Zeova Pe Anbelir Son Pep Avek Lalimyer
Zeova Pe Anbelir Son Pep Avek Lalimyer
“Leve, O fanm, anvoy lalimyer, parski ou lalimyer in arive e lo ou, laglwar Zeova in leve.”—IZAI 60:1.
1, 2. (a) Ki kondisyon limanite? (b) Lekel ki par deryer sa teneb ki limanite pe eksperyanse?
“NOU vreman bezwen en Izai oubyen en Sen Pol!” Prezidan Lanmerik, Harry Truman, ti plennyen dan bann lannen 1940. Akoz i ti dir sa parol? Parski dan sa letan ki i ti pe viv, i ti santi en bezwen pour bann dirizan ki annan en moralite tre o. Limanite ti’n fek pas atraver sa peryod pli sonm dan 20 tyenm syek, dezyenm lager mondyal. Me kantmenm lager ti’n fini, lemonn pa ti anpe. Teneb ti pe persiste. Anfet, 57 an apre ki sa lager in fini, lemonn i ankor dan teneb. Si Prezidan Truman ti ankor vivan ozordi, san dout i ti pou ankor santi sa nesesite pour annan bann dirizan avek bon moralite dan kalib Izai oubyen zapot Pol.
2 Ki swa Prezidan Truman ti konn sa oubyen non, zapot Pol ti koz lo sa teneb ki pe afliz limanite, e i ti averti lezot kont sa dan son lekritir. Par egzanp, i ti averti bann konpanyon Kretyen: “Nou pa pe lit kont dimoun, me kont bann pouvwar move lespri dan ler, bann lotorite, ek pouvwar dan lemonn teneb dan sa letan ki nou pe viv ladan.” (Efezyen 6:12, nou ki’n met an italik.) Par sa parol, Pol pa ti zis montre ki i konsyan sa teneb spirityel ki pe anvlop lemonn me ki i ti osi konn son vre sours—bann lafors demonyak pwisan ki ganny dekrir konman “pouvwar dan lemonn teneb.” Vi ki bann lespri pwisan i par deryer sa teneb ki nou vwar dan lemonn, ki bann senp imen i kapab fer pour elimin sa?
3. Malgre sa kondisyon fernwanr ki limanite i ladan, ki Izai ti predir pour bann fidel?
3 Izai osi ti koz lo sa teneb ki pe afliz limanite. (Izai 8:22; 59:9) Toudmenm, kan i ti get dan nou letan, i ti predir anba lenspirasyon ki menm dan sa bann letan fernwanr, Zeova ti pou fer keksoz vin pli kler pour bann ki kontan lalimyer. Wi, kantmenm nou napa Pol oubyen Izai avek nou an personn, parkont nou annan zot lekritir enspire pour gid nou. Pour vwar konman ki sa i en benediksyon pour bann ki kontan Zeova, annou egzamin parol profetik Izai dan son liv, sapit 60.
En Fanm profetik i anvoy Lalimyer
4, 5. (a) Ki Zeova i demann en fanm pour fer, e ki promes Zeova i fer? (b) Ki lenformasyon enteresan ki Izai sapit 60 i kontyen?
4 Premye parol dan Izai 60 i ganny adrese avek en fanm ki dan en sitiasyon byen tris—i pe alonze ater dan fernwanr. Toudenkou, lalimyer i pers sa fernwanr, e Zeova i kriye: “Leve, O fanm, anvoy lalimyer, parski ou lalimyer in arive e lo ou laglwar Zeova in leve.” (Izai 60:1) Letan ti’n arive pour sa fanm leve e reflekte lalimyer Bondye, setadir son laglwar. Akoz? Nou vwar larepons dan verse swivan: “Regarde! teneb li menm pou kouver later, e en fernwanr epe bann kominote nasyonal; me lo ou Zeova pou briye, e lo ou son prop laglwar pou ganny trouve.” (Izai 60:2) Kan sa fanm i obeir lord Zeova, i annan konfyans ki sa pou anmenn en bon rezilta. Zeova i dir: “Bann nasyon pou sertennman al kot ou lalimyer, e bann lerwa ver ou laklerte ki pe leve.”—Izai 60:3.
5 Sa bann parol eksitan dan sa trwa verse i en lentrodiksyon ensi ki en rezimen larestan Izai sapit 60. I predir leksperyans ki en fanm profetik pou pas ladan e i eksplike konman nou kapab reste dan lalimyer Zeova menm si teneb in kouver limanite. Me ki sa bann senbol dan sa trwa verse i reprezante?
