Laglwar Zeova I Briy Lo Son Pep
Laglwar Zeova I Briy Lo Son Pep
“Zeova li menm pou vin en lalimyer pour ou ki pou dir pour letan endefini.”—IZAI 60:20.
1. Konman ki Zeova i beni son pep fidel?
“ZEOVA i pran plezir dan son pep. I anbelir bann dimoun ki annan limilite avek delivrans.” (Psonm 149:4) Sa i parol ki en psalmis dan lepase ti dir, e listwar in konfirmen ki son parol i vre. Kan pep Zeova i montre zot fidel, Zeova i pran swen avek zot, i fer zot raport fri, e i protez zot. Dan letan ansyen, i ti fer zot ganny laviktwar lo zot bann lennmi. Ozordi, i gard zot for spirityelman e i asir zot delivrans lo baz sakrifis Zezi. (Romen 5:9) I fer sa akoz zot zoli dan son lizye.
2. Kantmenm zot rankontre lopozisyon, ki konfyans pep Zeova i annan?
2 Bann ki “viv en lavi fidel” pou definitivman rankontre lopozisyon dan en lemonn ki’n plonze dan fernwanr. (2 Timote 3:12) Me Zeova i vwar sa bann ki opoz nou, e i averti zot: “Tou nasyon e tou rwayonm ki pa pou servi ou pou disparet; bann nasyon pou sirman ganny devaste.” (Izai 60:12) Ozordi, lopozisyon i vin dan diferan fason. Dan serten pei, nou bann adverser i sey limit oubyen restrikte ladorasyon ki bann Kretyen senser i donn Zeova. Dan lezot pei, bann fanatik i atak bann adorater Zeova e bril zot bann keksoz. Selman, pa oubliye ki Zeova in fini prevwar rezilta okenn lesey pour opoz lakonplisman son lavolonte. Nou bann oponan pa pou reisi. Bann ki lager avek Siyon, reprezante lo later par son bann zanfan, pa pou reisi. Pa sa i en lasirans rekonfortan sorti kot nou gran Bondye, Zeova?
Ganny beni dan en Fason ki zot pa ti pe ekspekte
3. Konman ki labote ek prodiktivite bann adorater Zeova i ganny demontre?
3 Anfet, pandan bann dernyen zour sa sistenm, Zeova in beni son pep dan en fason ki zot pa ti pe ekspekte. I’n sirtou anbelir son landrwa ladorasyon ek bann ki port son non, dan en fason progresif. Dapre profesi Izai, i dir avek Siyon: “Laglwar Liban pou vin kot ou, pye zenevriye, pye frenn e anmenmtan pye sipre, pour anbelir mon landrwa sen; e mon pou glorifye landrwa kot mon met mon lipye.” (Izai 60:13) I vreman manifik pour vwar bann montanny ki’n ganny kouver avek bann zoli lafore. Alors, bann gro pye dibwa an bonn sante i en senbol apropriye pour labote ek prodiktivite bann adorater Zeova.—Izai 41:19; 55:13.
4. Lekel sa “landrwa sen” ek ‘landrwa kot Zeova i met son lipye,’ e konman ki zot in ganny anbelir?
4 Lekel sa “landrwa sen” ek ‘landrwa kot Zeova i met son lipye’ ki ganny mansyonnen dan Izai 60:13? Sa de lekspresyon i refer avek lakour gran tanp spirityel Zeova. Sa tanp i sa mwayen ki permet nou pour ganny akse avek Zeova pour ador li atraver Zezi Kri. (Ebre 8:1-5; 9:2-10, 23) Zeova in fer konnen son plan pour glorifye sa tanp spirityel par anmenn dimoun sorti dan tou nasyon pour ador li laba. (Agai 2:7) Pli boner, Izai li menm ti vwar bann lafoul sorti dan tou nasyon pe mont an gran kantite lo montanny ladorasyon Zeova ki’n ganny lev pli o. (Izai 2:1-4) Plizyer santenn lannen apre, zapot Zan ti vwar dan en vizyon “en gran lafoul, ki personn pa ti kapab konte, sorti dan tou nasyon, tribi, pep ek lalang.” Sa bann dimoun ti debout “devan tronn Bondye e zot ofer li ladorasyon lizour konman aswar dan son tanp.” (Revelasyon 7:9, 15) Anmezir ki sa bann profesi i ganny akonpli dan nou letan, lakaz Zeova i ganny anbelir devan nou prop lizye.
