“Ou en Fanm ekselan”

Sa ti en konpliman ki en zenn fanm Moabit ti gannyen. I ti en vev apele Rit, belfiy en fanm Izraelit, apele Naomi. Rit ki ti viv an Izrael apepre 3000 an pase, dan letan bann ziz, ti ganny en repitasyon konman en fanm ekselan. (Rit 3:11) Konman ki i ti arive ganny sa repitasyon? Lekel ki kapab benefisye avek son legzanp?

I pa ti en dimoun ki ti manz “dipen lapares.” Rit ti travay dir e pour lontan e konman en dimoun ki anmas larestan apre rekolt. E i ti merite ganny felisite pour son travay dir. Kantmenm i ti ganny ofer pour redwir son lakantite travay, Rit ti kontinyen travay dir, i ti fer plis ki sa ki i ti merit fer. Dan en fason remarkab, deskripsyon Labib konsernan en madanm kapab, ki travay dir e ki merit loner i al tre byen avek Rit.—Proverb 31:10-31; Rit 2:7, 15-17.

Se son bann kalite spirityel—limilite, leta lespri sakrifis, ek son lanmour fidel—ki ti kontribye bokou pour fer Rit ganny en bon repitasyon. Apre ki i ti kit son paran ek son pei natal, avek en pti gin lespwar pour trouv sa sekirite ki maryaz i kapab anmennen, i ti reste atase avek Naomi. Anmenmtan, Rit ti eksprim son dezir pour servi Zeova, Bondye son belmer. Pour montre valer ki Rit ti annan, resi Labib i dir ki i ti “pli meyer pour [Naomi] ki set garson.”—Rit 1:16, 17; 2:11, 12; 4:15.

Kantmenm Rit ti merite ganny felisite par lezot pour son ekselans, sa ki ti pli enportan ti laprouvasyon Bondye pour son bann kalite, e rekonpans ki Bondye ti donn li pour vin en zanset Zezi Kri. (Matye 1:5; 1 Pyer 3:4) Wi, Rit i en bon legzanp pa zis pour bann fanm Kretyen me osi pour tou bann ki dir zot ador Zeova!