Bann Kretyen I Ador An Espri E An Verite
Bann Kretyen I Ador An Espri E An Verite
“Bondye i Lespri e tou sa ki ador li, i devre ador li an-espri e an verite.” —ZAN 4:24.
1. Ki kalite ladorasyon ki fer plezir Bondye?
ZEZI Kri sel Garson Zeova, ti klerman endike ki ladorasyon ki fer plezir son Papa seles. Ler i ti pe donn en temwannyaz rekonfortan avek en madanm Samariten kot en pi obor lavil Sikar, Zezi ti dir: “Zot zot pa konnen ki zot adore, me nou nou konnen sa ki nou adore, akoz delivrans i vin atraver bann Zwif. Ler pe vini e i’n fini arive pour bann vre ladorater ador Bondye an-espri e an verite, parski se koumsa ki Bondye i oule ki nou ador li. Bondye i Lespri e tou sa ki ador li, i devre ador li an-espri e an verite.” (Zan 4:22-24) Ki nou konpran par sa bann parol?
2. Lo kwa bann Samariten ti baz zot ladorasyon?
2 Bann Samariten ti annan bann fo pwennvi relizye. Pour zot, selman sa senk premye liv Lekritir Sen ki ti’n ganny enspire e zot ti aksepte li inikman dan zot prop tradiksyon koni konman Pantatek Samariten. Menm si bann Samariten pa ti vreman konn Bondye, bann Zwif zot, zot ti’n ganny konfye avek konnesans lo Lekritir. (Romen 3:1, 2) Alor, i ti posib pour bann Zwif fidel ek lezot dimoun rezwir faver Zeova. Me pour ganny faver Zeova, ki zot ti bezwen fer?
3. Ki nou bezwen fer pour ador Bondye “an-espri e an verite”?
3 Pour kapab fer plezir Zeova, ki bann Zwif, Samariten ek lezot ki ti viv dan lepase ti bezwen fer? Zot ti bezwen ador li “an-espri e an verite.” Nou osi nou bezwen fer sanmenm. I vre ki nou bezwen servi Bondye avek zel e motive par en leker ranpli avek lanmour ek lafwa, me pour ador Bondye avek lespri nou sirtou bezwen annan son lespri sen e les li gid nou. Atraver letid ek laplikasyon Parol Bondye, nou lespri i devret vin an armoni avek sa ki pour li. (1 Korentyen 2:8-12) Pour ki Zeova i aksepte nou ladorasyon, nou devret osi ador li an verite. I devret an akor avek sa ki Parol Bondye, Labib, i revele lo li ek son plan.
I posib trouv Laverite
4. Konman ki serten i vwar laverite?
4 Serten etidyan filozofi in devlop sa pwennvi ki imen pa kapab arive konn laverite absoli. Annefe, loter Swis, Alf Ahlberg ti ekrir: “Fason ki bokou kestyon filozofik i ete i fer li enposib pour donn en larepons defini.” Kantmenm serten i dir ki nou kapab konn zis en bout laverite, eski sa i vreman leka? Pa dapre Zezi Kri.
5. Akoz Zezi ti vin dan lemonn?
5 Dan nou lespri imazin sa senn swivan: I boner dan lannen 33 N.L., e Zezi pe debout devan Gouverner Romen Pons Pilat. Zezi i dir avek Pilat: “Mon’n ne e mon’n vin dan lemonn pour servi temwen pour laverite.” Pilat i demande: “Kisisa laverite?” Me i pa esper larepons Zezi.—Zan 18:36-38.
6. (a) Ki mannyer “laverite” in ganny dekrir? (b) Ki travay Zezi ti donn son bann disip pour fer?
6 “Laverite” in ganny dekrir konman “lansanm bann keksoz, levennman, e fe reel.” (Webster’s Ninth New Collegiate Dictionary) Sepandan, eski Zezi ti rann temwannyaz lo laverite an zeneral? Non. I ti annan serten laverite spesifik antet. I ti demann son bann disip pour anons sa laverite, akoz i ti dir zot: “Ale e fer tou pep vin mon bann disip. Batiz zot o non di-Per, di-Fis e di-Sent-Espri. Ansenny zot pour obei tou sa ki mon’n konmande.” (Matye 28:19, 20) Avan lafen sa sistenm, bann vre disip Zezi ti pou anons “laverite levanzil” partou dan lemonn. (Galat 2:14) Sa ti pou ganny fer pour ki parol Zezi i akonpli: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” (Matye 24:14) Alor i enportan ki nou idantifye lekel sa bann ki pe ansenny tou nasyon laverite par pres sa bon nouvel Rwayonm.