6. Lekel sa fanm ki Izai sapit 60 i koz lo la e lekel ki pe reprezant li lo later?
6 Sa fanm ki Izai 60:1-3 i koz lo la i Siyon, lorganizasyon seles Zeova ki konpoze avek bann kreatir spirityel. Ozordi, Siyon i ganny reprezante lo later par larestan “Izrael Bondye,” kongregasyon enternasyonal bann Kretyen ki’n ganny swazir par lespri sen, ki annan lespwar pour al renny avek Kris dan lesyel. (Galat 6:16, NW ) Sa nasyon spirityel pou finalman annan en total 144,000 manm, e lakonplisman modern Izai sapit 60 i konsantre lo bann ki ankor vivan lo later dan “bann dernyen zour.” (2 Timote 3:1; Revelasyon 14:1) Sa profesi i osi annan bokou pour dir lo bann konpanyon sa bann Kretyen swazir, “gran lafoul” ‘lezot mouton.’—Revelasyon 7:9; Zan 10:16.
7. Ki kondisyon Siyon ti ladan an 1918, e konman sa ti ganny profetize?
7 Eski ti annan en letan kot “Izrael Bondye” ti pe alonze dan fernwanr, parey i’n ganny endike par sa fanm profetik? Wi, sa ti arive plis ki 80 an pase. Pandan premye lager mondyal, bann Kretyen swazir ti’n vreman lite pour kontinyen avek zot travay predikasyon. Me an 1918, dernyen lannen lager, travay predikasyon ti preski arete. Joseph F. Rutherford, ki ti pe sirvey travay mondyal predikasyon, ek lezot Kretyen byen koni ti ganny bann gran santans prizon baze lo bann fo lakizasyon. Dan liv Revelasyon, sa bann Kretyen swazir ki ti lo later sa letan, ti ganny dekrir dan en fason profetik konman bann kadav ater “dan lari sa gran lavil, ki apel senbolikman, Sodonm ou Lezip.” (Revelasyon 11:8) Sa ti vreman en peryod fernwanr pour Siyon, parey i’n ganny reprezante par son bann zanfan swazir lo later!
8. Ki sanzman remarkab ti arive an 1919, e avek ki rezilta?
8 Toudmenm, an 1919 ti annan en sanzman remarkab. Zeova ti anvoy lalimyer lo Siyon! Bann manm Izrael Bondye ki ti ankor vivan ti leve pour reflekte lalimyer Bondye. E avek bokou kouraz, zot ti repran zot travay predikasyon konsernan sa bon nouvel. (Matye 5:14-16) Gras a zel sa bann Kretyen ki ti’n ganny renouvle, lezot ti ganny atire ver lalimyer Zeova. Pour konmanse, sa bann nouvo ti ganny swazir par lespri pour vin lezot manm Izrael Bondye. Dan Izai 60:3, zot ganny apele lerwa vi ki zot pou vin bann zeritye ansanm avek Kris, dan Rwayonm seles Bondye. (Revelasyon 20:6) Plitar, en gran lafoul lezot mouton ti konmans ganny atire ver lalimyer Zeova. Sa i “bann nasyon” ki ganny mansyonnen dan sa profesi.
Zanfan sa Fanm i vin dan Lakour!
9, 10. (a) Ki keksoz remarkab sa fanm ti vwar, e ki sa ti anonse? (b) Ki rezon Siyon ti annan pour zwaye?
9 Aprezan, Zeova i konmans donn plis detay lo sa lenformasyon dan Izai 60:1-3. I demann sa fanm pour fer en lot keksoz. Ekout sa ki i dir: “Lev ou lizye dan zalantour e gete!” Sa fanm i obeir, e i vwar en keksoz ki vreman rekonfort li! Son bann zanfan pe vin dan lakour. Sa teks i kontinyen: “Zot tou zot in ganny rasanble ansanm; zot in vin kot ou. Ou bann garson pe kontinyen vini sorti byen lwen, e ou bann fiy ki pou ganny swen lo [ou] kote.” (Izai 60:4) Predikasyon konsernan Rwayonm ki’n ganny fer partou dan lemonn apartir 1919 in atir plizyer milye dimoun dan servis Zeova. Sa bann dimoun osi ti vin “bann garson” ek “bann fiy” Siyon, bann manm Izrael Bondye ki’n ganny swazir. Alor, Zeova in anbelir Siyon par anmenn larestan sa 144,000 dan lalimyer.
