Eski Siperstisyon i kontrol ou Lavi?

SIPERSTISYON i egziste partou dan lemonn. Parfwa siperstisyon i ganny bokou apresye konman en par leritaz kiltirel. Oubyen zot kapab ganny konsidere konman en senp kiryozite, ki fer lavi pli eksitan. Dan bann pei Oksidantal, siperstisyon pa ganny konsidere konman en keksoz serye. Dan lezot landrwa—par egzanp, Lafrik—siperstisyon i kapab afekte seryezman lavi en dimoun.

Lamazorite kiltir Afriken i baze lo siperstisyon. Sinema, progranm radyo, ek piblikasyon ki ganny prodwir Lafrik, i souvan met lanfaz lo siperstisyon ek bann topik misterye tel parey mazik, ladorasyon zanset, ek bann gardkor. Akoz dimoun i sitan ganny enfliyanse par siperstisyon? E kote siperstisyon i sorti?

Kwa ki par deryer Siperstisyon?

Lakoz prensipal par deryer bokou siperstisyon i lafreyer bann nanm. Bann levennman i ganny enterprete konmsi sa nanm pe esey kontakte bann dimoun vivan avek en menas, en lavertisman, oubyen en rekonpans.

Siperstisyon i osi ganny asosye avek gerizon ek lamedsin. Pour laplipar dimoun dan bann pei ki pe devlope, lamedsin modern i tre ser e souvan difisil pour gannyen. Pour sa rezon ki bokou i rod gerizon oubyen esey pran bann mezir prevansyon atraver koutim zot zanset, grigri ek siperstisyon. Zot osi santi zot pli alez avek en bonnonm dibwa ki konn zot koutim e koz zot langaz ki avek en dokter. Alor bann krwayans siperstisye i kontinyen fleri.

Bann tradisyon siperstisye i krwar ki maladi ek aksidan i pa bann keksoz ki zis arive par sans, me se lafors bann nanm ki’n fer sa bann levennman arive. Bann bonnonm dibwa i kapab dir ki en zanset ki’n mor pa kontan avek serten keksoz. Oubyen zot kapab sizere ki en dimoun in zet en sor lo sa viktim par mwayen en lot bonnonm dibwa, e sa i rezon akoz sa maladi oubyen aksidan in arive.

Siperstisyon i varye en kantite atraver lemonn e lafason ki zot propaze i depan lo tradisyon lokal, lezann ek sirkonstans. Me i toultan annan sa krwayans ki en dimoun, oubyen en keksoz, dan lemonn lespri envizib i bezwen ganny kalme.

Eski Siperstisyon i danzere?

Pour laplipar fanmiy, nesans de piti ansanm i en levennman eksepsyonnel e eksitan. Me pour dimoun siperstisye, i kapab ganny enterprete konman en siny. Dan serten pei Was Lafrik, bokou i vwar sa konman nesans bann bondye, e sa de piti ansanm i ganny adore. Zot fer bann pti stati sa de zimo,  e sa fanmiy i bezwen ofer manze avek sa bann stati, menm si enn sa zimo i mor. Dan lezot landrwa, dimoun i vwar nesans de piti ansanm konman en malediksyon, ki serten paran pou menm touy omwen enn parmi. Akoz? Zot krwar ki si tou le de zimo i sirviv, en zour zot pou touy zot paran.

Bann legzanp parey i montre ki kantmenm serten siperstisyon i kapab eksit kiryozite e paret danzere, lezot i kapab met lavi an danze—menm kout lavi en dimoun. Atraver en move enterpretasyon, en levennman normal i kapab vin en keksoz danzere.

Wi, annefe, siperstisyon i en krwayans, en kalite larelizyon. Vi ki siperstisyon i kapab danzere, i apropriye pour demande: Lekel ki vreman pe benefisye par bann krwayans ek aksyon siperstisye?

Sours Siperstisyon

Menm si i annan sifizaman levidans ki Satan i egziste, ozordi serten dimoun i tant pour rezet legzistans Satan oubyen move lespri. Sepandan, dan letan lager, refize pour rekonnet legzistans en lennmi danzere i zis anmenn maler. Sa i leka osi dan en konfli avek bann lespri ki pli for ki imen akoz zapot Pol ti ekrir: “Nou pa pe lit kont dimoun, me kont bann pouvwar move lespri dan ler, bann lotorite, ek pouvwar dan lemonn teneb.” (Nou ki’n met an italik.)—Efezyen 6:12.

Kantmenm nou pa kapab vwar zot, bann move lespri i egziste. Labib i rakonte ki en lespri envizib ti servi en serpan pour koz avek sa premye fanm, Ev, e fer li rebel kont Bondye. (Zenez 3:1-5) Labib i idantifye sa lespri konman “serpan lantikite, ki apel dyab ou satan, e ki tronp lemonn antye.” (Revelasyon 12:9) Satan ti reisi ensit lezot lanz pour rebele. (Zid 6) Sa bann move lanz ti vin bann demon, setadir lennmi Bondye.