Ki mannyer nou kapab aprann Laverite
7. Konman ou pou montre ki Zeova i Sours laverite?
7 Zeova i Sours laverite spirityel. Annefe, psalmis David ti apel Zeova “Bondye laverite.” (Psonm 31:5; 43:3) Zezi ti rekonnet ki parol son Papa i laverite e i ti osi deklare: “Bann profet in ekri, ‘Zot tou zot pou ganny ansennyen par Bondye limenm.’ Tou dimoun ki ekout mon Papa e ki resevwar son lansennyman i vin kot mwan.” (Zan 6:45; 17:17; Izai 54:13) I kler, alor, ki sa bann ki pe rod laverite i devret ganny ansennyen par Zeova, sa Gran Enstrikter. (Izai 30:20, 21) Bann ki rod laverite i bezwen ganny “konnesans Bondye.” (Proverb 2:5) E avek lanmour Zeova in ansenny oubyen transmet laverite dan plizyer fason.
8. Dan ki fason Bondye in ansenny oubyen transmet laverite?
8 Par egzanp, se atraver bann lanz ki Bondye ti transmet Lalwa avek bann Izraelit. (Galat 3:19) Dan bann rev i ti promet benediksyon avek patrias Abraam ek Zakob. (Zenez 15:12-16; 28:10-19) Bondye ti menm koze depi lesyel, par egzanp zour ki Zezi ti batize sa parol tousan ti ganny tande lo later: “Sa mon Garson byenneme, ki donn mwan bokou lazwa.” (Matye 3:17) Nou kapab osi rekonesan ki Bondye ti transmet laverite par enspir bann ekriven Labib. (2 Timote 3:16, 17) Alor, par aprann sa ki dan Parol Bondye, nou kapab annan “lafwa dan laverite.”—2 Tesalonisyen 2:13.
Laverite ek Garson Bondye
9. Konman ki Bondye in servi son Garson pour revel laverite?
9 Bondye in servi sirtou son Garson, Zezi Kri, pour revel laverite avek limanite. (Ebre 1:1-3) Annefe, Zezi ti koz laverite dan en fason ki personn pa’n deza koze avan. (Zan 7:46) Menm apre ki i ti mont dan lesyel, i ti revel laverite sorti kot son Papa. Par egzanp, zapot Zan ti resevwar en “revelasyon Zezi-Kri, ki Bondye ti donn li pour montre son bann serviter sa ki devre arive byento.”—Revelasyon 1:1-3.
10, 11. (a) Sa laverite ki Zezi ti prese i relye avek kwa? (b) Konman ki Zezi ti fer laverite vin realite?
10 Zezi ti dir Pons Pilat ki I’n vin lo later pour servi konman temwen pour laverite. Pandan son minister, Zezi ti revele ki sa laverite ti relye avek zistifikasyon souvrennte Zeova par mwayen Rwayonm Bondye avek Kris konman Lerwa. Me Zezi ti bezwen fer plis ki zis prese e ansennyen pour kapab vin temwen laverite. Zezi ti fer sa laverite vin en realite par akonpli li. Alor Pol ti kapab ekrir: “Pa les personn pas zizman lo zot konsernan sa ki zot manze e bwar, konsernan bann zour lafet, lafet nouvel-lin oubyen bann saba. Tousala i zis lonbraz keksoz ki pou vini dan lavenir, me se Kris ki larealite.”—Kolosyen 2:16, 17.
11 Nesans Zezi ki ti’n ganny predir pour ariv an Betleenm i en fason ki laverite ti vin realite. (Mika 5:2; Lik 2:4-11) Laverite ti osi vin realite par lakonplisman parol profetik Danyel konsernan laparisyon Mesi alafen sa 69 ‘semenn lannen.’ Sa ti arive ler Zezi ti prezant son lekor avek Bondye zour i ti batize e ganny swazir avek lespri sen, moman egzakt ki sa ti’n ganny predir pour arive, lannen 29 N.L. (Danyel 9:25; Lik 3:1, 21, 22) Laverite ti kontinyen vin realite par bann eklersisman ki Zezi ti donnen par son minister konman en proklanmater Rwayonm. (Izai 9:1, 2, 6, 7; 61:1, 2; Matye 4:13-17; Lik 4:18-21) I ti osi vin realite par son lanmor ek rezireksyon.—Psonm 16:8-11; Izai 53:5, 8, 11, 12; Matye 20:28; Zan 1:29; Akt 2:25-31.
12. Akoz Zezi ti kapab dir, ‘mwanmenm laverite’?
12 Vi ki laverite i santre lo Zezi Kri, i ti kapab dir: “Se mwanmenm semen, laverite ek lavi. Personn pa kapab ariv kot mon Papa san pas par mwan.” (Zan 14:6) Dimoun i ganny libere spirityelman ler zot demontre ki zot “pour laverite” par aksepte rol Zezi dan plan Bondye. (Zan 8:32-36; 18:37) Parski bann ki parey mouton i aksepte laverite e swiv Kris avek lafwa, zot pou resevwar lavi eternel.—Zan 10:24-28.