10 Eski ou kapab imazin sa lazwa ki Siyon i resanti aprezan ki son bann zanfan i avek li? Anplis ki sa, Zeova i donn Siyon ankor rezon pour zwaye. Nou lir: “Sa moman ou pou vwar e sirman ou pou deborde avek lazwa, anfet ou leker pou frisonnen e gonfle, akoz larises lanmer pou diriz ver ou, resours bann nasyon pou vin kot ou.” (Izai 60:5) An armoni avek sa bann parol profetik, depi bann lannen 1930, en gran lafoul Kretyen ki annan lespwar pour viv pour touzour lo later in rasanble kot Siyon. Zot sorti dan “lanmer,” setadir parmi bann dimoun ki elwannyen avek Bondye, e zot reprezant resours bann nasyon. Zot “bann keksoz dezirab sorti dan tou nasyon.” (Agai 2:7; Izai 57:20) Remarke, osi, ki sa “bann keksoz dezirab” pa ale pour servi Zeova sakenn dan son fason. Non, zot donn lanmen anbelir Siyon par rasanble avek zot bann frer swazir dan ladorasyon, e zot vin “en sel troupo” anba “en sel berze.”—Zan 10:16.
Marsan, Berze, ek Vander i vin kot Siyon
11, 12. Dekrir sa lafoul ki ti ganny vwar pe vin ver Siyon.
11 Rezilta sa rasanbleman ki ti ganny predir i en ogmantasyon eksepsyonnel dan lakantite dimoun ki loue Zeova. Sa i ganny predir dan parol swivan sa profesi. Imazinen ki ou pe debout avek sa fanm profetik lo Montanny Siyon. Ou get dan les, e ki ou vwar? “En lamas samo pou kouver ou, bann zenn mal samo Madyann ek Efa. Tou sa bann ki sorti Seba—pou vini. Zot pou anmenn lor ek lansan blan. E zot pou anons bann louanz Zeova.” (Izai 60:6) Bann gran group marsan i diriz zot latroup samo lo larout ki anmenn ver Zerizalenm. Sa bann samo i parey en linondasyon ki pe kouver pei! Bann vander i anmenn bann kado ki annan bokou valer, “lor ek lansan blan.” E sa bann marsan pe vin ver lalimyer Bondye pour loue li an piblik, ‘pour anons bann louanz Zeova.’
12 Pa zis bann marsan ki pe deplase. Bann berze osi pe vin rasanble kot Siyon. Profesi i kontinyen an dizan: “Tou bann troupo Kedar—zot pou ganny rasanble kot ou. Bann belye Nebayot—zot pou servi ou.” (Izai 60:7a) Bann group berze pe vin dan lavil sen pour ofer Zeova sa ki pli meyer dan zot troupo. Zot menm ofer pour servi Siyon! Konman Zeova i resevwar sa bann etranze? I reponn li menm: “Avek laprouvasyon zot pou mont lo mon lotel, e mon pou anbelir mon lakaz labote.” (Izai 60:7b) Avek labonte, Zeova i aksepte bann lofrann ek servis ki sa bann etranze i ofer. Zot prezans i anbelir son tanp.
13, 14. Ki nou kapab vwar sorti dan rezyon was?
13 Aprezan vir ou latet e obzerv byen lorizon lo kote was. Ki ou vwar? Dan lwen, i annan en keksoz ki resanble en nyaz blan ki’n ganny tale zis parlao sirfas lanmer. Zeova i demann sa kestyon ki ou pe mazinen: “Lekel sa bann ki vini pe anvole parey en nyaz, e parey bann kolonm ver larantre zot lakaz?” (Izai 60:8) Zeova i reponn son prop kestyon: “Bann zil pou kontinyen annan lespwar dan mwan, bann bato Tarsis osi, parey okonmansman, pour anmenn ou bann garson sorti byen lwen, zot larzan ek zot lor avek zot, ver non Zeova ou Bondye e ver Sen Izrael, akoz i pou’n anbelir ou.”—Izai 60:9.
14 Eski ou kapab imazin sa senn? Sa nyaz blan in vin en pe pli pre e aprezan i parey en bann pti pwen lwen dan was. Ou a krwar bann zwazo ki pe anvole parlao laroul. Me pli zot aprose, ou vwar ki zot bann bato ki’n met zot lavwal pour bar divan. I annan sitan bokou sa bann bato ki pe vin ver Zerizalenm ki zot resanble en kantite kolonm. Zot sorti dan bann por byen lwen, e zot pe vin avek en tre gran vites, pour anmenn bann krwayan Zerizalenm pour ador Zeova.
Lorganizasyon Zeova i agrandir
15. (a) Ki ogmantasyon sa bann parol dan Izai 60:4-9 i predir? (b) Ki leta lespri bann vre Kretyen i demontre?
