Azout Latasman Pour Bondye Avek Ou Perseverans
Azout Latasman Pour Bondye Avek Ou Perseverans
“Azout avek zot lafwa . . . perseverans, e avek perseverans latasman pour Bondye.”—2 PYER 1:5, 6.
1, 2. (a) Ki kalite devlopman nou ekspekte avek en zanfan? (b) Ki kantite enportan devlopman spirityel i ete?
IENPORTAN pour en zanfan grandi, me pa zis grandi fizikman. Nou osi ekspekte ki i devlope mantalman e emosyonnelman. Avek letan, sa zanfan pou nepli konport li parey en manrmay, me i pou devlope pour vin en zonm oubyen en fanm adilt. Zapot Pol ti refer avek sa kan i ti ekrir: “Kan mon ti en zanfan, mon ti koz konman en zanfan, mon ti mazin konman en zanfan, mon ti rezonn konman en zanfan, e ler mon’n vin en zonm, mon’n kit tou sa bann mannyer en zanfan.”—1 Korentyen 13:11.
2 Pol i fer resorti en pwen enportan konsernan devlopman spirityel. Bann Kretyen i bezwen aret fer konman zanfan lo plan spirityel e progrese pour ki “dan zot rezonnman [zot] montre matirite.” (1 Korentyen 14:20) Zot bezwen fer bokou zefor e sey arive “konn en developman konplet parey Kris.” Alors, zot pou nepli vin parey “bann zanfan ki ganny trennen par laroul, e pouse partou par nenport divan lansennyman.”—Efezyen 4:13, 14.
3, 4. (a) Ki nou bezwen fer pour vin bann adilt lo plan spirityel? (b) Ki bann kalite ki fer plezir Bondye ki nou bezwen demontre, e konman ki zot enportan?
3 Ki mannyer nou kapab vin en adilt lo plan spirityel? Devlopman fizik i ariv preski otomatikman dan bann sirkonstans normal, me parkont nou bezwen fer zefor si nou anvi devlope lo plan spirityel. Sa i konmans par pran konnesans egzakt lo Parol Bondye e azir an armoni avek sa ki nou aprann. (Ebre 5:14; 2 Pyer 1:3) An retour, sa i ed nou pour demontre bann kalite ki fer plezir Bondye. Parey devlopman fizik ek son bann laspe ki relye avek li, normalman plizyer kalite ki fer plezir Bondye i devlop anmenmtan. Zapot Pyer ti ekrir: “Fer tou zot zefor pour azout avek zot lafwa, bonn kondwit, avek bonn kondwit, konnesans. Azout avek konnesans, disiplin lo zot lekor, avek disiplin lo zot lekor, perseverans, e avek perseverans latasman pour Bondye. Azout avek latasman pour Bondye, lafeksyon fraternel, e avek lafeksyon fraternel lanmour.”—2 Pyer 1:5-7.
4 Tou sa bann kalite ki Pyer in nonmen i esansyel, e nou pa kapab negliz ni enn ant zot. I azoute: “Si zot posed tousala an labondans i ava rann zot aktif e prodiktif dan konnesans nou Senyer Zezi-Kri.” (2 Pyer 1:8) Annou konsantre lo nesesite pour azout latasman pour Bondye avek nou perseverans.
Lenportans Perseverans
5. Akoz nou bezwen persevere?
5 Tou le de, Pyer ek Pol, ti asosye latasman pour Bondye avek perseverans. (1 Timote 6:11) Annan perseverans i pa senpleman vedir siport en difikilte e reste ferm. I enplik pasyans, kouraz, ek rezolisyon, pa perdi lespwar kan ou fer fas avek bann leprev, lobstak, tantasyon, oubyen persekisyon. Vi ki nou pe viv “en lavi fidel dan Kris Zezi,” nou ekspekte ganny persekite. (2 Timote 3:12) Nou bezwen persevere si nou oule demontre nou lanmour pour Zeova e devlop bann kalite ki neseser pour ganny sove. (Romen 5:3-5; 2 Timote 4:7, 8; Zak 1:3, 4, 12) Nou pa pou ganny lavi eternel si nou pa persevere.—Romen 2:6, 7; Ebre 10:36.
6. Kwa ki enplike dan persevere ziska lafen?
6 Kantmenm nou’n kapab byen konmanse, finalman sa ki pli enportan se nou perseverans. Zezi ti dir: “Sa ki reste fidel ziska lafen pou ganny sove.” (Matye 24:13) Wi, nou bezwen persevere ziska lafen, ki swa lafen nou lavi prezan oubyen lafen sa sistenm mesan. Dan tou le de ka, nou bezwen reste fidel avek Bondye. Me si nou pa azout latasman pour Bondye avek nou perseverans, nou pa kapab fer plezir Zeova e nou pa pou ganny lavi eternel. Me kisisa latasman pour Bondye?