5. Ki gran amelyorasyon bann zanfan Siyon ti eksperyanse?
5 Sa in vreman en gran amelyorasyon pour Siyon! Zeova i dir: “Olye ki ou ganny konpletman abandonnen e deteste, san ki personn i pase, mon pou etablir ou konman en rezon pour fyer pour letan endefini, en rezwisans pour zenerasyon apre zenerasyon.” (Izai 60:15) Ver lafen premye lager mondyal, “Izrael Bondye” ti anfet eksperyans en peryod dezolasyon. (Galat 6:16) I ti santi li “konpletman abandonnen,” parski son bann zanfan lo later pa ti kapab rekonnet klerman lavolonte Bondye pour zot. Apre an 1919, Zeova ti redonn lafors son bann serviter swazir, e depi sa letan i’n beni zot avek en prosperite spirityel merveye. Deplis, pa sa promes dan sa verse i rezwisan? Zeova pou vwar Siyon konman “en rezon pour fyer.” Wi, bann zanfan Siyon, e Zeova limenm, pou fyer pour Siyon. I pou en “gran lazwa,” en rezon pour deborde avek lazwa. E sa pa zis pour en pti gin letan. Kondisyon favorize Siyon, reprezante par son bann zanfan lo later, pou dir “pour zenerasyon apre zenerasyon.” I pa pou zanmen arete.
6. Ki mannyer bann vre Kretyen i servi resours bann nasyon?
6 Aprezan, ekout sa lot promes divin. Zeova i dir avek Siyon: “Ou pou sis dile bann nasyon, e ou pou sis tete bann lerwa; e ou pou sirman konnen ki mwan, Zeova, mon ou Sover, e sa Enn Pwisan ki pour Zakob i sa Enn ki reaste ou.” (Izai 60:16) Konman ki Siyon i nouri lo “dile bann nasyon” e sis “tete bann lerwa”? Dan le sans ki bann Kretyen swazir ek zot konpanyon ‘lezot mouton’ i servi resours bann nasyon ki vreman itil pour fer avanse ladorasyon pir. (Zan 10:16) Bann kontribisyon ki ganny donnen volonterman i ede pour fer posib travay predikasyon ek lansennyman partou dan lemonn. Servi bann teknolozi modern dan en fason saz, i fasilit prodiksyon Labib ek literatir ki baze lo Labib dan plizyer santenn langaz. Ozordi bokou plis dimoun i ganny akse avek laverite biblik ki zanmen oparavan. Dan bokou, bokou nasyon, bann sitwayen pe aprann ki Zeova, ki ti liber son bann serviter swazir anba detansyon spirityel, i vreman sa Sover.
Progre dan zot Fason organize
7. Ki progre remarkab bann zanfan Siyon in fer?
7 Zeova in anbelir son pep dan en lot fason. I’n beni zot par fer zot progrese dan zot fason organize. Nou lir dan Izai 60:17: “Olye kwiv mon pou anmenn lor, olye feray mon pou anmenn larzan, olye dibwa, kwiv, e olye bann ros, feray; mon pou etabli lape konman ou bann sirveyan e ladrwatir konman bann ki donn ou latas.” Ranplas kwiv avek lor i en amelyorasyon, e i menm parey pour tou lezot materyo ki’n ganny mansyonnen. An armoni avek sa, Izrael Bondye in eksperyans serten amelyorasyon dan fason ki zot organize pandan sa bann dernyen zour. Annou vwar ennde legzanp.
8-10. Dekrir serten amelyorasyon dan lorganizasyon ki’n arive depi 1919.
