Problenm Limanite eski en Zour zot pou fini?

“EN KAR popilasyon lemonn i viv dan lapovrete, 1.3 bilyon i viv lo mwens ki 1 dolar par zour, 1 bilyon pa konn lir e ekrir, 1.3 bilyon napa akse avek bon delo pour bwar e 1 bilyon napa manze.” En rapor ki sorti Irlann ti fer sa remark konsernan sitiasyon lemonn.

Sa pa i vreman montre ki zonm pa kapab trouv bann solisyon dirab pour bann problenm ki lemonn i ladan! Sa bann problenm i paret pli deplorab ler ou realize ki en gran mazorite sa bann dimoun ki’n ganny dekrir dan sa rapor i bann madanm ek zanfan ki pa kapab defann zot lekor. Pa i sokan pour vwar ki menm konmela, dan 21 tyenm syek, “toulezour drwa en gran kantite dimoun i kontinyen ganny vyole”?—The State of the World’s Children 2000.

“En nouvo Lemonn dan en sel Zenerasyon”

United Nations Children’s Fund in eksprim konfyans ki “sa latmosfer dezespwar ki sa bann labi . . . in anmennen lo lavi plizyer dimoun partou dan lemonn, i kapab ganny retire.” Sa lorganizasyon i dir ki sa bann kondisyon terib ki sa plizyer bilyon pov malere pe bezwen sibir ozordi i “pa ni inevitab oubyen pa kapab sanze.” Annefe, i’n lans en lapel pour “tou dimoun realiz en nouvo lemonn dan en sel zenerasyon.” Sa lorganizasyon i swete ki i ava en lemonn kot tou imen pou ganny “libere avek lapovrete, diskriminasyon, vyolans ek maladi.”

Sa bann dimoun ki manifeste sa bann santiman koumsa i ganny ankouraze par lefe ki menm konmela bann dimoun ki enterese i fer en kantite travay pour soulaz bann konsekans trazik ki arive akoz “en seri konfli ek kriz ki paret pa pou zanmen fini.” Par egzanp, pandan sa dernyen 15 an, Proze Tyernobil pour bann Zanfan “in ede pour diminyen soufrans plizyer santenn zanfan ki’n ganny afekte avek kanser akoz sibstans nikleer.” (The Irish Examiner, 4 Avril, 2000) Bann lorganizasyon imaniter, pti konman gran, i sertennman fer en gran diferans dan lavi sa gran kantite viktim lager ek dezas.

Toutfwa, sa bann ki enplike dan bann zefor imaniter i bann dimoun realis. Zot konnen ki sa bann problenm ki nou pe rankontre “i pli bokou e pli anrasinen ki zot ti ete 10 an pase.” David Begg, sef egzekitif Irish charity Concern, i dir ki “bann travayer, lezot dimoun enterese, ek bann ki fer donasyon ti reazir dan en fason vreman enpresyonan” kan Mozanbik ti ganny frape par en linondasyon ki ti fer bokou dezas. I azoute, “me, i enposib pour nou kapab sirmont sa gran kantite dega dan bann tel dezas nou tousel.” Konsernan bann zefor led sekour an Lafrik, i ti admet fransman: “Sa detrwa rezon pour annan lespwar ki egziste i parey ennde labouzi ki pe alimen byen sonm.” Bokou dimoun pou santi ki son komanter i rezim sitiasyon lemonn.

Eski nou kapab vreman ekspekte pour vwar sa “nouvo lemonn dan en sel zenerasyon” ki tou dimoun pe swete vwar? Kantmenm bann zefor imaniter ki pe ganny fer i vreman merit ganny felisite, sirman i fer sans pour konsider en lot lespwar pour en nouvo lemonn kot i annan lazistis ek lape. Labib i donn sa lespwar, parey sa lot lartik pou diskite.

 [Lo paz 2 portre par]

Paz 3, bann zanfan: UN/DPI Photo par James Bu