Kisisa Latasman pour Bondye
7. Kisisa latasman pour Bondye, e ki i pous nou pour fer?
7 Latasman pour Bondye i en respe profon, ladorasyon, ek servis ki nou personnelman donn Bondye akoz nou fidel anver son souvrennte iniversel. Pour demontre latasman pour Bondye avek respe, nou bezwen annan konnesans egzakt lo li ek son bann prensip. Nou devret anvi konn Bondye personnelman e byen profon. Sa pou pous nou pour devlop en latasman ki sorti ofon nou leker pour li, enn ki aparan dan nou aksyon ek nou fason viv. Nou devret annan sa dezir pour vin parey Zeova otan ki nou kapab—pour kopye son fason fer e reflekte son bann kalite ek personnalite. (Efezyen 5:1) Anfet, latasman pour Bondye i motiv nou pour anvi fer li plezir dan tou sa ki nou fer.—1 Korentyen 10:31.
8. Konman ki latasman pour Bondye i relye etrwatman avek latasman zis pour Bondye tousel?
8 Pour demontre vre latasman pour Bondye, nou bezwen ador zis Zeova tousel, e pa les nanryen pran son plas dan nou leker. Konman nou Kreater, zis li ki annan drwa ganny nou latasman total. (Deterononm 4:24; Izai 42:8) Toudmenm, Zeova pa fors nou pour ador li. I oule ki nou donn li nou latasman volonterman. Se nou lanmour pour Bondye, baze lo konnesans egzakt lo li, ki pous nou pour pirifye nou lavi e fer en dedikasyon san rezerv avek li e apre viv an akor avek sa.
Batir en Relasyon avek Bondye
9, 10. Ki mannyer nou kapab devlop e mentenir en relasyon pros avek Bondye?
9 Apre ki nou’n senboliz nou dedikasyon avek Bondye par batenm, nou ankor bezwen devlop en relasyon ankor pli personnel avek li. Nou dezir pour fer sa e pour servi Zeova fidelman i alor pous nou pour kontinyen etidye son Parol e medit lo la. Anmezir ki nou les lespri Bondye enfliyans nou lespri ek leker, nou lanmour pour Zeova i vin pli profon. Nou relasyon avek li i kontinyen vin sa keksoz pli enportan dan nou lavi. Nou vwar Zeova konman nou pli bon Zanmi e nou anvi fer li plezir toultan. (1 Zan 5:3) Sa plezir ki nou annan dan nou bon relasyon avek Bondye i grandi, e nou apresye ki i ansenny nou avek lanmour e koriz nou kan i neseser.—Deterononm 8:5.
10 Nou relasyon presye avek Zeova i kapab afebli amwen ki nou pe toultan pran bann mezir pour fortifye li. Si sa i arive, i pa pou lafot Bondye, akoz li “i pa lwen avek sakenn parmi nou.” (Akt 17:27) Pa nou kontan ki Zeova pa’n fer li difisil pour nou apros li! (1 Zan 5:14, 15) Byensir, nou bezwen fer bokou zefor pour gard en relasyon personnel avek Zeova. Toutfwa, i ed nou pour apros pli pre avek li par donn nou tou provizyon ki nou bezwen pour batir e mentenir en latasman pour li. (Zak 4:8) Ki mannyer nou kapab servi o maksimonm tou sa bann provizyon ki i’n donn nou avek lanmour?
Reste for spirityelman
11. Nonm ennde fason ki nou kapab demontre nou latasman pour Bondye.
11 Nou lanmour profon pour Bondye pou motiv nou pour demontre ziska ki degre nou atase avek li, an akor avek konsey Pol: “Fer tou pour paret devan Bondye konman en zonm ki’n fer leksperyans, konman en zouvriye ki napa nanryen pour onte me ki anons byen mesaz laverite.” (2 Timote 2:15) Pour fer sa, nou bezwen mentenir en bon progranm letid Labib, asiste renyon e partisip dan predikasyon regilyerman. Nou kapab osi reste pros avek Zeova par “priye tou letan.” (1 Tesalonisyen 5:17) Sa i bann fason enportan ki nou kapab demontre nou latasman pour Bondye. Letan nou negliz enn ant sa bann keksoz, nou kapab malad spirityelman e pa kapab defann nou lekor kont bann taktik Satan.—1 Pyer 5:8.