13. Ki sa trwa domenn ki nou pou egzamin laverite biblik?
13 Lansanm laverite ki Zezi ek son bann disip enspire in transmet i konstitye vre lafwa Kretyen. Bann ki “aksepte lafwa” i alor kontinyen “swiv laverite.” (Akt 6:7; 3 Zan 3, 4) Alor, ozordi lekel ki pe swiv laverite? Lekel ki pe vreman ansenny tou nasyon laverite? Pandan ki nou abord sa bann kestyon, nou pou konsantre lo bann premye Kretyen e egzamin laverite biblik an rapor avek (1) krwayans, (2) fason adore, ek (3) kondwit personnel.
Laverite ek Krwayans
14, 15. Ki ou pou dir konsernan latitid bann Kretyen premye syek ek Temwen Zeova anver Lekritir?
14 Bann premye Kretyen ti annan en gran lestim pour Parol ekrir Zeova. (Zan 17:17) Son Parol ti zot standar an rapor avek krwayans ek pratik. Clement sorti Alekzandri ki ti viv dan dezyenm ek trwazyenm syek ti dir: “Sa bann ki pe travay dir pour ekselans pa pou arete resers laverite, ziska ki zot in ganny laprev dan Labib pour zot krwayans.”
15 Parey bann premye Kretyen, Temwen Zeova i annan en gran lestim pour Labib. Zot krwar ki “tou Lekritir i enspire par Bondye e i itil pour ansennyen.” (2 Timote 3:16) Alor, annou konsider detrwa krwayans bann premye Kretyen an rapor avek sa ki Temwen Zeova ozordi in aprann parski zot servi Labib konman zot liv letid prensipal.
Laverite konsernan Nanm
16. Kwa ki laverite konsernan nanm?
16 Parski zot ti krwar sa ki Lekritir i dir, bann premye Kretyen ti ansenny laverite konsernan nanm. Zot ti konnen ki “zonm ti vin en nanm vivan” ler Bondye ti kree li. (Zenez 2:7) Deplis, zot ti rekonnet ki nanm imen i mor. (Ezekyel 18:4; Zak 5:20) Zot ti osi konnen ki ‘bann mor pa konn nanryen ditou.’—Eklezyast 9:5, 10.
17. Ki mannyer ou pou eksplik lespwar pour bann mor?
17 Parkont bann premye disip Zezi ti annan lespwar sir ki bann mor ki dan memwar Bondye pou ganny resisite oubyen reganny lavi. Pol ti klerman eksprim sa krwayans ler i ti deklare: “Mon annan sa menm lesperans dan Bondye . . . ki tou dimoun bon konman move, pour resisite.” (Akt 24:15) Plitar, en swadizan Kretyen apele Minucius Felix ti ekrir: “Lekel ki telman bet oubyen inyoran pour oze dir ki Bondye, ki’n fer zonm, pa kapab refer li?” Parey bann premye Kretyen, Temwen Zeova i aksepte laverite Labib konsernan nanm imen, lanmor, ek rezireksyon. Aprezan annou konsider lidantite Bondye ek Kris.
Laverite ek Trinite
18, 19. Akoz nou kapab dir ki Trinite pa en lansennyman Labib?
18 Bann premye Kretyen pa ti konsider Bondye, Kris, ek lespri sen konman en Trinite. Encyclopædia Britannica i mansyonnen ki: “Sa mo Trinite oubyen sa doktrin pa aparet dan Nouvo Testaman, e ni Zezi ek son bann disip pa ti annan lentansyon pour kontredir Shema [en lapriyer Ebre] ki trouve dan Ansyen Testaman: ‘Ekoute, O Izrael: Senyer nou Bondye i en Senyer’ (Det. 6:4).” Bann Kretyen pa ti ador bann bondye Romen ki ti an trwa personn ni okenn lezot bondye. Zot ti aksepte deklarasyon Zezi ki Zeova tousel ki devret ganny adore. (Matye 4:10) Deplis, zot ti krwar parol Kris ki ti dir: ‘Mon Papa i pli gran ki mwan.’ (Zan 14:28) Ozordi Temwen Zeova i annan menm pwennvi.
19 Bann premye disip Zezi ti klerman fer diferans ant Bondye, Kris, ek lespri sen. Annefe, zot ti batiz bann disip (1) onon Papa, (2) onon Garson, e (3) onon lespri sen, non pa onon en Trinite. Temwen Zeova i ansenny menm laverite biblik e alor fer diferans ant Bondye, son Garson, ek lespri sen.—Matye 28:19.