Zezi ti retir demon dan dimoun, e son bann disip osi ti fer parey. (Mark 1:34; Akt 16:18) Sa bann lespri i pa bann zanset ki’n mor, akoz bann mor “pa konn nanryen  ditou.” (Eklezyast 9:5) Okontrer, zot bann lanz rebel ki ti ganny tronpe par Satan. Antre an kontakt avek zot oubyen soumet avek zot lenfliyans i en keksoz ki tre serye, akoz parey zot dirizan, Satan Dyab, zot pou kontan pour devor nou. (1 Pyer 5:8) Zot lobzektif se pour detourn nou avek sa sel lespwar pour limanite—Rwayonm Bondye.

Labib i revel enn bann metod ki Satan ek son bann demon i servi: “Satan limenm i degiz konman lanz lalimyer.” (2 Korentyen 11:14) Satan pou kontan anbet nou pour ki nou krwar ki li i kapab ofer nou en pli bon fason viv. Pour sa rezon, i kapab sanble annan serten benefis tanporer par lentervansyon bann move lespri. Me zot pa kapab ofer okenn solisyon permanan. (2 Pyer 2:4) Zot pa kapab donn lavi eternel okenn dimoun e tre byento zot pou ganny detri. (Romen 16:20) Nou Kreater i sa sel sours lavi eternel ek vre boner e pli bon proteksyon kont bann lafors mesan.—Zak 4:7.

Bondye i kondann rod led avek grigri. (Deterononm 18:10-12; 2 Lerwa 21:6) Sa i pou konmsi ou pe asosye avek lennmi, pe form en linyon avek bann ki trai Bondye! Si ou konsilte en oroskop, oubyen en bonnonm dibwa, oubyen enplike lezerman dan okenn pratik siperstisye, savedir ou pe permet bann move lespri kontrol desizyon ki ou fer dan ou lavi. I konmsi ou pe partisip avek zot dan zot rebelyon kont Bondye.

Proteksyon kont Mesanste—Eski i posib?

Ade, * en zonm ki reste Nizer, ti pe etidye Labib avek en proklanmater aplentan Temwen Zeova. Ade ti eksplike akoz i ti annan en gardkor dan son laboutik: “I annan bokou lennmi.” Atraver son letid Labib, sa Temwen ti montre Ade ki se selman Zeova ki kapab ofer vre proteksyon. I ti lir Psonm 34:7 avek Ade, ki dir: “Lanz Zeova pe kanp tou otour bann ki annan lakrent pour li, e i sov zot.” Ade ti konklir: “Si Zeova i kapab vreman protez mwan, alor mon pour retir sa lobze.” Apre bokou lannen, ozordi, i pe servi konman en  ansyen e en minister aplentan. Napa enn son bann lennmi ki’n fer li ditor.

Labib i endike ki letan ek levennman san ekspekte i ariv lo nou tou, ki swa nou siperstisye oubyen non. (Eklezyast 9:11) Me Zeova pa zanmen teste nou avek bann move keksoz. (Zak 1:13) Lanmor ek lenperfeksyon i arive akoz pese ki nou’n erite avek Adan. (Romen 5:12) Pour sa rezon, tou dimoun i tonm malad detanzaot e zot osi fer bann fot ki kapab anmenn bann move konsekans. Alor, i pou mal pour dir ki tou maladi oubyen problenm i ganny koze par bann move lespri. En tel krwayans pou senpleman tant nou pour esey kalme bann lespri dan en serten fason. * Ler nou malad, nou devret rod tretman medikal apropriye, pa konsey avek en “manter e papa tou mansonz,” Satan Dyab. (Zan 8:44) Statistik i montre ki bann dimoun ki viv dan bann pei kot siperstisyon i komen pa viv pli lontan oubyen en pli bon lavi ki dimoun dan lezot pei. I kler, alor, ki siperstisyon napa okenn lavantaz pour nou lasante.

Bondye i pli for ki okenn move lespri, e I enterese dan nou byennet. “Lizye Senyer i fikse lo bann zis, e son zorey i ouver pour ekout zot lapriyer.” (1 Pyer 3:12) Priy li pour ganny proteksyon ek lasazes. (Proverb 15:29; 18:10) Fer en zefor pour konpran son Parol Sen, Labib. Konnesans egzakt lo Labib i pli bon proteksyon ki nou kapab gannyen. I pou ed nou rekonnet akoz bann move keksoz i arive e konman pour ganny faver Bondye Tou Pwisan.