12. Konman ki nou kapab reisi fer fas avek nou bann leprev?
12 Gard nou for e aktif lo plan spirityel i osi ed nou pour fer fas avek bokou leprev ki nou rankontre. Nou kapab ganny bann leprev ki sorti kot bann sours ki kapab teste nou en kantite. Lendiferans, lopozisyon, ek persekisyon i kapab pli dir pour andire si zot sorti kot bann fanmiy pros, lezot parante, oubyen nou bann vwazen. Nou kapab ptit-a-pti ganny bann presyon ki pa sitan aparan kot travay oubyen dan lekol pour fer nou abandonn nou bann prensip Kretyen. Dekourazman, maladi, ek depresyon i kapab afebli nou fizikman e fer li pli difisil pour nou fer fas avek bann leprev ki teste nou lafwa. Me nou kapab reisi fer fas avek okenn leprev si nou persevere dan ‘en lavi sen e annan respe pour Bondye, letan nou pe esper sa zour.’ (2 Pyer 3:11, 12) E anmezir ki nou fer sa, nou kapab gard nou lazwa e annan konfyans ki Bondye pou beni nou.—Proverb 10:22.
13. Ki nou bezwen fer pour kontinyen demontre latasman pour Bondye?
13 Kantmenm Satan i target bann ki atase avek Bondye, pa bezwen ki nou per. Akoz? Parski “Bondye i konnen ki mannyer i pou delivre bann dimoun ki atase avek li dan difikilte.” (2 Pyer 2:9) Pour andir bann leprev e eksperyans en tel delivrans, nou bezwen “abandonn nou move lavi ek son bann move dezir, . . . viv en lavi rezonnab, zis e fidel avek Bondye lo sa later.” (Tit 2:12) Konman bann Kretyen, nou bezwen veye ki okenn febles ki annan pour fer avek bann dezir ek aktivite laser pa gradyelman pran kontrol lo nou latasman pour Bondye e detri li. Aprezan, annou egzamin ennde keksoz ki kapab menas nou latasman pour Bondye.
Vey bann keksoz ki kapab menas ou Latasman pour Bondye
14. Ki nou devret mazinen si nou pe ganny atire par sa pyez pour tay deryer larzan?
14 Tay deryer larzan i en latrap pour bokou dimoun. Nou kapab pe tronp nou lekor, letan nou “krwar ki lafwa dan Bondye i en fason pour vin ris.” Sa i kapab donn nou kouraz pour abiz lo sa konfyans ki nou bann konpanyon Kretyen i annan dan nou. (1 Timote 6:5) Nou menm kapab krwar ki i byen pour met presyon lo en Kretyen ris pour nou ganny en lón ki probableman nou pa pou kapab rann. (Psonm 37:21) Me pa bann keksoz materyel ki “posed promes lavi dan letan prezan, ek dan lavenir,” se plito latasman pour Bondye. (1 Timote 4:8) Vi ki “nou pa’n vin avek nanryen dan lemonn e nou pa pou kapab anmenn nanryen avek nou,” annou pli determinen pour rod “latasman pour Bondye” e ‘kontant nou avek manze ek lenz.’—1 Timote 6:6-11.
15. Ki nou kapab fer si rod plezir pe menas nou latasman pour Bondye?
15 Rod plezir i kapab pran nou latasman ki nou annan pour Bondye. Eski i neseser pour nou fer bann sanzman dan sa domenn konmela menm? I vre ki nou ganny serten benefis kan nou fer legzersis fizik e detann nou. Parkont, sa bann benefis i pti gin kan nou konpar zot avek lavi eternel. (1 Zan 2:25) Ozordi, bokou dimoun i ‘kontan plezir plis ki Bondye, zot montre en laparans lapiete, me rezet son vre pisans,’ e nou bezwen evite frekant sa bann dimoun. (2 Timote 3:4, 5) Bann ki met lanfaz lo latasman pour Bondye pe “anmas en bon e solid trezor pour lavenir, e koumsa zot ava ganny vre lavi.”—1 Timote 6:19.
16. Ki bann move dezir ki anpes serten viv an akor avek bann legzizans drwat Bondye, e ki mannyer nou kapab ranport laviktwar lo sa bann dezir?
16 Labi lalkol ek drog, imoralite, ek bann move dezir i kapab detrir nou latasman pour Bondye. Si nou les nou ganny kontrole par sa bann keksoz, sa i kapab anpes nou viv an akor avek bann legzizans drwat Bondye. (1 Korentyen 6:9, 10; 2 Korentyen 7:1) Menm Pol ti bezwen siport en konfli kontinyel avek son laser enparfe. (Romen 7:21-25) Bann mezir tre strik i neseser pour elimin bann move dezir. Avan tou, nou bezwen determinen pour reste prop moralman. Pol i dir nou: “Met an-mor bann dezir materyel ki dan zot: limoralite seksyel, lenpirte, pasyon, move dezir, move dezir pour akapar keksoz dimoun, ki en form ladorasyon zidol.” (Kolosyen 3:5) Pour arive met an-mor nou bann manm an sa ki konsern bann tel pese, nou bezwen determinen pour elimin zot, retir zot net. Priy senserman pour demann Bondye led, pou ed nou pour rezet bann move dezir e resers ladrwatir ek latasman pour Bondye dan sa sistenm mesan.