8 Avan 1919, kongregasyon pep Bondye ti ganny administre par bann ansyen ek dyak. Zot tou zot ti ganny elekte dan en fason demokratik par bann manm kongregasyon. Me apartir 1919, “lesklav fidel e pridan” ti apwent en direkter pour servis dan sak kongregasyon pour sirvey bann aktivite predikasyon. (Matye 24:45-47, NW ) Parkont, dan plizyer kongregasyon sa laranzman pa ti mars sitan byen parski serten ansyen ki ti’n ganny elekte pa ti pe donn tou zot sipor sa travay predikasyon. Alor, an 1932, bann kongregasyon ti ganny demande pour aret elekte bann ansyen ek dyak. Plito, zot ti bezwen elekte bann zonm pour servi lo en komite servis ansanm avek direkter pour servis. Sa ti konmsi “kwiv” olye “dibwa”—en gran amelyorasyon!
9 An 1938, bann kongregasyon partou dan lemonn ti determinen pour aksepte en pli bon laranzman, enn ki ti pli an armoni avek model ki annan dan Labib. Ladministrasyon kongregasyon ti ganny konfye avek en serviter group ek lezot serviter, e zot tou zot ti ganny apwente anba sirveyans lesklav fidel e pridan. Ti nepli annan eleksyon! Alor bann nominasyon dan kongregasyon ti ganny fer dan en fason teokratik. Sa ti parey “feray” olye “ros” oubyen “lor” olye “kwiv.”
10 Depi sa, lorganizasyon in kontinyen progrese. Par egzanp, an 1972 zot ti vwar ki apwent bann ansyen dan en fason teokratik, san ki okenn ansyen i egzers lotorite lo lezot, ti pli pros ankor avek fason ki bann kongregasyon premye syek ti ganny administre. Deplis, apepre de zan pase, ti annan en lot pa an avan. En azisteman ti ganny fer dan ladministrasyon serten lasosyasyon legal, ki ti fer li posib pour Konsey Direkter konsantre plis lo lentere spirityel pep Bondye olye ganny distrer par bann zafer legal toulezour.
11. Lekel ki par deryer sa bann sanzman dan fason ki pep Zeova i organiz zot, e ki rezilta sa bann sanzman in anmennen?
11 Lekel ki par deryer sa bann sanzman progresif ? Sa pa lot ki Zeova. Se li menm ki dir: “Mon pou anmenn lor.” E se li menm ki kontinyen an dizan: “Mon pou etabli lape konman ou bann sirveyan e ladrwatir konman bann ki donn ou latas.” Wi, Zeova i responsab pour sirvey son pep. Progre dan fason ki nou organize i en lot fason ki i pe anbelir son pep. E an rezilta, Temwen Zeova in ganny beni dan plizyer fason. Nou lir dan Izai 60:18: “Pou nepli antann vyolans dan ou pei, ni ravaz oubyen deboulir dan ou bann frontyer. E ou pou sirman apel ou bann miray Delivrans e ou bann laport Louanz.” Pa sa i en zoli parol! Me konman ki zot in ganny akonpli?
12. Konman ki lape in arive rennyen parmi bann vre Kretyen?
12 Bann vre Kretyen i kont bokou lo Zeova pour enstri e gid zot, e Izai ti predir rezilta: “Tou ou garson pou bann dimoun ki pou ganny ansennyen par Zeova, e lape ou bann garson pou an abondans.” (Izai 54:13) Deplis, lespri Zeova i oper lo son pep, e lape i form parti fri sa lespri. (Galat 5:22, 23) Sa lape parmi pep Zeova i fer zot vin en refiz atiran dan en lemonn ranpli avek vyolans. Sa latmosfer pezib ki egziste parmi zot, baze lo lanmour ki vre Kretyen i annan pour kanmarad, i en avangou sa kalite lavi ki pou annan dan nouvo monn. (Zan 15:17; Kolosyen 3:14) Byensir nou tou nou byen kontan pour rezwir e kontribye anver sa lape, ki anmenn louanz ek loner pour nou Bondye e ki en laspe enportan dan nou paradi spirityel!—Izai 11:9.