Benefis Konnesans Bondye

Konnesans egzakt lo Zeova ek son plan se sa ki lakle pour ganny vre proteksyon, non pa linyorans ek siperstisyon. Sa i ganny demontre dan ka Jean, en zonm ki reste Benen. Siperstisyon ti byen anrasinen dan fanmiy Jean. Dapre koutim siperstisye dan tribi Jean, en madanm ki’n fek donn nesans en garson i bezwen reste dan en payot spesyal pour nef zour. Si i donn nesans en fiy, i pou reste dan sa payot pour set zour.

An 1975, madanm Jean ti donn nesans en zoli pti garson, ki zot ti apel Marc. Baze lo zot konnesans lo Labib, Jean ek son madanm pa ti anvi enplike avek bann move lespri. Me eski zot ti pou les lafreyer ek presyon domin zot pour swiv sa siperstisyon e fer sa manman reste dan sa payot? Non—zot ti rezet sa siperstisyon.—Romen 6:16; 2 Korentyen 6:14, 15.

Eski ti annan okenn maler ki ti ariv avek fanmiy Jean? Bokou lannen in pase, e Marc i aprezan pe servi konman en asistan ministeryel dan son kongregasyon Temwen Zeova. Sa fanmiy antye i zwaye ki zot pa ti les siperstisyon enfliyans zot lavi e met an danze zot byennet spirityel.—1 Korentyen 10:21, 22.

Bann vre Kretyen i devret rezet bann pratik siperstisyon dan zot lavi e aksepte lalimyer spirityel ki Kreater, Zeova, ek son Garson, Zezi Kri i ofer. Zot kapab alor rezwir vre lape lespri vi ki zot konnen ki zot pe fer sa ki byen dan lizye Bondye.—Zan 8:32.

[Not anba lo paz]

[Bwat lo paz 5]

Serten Siperstisyon ki komen atraver Lemonn

• Si sa de baget ki Sinwan i manz avek i debout dan en bol diri i endik lanmor

• Si ou vwar en ibou dan soley i anmenn mofin

• En labouzi ki tennyen pandan en seremoni i endike ki bann move lespri i dan zanmirant

• Larg en parasol ater lo lestik i endike ki pou annan en mert dan lakaz

• Poz en sapo lo lili i anmenn mofin

• Son laklos i repous bann demon

• Si premye kou ki ou soufle labouzi lo en gato lanniverser tou i tennyen, ou swe pou vin vre

• En balye apiye avek en lili i permet bann move lespri dan sa balye pour zet en sor lo sa lili

• En sat nwanr ki koup semen devan ou i anmenn mofin

• Si en fourset i tonm ater, en zonm pe vin rann vizit

• En portre lelefan ki vir anfas avek en laport i anmenn lasans

• En soulye seval parlao laport lakaz i anmenn lasans

• Si sa plant ki apel lyer i fil lo lakaz, i donn proteksyon kont demon

• Pas anba en leskalye i anmenn mofin

• Kas en laglas i endik set lannen maler

• Si dipwav i tonbe avek ou i endike ki ou pou ganny en largiman avek ou bon zanmi

• Si disel i tonbe avek ou i anmenn mofin amwen ki en pense disel i ganny anvoye parlao ou zepol gos

• Les en sez balanse kontinyen balanse ler i vid, i envit bann demon pour asiz ladan

• Les en soulye latet anba i anmenn mofin

• Kan en dimoun i mor, ou bezwen les lafnet ouver pour sa nanm ale

[Bwat lo paz 4]

Libere anba Lenfliyans Siperstisyon

Bann Temwen Zeova ti pe prese dan en landrwa Sidafrik. Ler en laport ti ouver apre ki zot ti’n tape, sa bann temwen ti vwar zot fas a fas avek en madanm ki ti’n abiy li konman en Sangoma (bonnonm dibwa.) Zot ti anvi ale, me sa madanm ti ensiste ki zot prezant zot mesaz. Enn sa bann temwen ti lir Deterononm 18:10-12 pour montre li pwennvi Bondye lo bann pratik grigri. Sa bonnfanm dibwa ti aksepte sa mesaz e dakor pour etidye Labib. I ti dir ki si i konvenki atraver son letid Labib ki travay konman en Sangoma ti kont lavolonte Zeova, i pou arete.

Apre ki i ti’n fini etidye sapit 10 dan liv Vous pouvez vivre éternellement sur une terre qui deviendra un paradis ansanm avek Labib, i ti bril tou son bann keksoz ki annan pour fer avek grigri e i ti konmans asiste bann renyon dan Lasal Rwayonm. Deplis, i ti legaliz son relasyon maryaz, menm si i ti’n separe avek son mari pour 17 an. Konmela, zot tou le de zot Temwen Zeova.

[Portre lo paz 4]

En “Sangoma” i anvoy lezo pour devin lakoz problenm en pasyan

[Portre lo paz 6]

Konnesans egzakt Bondye i anmenn vre proteksyon ek boner