17. Ki mannyer nou devret vwar disiplin?
17 Dekourazman i kapab afebli nou perseverans e annan en tre move lefe lo nou latasman pour Bondye. Bokou serviter Bondye in eksperyans dekourazman. (Nonm 11:11-15; Ezra 4:4; Yona 4:3) Dekourazman i kapab sirtou annan en lefe destriktif lo nou si i ganny akonpannyen par rankin akoz nou ofanse oubyen akoz nou’n ganny severman reprimande oubyen disiplinen. Parkont, reprimann ek disiplin i laprev ki Bondye i enterese avek nou akoz i kontan nou. (Ebre 12:5-7, 10, 11) Disiplin pa devret ganny konsidere konman senpleman en pinisyon me konman en mwayen pour form nou dan semen ladrwatir. Si nou abes nou, nou pou apresye e aksepte konsey, e realize ki “bann reprimann disiplin i semen pour lavi.” (Proverb 6:23) Sa i kapab ed nou pour byen progrese dan nou latasman pour Bondye.
18. Ki responsabilite nou annan an rapor avek bann lofans personnel?
18 Bann malantandi ek lofans personnel i kapab vin en defi pour nou latasman pour Bondye. Zot kapab anmenn traka oubyen fer serten izol zot avek zot bann frer ek ser spirityel, ki pa en keksoz saz pour fer. (Proverb 18:1) Me i bon rapel ki kontinyen gard rankin oubyen lanmertim anver lezot i kapab severman afekte nou relasyon avek Zeova. (Levitik 19:18) Anfet, “si en dimoun i ay son frer ki i war, i pa kapab kontan Bondye ki i pa war.” (1 Zan 4:20) Dan son sermon lo montanny, Zezi ti met lanfaz lo nesesite pour pran bann pa deswit pour rezourd bann problenm personnel. I ti dir bann dimoun ki ti pe ekout li: “Si alor, ou vin prezant Bondye ou lofrann devan lotel, e ki la ou rapel ki ou frer i annan keksoz kont ou, kit ou lofrann devan lotel, e al fer lape avek ou frer; apre retournen e prezant ou lofrann.” (Matye 5:23, 24) En leskiz i kapab ede pour geri en blesir ki’n ganny koze par bann parol oubyen aksyon blesant. Si nou demann pardon e admet ki nou’n mal azir, en blesir i kapab ganny geri e bann relasyon pezib i kapab ganny reetablir. Zezi ti osi donn lezot konsey lo konman pour rezourd bann problenm. (Matye 18:15-17) Pa nou kontan letan nou bann zefor pour rezourd problenm i reisi!—Romen 12:18; Efezyen 4:26, 27.
Swiv Legzanp Zezi
19. Akoz i sitan enportan pour imit legzanp Zezi?
19 Bann leprev pou sirman afliz nou, me zot pa neseserman bezwen anpes nou konsantre lo nou lakours pour lavi eternel. Pa bliye ki Zeova i kapab delivre nou dan leprev. Anmenmtan ki nou “debaras nou avek tou fardo” e ‘avek determinasyon fer sa lakours ki i’n propoz nou,’ annou “gard nou regar fikse lo Zezi, sa enn ki linisyater nou lafwa, e ki anmenn li ziska perfeksyon.” (Ebre 12:1-3) Egzamin atantivman legzanp Zezi e sey nou mye pour imit li an parol e aksyon, pou ed nou pour kiltiv latasman pour Bondye e demontre li pli byen.
20. Ki rekonpans nou gannyen kan nou persevere e annan latasman pour Bondye?
20 Perseverans ek latasman pour Bondye i mars kotakot avek kanmarad pour garanti nou delivrans. Par demontre sa bann kalite presye, nou kapab kontinyen reste fidel dan nou servis sakre pour Bondye. Menm kan nou dan leprev, nou pou zwaye akoz nou santi lafeksyon ek benediksyon Zeova parski nou’n persevere e nou pe demontre latasman pour Bondye. (Zak 5:11) Deplis, Zezi li menm i donn nou sa lasirans: “Par zot perseverans zot a sov zot lavi.”—Lik 21:19.
Ki ou pou reponn?
• Akoz perseverans i enportan?
• Kisisa latasman pour Bondye, e konman i ganny demontre?
• Ki mannyer nou kapab batir e mentenir en relasyon entim avek Bondye?
• Nonm serten keksoz ki kapab menas nou latasman pour Bondye. Ki mannyer nou kapab evit zot?
[Study Questions]
[Portre lo paz 8]
Latasman pour Bondye i ganny demontre dan plizyer fason
[Portre lo paz 10]
Veye ki nanryen pa menas ou latasman pour Bondye