15 Verse 4 a 9 i penn en desen profetik vivan konsernan ogmantasyon ki’n arive lo nivo mondyal depi 1919. Akoz Zeova in beni Siyon avek en tel ogmantasyon? Parski depi 1919, avek lobeisans, Izrael Bondye in anvoy lalimyer Zeova dan en fason konsistan. Eski ou’n remarke ki dapre verse 7, bann ki fek vini i “mont lo lotel [Zeova]”? En lotel i en landrwa kot sakrifis i ganny ofer, e sa karakteristik dan sa profesi i rapel nou ki servis Zeova i enplik sakrifis. Zapot Pol ti ekrir: “Mon bann frer, mon sipliy zot par konpasyon Bondye pour nou, ofer zot lekor konman en sakrifis vivan, sen e agreab devan Bondye, ki ava en kilt ki fer li bokou plezir.” (Romen 12:1) An armoni avek parol Pol, bann vre Kretyen pa kontant zot zis pour asiste servis relizye enn fwa par semenn. Zot donn zot letan, lenerzi, ek resours pour promot ladorasyon pir. Pa prezans sa bann adorater devoue i vreman anbelir lakaz Zeova! Profesi Izai i dir ki i ti pou fer sa. E an retour, nou kapab asire ki sa bann adorater zele i zoli dan lizye Zeova.
16. Lekel ki ti kontribye dan travay rekonstriksyon dan letan ansyen, e lekel ki’n fer li dan nou letan?
16 Bann ki fek vini i anvi travay. Sa profesi i kontinyen an dizan: “Bann etranze pou konstri ou bann miray, e zot prop lerwa pou servi ou.” (Izai 60:10) Kan sa parol ti ganny akonpli pour premye fwa letan bann Zwif ti sorti an egzil Babilonn, bann lerwa ek bann endividi sorti dan lezot nasyon ti anfet ede pour rekonstrir tanp ek lavil Zerizalenm. (Ezra 3:7; Neemya 3:26) Dan lakonplisman modern, sa gran lafoul in ed larestan Kretyen swazir pour batir vre ladorasyon. Zot in ede batir bann kongregasyon Kretyen e alor fortifye “miray” lorganizasyon Zeova ki parey en lavil. Zot osi partisip dan en travay konstriksyon literal—konstriksyon bann Lasal Rwayonm, Lasal Lasanble, ek Betel. Dan sa bann fason, zot ed zot bann frer swazir pour okip bezwen lorganizasyon Zeova ki pe kontinyen agrandir!
17. Nonm en fason ki Zeova i anbelir son pep.
17 Pa sa parol dan dezyenm parti Izai 60:10 i vreman ankourazan! Zeova i dir: “Dan mon lakoler mon ti pou’n tap ou, me dan mon faver mon pou sirman annan pitye pour ou.” Anfet, dan lepase ver 1918/19, Zeova ti disiplin son pep. Me sa ti dan lepase. Aprezan, i lemoman pour Zeova eksprim son mizerikord anver son bann serviter ki i’n swazir ek zot bann konpanyon, lezot mouton. Laprev ki sa i vreman leka i sa ogmantasyon ekstraordiner ki i’n beni zot avek, dan en sans ‘anbelir zot.’
18, 19. (a) Ki promes Zeova in fer konsernan bann nouvo ki pe vin dan son lorganizasyon? (b) Ki larestan verse Izai sapit 60 i dir nou?
18 Sak lannen, plizyer santenn milye lezot “etranze” i asosye avek lorganizasyon Zeova. Laport pou reste ouver pour bokou plis ankor swiv zot. Zeova i dir avek Siyon: “Ou bann laport pou touzour reste ouver; zot pa pou ganny fermen ni lizour ni aswar, afen ki resours bann nasyon i ganny anmennen kot ou, e zot lerwa pou antet.” (Izai 60:11) I annan serten lennmi ki sey ferm sa bann “laport,” me nou nou konnen ki zot pa pou kapab fer li. Zeova li menm in dir ki dan en fason ou en lot bann laport pou reste ouver. Ogmantasyon pou kontinyen.
19 I annan ankor lezot fason ki Zeova in beni son pep, e fer zot vin zoli dan sa bann dernyen zour. Dan en fason profetik, larestan verse dan Izai 60 i fer nou konn sa bann fason.
Eski ou kapab eksplike?
• Lekel “fanm” Bondye, e lekel ki reprezant li lo later?
• Kan ki bann zanfan Siyon ti pe alonze ater, e kan e konman ki zot ti “leve”?
• An servan diferan senbol, ki mannyer Zeova ti predir sa ogmantasyon ki nou vwar dan lakantite proklanmater ozordi?
• Dan ki fason Zeova in fer son lalimyer briye lo son pep?
[Study Questions]
[Portre lo paz 20]
“Fanm” Zeova i ganny demande pour leve
[Portre lo paz 22]
Sa bann bato i parey bann kolonm lo lorizon