Lalimyer Zeova pou kontinyen briye
13. Akoz nou kapab asire ki lalimyer Zeova pa pou zanmen aret briy lo son pep?
13 Eski lalimyer Zeova pou kontinyen briy lo son pep? Wi! Dan Izai 60:19, 20, nou lir: “Soley pou nepli vin en lalimyer lizour pour ou, e lalin pou nepli donn ou lalimyer pour laklerte. Me Zeova pou vin en lalimyer pour ou ki pou dir pour letan endefini, e ou Bondye ou labote. Ou soley pou nepli kouse, e ou lalin pou nepli deklinen; parski Zeova li menm pou vin en lalimyer pour ou ki pou dir pour letan endefini, ou bann zour dey pou’n terminen.” Apre ki “dey” sa bann egzile spirityel ti terminen an 1919, lalimyer Zeova ti briy lo zot. Plis ki 80 an plitar, zot ankor touzour pe rezwir faver Zeova vi ki son lalimyer pe kontinyen briye. E i pa pou arete. Bondye pa pou “kouse” parey soley oubyen “deklinen” parey lalin lo son bann serviter. Plito, i pou anvoy lalimyer lo zot pour leternite. Pa sa i en lasirans merveye pour nou ki pe viv dan bann dernyen zour sa lemonn ki dan fernwanr!
14, 15. (a) Dan ki sans ki tou pep Bondye i “drwat”? (b) An rapor avek Izai 60:21, ki lakonplisman enportan lezot mouton pe espere avek enpasyans?
14 Aprezan, ekout sa lot promes ki Zeova i fer konsernan bann reprezantan Siyon lo later, Izrael Bondye. Izai 60:21 i dir: “An sa ki konsern ou pep, zot tou zot pou vin drwat; e pour letan endefini zot pou posed pei, bourzon mon plantasyon, travay mon lanmen, pour mwan ganny anbelir.” An 1919 kan bann Kretyen swazir ti repran zot aktivite, zot ti en group dimoun remarkab. Dan en lemonn ki enfeste avek pese, zot in ganny “deklare drwat” lo baz zot lafwa ferm dan sakrifis ranson Kris Zezi. (Romen 3:24, NW; 5:1) Apre sa, zis parey bann Izraelit ki ti’n ganny libere an egzil Babilonn, zot ti pran posesyon en “pei,” en pei spirityel, oubyen en domenn aktivite, kot zot ti pou rezwir en paradi spirityel. (Izai 66:8) Labote sa pei pa pou zanmen disparet akoz, kontrerman avek ansyen Izrael, Izrael Bondye konman en nasyon pou reste fidel. Zot lafwa, zot landirans, ek zot zel pa pou zanmen aret anmenn loner lo non Bondye.
15 Tou manm sa nasyon spirityel in antre dan nouvo lalyans. Lalwa Zeova in ganny ekrir lo leker zot tou, e Zeova in pardonn zot pese lo baz sakrifis ranson Zezi. (Zeremi 31:31-34) I deklar zot drwat konman bann “garson” e i tret zot konmsi zot parfe. (Romen 8:15, 16, 29, 30) Zot bann konpanyon, lezot mouton, in osi ganny pardonnen zot pese lo baz sakrifis Zezi e parey Abraam, zot in ganny deklare drwat konman zanmi Bondye akoz zot lafwa. “Zot in lav zot rob e blansi li dan disan Lanyo.” E sa bann lezot mouton pe esper avek enpasyans en lot benediksyon eksepsyonnel. Apre ki zot pou’n sirviv ‘gran ladetres’ oubyen apre ki zot pou’n ganny resisite, zot pou vwar en lakonplisman literal sa parol dan Izai 60:21 kan later antye pou vin en paradi. (Revelasyon 7:14; Romen 4:1-3) Sa letan, “bann ki annan limilite pou posed later, e zot pou vreman rezwir dan labondans lape.”—Psonm 37:11, 29.
