen Zeova. Depandan lo latitid kominote an zeneral anver swisid, e sirtou anver sa ka partikilye, bann ansyen i kapab prefere pour pa montre piblikman ki zot aprouv en tel lanterman oubyen pour fer li kot Lasal Rwayonm.

Toudmenm, si en minis Kretyen i ganny demande pour prezid dan en servis lanterman, i kapab santi ki lo en baz personnel, i kapab fer li. Si i deside pour fer li, i devret fer atansyon pour pa fer okenn deklarasyon konkret konsernan si en rezireksyon i kapab posib. Okenn lespwar pour sa defen i dan lanmen Zeova, e personn pa dan en pozisyon pour dir si sa defen pou ganny resisite oubyen non. Sa minis i kapab konsantre lo bann laverite Labib konsernan lanmor e ofer konsolasyon pour bann ki pe soufer akoz sa lanmor.