Laverite ek Batenm
20. Ki konnesans ki bann kandida batenm i bezwen?
20 Zezi ti demann son bann disip pour fer lezot dimoun vin disip par ansenny zot laverite. Pour kalifye pour batize, zot bezwen en konnesans debaz lo Labib. Par egzanp, zot bezwen rekonnet pozisyon ek lotorite Papa ek son Garson, Zezi Kri. (Zan 3:16) Bann kandida batenm i osi bezwen konpran ki lespri sen i pa en dimoun me lafors aktif Bondye.—Zenez 1:2, not anba lo paz.
21, 22. Akoz ou pou dir ki batenm i pour bann krwayan?
21 Bann premye Kretyen ti batiz selman bann dimoun ki ti annan konnesans e ki ti’n repantir e dedye zot lekor san rezerv avek Bondye pour fer son lavolonte. Bann Zwif ek Zwif konverti ki ti rasanble an Zerizalenm zour Lapannkot 33 N.L. ti deza annan en konnesans lo Lekritir Ebre. Ler zot ti antann zapot Pyer koz lo Zezi konman Mesi, apepre 3,000 zot “ti krwar dan sa mesaz e ti aksepte pour ganny batize.”—Akt 2:41; 3:19–4:4; 10:34-38.
22 Batenm Kretyen i pour bann krwayan. Bann dimoun an Samari ti aksepte laverite, e “kan zot ti tann Filip, zot ti krwar bonn nouvel lo Rwayonm Bondye ek Zezi-Kri ki i ti anonse, e en kantite zonm ek fanm ti ganny batize.” (Akt 8:12) Konman en dimoun devoue ki ti’n konverti konman Zwif, sa zofisye Etyopyen ti deza annan konnesans lo Zeova, alor i ti aksepte deklarasyon Filip konsernan lakonplisman profesi Mesi e apre i ti batize. (Akt 8:34-36) Plitar, Pyer ti dir Korney ek lezot non Zwif ki “tou dimoun ki annan respe pour [Bondye] e ki fer sa ki byen Bondye i kontan li” e ki tou dimoun ki met lafwa dan Zezi Kri i ganny pardonnen son bann pese. (Akt 10:35, 43; 11:18) Tousala i an armoni avek komann Zezi pour ‘fer disip, ansenny zot pour obei tou sa ki in konmande.’ (Matye 28:19, 20; Akt 1:8) Temwen Zeova i mentenir sa menm standar, zot aksepte pour batiz selman sa bann ki annan en konnesans debaz lo Labib e ki’n fer en dedikasyon avek Bondye.
23, 24. Konman ki bann Kretyen i merit ganny batize?
23 Ler zot ganny batize, bann krwayan i merit ganny plonze antyerman anba delo. Apre ki Zezi ti’n ganny batize dan Larivyer Zourden, i ti “sorti dan delo.” (Mark 1:10) Sa zofisye Etyopyen ti ganny batize dan “en landrwa kot ti annan delo.” Li ek Filip “ti desann tou lede dan delo” e apre “sorti dan delo.” (Akt 8:36-40) Lefe ki Labib i asosye batenm avek ganny antere dan en sans senbolik, sa osi i endik ganny plonze konpletman dan delo.—Romen 6:4-6; Kolosyen 2:12.
24 Oxford Companion to the Bible i dir: “Lafason ki batenm i ganny dekrir dan Nouvo Testaman i endike ki sa dimoun ki ti pe ganny batize ti ganny plonze anba delo.” Dapre en travay Franse, Larousse du XXe Siècle (Paris 1928), “bann premye Kretyen ti pran batenm par ganny plonze partou kot zot ti kapab vwar delo.” E liv After Jesus—The Triumph of Christianity i note: “Dan son fason pli senp, [batenm] i egzize ki sa kandida i fer en deklarasyon lafwa, swivi par ganny plonze dan delo onon Zezi.”
25. Ki pou ganny diskite dan lartik swivan?
25 Sa bann pwen ki nou’n vwar konsernan bann pratik ek krwayans bann premye Kretyen i senpleman bann legzanp. I posib pour prezant lezot similarite ant zot krwayans ek sa bann pour Temwen Zeova. Dan lartik swivan, nou pou diskit lezot fason pour idantifye sa bann ki pe ansenny dimoun laverite.
Konman ou pou reponn?
• Ki kalite ladorasyon ki Bondye i ekspekte?
• Konman ki laverite ti vin en realite atraver Zezi Kri?
• Kwa ki laverite konsernan nanm ek lanmor?
• Konman ki batenm Kretyen i ganny fer, e kwa ki ekspekte avek bann kandida batenm?
[Study Questions]
[Portre lo paz 14]
Zezi ti dir avek Pilat: “Mon’n vin dan lemonn pour servi temwen pour laverite”
[Portre lo paz 15]
Eski ou kapab eksplike akoz Zezi ti dir: ‘Mwanmenm laverite’?
[Portre lo paz 16]
Kwa ki laverite konsernan batenm Kretyen?