Kontinyen ogmante
16. Ki promes remarkab Zeova ti fer, e konman ki i’n ganny realize?
16 Dan dernyen verse Izai 60, nou lir dernyen promes ki Zeova in fer dan sa sapit. I dir avek Siyon: “Sa enn ki pti pou vin en milye, e sa enn pti pti en nasyon pwisan. Mwan menm Zeova, mon pou akseler li dan son letan.” (Izai 60:22) Dan nou letan, Zeova in gard son parol. Kan bann Kretyen swazir ti repran zot aktivite an 1919, zot ti pti gin—vreman “enn ki pti.” Zot ti ogmante letan lezot Izraelit spirityel ti ganny rasanble. E apre lezot mouton ti konmans rasanble avek zot an gran kantite. Sa latmosfer pezib ki egziste parmi pep Bondye, e sa paradi spirityel ki egziste dan zot “pei,” in atir sitan bokou dimoun senser ki sa “enn ki pti” in vreman vin “en nasyon pwisan.” Aktyelman, sa “nasyon”—Izrael Bondye ek sa plis ki sis milyon “etranze” ki’n dedye zot lavi—i pli peple ki bokou pei dan lemonn. (Izai 60:10) Tou son sitwayen i kontribye pour reflekte lalimyer Zeova, e sa i fer zot tou zoli dan son lizye.
17. Ki lefe sa diskisyon lo Izai sapit 60 in annan lo ou?
17 Etidye sa bann pwen prensipal dan Izai sapit 60 i vreman fortifye nou lafwa. I rekonfortan pour konnen ki en bon pe letan avan, Zeova ti konnen ki son pep ti pou al an egzil spirityel e apre zot ti pou ganny restore. I enpresyonn nou pour konnen ki byen byen avan, Zeova ti vwar sa gran ogmantasyon dan lakantite vre adorater dan nou letan. Deplis, i vreman rekonfortan pour mazinen ki Zeova pa pou zanmen abandonn nou! Sa lasirans ki bann laport sa “lavil” pou touzour reste ouver pour byen resevwar bann ki “dan dispozisyon neseser pour lavi eternel” i vreman en laprev lanmour. (Akt 13:48) Zeova pou kontinyen briy lo son pep. Siyon pou reste konman en rezon pour fyer vi ki son bann zanfan pe les zot lalimyer briy ankor pli kler. (Matye 5:16) Byensir nou pli determinen ki zanmen pour reste pros avek Izrael Bondye e pour seri sa privilez ki nou annan pour reflekte lalimyer Zeova!
Eski ou kapab eksplike?
• Ki konfyans nou kapab annan an rapor avek lopozisyon?
• Konman ki bann zanfan Siyon in “sis dile bann nasyon”?
• Dan ki fason Zeova in ‘anmenn kwiv olye dibwa’?
• Ki sa de kalite ki pep Zeova i posede ki ganny soulinyen dan Izai 60:17, 21?
• Konman ki “sa enn ki pti” in vin “en nasyon pwisan”?
[Study Questions]
[Box/Picture on page 28]
PROFESI IZAI Lalimyer pour tou Imen
Sa bann lenformasyon dan sa de lartik ti ganny prezante dan en diskour dan Lasanble Distrik “Bann Ansennyan Parol Bondye” ki ti ganny fer lannen 2001 a 2002. Alafen sa diskour, dan laplipar landrwa sa orater ti entrodwir en nouvo piblikasyon ki annan pour tit La prophétie d’Isaïe, lumière pour tous les humains, Volim De. Son lannen avan, La prophétie d’Isaïe, lumière pour tous les humains, Volim Enn ti sorti. Avek lansman sa nouvo piblikasyon, aprezan i annan en diskisyon azour lo preski sak verse sa liv Izai. Sa de volim pe vreman ed nou pour aprofondi nou konprenezon ek lapresyasyon pour liv profetik Izai ki enspir lafwa.
[Portre lo paz 25]
Dan lopozisyon vyolan, ‘Zeova i anbelir son pep avek delivrans’
[Portre lo paz 26]
Pep Bondye i servi resours bann nasyon ki itil pour fer avanse ladorasyon pir
[Portre lo paz 27]
Zeova in beni son pep par fer zot progrese dan zot fason organize e fer zot anpe